Rasul 6 - Eipomek

Yesus dib tenyamik ninye arye, youwak kilapu melina ati, tekbarye nang wipdeibik yupu

¹ Ura, Yesus yupu kekebuka dib tenebuka dobolbalamik nang weik upnin balamik talak arye, sik anang noutamak arye sik nirya Yahudi yala nang bukni, Yunani yupu nyalamik nang arye, Ibrani yupu nyalamik nang ati, malye kanye bolamikce derelamik. Deiyok ara, youwak kilapu melin ati bokuka asum-asum nirya arilamik ning ati ara nyalamik. “Ibrani tam youwak kilapu arenyak bukni, nun Yunani tam youwak kilapu ton, kum arisinyakce batakaldongosinyake,” nyalamikce dereldalamik.

² Sik waldalamika ati, Yesus arye wibuka dopkwetebukura, el yupu bobuka peterelbalamik 12 nang arye, “Buluplulume,” nyabikura, Yesus yupu diba tenebuka dobolbalamik nang nirya kekebikce, bulubuka wekikopura, ayupu nyabik. “Nun tenepmap ara ani. Youwak kilapu melina pil ara, teleb pil bukni, apiluk talibuka dobibyopura, Allah yupu peteren pil bataktibye. Bukni, Allah yupu pil batakana ara, pia malye. Aning kum bataktibye.

³ Ati, nun kayapu, anggun akunum bikilulum nang ara, anggun noutamak arye tekbarye nang wipdeipnulume. Ara, Allah El Dib Kanye wekuka langdibukura, funguk kibuka unyak nang, sik yupu nyanyak ning ap, sik pil donyak ning ap, teleb-teleb kibuka wininyak nanguk wipdeipnulume. Wibdeipmunyeura, ‘Youwak kilapu dina bokuka arin pil donamak’ tenen, sik deiyok nang keipdeipnamabe.

⁴ Bukni, Yesus arye wipdeipsuk nang, nunda teniltotona kumce, Allah morona ap, Allah yupu ninye melibuka peterena ap, apiluk talibuka donamape,” nyabik.

⁵ Nyabikura, awekmek nang, Yesus dib tenebik nang nirya arye, ‘Winipnamabe, nyapmasiak yupu ara telebuk,’ tenebikce, kanye deibikce, ninye tekbarye nang weipdeibik. Ara, Stefanus wipdeibik. Stefanus ara, Yesus ati pia dipkoprop tenebukce, kanye talima lamapdongobuka ulamuk. Tonda Allah El Dib Kanye Stefanus talima noutamak wekamukce, langdibukura, diksukumuk winilamuk. Tonda, ninye si Pilipus ap, Pokorus ap, Nikanor ap, Timon ap, Parmenas ap, ton Antiokia deiamiknye, Nikolas ap wipdeibik. Nikolas ara, Yahudi yala kumnye bukni, Yahudi yala nang, Allah ati kibuka si erelamik ning, sik winilamik ning nirya ara Nikolas babye dobuka winilamuk.

⁶ Anang akunum wibuka deibikce, Yesus arye wibuka dopkwetebukura, el yupu dobuka peterepra balamik nang, obarye (12) Rasul nang, sik dam bobinuka deibik. Deibikura, aobarye adua belas (12) nang arye Allah morobikce, awibuka deibik nang ati, sik gisok deice taruk tatang deibik.

⁷ Ura, Allah yupu pia peterelamikbuk, Yerusalem mutuku ulamik nang weik tonap kekelamikce, dib tenebuka tabaknin balamikce, minopce yupa weik uptabaknin balamik. Tonda, sik Yahudi yala nang, sik Allah ati arena deiyok nang Yesus peterelamuk yupu, ninye lyena ati laka teleb yupu kekelamikak arye, ninye weik tabaklamikce, Yesus el yupu talibuka dobolbalamik.

