Rasul 28 - Eipomek

Mekwen sekdongamuk mutuku, Malta mutuku ulamik yupu

¹ Ura nun nirya tuku tam teleb kibuka akunum beipu ura, amekwen dana-dana sekdongamuk mutuku ati, amutuku ulamik nang arye, “Nun mutuku si ara, Malta,” nyabikura, kekebuburye kel bikupe.

² Amekwen dana-dana sekdongamuk mutuku ulamik nang arye, nunti bico ubuk ati, kisal dopsikce, pia teleb-teleb kibuka melipsike. Tonda, mok pia cenmok akarye, moul weik upmoka ati, anang arye kisal akunum dopsikopura, ‘Sik uku peiknamak’ tenen, uku seksik.

³ Uku seksikura, Paulus arye, talye koulyamukce sakamuk yo koula bubukce, uku dinmokak binuka delilbiyukbuk, uku bupu arye bunye kwatima ayo kan-kan damapmoka arye kutukuka bayukce, Paulus taruk si binuka topdongobuka kwatibukce bomtikinmok.

⁴ Wininmokbuk, amekwen sekdongamuk mutuku ulamik nang arye, akwatima si Paulus taruk topdongobuka kwatinmokak eibikce, sik yuk yupu talipdayik. “Kapal bongobukce, mekwen kum dipmoa ati, tuku tam teleb kibuka yanmo bukni, nun isa arye el si ara, Kwangdakuka Ona Deiyoknye, ‘Anye bira kum kam unamle’ tenen, akwatima arye akunum si topmale. Ara, anye bira ninye onanye ulya arye,” nyabik.

⁵ Nyabik bukni, Paulus taruk lyepdonokukura, akwatima uku noutamak sakukura, Paulus ara, kip tuba unmok.

⁶ Teleb unmokopura, amutuku ulamik nang arye, ‘El nong ara, weik nepnamle kum, minop dipnamle do?’ tenebikce, dinauk unmek. Mitik weik anun ton dinauk unmek bukni, Paulus kam tuba unmokak, sik Paulus ati, tenenmek ning ara, batakuka sik kanye yuk bobikce, “Anye bira, Isa Mutuku Dongonye arye dinanye, el mi ulul do? Im deice arye weik mikipnye yanmasil do?” nyabik.

⁷ Ara, nun unmapu dam ara, amutuku weik ninye deiyoknye, el si ara, Puplius, el wa wiamikak ap, weik aik domik ap uawamuk. Ati, Puplius arye, “Na aik neika unamabe,” nyapsukce, dina arebuka, yupu nyabuka, el aik neika mabuka, ulamupa deice arye, elce teleb-teleb kibuka melilamsuk.

⁸ Puplius, el li bira, nong bupu ap, dei bataknauk ap dilamuk ati, amsuna akuk ikin kanye bobuka dolamuk. Dolamukbuk, Paulus eluk donmokak, biyukce, Allah akunum morobukura, adolamuknye, Paulus el taruk anye el gisok deice talibukce kwetebukba, uk dilamuk ning kum dayukba teleb kibuk.

⁹ Aning akunum winibukopura, amekwen dana-dana sekdongamuk mutuku, uk dilamukbuk ulamik nang nirya ara, asum-asum nirya yangalamikura, uk kwetelilamuk.

¹⁰ Ara amutuku ulamik nang arye, nunti, sik winilamik ning deice arye, kisal dolamsikbuk, ulamubu ani, yuk mutuku mekwen deice binupu ati, kintinibupu talak ara, nun patalamsuk ning nirya melibuka arepsike.

Malta mutuku arye Roma mutuku biyik yupu

¹¹ Malta mutuku uk ulamubu ani, wala winilye akunum ubukopura, arukna wala nirya amutuku uk unamika ati, weik kapal yuk nang arye deiamika ara, nun ap, sik ap wekupu ura, ‘Binuyap’ tenen, kintinibuka mekwen deice beipu. Akapal ara, Aleksandia mutuku arye talyamik kapal min arye Malta mutuku yanamik. Akapal noutamak deiamik kapal, weik kapal ara, kup-kup tam ara, bitinye isa, sik urasin atonun kintinyamik, puturuna kel nang arye puturupdeiamik. Abitinye isa si ara, Kastor ap, Poluk ap nyalamik.

¹² Ara Malta mutuku arye banmapu ani, kapal delilbalamik ak, mutuku si ara, Sirakusa mutuku binuka deibikura, nun tukwak sakuburye, asukumuk liki winilye unmapu.

¹³ Atalak akunum ubukopura, Sirakusa mutuku arye kapal tamubuka welebuburye, mekwen deice banmapu ni, Erekium mutuku beipu. Biburye mapmapua berekukopura, utam arye kumanya mikip anyapce welebukura, tuba tamubuka mekwen deice banmapu ani, mekwen deiceuk mapmapua, berekukopura, tuba tamubuka banmapu ani, Putioli mutuku beipu. Biburye kapal adeibikopura, tuku tam sakupe.

¹⁴ Tukwak sakupeura, epnin banmapu ani, Yesus diba tenyamik nang aulamika mankau arye banmapu ani, epdapu ura, sikce nunti nyapsik. “Liki naku barye sum tonap neika unamabe,” nyapsikura, anyuk ulamubu. Ulamubu ani, akunum ubukopura, nunda tuku bisikuk mapnin balamubu ani, Roma mutuku beipu.

