Ratapan 1 - Eipomek

“Yerusalem unyak ninye ati, ikin ning dobuka, sik nong deice deipniba, engebuka donamake,” nyabuk yupu

¹ Minop talak ulamik mutuku nirya ara, kanye deibuka, kil-kil asa arye teleb ubuka ulamik. Bukni, wini talak unyap Yerusalem mutuku ara, asik ol dem ubuku ati, wini talak ara, langapdongobuka, namin asa arye unyabe. Minop talak ara, mutuku nirya teleb asauk ulamik bukni, wini talak ara, youwak kilapu ulamak touk unyake. Minop dorapce, dib dongobuka, upra yangalamupu nirya ara, pia teleb bukni, wini talak tuba malye updeibik.

² Asum lukunyan nirya ara, nyabuka el bico ubukba, engenmoka ani, el asing maka sakuka, el katum deice bilikuka poul biyukce, el nong deice palilbiyuk. Wininmok talak ara, el kwit capu nang ton pia kume. El kwit capu nang, sik neika ulamik nang nirya ara, batakikirye atalak aryuk tamubuka, el ap mal olan nanguk unamake.

³ Yehuda mutuku talibuka unyak ninye nirya arye, sik mutuku koproba batakanye. Winibuka batakikirye, ‘Malye ubuka unamabe,’ tenebuka unyakce, pia malye piluk talibuka unyake. Sik amutuku unyak nang nirya ap, sik aninye mitang asa arye dopropmanto ning, sik dam ton pia kume. Yata ninye do, ‘Minopce wektinye’ tenen, weklinye bira, elce doproptue. ‘Sik ti opnamabe,’ tenenyak nang arye, warikuka antanap dongoptinga babye, sik aninye nirya arye, malye kanye boptinge.

⁴ Tonda, pia weik sum akunum dam uplye talak ara, ninye tonoknye babye, nun ni Allah, el aik dam kum yangalula atonun, ‘Sik mot nyanamak’ tenen, wipdeibik kam ninye nirya ara, malye kanye bobuka unyake. Tonda, Allah el aik siltong ning dobuka yayukba, uku dongonyak nang, sik imam-imam nang babye, ‘Se’ tenen, unyake. Sion mutuku weik bisik bublan noutamak, tonoknye tikuknye birye, pia bico kum tenepnamsile.

⁵ Sik mal olan nang nirya, akunum winibicopura, akunuma tenebikirye, kwalinyake. Winibuka kekebice kili sal nirya ara, na Allah Yahweh arye, anggun nong deice, ikin pia weik ning deipnamsine. Ara, anggun malye winin ning weik arye winimunya atia. Amutuku noutamak unyak ninye ara, malye diamuk winibuka, yupu yanin nang unyake. Tonda, sik mapu nirya, sik mal olan nang dam bakirye, dobuka donokolbanyake.

⁶ ‘Yerusalem mutuku noutam dorapce, upra yangalamik deiamne ninguk winipnarye, na yuk winipmane,’ nyabuka, kwalipnarye kiklap daklamik. Sikce, ‘Winipnululume,’ nyabuka, nyalamik ninye deiyok nang nirya babye, mitang upnaba ulamik. Winipmanto ara, Rusa basam arye, el din ning patanmaliba malamle touk, ulule. Sik anang ara, ‘Nun kayapu nang mal olan nang arye adobol yanganmasiake,’ kum tenenyake.

⁷ Atalak ikin ning akunum arepliba, sik malye kanye bobicopura, Yerusalem minop dorapce ulamikce, tenelamik ninguk tenenyake. Utenenyakce, sik aninye ara, ‘Bona pia weik taleptibye,’ tenenyake. Ati ara, amutuku unyak ninye nirya, sik mal olan nang, taruk deiceuk dobuka, binamake. Winibikiba, ninye tonoknye birye, ton bico nyabuka, kum lyepdeipnamle. Sik mal olan nang nirya arye, sik sakuka opmaliba dinmakirye, akutunauk unamake.

