Rasul 8 - Eipomek

Yesus yupu dib tenebik nang ara, dib tenena kum nang arye, ikin ning weik, sik nong deice deililamik ati, nyabuk yupu

¹ Stefanus obik talak ara, tonoknye el si Saulus mening dam tikuka dinmokce, ‘Anye opmaka ara, merekuka opmake,’ tenebuk. Stefanus obika deice arye, adiparyuk Yerusalem mutuku noutamak bukni, dib tenena kum nang arye, Yesus ati dib tenelamik akarye, bulubuka weklamik nang ati, sik nong deice ikin ning weik delilamik. Winilamikopura, sik diba tenelamik nang arye, ‘Anang ara, olyasicak’ tenen, Yudea tam noutamak ap, Samaria mutuku noutamak ap, bik-bik abuka biyik. Anang bik-bik abuka biyik bukni, Yesus elce wibuka deiyamuk nang, 11 Rasul nang ara, sik yukak kum bindobik. Anyuk ulamik.

² Bukni, sik bayik akarye batakik nang, Allah nyalilamuk yupu pia talibuka diksukumuk ulamik nang arye, Stefanus nong dobuka weibikak arye, sikce elti, pia bico ubukura, mambul kanye bobuka engelamik.

³ Atalak ara, Saulus birye, Yesus yupu dib tenebik nang ara, sik nong babye, sik dib tenelamik ning ap, tenebik ning babye, peterelamik ning nirya babye, ‘Obuka atonun kiplopnamne,’ tenelamuk. Utenelamukce, anyasik-anyasik nirya wekukabukce, sal babye, kilapu babye, nirya dobuka libuka, wenena aik dongolbalamuk.

⁴ Sik ilil ati yuk-yuk pera mutuku binamik nang arye, sik binamik mutuku nirya Allah yupu peterepra balamik.

Pilipus birye Samaria mutuku peterelbiyuk yupu

⁵ Winilamikbuk, Pilipus el babye, Samaria mutuku noutamak tonok asik dolamikak biyuk akarye, Allah wibuka deiamuknye Mesias ara, Allah arye, ‘Yesus ati dib tenena ninye ara, lyeplirye, talipnamle’ tenen, wibuka deiamuk Mesias ati, el yupu pia peterelamuk.

⁶ Winibuka peterelamukura, sik amutuku nang weik bulyamik akarye, el yupu nyalamukura, kekelamik ning ap, tonda, el ninye kum winipmanto ning, pil dolamuka elilamik ati, aning deice arye el peterelamuk yupu pia moubuka kekelamik.

^7-8 Isa arye ninye talima ak wekamuk akarye talyamuk ninye ara, sik isa ninye talima ak arye kutukuka weik ngalukuka balamik. Tonda, sik taruk ap, yan ap nirya sisal selamuk ninye ap, tonda, yan kwalin ninye ap, weike lipsisikuka pung kililamuk. Pilipus arye aninye pung kililamukura, sik teleb kibikak arya eibikce, sik anyasik ninye ara, pia weik kanye deibik.

Ker dona deiyoknye, el si ara, Simon biti, nyabuk yupu

⁹ Ara, tonoknye, el si ara, Simon, anyasik noutamak ulamuk akarye, ‘Ton talak ninye dipnamak’ tenen, kir dolamuk. Ton talak ara, ninye teleb kina ati, isa mikip deice bukni, ninye winipmanto kum pil ninye kwetelamuk. Winilamuka ati, Samaria mutuku ninye nirya eibikura, lukdayik akarye mambul kanye bobik akarye sirim talibuk. Tonda Simon arye, ‘Elda weiknye, tenepnamniak’ tenen, kwalilamuk akarye weik yupu nyalamuk.

¹⁰ Elce el bidamnye ati kwalin yupu nyalamukba, amutuku ninye weik nang babye, talye bona utotoa kum nang babye, nirya Simon ati moubuka kekebikce, nyabik. “Mutuku-mutuku nirya kwepdeiamuknye, minop arye el si ara, Weik Mikipnye bira, akunum unmale,” tenebikce weik yupu nyabik.

¹¹ El minop arye pia isa mikip deice arye ninye kum winipmanto ning pil dolamuk anyak, sik eibikura, lukdayik ati, el yupu pia kekebuka diba tenebuka ulamik.

¹² Winilamik bukni, Pilipus arye, ninye lyena yupu peterelamukba kekebuka doprobikce, dib tenebik ninye ara, sal ap, kilapu ap, mek dongolamuk. Pilipus arye peterelamuk yupu ara, Allah arye Yesus pil dopsuk deice, ninye lyepsilirye, talisulul yupu ap, Yesus Kristus si ap, peterelamuk.

