Ratapan 3 - Eipomek

Allah arye bico tenesulula ati, tia talak ati, wenesulul bukni, aminyan talak ara, el nyalin yupu deice nyasilye ning nirya ara, dipkoprob arepnamsila ati, nyabik yupu

¹ Na Yeremia bira, weik kanye ikin ning dopromsirye, akunum kel bikamsinye, Allah el yu ubukura, wenen ning na deice ikin ning areamnukba, dololamse.

² Winipmanto ara, nara Allah arye, dirina babye pia kumak, kunuknakuk uamuk noutam yakuka dolkwetena ati, bobuka bin deiamnuke.

³ Allah elce, nara asum-asum nirya, bico tenena kum arye, tuba el taruk arye, pia onauk ulamnukce, el ning dengna arelamnuke.

⁴ Ikin ning weik arelamuka deice arye, na nong deice ara, Allah elce onauk ulamnukba, suse dilauk upnukce, na nong tup ap, na nong bola ap, mitang kipnukce, nong bol kum kipnin banulule. Atalak nirya ara, na nong bola malyeuk unulule. Tonda, na yoka nirya belebuka tiknukce, na nong bola tumaknuke.

⁵ Allah elce na deice ara, kanye ikin un ning ap, uk din ning ap, pia ikin ning ap uk, na nong deice dobuka deiamnuk deice arye, ikin kanye weik bonune.

⁶ Nara, Allah elce dobuka kunukna noutam binuka deiamnuke. Winipmanto ara, min talak arye diamne nang atonun kipdeiamnuke.

⁷ Allah elce, nara pia kat ikin tapu arye, ninye tapu dobuka delilamak atonun, kiyamnuke. Winyamnukba, na bisik bana babye, kum balamse. Nara kum lyepdanmanto ulamsirye, pia telebak kum binmanto ulamse.

⁸ Narye Allah ati, “Melibuka lyepnilyame,” nyabuka, ngalukulamsirye morolamse bukni, elce na yupu kum kekepmanto ulamnuke.

⁹ Elce, ‘Na binun,’ tenepne bisik nirya ara, weik cang keil poka dobuka tirikdogobuka balamak atonun ulamnuke. Tonda, na dipkoprob bisik balamse ning nirya ara, kwalipdanen ban bisik atonun kibuka deiamnuk ati, yukak kum binmanto unune.

¹⁰ Winipmanto ara, Allah elda, weik yu kus singa atonun, tonda bai mutuku pia yu ning, el si beruang atonun kibuka, kam ning kanye tenena kum aryuk, talye balamikcak, ayu ning kalikmanarye, dungnubuka olamle touk ulamnuke.

¹¹ Elce nati dungnubuka kalikmanarye, dobolbalamniak, nara diksukum bisik bana kum arye, lekuka yuk bisik binak, aminyan dobolbinarye, si tobuka tuku deice deiplopnarye, bola kobuka bataklamaka touk upnuke. Pia aning-aning kum mutuku atonun upnuke.

¹² Winipmanto ara, Allah el yin deice ara, ‘Anye bira, el taram deiceuk mal opnunʼ tenen, mal dobuka deipnarye, na dam kibuka dopneba, amal arye, na nong deice bikilyangalamnuke.

¹³ Pia ikin ning weik, na nong deice delilamnuka ati, winipmanto ara, Allah elce na dam mal dolamnuk ning ara, na nong noutam biknarye, na talima luklamnuk atonun upnuke.

¹⁴ Na tam nang nirya arye, nati akutulamnike. Tonda, tonok sum noutam nirya ara, batakna kum aryuk, sikce na tonok, mot nyana deice arye, nyek-nyek nyabuka nalilamnike.

¹⁵ Allah elce nati, kanye ikin ning weik areamnuk ati, winipmanto, pia piribuka yu ning arebikiba, dilamak touk kibuka arepnukba, ikin weik ulamse. Tonda, mek yu ning arebikceba dilamak atonun, mek arepnukba dipseura, boupnuke.

