Rasul 9 - Eipomek

Saulus el malye ulamuk ning ara, batakuka, diba tenebuk yupu

¹ Anirya winilamuk talak noutam ara, Saulus arye, “Se, ‘Yesus el ulya atonun uptibye’ tenen, piribuka kel kinyak nang nirya ara, Yesus ati dib tenenyak nang nirya ara, na opnamne,” pia tuba-tuba nyalamuk. Ati, Saulus arye sik Israel nang Allah arena ati pil dolamik ning sik deiyoknye dam surat dolona ati morolbiyuk.

² “Ance ‘Ur ninye tongolbilyame,’ nyapnutumce, ninye tongon surat weik arye sekdeipnutumopura, asurat deice arye dobuka, Damsyik mutuku noutamak Yahudi yala nang Allah yupu peterena aik betinirye, Yesus el yupu dib tenebuka, Yesus bisik dobolbanyak nang nirya ara, tapu koptinirye, Yerusalem mutuku wenena aik dongoptinye. Ara, sal babye, kilapu babye nirya, Yerusalem mutuku wenena aik dongoptinye,” Saulus arye anye dam biyuk akarye morobuk.

³ Moropdeyukbuk, anye birye, “Telebe,” nyabuka asurat sekuka aribukura, Saulus arye asurat bobuka, ‘Damsyik mutuku binun’ tenen, panabuka banmok. Banmoka ani, bisik noutamak Damsyik mutuku asik dam bayukba, im deice arye Allah dirina mikip arye Saulus dam minop dopkwetebukba, el nong dana-dana nirya mili dakukura, Saulus tuku deice pubukce lalakuk.

⁴ Saulus tuku deice puplobuka lalakmok bukni, ninye yupu atonun arye “Saulus Sauluso. Yata ati ikin ning na nong deice deilinilyam do?” nyabukura, kekebuk.

⁵ Kekebukce Saulus arye nyabuk. “Naio, an yatanye birye nyapnilam do?” nyabuka asipdeyuk. Asipdeyukura, Yesus im deice arye, ninye yupu atonun arye ayupu ton nyabuk. “Ance ikin ning nati deliniminya ara, Yesus natia,” nyabuk.

⁶ Nyabukce ayupu ton nyabuk. “Tiklyame. Tikmince Damsyik mutuku asik dam noutamak biminyeura, an wininamlam ning nyapkiceura, kekepnamlyame,” Yesus arye Saulus ati nyabuk.

⁷ Nyabukura, Saulus el ap neika sik nirya yanganmek nang ara, anyapmok yupu sik kekebik bukni, sik ninye nong kum eipmeka ati, lukdayikce pia tunim abuka tikmek.

⁸ Tikmeka ani, Saulus tikukce asing ara, labuk, bukni, aning-aning nirya kum eipmanto kibuk. Kum eipmanto kibuka ati, el ap, neika yanganmek nang, sik anang arye el taruk talibuka Damsyik mutuku asik dam bobiyik.

⁹ Bobiyikura, Saulus elda like winilye sum asing gunanye atonun unmokce, atalak nirya din ap, mek ap, kum dinmok.

¹⁰ Ara, Damsyik mutuku noutamak tonoknye el si ara, Ananias, Yesus ati dib tenebuk akarye, Yesus el winilamuk ning nirya dobukabukce, piribuka kel kiyamuk. Ananias tuba bukmok bukni, nun ni Yesus lengdar deice atonun arye Ananias ati yanuka nyabuk. “Ananiaso,” nyabuk ura. Ananias kekebukce, ‘Kekepnun’ tenen, tamubuka, “Wo naio,” nyabuk.

¹¹ Nyabukura, nun ni Yesus arye nyabuk. “Sik bisik si ara, Pung Bisik ak si sisibuka nyalulum bisik ara, abisik dam Yudas dobuk aik dam biminyak arye, Tarsus mutukunye, el si ara, Saulus ati, ‘Saulus yalyame,’ nyalbinulyame. Wini talak ara, Saulus arye na moronmanile.