¹³ Tonda, Simon babye, malye ulamuk bukni, amalye ulamuk ning batakuka diba tenebukura, Pilipus arye Simon mek dongobuk. Mek dongobukopura, Simon arye Pilipus balamukak nirya, dobolbalamuk akarye, ‘Se, el yata pil dopnamle do?’ tenen, dipra balamuk. Dipra balamuk akarye, Pilipus arye ninye winipmanto kum pil dolamuk anyak, eibuka deice arye, ‘Se weik mambule,’ tenelamuk akarye lukulalamuk.

¹⁴ Aminyan talak, Yesus elce wibuka deibuk Rasul nang, Yerusalem tuba ulamik nang ara, “Samaria mutuku nang Allah yupu dib tenebuka doprobike,” nyabika kekebikura, Peterus ap, Yohanes ap, wibuka Samaria mutuku dopkwetebik.

¹⁵ Dopkwetebikura, sik abitinye nang Samaria mutuku nang dam yarikopura, sik Samaria mutuku diba tenebik nang ‘Allah El Dib Kanye dopropnuyak’ tenen, Allah moroprik.

¹⁶ Winiprika deiyok ara, Allah El Dib Kanye amutuku nang yanuka min kum wekamuka ati, sik amutuku nang ara, ‘Nun ni Yesus el mapu unamak’ tenen, Yesus el si deice aryuk talye mek dongolamik bukni, Allah El Dib Kanye men kum dololamik.

¹⁷ Aning ati ara, Peterus ap, Yohanes ap, sik taruk tatang arye, Samaria mutuku nang nong deice deiprikce, moroprikopura, Allah el Sambala anang deice yanuka wekukura, sik doprobik.

¹⁸ Doprobikura, sik ayarik Rasul nang arye, sik taruk tatang anang sik nong deice deiprikura, Allah El Dib Kanye yanuka wekukura, Simon eibuk akarye, ‘Se apil ara, na babye winiptinye’ tenen, yo bok dobuka Peterus ap, Yohanes ap ati, aribukak arye nyabuk.

¹⁹ “Anggun winipmaruma deiyok ning arepnuturumura, yata nang do nirya, na taruk tatang arye sik nong deice deiptinyopura, sik babye, Allah el Sambala doproptinge. ‘Winiptinye’ tenen, moropsine,” nyabuk.

²⁰ Nyabukura, Peterus arye tamubuka nyabuk. “Se, anda, Allah arye bico tenesilirye, elce urdem talye arisulul ning, El Dib Kanye ara, ance, ‘Yo bok deice arye dektinye,’ tenepmalama ati, an dipminopura, an yo bok kum danamlarya.

²¹ Allah dinmakilak, winipmalama arye, an kanye malye kipmakil ati ara, nun adonmap pil ara, bokuka arepkenemeba, an ton kum pil doptume.

²² An malye winipmalam ara, batakmince Allah moropnulyame.

²³ Anda, ninye ati kanye wilibuka derelyamnye ara, eipmakine. Awininmalamba, eipmakince kel kipmakina anya arye, an kanye pum arye malye tenepmalama ara, Allah arye an kanye malye kibkuk ning dobuka kum kipdeipnamkil do? Kum do? Ati, Allah moroplyame.” Peterus arye Simon ati nyabuk.

²⁴ Nyabukura, Simon tamubuka nyabuk. “Se, ‘An nyapmanilam ning nirya kum kipdeipnamanil’ tenen, ance nati Allah moropnelyame,” nyabuk.

²⁵ Simon ulamuk mutuku Allah yupu peterelamrika ani, ‘Tamubuka Yerusalem mutuku binamanam’ tenen, bisik mapnin balamrika ani, Samaria mutuku noutamak ninye asik domikak anyasik-anyasik weik peterepnin balamrik. Ura, Yesus ap, neika ulamik talak arye, sik elilamrik ning ap, sik kekelamrik ning ap ati, ‘Yesus arye el yupu dib tenen, nang lyepnamle,’ nyabuka peterepnin balamrik.

Pilipus arye laka nyabukura, Etiopia mutukunye dib tenebuk ati, Pilipus arye mek dongobuk yupu

²⁶ Aminyan talak, Allah el im deice pil donanye, yupu lak lenanye malaikat tonok Pilipus dam nyalyayukce, ayupu nyabuk. “Anda Yerusalem arye Gasa mutuku bana ati, atam yapdeibik bisik noutamak ara, bupu weik ulirye, mek kum ati ninye kum unyak mutuku bisik, ubilyame,” nyabuk.

²⁷ Nyabukura, Pilipus kekebukce, deiyok koubuk akarye banmoka ani, bisik noutam ara, Etiopia mutukunye min menekuka banmokbuk, Pilipus aminyan biyukura, epdarik akarye, Anye bira, sik Etiopia mutuku nang yupu bokolina deiyok kil, el si ara, Kandes, akil el yo bok ap, el bona nirya ap ara, anye birye melibuka talibuka ulamuk.