⁸ Yerusalem mutuku unyak ninye nirya ara, sik nong deice malye updeipnamake. Winibikirye, pia malye una ap, yu kanye bona ap, unyake. Minop talak ulamik ning nirya ara, elti, si erelamikce ulamik touk, winina telebe. Wini talak ara, nong bananguk eipmaba deice arye, ‘Nun like’ tenen, batakanyake. Wininyaka babye, el asok nirya lelipdoplye talak ara, ‘Bico,’ teneplyopura, el talima uk dipliba batakalule.

⁹ Malye winin ning lakak kipliba, bakanyake. Bukni, ninye ton aminyan el nong noutam ap, baju bol deice palipnamle ning ap ara, el pia moubuka kum tenelula deice arye, amuak weklirye, sakalule. Anye elti, ara winilul koproba melibuka, ‘Bico,’ kum teneptinge. Na Allah Yahweh ati ara, ‘Se, anye birye bico nyapnutua’ tenen, moropnutua babye, narye anye biti, kum meliptinye. Aning ara, el ap mal olan nang ara, akunum bisilula ati, narye anye biti, pia kum melipnamne.

¹⁰ Ninye arye, ‘Aning ara, nauk taliptinye,’ tenenyak ning nirya ara, sik mal olan nang arye, nirya dalubuka dolonyake. Winibuka dolonyak ninye ara, sik yuk ninye dinmakibuk, Allah el si eren aik noutamak wekelbanyake. Allah Yahweh arye, el mapu koproba, ubuka una kum nang ati, ‘Pia winibuka kum unamlyame,’ nyapdeibuk.

¹¹ Amutuku noutamak unyak ninye nirya arye, ‘Se, yata din diptibye do?’ tenebikirye, ‘Nun din ning kum dasilyak’ tenen, sik dekna weik ning dobuka, yuk nang ati dekikirye, ayo bok uang deice arye, sik din ning dekelbanyake. Ati, ‘Yata ning wiriptibye do?’ tenekirye, sik talinyak ning noutam arye elamica ani, akunum eibicopura, sik din ning kwaning ap, dekenyake. Winibuka dekice talak ara, ‘Nunda kam pia unamaba anya arye, nunda pia kum dipnamabe,’ tenenyake. Sik Yerusalem mutuku noutamak unyak ninye nirya arye, nyanyake. “Allah Yahweh nun patasulul ning nirya ara, ancuk bikisilyame,” nyanyake.

“Yerusalem mutuku noutamak unyak ninye nirya arye, ‘Se,’ tenenyake,” nyabuk yupu

¹² Se, anggun amutuku bisik noutam balulum ninye ara, pia moubuka dinamlulume. Wini talak ara, winilen ning pia weik arye, na nong deice winipdenukba, dopropse. Awenen ning nirya ara, na ni Allah Yahweh arye, nati dopdeipnuke. Aning ara, Allah el yu weik wenen ning nirya, na dam dobuka arepnuke.

¹³ Anya arepnuk ning nirya ara, uku buk im deice arye, dopkwetebukba sakukce, aning nirya dibuka, sirya dakukce, ninye tenelamak ning nirya kum kipdeibuk. Tonda na sakana ati, kintinip deipnuk ning ara, kapang bisik banak mangkau tapu welamak touk, na bisik banak kintinibuka deipnukce, ‘Aminyan talak ara, abisik noutamak saknamle’ tenen, kalikuka dinauk unulule. Tonda, asum-asum nirya talima uk dilule.

¹⁴ Winilirye, na malye wininye ning nirya, elcuk dobuka, tonok sukum dobuka kintinililule. Tonda, na ngang dam karang lamak ning atonun ubuka delinulule. Wininilirye, awininye ning ikin arye, na nong nirya mitang kilinulule. Wininilirye, na ni Allah Yahweh arye, na yu un ninguk arenulule. Adeice arye, na nong mitang ubuka, sikti, on kanye kum bonune.

¹⁵ Allah Yahweh elce, ‘Yin talina deiyok nang, sik kanye talima erenyak nang ara, amu tam unyak nang uka,’ tenelule. Anang, sik yin talina deiyok nang ara, amu tam nang arepniba, sik anang nirya obuka, sirya daknamake. Winibikirye, amutuku noutam nirya yaniptapnirye, uku sice atonun kiplopnamne. Winipmanto ara, anggur tapu wa wiamlinye birye, wisipliba liplirye, teiklamica ning pum bisik dongobuka, teikuka purulamak touk upnamle.