¹² Ura, lengdar atonun deice arye, el dinmok anyak tonoknye el si ara, Ananias yanmok akarye taruk talipmokura, ‘Asing lapdeipnunil’ tenen, eipmoe. Aning ara, Ananias ance min kum winipmalam bukni, aning winipnamalam ati nyapkine,” nyabuk.

¹³ Yesus arye nyabukura, Ananias arye tamubuka nyabuk. “Anti dib tenelamkik nang Yerusalem mutuku unyak nang ati, anye birye ikin ning weik deililamuk. Tonda, el winilamuk ning nirya sikce nyabikura, kekepse.

¹⁴ Tonda, min talak ara, Allah arena deiyok nang arye yupu nyabikura, anye birye an si sisibuka morokinyak nang nirya ara, ‘Wenena aik dongopnamne’ tenen, amutuku yayuk,” nyabuk.

¹⁵ Ananias arye ayupu nirya nyabuk bukni, nun deiyoknye Yesus arye tamubuka nyabuk. “Kume. An bilyame. Anye bira narye wipdeipse. Ati, na si dobuka, yuk-yuk mutuku ninye, Yahudi yala kum ninye ap, sik deiyok nang ap, ton Israel ninye ap ati, peterelbinamla deice arye, ‘Na pil donamle’ tenen, narye anyup wipdeipse.

¹⁶ Na si dobuka peterelbilibuk, aminyan ara, sikce na si ati yu uplyaura, kanye imun ning arepnamaka ati, narye benepnamne. El yuk kel biknamlarye,” nyabuk.

¹⁷ Yesus arye nyabukura, Ananias kekebuk akarye, Saulus el aik ulamukak binuka wekuk. Anyaik wekukura, el taruk tatang Saulus nong deice deibuk akarye nyabuk. “Na weit Sauluso, amutuku yanamluma ati, bisik yanganmumak panalyayuknye bira, nun ni kopropa Yesus. Elce, ‘Nara, an asing lapdeipnamkil’ tenen, tonda, Allah El Dib Kanye dopkweteplibuk, ‘Kanye pum tam wekilirye, langdipnamkil’ tenen, dopdeipmanile,” nyabuk.

¹⁸ Ananias arye ayupu nyabuka tunim abuk bukni, adiparyuk mekin bal kal-kal bola atonun ning, Saulus el asing duk deice arye sakukura, Saulus el asing teleb kibukura, aning-aning nirya laka eibuk. Eibuk akarye bukukura, Ananias arye Saulus mek dongobuk.

¹⁹ Mek dongobukura, min ara Saulus mikip kum mitang upmok bukni, din dibukura, mikip ubuk. Mikip akunum ubukura, lik ton winilye to dumbarye to noutamak ara, Saulus ap, sik Damsyik mutuku dib tenelamik ninye ap neika ulamik.

Saulus arye Damsyik mutuku ap, Yerusalem mutuku ap, noutamak winilamuk ning ati nyabuk yupu

²⁰ Saulus el mek dongobuk talakuk deiyok koubuka, sik Israel ninye Allah yupu keken aik nirya yuk-yuk wekra balamuk akarye, “Yesus elda Allah mi dipkoprop ulule,” nyabuka peterepda balamuk.

²¹ Peterelamukura, sik kekelamik nang arye lukdayik akarye asipdeyik. “Yerusalem unyak nang ara, Yesus si sisibuka morolamik nang ati, ikin ning deililamuknye bira anye do? Anye bira yuknye do? Tonda, Yesus dib tenenyak nang tapu koubuka, Allah arena deiyok nang unyakak bobalinye bira, anye do? Yuknye do?” nyabuka yupu talipdayik.

²² Bukni, Saulus mikip weik tonap kibukura, “Na kayapu, ‘Ninye nirya lyeplirye, talipnamle’ tenen, Allah arye wibuka deiamuknye bira, ara, Yesus el uka,” nyabuka peterenmok. Tonda, ‘Dipkoprop tenepnamak’ tenen, ilil kum mikip arye, “Deiyok ara, anye, anye,” nyabuka peterenmokura, Damsyik mutuku ulamik Israel nang, el yupu kekebikak arye, el yupu bisina ati, ‘Yata yupu tamubuka nyaptibye do?’ tenebikce, sik kanye walwal kibukura, teniplobik.