¹⁶ Imun kanye bobuka ununa ati, winipmanto, Allah elce na asok deice ara, tuku dobuka linuke. Tonda, elce na si ara, keil dobuka copnukba, deiyok kipnuke. Tonda, ninye arye yuk nang oplobikirye, butbuta deice poulbinuka sakikceba, yanilamak atonun upnuke.

¹⁷ Aning-aning nirya ati ara, na aunun talak nirya ara, na kanye tenen ning noutam do, na talima noutam do, kanye teleb ton bobuka kum unune. Teleb uplyeba, pipin kanye bobuka ulamak ning ara, min arye akunum lubakipse.

¹⁸ Aning ati ara, na pia mikip kum upnukce, mitanguk upnuka ati, ‘Tuba teleb kibuka, kam kum unamne,’ tenyamse. Tonda min talak narye Allah ati, ‘Winibuka-winibuka teleb ning ton arepnamnilame. Pia teleb kipdeipnamnilame,’ tenelamse ning nirya ara, akunum kum kipnuka ati, ikin kanyeuk bonune. Aning nirya, tuba kum tenenune. Akunum lubakipse.

¹⁹ Se, narye, na kanye mambul upnilye ning ap, ikin upnilye ning ap, na aik kum upnuk ning ap ati, aning nirya tuba tenenipyeura, nara pia kanye ikin deiceuk unune. Pia ikin weik unulula ati, winipmanto, nara pia yu ulamle ning ara, akunum dilamaka atonun, tonda pia yu nyalamle mek dilamaka atonun, unune.

²⁰ Nara aning nirya tonok, pia tuba-tuba tenenauk unune. Adeice arye, na kanye noutam ara, pia talima uk dinulule. Na talima nirya babye, daksaknuke.

²¹ Dipkoprop pia ikin weik unulul bukni, aunilya babye, ‘Aning-aning ton lubakina kume. Aning ton, pia tenenauk unamne’ tenen, kanye ton upnilyeura tamubuka, ‘Aninguk winipnamnarya, aminyan talak ton ap, teleb upnamnarya,’ tenenune.

²² Nara, ton ap tenenun ning ara ani. Ara, Allah elce tuba nunti pia bico tenesulule. Tonda, Allah elce nunti, “Winipnamsine, anggunce na yupu talibuka upmunyeura, narye anggunti winibuka-winibuka teleb kipdeipnamsine,” nyabuka, nyalin yupu deice arye nyapdeipsuk ning nirya ara, kum bataknamle. Aning nirya dipkoprob nong upnamle. Allah arye, ‘Na tenen nang ati ara, tuba telebuk kipdeipnamsine,ʼ tenesulul ning ara, min kum winipmanto. Aning ara, pia ati aunamle.

²³ Allah arye, ‘Naʼ tenen nang ati ara, tuba telebuk kipdeipnamsine,’ tenesulul ning ara, asum-asum nirya, beren tam talak arye deiyok koubuka, tenena uk usilirye, telebuk kilisulule. Allah elce nunti bico tenesilirye, elce, “Winipnamsine,” nyasulul yupu nirya ara, dipkoprob nong upnamle. Kum bataknamle. Tuba weika arye, teleb kibuka melinamsile.

²⁴ Aning ati ara, na kanye noutam ning ara, utenebuka nyanune, “Allah Yahweh, elda na ni koproba Allah unulula ati, yuk ning ton kum patanulule. ‘Elcuk, pia melinamnilarya,’ tenenuna ati, el deiceuk na kanye talima nirya ara deipnamne,” nyanune.

²⁵ Yata ning do nirya, anggunce, Allah elti, ‘Elcuk melinamsilarya,’ tenebuka, el tonok dip tenebuka, tenenauk unyak nang ara, anggunti teleb kilisulule. Tonda, anggun kanye talima noutam, el tonok enyak nang ati ara, elce pia teleb kililule.

²⁶ Ati ara, teleb una ara, ani. Yata nang do nirya ap, tonda nun nirya babye, duknubuka unyapce, el tonok, ‘Elcuk melinamsileʼ tenen, dinamabe. Winilamepye buk, Allah Yahweh elda, nunti melibuka lyelonamsile.