¹⁶ Aning ati ara, na asing maka sakanulule. Ara, ninye yuk nang ton, teleb ubuka delina ap, teleb ubuka si erena ap, uninyaka ati, ‘Bico’ tenen, na asing maka sakanulule. Na mutuku koproba nirya ara, aning-aning nirya kum kipdeipniba, kum danamle. Ara, amutuku nirya, sik yu nanguk langdipnamake.

¹⁷ Na taruk erepnirye, na patan ning ati moropnamne. Bukni, nati bico tenebuka melina ara, pia kum arepnamsile. Ara, nun deiyok kibuka unyap nang nirya atia. Allah Yahweh, elce olana ati, dopkwetepnamsile. Winipsiliba, na dam yakirye, olyanamsiake. Winibikiba, narye sikti, winipnamne ning ara, din ning bama dolkwetelamak atonun kibuka, deipnirye bona ning dobuka, uku sice kilamak touk, sik dam arye winipnamne.

¹⁸ Bukni, Allah Yahweh elda, dib kopropnye birye, yupu nyapdeiamuk ning ara, na akunum yaniptapse. Ati, na nyanamne yupu ara, anggunce moubuka kekenamnulume. Ara ani. Se, mutuku-mutuku nirya ululum ninyo, bita dipdenululume. Nara, pia ikin weik ning, na nong deice upnile. Ati, na mapu wel nang ap, wel kilapu ap nirya ara, anggun mal olan nang dam bimunce, olalbinululume.

¹⁹ Narye na kayapu koproba, nun neika unyap ninye ati, yukupniba, yanamak bukni, sikce na ati, ‘Nun like,’ nyabuka bataknamniake. Tonda, Allah el aik pil talibuka donyak nang, imam-imam nang ap, amutuku noutamak ninye deiyok kibuka, talibikce unyak nang nirya ap ara, amutuku bisik noutamakuk dipnamake. Winibikirye, tamubuka sik kam tuba unyak ati, din dina kumce, si tebuka, nati pia enamake.

²⁰ Allah Yahweh, elcuk na ati, pia moubuka kalikuka dinulule. Wininilirye, na nong noutamak nirya ara, bol teleb unulule. Tonda, na talima noutam ara, kanye nirya obinapna, ayanapna kibuka, na duk-duk noutamak welebinapna, kouluka yanapna kinulule. Ati nara, akunuma ninye ona atonun unune. Wininirye, ninye dibikirye, balamak aik dam atonun unune.

²¹ Yuk daunyak nang arye, “Anye bira, imun kanye bobuka ulirye, engena dem ulule. Tonda, el melin nang ap, el kanye barin nang ap ara, pia kum unyake. “El yuk ulule,” nyabuka, lak nyabikba nati, ‘Nun like,’ teneninyak nang kekebikce, ‘E merekuka ikin weik ulule. Nunda kanye deibuka, unyabe,’ tenebikirye, pin-pin asa ulamike. Ati, na ni Allah ance onlyangasin nang ara, “Aminyan talak ara, narye ikin weik ning dobuka, anggun deice deipniba, imun kanye bon ning unamsile,” nyabuka, nyalin yupu deice akunum nyaplum ning ara, akunuma. Ati ara, adiparyuk ikin ning dobuka, nun mal olan nang ati, sik deice deipnulyame na nio! Winipminyopura, imun kanye bobuka, unamake.

²² Winipnalama deice arye, na mal olan nang arye, malye-malye weik unyak ning nirya ara, ance moubuka dinmamince, sikti weik wenepnalame. Ara, narye an yupu yanipsirye, malye ulamsiba, ance nati wenepnuluma atonun, ‘Ance na mal olan nang babye, weik tonun wenepnalamʼ tenen, moropkine. Na nio, aning ara, talye ati kum moropkine. Deiyok ara, ikin weik unulula ati, talima pum tamuk dinilyeba, engena ap, malye nyana ap, weik ununa ati, aning moropkine, na nio!