²³ Ara, asum-asum nirya weik ulamika akarye, el pia peterelamuk. Anoutam ara, yuk Yahudi deiyok nang arye, ‘Saulus opnamabe,’ tenebikura, yupu talilamik.

²⁴ Yupu talilamik bukni, yuk nang arye nyabikura, Saulus arye sik talilamik yupu kekebuk. Sik anang arye, ‘Saulus opnamabe’ tenen, keting noutam babye, lukunyan babye nirya, sik asik domikak kup-kup tam wiyamik keil poka bisik buplan dam, tonok potokiamikak bukuka, ‘Anyup ara, tomopnamap’ tenen, kaliklamik.

²⁵ Kaliklamik bukni, Saulus el yupu kekelamik nang arye, tonok lukunyan noutamak arye, tapu wibuka, aling atonun koubuka dolamik ning el si keranjang arye, Saulus el nong lipdongobikura, tapu kirikdongobuka, cang keil poka pum uamukak arye buru tam deipdongobuka, nimalye dopkwetebuka, batakdongopnin yanganmeka ani, tukwak dopkwetebik.

²⁶ Saulus tukwak dopkwetebikura, Yerusalem mutuku biyuk. Biyukura, Yesus dib tenelamik nang ati utenebuk. ‘E, na ap, Yesus ap, dib tenebikce, Yesus winilamuk ning piribuka kel kinyak nang ap, na ap anang ap neika dukdongobuka unamabe,’ tenebukce winipdeyuk. Winipdeyuk bukni, sik anang ‘Anye bira Yesus ati, ‘Dip tenepnirye el winilamuk ning winiptinye’ tenen, piribuka kel kilulnye, dipkoprop kume,’ tenebik ati, Saulus ati ilil ubuk.

²⁷ Ilil ubuk bukni, Barnabas arye Yesus elce wibuka deibuk nang, 11 Rasul nang ara, Saulus dobuka sik dam bobiyuk. Bobiyuk akarye, Saulus winipmok ning ara, laka lebuk. Saulus el Damsyik mutuku yangana ati bisik noutamak yangalamuk talak ara, Yesus eibuk yupu ap, tonda, Yesus arye Saulus ati nyabuk yupu ap, tonda, Saulus arye Damsyik mutuku noutamak Yesus si deice ilil kum asa mikip arye peterebuk yupu ap, anirya ara, Barnabas arye anang ati laka nyabuk.

²⁸ Anirya laka nyabuka ati, Saulus ap, sik anang ap neika ulamikce, Saulus arye Yerusalem mutuku noutamak talya parapkabuka balamukce, Yesus si deice ilil kum asa mikip deice aryuk Allah yupu peterepra balamuk.

²⁹ Peterepnin balamokce, Yunani yupu nyalamik bukni, Yahudi nang ati, ‘Yesus ati dib tenepnamak’ tenen, yupu nyabukura, el ap, sik anang weik ap yupu weik nyaldalamikce waldalamik. Yupu talildalamik bukni, anang arye, ‘Saulus ati optibye,’ tenelamik.

³⁰ Opmandayikura, el Saulus ap, yuk nang ap ara, sik ap neika Yesus dib tenebikce, du weit atonun ulamik nang arye, Saulus bobuka Kaisarea mutuku bobiyik. Bobiyikura, ‘Tarsus mutuku dopkwetepnamap,’ tenebik akarye dopkwetebik.

³¹ Winibikce, aminyan talak, sik Yudea tam ap, Galilea tam ap, Samaria tam ap, Yesus diba tenebuka ulamik nang ara, sik diba tenena kum nang arye, ikin ning kum delilamik ati, teleb kanye bobuka ulamik. Atalak ara, Allah El Dib Kanye arye, Yesus diba tenelamik nang nirya ati, sik kanye talima mikip kipdeibukce, melina ati teleb yupu nyalamukce sik talima kwa dilamuk. Yesus ati diba tenenyak ninye nirya ara, ‘Se, nun ni Allah weik mambulnye ulule’ tenen, elti, kibuka el si erebuka ulamikce, ‘Malye winibibiba wenepsilyak’ tenen, pia kanye moubuka ulamikce, Allah ati ilil ulamuk.