²⁷ Tonda, teleb ning ara, nun wel tuba unmapye talak ara, ikin ning yanuka upsilya babye, ‘Se yata deiyok ati upmanil do?’ tenena kum bukni, kanye talima teniltona kum aryuk, tunim abuka un ninguk, moubuka bikibirye, unamabe.

²⁸ Winibibirye, Allah Yahweh el kanye aryuk, nunti, kanye ikin ning nun deice deipsilyeba, ikin kanye bobuka unyap talak ara, akunuma, dakuka bukeipyakarye, ‘Se yata deiyok ati do?’ tenen, yupu weika arye nyana kumce, nun yuk tunim abuka unamabe.

²⁹ Ura, nun talima amu tam kibuka unyapce, ikin weik unyap talak ara, winipmanto, nun tuku deice mabibirye, si bam bol ara, butbuta deiceuk deiptibirye, ‘Kume, aminyan talak ara, Allah aryuk yanuka, melibuka lyepdopnamsile,’ tenenauk unamabe. Ara, nunce, ‘Aning nirya ara, Allah aryuk winiptu ati, elcuk melinamsile,’ tenebuka, tenenauk unamabe.

³⁰ Aning atonun, winipmanto, yuk yu nang arye, nun katum dam yanuka bokuka opsikceura, ton tam katum babye moupdeibibiba, bokuka onamsinyake. Tonda, yuk yu nang arye nunti, akutubuka nalipsikce babye, “Dauplye, danaliplulume,” nyabuka, mangkau kinamnyabe.

³¹ Wininamaba deiyok ara, ani. Ara, Allah Yahweh elce nunti, “Sikda daunyake nang, akunum batakmana ati, ton ap pia kum melinamne,’’ nyabuka, kum bataknamle. Elce nunti, pia ati kum bataknamsile.

³² Allah elce, nun dam tiya talak ati, kanye ikin ning aresilyeba, nunda ikin kanye bobuka unamap bukni, elce tenelu touk deipsilyeba, akunum winibibyeura, elcuk nunti tamubuka tenepsilirye, melibuka lyepnamsilarya. Ara, ‘Allah elce nunti, weik arye bico tenesilirye, anggunti winibuka melina teleb kilinamsile,’ tenebuka, nyalin yupu deice arye nyasilye touk, tuba melinamsile. Dipkoprop pia ati, kum bataknamsile. Elda weik arye bico tenesulula ati, tamubuka pia ati bico tenepsilirye, weika arye melinamsilarya.

³³ Winipnamla deiyok ara, ani. Ara, Allah el kanye ara, nun ikin ning dolanauk ubirye, kanye ikin usulul ning ara, ‘Telebe,’ kum tenelule. Bico weik arye tenesulula atia.

³⁴ Winipmanto ara, yu nang arye, tapu koupsikirye, wenena aik dongopsikceba, anyaik pum tam bukeipyakarye, kanye ikin usilyeba, yu nang arye yanipsikceba, kanye bokoltosulul talak babye, Allah Yahweh arye disulule.

³⁵ Tonda, yu nang arye, Allah tenelye ning ara, ‘Dauplyeʼ tenen, el yupu yanibikirye, yuk nang nirya ati, ‘Anggunda dauplye. Anggun patan ning ap, kalikin ning ap, melin ning ap nirya ara, pia kum arenamap,’ tenebikirye, anang nirya, sik nong deice yanibikce talak ara, Allah elda aning-aning nirya talebuka, deice tam ulirye, Pia Mikip Weiknye, ululnye birye, aikin unyak nang nirya elilule.

³⁶ Tonda, nunce malye kum winipmabye bukni, yuk nang arye, tilila yupu nyabikca deice arye, sik yupu lipsisikuka nyanyak deiyok nang kekebikirye, deiyok kum upmalibuk, nunti wenen ning ara, deipsikceura, nun ni Allah Yahweh arye, aning eibuka akunum bikisulule.

