Rasul 3 - Eipomek

Peterus arye, yok kwanyamuknye, kwetebuk yupu

¹ Ara, aminyan talak, Peterus ap, Yohanes ap, sintam jam tiga ato kibukura, ara, Yahudi yala nang bulubuka sik Allah morolamik keting kibuk ati, sik abitinye nang ara Yahudi yala nang, sik Allah ati arilbalamikce, el si erelamik aik banmarik.

² Ara, tonoknye el deiamik talak arye nirya, yok kwanyamuknye ulamukak, sik yuk nang arye el baya wibuka, Allah ati arilbalamik aik buplan dam asum-asum nirya deililbalamik. Abuplan si ara, Urasin Teleb Bublan nyalamik. Delilbalamik anyak, anye birye, ‘Sikda yo bok talye arepnamniak’ tenen, sik anyaik wekelbalamik nang ati, pia moronauk ulamuk. Asum-asum nirya winilamika ati, sik baya wibuka bobayik talak ara, Peterus ap, Yohanes ap, banmarika dam kirikuka banmekbuk, anye birye Peterus ap, Yohanes ap eibuk.

³ Peterus ap, Yohanes ap, anyaik weknurik talak ara, el eibukopura, ‘Yo bok arepnamnirak’ tenen, morobuk.

⁴ Morobukopura, Peterus ap, Yohanes ap minopce dipderik akarye, Peterus birye ayupu nyabuk. “Nun dipdesilyame!” nyabuk.

⁵ Nyabuk ati, anye birye ‘Yo bok arepnamniraka atia’ tenen, dinmok.

⁶ Dinmok anyak, Peterus arye ayupu nyabuk. “Geil uang atouk bukni, dekna pia weik ning perak ap, emas ap ara, pia nun ton kum upmasil bukni, aupmanil ning ara, arepnukine. Nasaret nang arye deiyamiknye Yesus Kristus, el si mikip arye, tikuka bilyame, nyapkine,” nyabuk.

⁷ Nyabuk akarye, anye biti el sirik taruk talipdakuka, tikilinmok talak ara, adiparyuk anye bira el yan ap, el yan kwamul ap, mikip kibuk.

⁸ Mikip kibukura, anye bira el bidamnang erebuka im sukukce, el yan tuku deice yanibuka talye-talye banmok. Banauk unmokak arye, anye ap, sik ap, Yahudi yala nang, sik Allah ati arilbalamik aik, el si eren aik dam biyikura, elda talye-talye bana ap, kanye deibukce merena ap, Allah si erena ati, “Allah ara, el pia telebe,” nyabuka, Allah si erena ap, wininmok.

⁹ Wininmok talak ara, abulubuka wekmek nang nirya arye, el bana ap, Allah si erena ap, wininmok ning eibik.

¹⁰ Eibikce, dinmekak arye, ninye tonok-tonok arye, ‘Anye bira ara, Urasin Teleb Bublan dam bulamukak arye yo bok morolamuknye bira, anye,’ tenenmeka ani, bikik. Bikik akarye, Peterus arye anye kwetebukura, winibuk ning eibika ati, ‘Se, aning ara pia teleb’ tenen, lukdayik akarye, teniltonauk unmek.

Peterus arye, adinmek nang ati, nyabuk yupu

¹¹ Ura, ayo bok morolamuknye kanye deibukce Peterus ap, Yohanes ap, sik nong talibuka kibuk talak ara, adinmek nang nirya ‘Se’ tenen, lukdayik akarye aunmek aik si ara, Salomo Atolonga (Kolonade) memamukak bik-bik abuka dilyanganmekce, awekmek.

¹² Sik dilyanganmek ak, Peterus eibukopura, anang ati nyabuk. Na kayapu, anggun Israel nango, Yata ati aning eipmalumce, lukuldanmalum do? Nun mikip ap, nun diksukum una ap deice arye, anye bira kum kwetepmaname. Sikce, ‘Allah el diksukumuk ulye touk, sik babye, atonun diksukum urikirye deice arye, anye bira kweteipmarakba banmale,’ tenenmasulum do? Ati, ‘Se’ tenen, nun dinmasulum ara, yata ati do?

¹³ Nun bitinye nang aryuk anye bira kum kwetepmaname. Aning kum bukni, Abraham ap, Isak ap, Yakup ap, sik moubuka talyamik Allah ara, nun apu yapu nirya talyamik Allah ara, el yupu kekebuka, el piluk melibuka ninye winipmanto kum pil dolulnye, Yesus akunum erepdeibuk. Anggunda, ‘Nun deiyok nang arye Yesus opnamak’ tenen, Yesus dobuka anang ati akunum talye areplume. Akunum areplumopura, Pilatus bira, ‘Yesus talye lopdeipnamne’ tenen, akunum tenebuk bukni anggunce, ‘Kume opdeipsilyame,’ nyaplumce, Yesus dobuka Pilatus damak delilbilumce bataklume.

¹⁴ Yesus ara, Diksukum Ululnye atia. Allah el yupu pia teleb kibuka kekebuka dolamuk akarye, malye una pia kum arye, Allah piluk dolamuk bukni, anggunce elti, bataklum akarye, “Ninye onanye Barsabas lobuka arepsilyame,” nyabuka moroplume.