Eneas ap, Dorkas ap ati, nyabuk yupu

³² Peterus arye amutuku-amutuku nirya balamuka ani, Yesus diba tenebuka Lida mutuku ulamik nang dam uruna ati biyuk.

³³ Lida mutuku biyukopura, tonoknye, el si ara, Eneas, keting tamun pin barye deice arye el nong nirya sisal semuknye ulamuka anya arye min sakdebuka binmanto kum ulamukbuk, anyup dam Peterus biyukce eibuk.

³⁴ Eibukce Peterus arye Eneas ati nyabuk. “Eneaso, wini talak Yesus arye an nong lipsisikuka deipkile. Ati tiklyame. Tikmince an amsuna pakupdoplyame,” nyabuk. Nyabukura, Eneas kekebukce adiparyuk tikuk.

³⁵ Winibukura, Lida mutuku ap, Saron mutuku ap, ulamikak arye Eneas kwetebuk ning elilamika ati, sik elilamik nang arye, sik malye winilamik ning batakikce, nun ni Yesus ati dib tenebik.

³⁶ Ara, Yope mutuku, tonok kil, el si ara, Dorkas, Yesus ati dib tenebukce Yesus el ulamuk ning piribuka kel kiyamuk kil ulamuk. El ulamuk talak nirya ara, pia tuba-tuba teleb pil dolamukce, kankan ninye weik melilamuk.

³⁷ Peterus arye Eneas kwetebuka lepsisikdeibuk talak ara, akiluk weik dibukura, dibuk. Dibukura, el dam ulamik nang arye, el nong mek kekdeibik akarye, el nong dobuka alip aik deibik.

³⁸ Lida mutuku ara, Yope mutuku dam uamuka ati, Yope mutuku diba tenebuka ulamik nang ara, “Peterus ara, Lida mutuku unmale,” nyabikura, Yope mutuku nang kekebikce, bitinye nang wibuka, Lida mutuku dopkwetebik. Ura, abitinye nang arye Peterus binuka moroprikceura, ‘Neika tamubuka yanamak’ tenen, dopdeibik. Dopdeibikura, birikce, “Peterus an minop yalyame,” nyabuka morobidikura, Peterus ap, laka nyalbinmarik nang ap, tamubuka Yope mutuku yayik.

³⁹ Anang arye Peterus dobuka yarikopura, Dorkas deipmek aik, alip aik deibik. Alip aik noutamak, Peterus binuka tikukbuk, youwak kilapu weik arye el balye tam nirya tikuka antapdongobik akarya nyabik. Tikra antapdongobikce, Peterus ati, “Akain ara, Dorkas arye el kam ulamuk talak nun neika ulamubu talak arye wiyamsuk baju adipdelyame,” nyabuka engenmekce, laka nyanmek.

⁴⁰ Nyabuka laka nyanmekbuk, Peterus arye anyaik arye anyanmek kilapu buru tam dopkwetebukura, amsuna deice gutam dipdongobukce, Allah morobuk. Morobukopura, adipmok kil deipmekak tamubuka dipdeyukce nyabuk. “Tapita tiklyame,” nyabuk. Nyabukura, akil asing labuk. Akil asing labukce, Peterus dipdeyukopura, bukuk.

⁴¹ Bukukura, Peterus arye akil taruk talibuka tikdeibukce, min arye dib tenebik nang ap, ayouwak kilapu ap, yukubukba yayikura, “Akunuma kam bukuka tekmala dipdelulume,” nyabuk.

⁴² Akam bukibuk ning, ton nang arye laka nyabikura, Yope mutuku ulamik ninye nirya kekebikce, ninye weik tonap, nun ni koprop Yesus ati diba tenebik.

⁴³ Ara, Peterus ara, Yope mutuku ulamuknye, el si ara, Simon, domba bola kintinibuka deipmanabuk, kel-kel apnopura, baju wilamuknye, el aik asukum ara, mitik weik tonun neika pia ulamrik.