³⁷ Allah ara, elce aning-aning nirya talilirye, pia mikip weik deiyoknye ulule. Ati ara, winipmanto, Allah elce, ‘Aning ton winiptue,’ kum tenelam toura, dipkoprob yata ninye aryuk, aning-aning ton ulamtibye do? Kume, Allah arye, ‘Aning winipnamle,’ kum tenelye ning nirya ara, ninye arye dipkoprob kum winiptinge.

³⁸ Deiyok ara, ani. Anggun ton tenipdelulume. Malye ning babye, teleb ning babye, Allah elda aning-aning nirya talelirye, erebuka deice tam ulirye, Mikip Weik Erenanye ululnye bira, elcuk, “Aning ara, winipnule,” nyalisulule.

³⁹ Nun tukwak mutuku nang nirya arye, malye winin ning winibibyeura, Allah arye menenga ning arepsilyeba, ikin weik upsilyeura, yata deiyok ati, nun ninye arye, “Aning ara, kum winipsutue, aning ara malye kum uptue,” nyanyap do? Kume, nun tukwak mutuku ubirye, isin kam tuba ulamap nang nirya ara, “Se, ara yata deiyok ati wenesulul do?” nyabuka, malye kum nyaptibye. Allah elcuk, nun malye un ning winilamebyeba, elce, ‘Wenepnun,’ tenepsilyopura, adiparyuk wenesulule. Nunce yupu ton kum sektibye.

^40-41 Telebe, nun ninye kam unyap talak arye, nunce wininyap ning nirya ati ara, moubuka dipdabirye, ‘Aning ara, teleb do? Aning ara, malyeuk ulul do?’ tenen, bikilanamnyabe. Winibipyopura, nun adiparyuk, nun malye un ning batakibirye, nun ni koproba Allah Yahweh, el ululakuk dilbibyak arye, nun taruk erebiyak arye, nun kanye talima noutam arye, elti, ayupu nyabuka moronamabe.

⁴² “Se, nun ni Allah, nunce an dam malye ubirye, ance nyapsulum yupu ap, an pil ap, talye lubakibuka yanibuka batakanyabe. Wininyap ati, Allah ance, nun malye unyap ning nirya ara, pia kum kipdeipsilyame. Tuba tenenauk ulyame.

⁴³ Nunda ance bobasiminyak arye, nun malye unyap ning wenena ati, obuka batakasilyame. Allah ance nunti, bico tenesilyam nang ara, pia duknuplumce, nun dam ara, an yupu delisilyame.

⁴⁴ Allah an yu ara, winipmanto, nun dam ara, weik dua bum tobuka yalirye, lelilamle touk, winipsiminyeba, nunce anti, “Melipsilyame,” nyabuka, moropkinyap ning ara, an dam pia kum yangalule.

⁴⁵ Allah ance nunti ara, malye kilisilyama deice arye, ninye mutuku-mutuku nirya disenyakak arye, talye bam ning bataklamaka atonun, ubuka batakamsulumba, ninye nirya arye, ‘Se, sikda dipkoprob malye nang, lyun ning atonun unyakeʼ tenen, disinyake.

⁴⁶ Nun dana-dana tam unyak mal olan nang nirya arye nunti, malye nenesinyakce, nalibuka akutusinyake.

⁴⁷ Ati ara, nun dam pia ikin ning yayukce, malyeuk kipdeipsuka deice arye, yupu sidabuka opsukce, kum danaipsukba, ilil usilirye, nun ilil deice aryuk unaba ati, nyasinyake.

⁴⁸ Na asing maka ara, weik mek balamle touk unulule. Ara, na mutuku nang nirya ara, pia obukce, kum danaibuka ati, unulule.

⁴⁹ Nara ton batakna kum aryuk, tuba-tuba pia enganauk unamne.

⁵⁰ Winilamnye bukni, na ni Allah, an im deice uminyak arye, nun ikin weik unyap ning ati, eibuka biknamsilame. Biksiminyopura, na asing maka tunim aptue.