²⁸ Anye bira, Yerusalem mutuku binamukce, Allah si talye erelamuka ani, el mutuku tamubuka banmoka ani, el tuku deice bana ning, deice bukmokce Allah el yupu lak lena deiyoknye, nabi Yesaya sekamuk yupu yininmok.

²⁹ Yininmok anyak, Allah El Dib Kanye arye Pilipus ati nyabuk. “Anda atuku deice banmal ning dam bimince neika ansinibuka banurume,” nyabuk.

³⁰ Nyabukura, Pilipus kekebukce atuku deice bana ning dam bik-bik abuka biyukura, Etiopia mutukunye birye nabi Yesaya arye sengamuk buku yininmokbuk Pilipus arye kekebuk. Kekebukura, Pilipus arye asipdeyuk. “An yininmalam yupu ‘Deiyok anye’ tenen, teleb kibuka bikmalam do? Kum do?” nyabuk.

³¹ Nyabukura, anye birye tamubuka nyabuk. “Kume. Yuknye birye kum laka nyapnutu ura, yata wiribuka kel kiptinye do? Ati, an ap, neika asukumuk bulyalyame,” nyabuk.

³² Anye bira nyanmok yupu, nabi Yesaya arye sekuk yupu ara, ani. ‘Sik domba opnukirye turya talibuka balamak touk, tonda, mitik domba el potong seknulye talak ara, el potong sekelulnye dam lamapdongobuka tiklamle tok, el babye tunim abuka ulamuka ati, yupu tonok tonap kum nyabuk.

³³ El alye ubuk talak ara, teleb yupu wibuka kum nyapdeipmek. Ikin yupu uk nyapdeipmek. Sikce obikbuk, akunum dibuka ati, elce deibukura, dadeipdanin banyak nang ara, kum ati, yata nang arye laka nyapting do?’ (Yesaya 53:7-8)

³⁴ Etiopianye ayupu yininmokce Pilipus biti asipdeyuk. “Kao, na melipnimince ayupu deiyok ara, nyapnio. Allah el yupu laka nyabuknye bira, adomon yupu deice arye, ayupu sekamuknye arye, yatanye biti sekamuk do? Yuknye biti sekamuk do? El bidamnye ati sekamuk do?” nyabuka asipdeyuk.

³⁵ Asipdeyukura, Pilipus arye anye asum min nyapmok yupu deice arye, deiyok koubukce, anyapce dukdongobuka laka teleb yupu, peterepnin banmok. Ara, ‘Yesus arye ninye lyepnamne’ tenen, yayuk ati, ayupu nirya peterepnin banmok.

³⁶ Apia peterepnin banmoka ani, bisik noutam mekwen deiyamukak birikopura, anye birye nyabuk. “Mekwen mening dam deibuka ati, adiparyuk mek dongopnutum do? Na talye ning ton aupmanil do? Kum do?” nyabuk.

³⁷ Nyabukura, Pilipus arye tamubuka nyabuk. “An kanye tenebuka pia kanye talima bokoltona kumce, an kanye talima noutam arye Yesus dib teneptumopura, mek dongopkitinye.” Pilipus nyabukura, aEtiopianye birye tamubuka nyabuk. “Na diba tenepmana ara, Allah el mi sirika ara, Yesus el uka, tenepne,” nyabuk.

³⁸ Nyabukura, anye birye el melinanye ati nyabuk. “Nun tuku deice bana ning tunim abuka mining akuk talibuka tiklyame,” nyabuk. Nyabukura, mining akuk binuka talibuka tikukbuk, Pilipus ap, Etiopianye ap, mekwen noutamak binuka tikrikce, Pilipus arye anye mek dongobuk.

³⁹ Pilipus arye anye mek dongobukopura, mekwen noutamak arye lukuka bisik deice tikilbirikura, Allah Sambala arye Pilipus el nong minopce mikip deice arye doprobuk. Doprobukura, Etiopianye birye Pilipus el nong tonap kum eibuk bukni, el kanye deibukce, ila tamubuka nong bisikuk banmok.

⁴⁰ Anye bira abisikuk banmok bukni, Pilipus ara, Asotus mutuku kutukuka tikilbiyuk. Kutukuka tikilbiyukura, yuk pera mutuku si ara, Asotus mutuku, laka teleb yupu ara, ‘Yesus arye ninye lyepnamsile,’ nyabuka peterebuk. Peterebukura, Kaisarea mutuku binamuka ati, bisik noutam balamuk talak ara, abisik noutamak asik dolamikak anyasik-anyasik weik laka teleb yupu ara, ‘Yesus arye ninye lyepnamsile,’ tenen, nyabuka peterepnin balamuka ani, Kaisarea mutuku biyuk.