¹⁵ Anggunce yupu nyapdeiplumura, kam una deiyok teleb ning arisulula deiyoknye, sik malye nang arye dobuka obik. Sik obik bukni, Allah arye anye Yesus el kam bukeibuk. Nunda, anirya dilamubu nang unmabe.

¹⁶ Ara, minop arye anye bira kel bikamlum akarye, winiryuk eipmalumnye bira, Yesus el si dib tenenarye kwetepmala anyak mikip upmale. Ara, Yesus el si mikip tenena ap, Yesus arye nunti dib tenena deiyok ning arisilya deice arye, anye bira el nong nirya kwetepmal anyak, anggun nirya eipmalume.

¹⁷ Na kayapu, na kele. Anggun ap, anggun du yapu ap, ‘Deiyok anye’ tenen, kel bikna kum arye, anggun nirya walwal arye malye winiplume.

¹⁸ Walwal arye winiplum bukni, Allah arye nyabukura, aminyan winipnamuk ning lak nyalamik nang, nabi nang nirya arye, ‘Allah el Mesias dopkwetepnamla ara, kanye talima imun ning weik wininamle,’ nyabuka lak nyalamik. Anggun winipluma deice arye, Allah yupu nyalilamuk touk akunum winipsuke.

¹⁹ Aning ati ara, anggun malye ulamlum ning ap, anggun kanye talima malye tenelulum ning ap, batakmunye akarye, Allah el tam kipropmunyeura, elce anggun malye winilamlum ning nirya kum daneipnamsile.

²⁰ Anggun malye winimunye ning nirya batakmunce, Allah el tam tonap tamubuka kipropmunyeura, Allah weik arye melinamsile. Ara, tukak mutuku noutamak nirya arye, ninye weik lyeplirye, talinamlanye bira Mesias, Allah arye anggun lyena ati akunum weipdeipsuknye, dopreipnamsile. Ara Yesus ati nyapsine.

²¹ Minop talak arye, Allah el aminyan winipnamuk ning laka nyalamik nang, el yupu uk kekebuka, el piluk dobuka, pia teleb-teleb kibuka dolamik nang ara, sik nabi nang arye nyalamik yupu deice Allah arye, ‘Aning-aning minop ning nirya ati, tuba punubukapnirye, winiryuk ninguk kintinipnirye arepnamsine,’ nyalilamuk. Anyalilamuk ning min kum winipmalye talak ara, Yesus im deiceuk pia ulamlya ani, anyalilamuk ning kintinibuka delin talak akunum uplyopura, Allah arye Yesus dopkwetepnamle.

²² Aning atouk, Musa babye, nyabuke. ‘Nara, Allah el yupu laka nyananye nabi ulamse touk, Allah el yupu laka nyanamsilnye anggun yala nang kan-kan arye, anggunti erepdeipnamsile. Yata yupu do nirya, elce anggunti nyanamsil yupu nirya ara, moubuka kekenamlulume.

²³ Yatanye do, yata kil do nirya, el nyalye yupu kum kekebuka doprobiceura, Allah el mapu sik kan-kan arye el yupu kum kekenyak ninye dobuka onamake.’ (Ulangan 18:15, 18, 19)

²⁴ Dipkoprop Allah el yupu laka nyalamuknye nabi Samuel dipdongobuka, Allah el aminyan arye winipnamuk ning laka nyalamik nang arye, nyapdanin yangalamika ani, laka nyalamik nang, nabi nang nirya arye, Allah elce kintinip deiyamuknye, Mesias ara, Yesus eluk unamuk talak ati, ‘Winipnamle,’ nyabuka lak nyalilamsik.

²⁵ Tonda, Allah arye, nun apu yapu ap, el yupu laka nyalilamik nabi nang ap ati, el mapu kipdeibuk akarye, “Winipnamsine,” nyalilamuk yupu ara, nun apu yapu ap, tonda anggun wini talak umunye ninye ap ati, nyalilamuk. Allah arye el nyalilamuk ning wini talak akunum pil donmal anyak elinmalume. Allah arye Abraham ati anyapnusin yupu nyabuk. Allah arye Abraham ati nyabuk yupu ara, nyapnusine. ‘Ance deipminyeura, dadeipdanin balamikca ani, deibice mapu deice arye, ninye mutuku-mutuku nirya ati, teleb ning nirya kintinibuka dipse ara, arepnamsine.’ (Kejadian 22:18; 26:4) Peterus arye Musa sekamuk yupu dobuka nyabuk.

²⁶ Peterus ayupu nyabuk akarye ayupu tonap, nyabuk. “Allah arye el Melinanye kunum kintinipdeibukura, ‘Yahudi yala nang ara, weik melipnamle’ tenen, anggun dam minop dopkwetepsuke. Ara ‘Sik yuk arye, malye wininyak ning batakuka, balye tamubuka teleb bisik binamakce, Yesus ati dib tenepnamak’ tenen, dopkwetepsuke. Tonda, ‘Yesus arye aninye dobuka, Allah el tam tamulinamsil’ tenen, dopkwetepsuke,” Peterus arye nyabuk.