Yahudi yala deiyok nang arye, Stefanus ati derebikce, el nong talipropdakuka, biyik yupu

⁸ Allah arye Stefanus ati, pia kanye deiamukce, weik melyamuk ning ap, el mikip weika arye Stefanus areamuk ning ap, adeice arye Stefanus ulamuk. Allah el mikip weik Stefanus areamuka ati, Stefanus arye ninye winipmanto kum pil ap, ‘Allah el mikip pia weik pil donmasile, tenepnamak’ tenen, laka len pil ara, ninye kum winipmanto pil dolamuk.

⁹ Apil dolamuk bukni, aminyan talak ara, Yahudi yala nang Allah si erelamik aik si ara, Lipertini nang nyalamik aik weklamik nang arye Stefanus el yupu deiyok koubuka yanibik. Anyaik weklamik nang ara, Yahudi yala nang bukni, Kirene mutuku ap, Aleksandia mutuku ap, tonda Provinsi Kilikia ap, Provinsi Asia ap, atam nang arye el yupu yanibik akarye yupu weik nyanmek.

¹⁰ Stefanus el yupu dipkoprop nyalamukura, anang arye balye tam kibik akarye, ‘El yupu yanipnamap’ tenen, deiyok koubuka priplobik bukni, Allah El Dib Kanye Stefanus talima noutamak ulamuk arye, mikip weik kililamukura, weik kel ning melyamuka deice arye, Stefanus yupu teleb-telebuk nyalamukura, anang kum bisipmanto kibik.

¹¹ Ati, anang arye yuk nang dam binuka dungnubikak arye, ‘Nyapnalume, nyapnamlulume,’ nyabuka yupu moupdeibik deice arye, anang arye Stefanus ati, “Musa sekamuk yupu ap, Allah ap ati, Stefanus pia malye yupu nyalamuka arye Allah si yanibuk anyak, nun kekebupe,” nyabuka talye kisikdeibik.

¹² Nyalanmekopura, sik nyanmek yupu yuk nang kekebikce derebik. Ara, talye nang ap, Yahudi yala nang, sik yupu lepsisikuka bokolina deiyok nang ap, Musa sekamuk yupu, mem yupu peterena deiyok nang ap, anang nirya yu weik ubukura, yupu kweltoulanmek. Winibikce, Stefanus talibikce, sik yupu bokolin weik deiyok nang ara, Sandeheren nyalamik nang dam bobinuka deibik.

¹³ Tonda, anang aryuk, “Ayupu-ayupu nirya talye binuka kisipdeipnalyame,” nyabikura, yuk nang akunum kekebikopura, atilila yupu nyapnamik nang bobuka Sandeheren nang dam bobiyik. Bobiyikura, atilila yupu nyan nang arye nyabik. “Amalinye Stefanus bira, nun malye wininyap ning dekna ati, Allah arinyap aik, ara Allah arye el si erena ati, wipdeibupu aik ara, anye Stefanus nyalye yupu deice arye yanisulule. Tonda Allah arye, ‘Aning wininamlume, aning kum wininamlume,’ nyabukura, Musa arye sekeiyamsuk yupu mem yupu ati Stefanus nyalye yupu deice arye yanisulule. Aning ara, pia kum batakasulule. Abitinye ning tuba-tuba yaninauk usulule.

¹⁴ El nyabukura, kekebupu yupu ara, ani. Ara, ‘Nasaret mutuku deiamiknye Yesus arye nun malye wininyap ning dekna ati, Allah arebibirye el si erenyap aik uluplopnamle. Tonda, Allah arye nyapdeibukura, Musa arye peterelamukbuk, kekelamikak arye winipnin yangalamik ani, wini talak nun peterepsikura, wininyap ning nirya ara, aning batakikirye, ‘Winiryuk ning yuk punubuka dobolbinamak’ tenen, Yesus arye kintinibuka deipnamsile,’ nyabuka, Stefanus arye ayupu nyabuka peterepsukura, kekebupe.” Tilila yupu nyabik nang arye, ayupu nyabik.

¹⁵ Nyabuka ayupu nyanmek talak ara, Sandeheren nang, sik yupu bokolin aik bukmek nang nirya arye, Stefanus pia dipngirik lobikura, Stefanus el urasin ara, Allah el im deice melinanye, malaikat urasin atonun ubukak, eibik.