⁵¹ Nun wel kilapu ara, yu nang arye malye kideibika ati, akilapuuk, sik ikin weik unyaka nirya eiplyeura, na talima noutam ara, malye kanye bonirye, na talima pia uk dinulule.

⁵² Nara, malye ton kum upmanyebuk, na mal olan nang arye, tuba ebuka dobonauk uninyake. Winipmanto ara, bai ulamle maka ati, ninye arye, ‘Amaka opnamapʼ tenen, dobolamaka atonun, na on nang babye, atonun uninyake.

⁵³ Na mal olan nang arye, nara tomobuka balamne mek ati lokamik bukni, mek cebukabukce, sisal sepdobuk pum bisik ara, na nong dobuka, kam kipman dopkwetepnik. Dopkwetepnika deice ara, keil arye dobuka opnike.

⁵⁴ Karu mek lokamika pum tam dongopnikba wekse ning ara, mek deibuka welebukce, na kisok deice welepnuke. Winipnukopura, “Nara dipnune,” nyapse.

⁵⁵ Nara dipmanto upse bukni, na ni Allah Yahweh, nara karu mek lokamik ning pum tam wekse talak ara, anti, “Se na nio, ance melipnilyame,” nyabuka, an si deice arye moropkise.

^56-57 Narye Allah anti, pia moropse. “Narye anti moropkise ning ara, an amul kunukulongona kum bukni, ance kekebuka melipnilyame,” nyabuka moropkise. Tonda, narye anti, “Melipnilyame,” nyabuka, morokeseura, kekepnulumce, na dam yanamlume. Winiplumopura, nati, “Anda ilil una bataklyame,” nyapnulume.

⁵⁸ Na ni Allah Yahweh, ance aning-aning nirya talemince, mikip weik deiyoknye ulyama ati, ance na ikin weik ulamse ning ara, lipsisikuka akunum teleb kipdeipnulume. Winipnuluma deice arye, ance na nong ara, akunum lyepropnulume.

^59-60 Na ni Allah Yahweh, na mal olan nang arye malye ning, na dam wininyak ning ara, an akunum elilyame. Ara, sikce nati yu tenenikirye, ‘Anye bira oplonuyapʼ tenen, yupu talinyake. Ati ara, na ni Allah, ance na tam kipropnimince, na deken ning nirya ara, ‘Teleb ulamuk do, kum do?’ tenen, yupu lipsisiknilyame.

⁶¹ Tonda, na olyanganikce nang arye nati, malye nyabuka nalininyak nang ara, Allah Yahweh anda akunum kekeplume. Sikce nati, ‘Anye bira winipnamabe,’ tenenyak ning ara, an akunum biklume.

⁶² Na olyanganikce nang arye na ona ati, asum akunum nirya ara, “Anye bira, nun lik ati, winipnuyabe, winipnuyabe,” nyabuka, malye yupu talininyake. Ara, sikce na ona ati, “Winibibirye opnamabe,” nyabuka, yupu talininyake.

⁶³ Na tonok sum arye yukubuka, yupu talininyak ning ara, beren tam arye dipdongobuka atalipmakca ani inilule. Winikirye, sik bukikce talak babye, tikuka banmace talak, mot nyana yupu deice arye, na tonok nalibuka akutuninyake.

⁶⁴ Ati ara, na ni Allah Yahweh, ance sik anang nirya ara, aunyaka atonun kibuka, sik babye weneplyame. Sikce malye ulamnik touk kibuka, ance sikti, malye kipdeipnamlyame.

⁶⁵ Ance sikti, dokdongopnulyame. Winipminyeba, sikda kanye ikin uplyeba, kanye bokoltona deiceuk unamnyake.

⁶⁶ Im alip deice tam ap, amutuku tukwak tam ap, mutuku noutam unyak nang ara, na ni Allah an yu weik upkilyeba, ance na olyanganikce nang, sik nirya ati eibuka bobimince, anang nirya obuka, pia kum kipdeipnulyame. Im amu tam, tukwak mutuku nirya ara, tonoknye babye kam kum unamnyake.