¹⁵ Bukni, bisik tuba mapnin balamubu talak ara, yuk nang arye nyabikura, kekebikce nun diba tenyamubu touk, Roma mutuku Yesus ati diba tenyamik nang ara, eiabce mutuku si Porum Apius dilyanamsik. Tonda, tonok mutuku ton dekna aik winilye uamuka ati, Tiga Taberne nyalamik mutuku dilyanamsik. Dilyanamsikura, Paulus arye anang akunum eibukopura, Allah ati, “Telebe,” nyabukura, el talima kwa deibukura, el kanye deibuk.

Paulus arye, Roma mutuku binuka, peterebuk yupu

¹⁶ Roma mutuku akunum beipuopura, Roma mutuku ninye deiyok nang arye nyabikura, Paulus el aik yukulamuk bukni, ‘Paulus bilyak’ tenen, tonok yin talinanye dopdeibikura, sik neika ulamrik.

¹⁷ Roma mutuku beiburye. Winilye sum akunum dikdik sebuka, mabupopura, Paulus arye Yahudi yala nang, sik du yapu ati, “Buluplulume,” nyabuk. Nyabukura, akunum bulubikopura, Paulus arye anang ati nyabuk.

¹⁸ Na kayapo. Nara, anggun yalanye unune. Ara, nun Yahudi yala ninye ap, nun apu yapu ulamikce peterelamsikbuk, nun tuba wininyap ning ap ati, na winilamse ning deice arye kum bisipsirye, kum yanipse. Kum yanipse bukni, Yerusalem mutuku ulamsibuk, sikce talibuka tapu koupnikce, Roma mutuku weik deiyok nang ati, talye arepnike. Ara, ‘Anang arye Paulus oplopnamak’ tenen, arepnikbuk, Roma nang arye na pia lipsisikdenik akarye, sik ninye olamik deiyok ning kum winipsa ati, ‘Anye bira lopdongoptibye’ tenen, patabuk.

¹⁹ ‘Anye bira lopdongopnamabe’ tenepnik bukni, Yahudi yala nang arye, “Ara kumde!” nyabuka sekdongopnikura, ‘Adiparyuk yuk bisik kum bitinye,’ tenepsa ati, “Kaisar elcuk na ati yupu lepsikuka bokeipnutue,” nyabuka moropse. Amoropse bukni, ‘Yahudi yala nang malye winibik ning ara, anye, nyapnamne’ tenen, kum moropse.

²⁰ Ura na laka nyanmasin yupu nirya akunum winibuka ati, ‘Nun bulubibyopura, yupu talipnamabe’ tenen, “Anggun buluplulume,” nyabuka moropse. Nun Yahudi yala nang nirya arye, “Allah arye aning dipkoprop arepsilyopura, yanamsile,” nyabuka dib tenebuburye, dinuk unyap ning ati, tapu koupnik ati aunmane. Paulus arye aYahudi yala nang ati nyabuk.

²¹ Nyabukura, sikce tamubuka nyabik. “Kume, Yudea mutuku nang arye, ‘Paulus malye winibuk,’ nyabuka surat sekuka nun dam kum dopkwetepsik ati, nun kum eibupe. Tonda, nun Yahudi yala nang Yudea mutuku arye anti, malye yupu nyabuka kum nyapsika ati, kum kekebupe.

²² Bukni, anggun Yahudi yala nang bukni, anggun Yesus ati diba teneplum ninye ati ara, yuk ninye mutuku-mutuku nirya arye anggunti, ‘Anang ara, sik urasin yuk kipdobikce yuk ning ati dib tenesinyak,’ anya arye, malye yupu nyabuka lululisinyake. Lululisinyaka ati, an tuba-tuba teneminye ning ap, petereminye ning ap, lak nyapsiminyeura, nun kekepnamapa ati, nun patapmasile,” nyabik.

²³ Nyabikura, sik ap Paulus ap arye, “Ara asum arye bulubibyopura, yupu talipnamabe,” nyabik. Nyabik touk, asum akunum ubukopura, dana-dana tam nirya arye, Paulus unmok aik damak ninye weik bulubuka yanmek. Yayikopura, beren tam arye ubuka keting dukduk noutam ap, anoutam nirya peterenmoka ani, inibuk. Paulus arye peterenmok yupu ara, ani. Tonok ning ara, Allah arye ninye lyeplirye, sik kanye talima talipnamle yupu peterenmok. Tonda Musa arye sekamuk yupu noutamak ap, tonda Allah el yupu lak nyalamik nang nabi-nabi nang arye sekamik yupu ap, doprobukce, ‘Anggun kel kiplulume. Yesus ara, dipkoprop Ninye Lyena Deiyoknye ulule,’ nyabuka peterebuk. Ara, ‘Awekmek nang dib tenepnamak’ tenen, peterebuk.

²⁴ Paulus el ayupu laka nyanmoka deice arye, ton nang ara, diba tenebik bukni, ton nang ara, ‘Nun kum kekepnamabe,’ tenebika ati, diba kum tenebik.

²⁵ Sik ansinibuka kum tenebikce, yupu weik nyaldanmeka ani, binuyik talak ara, Paulus arye el nyanmok yupu sirya ara, ayupu nyabuk. Allah El Dib Kanye arye nun apu yapu ati, dipkoprop yupu nyabuk. Ara, elce nabi Yesaya ati nyapdeibukura, nabi Yesaya arye sekuk yupu ara ani.

²⁶ Anda, Yahudi yala nang dam bimince ayupu nyanamlyame. “Anggunda talye amul deice pia kekenamlum bukni, dipkoprop, ‘Deiyok anye’ tenen, moubuka kum kekenamlulume. Tonda, anggun asing arye bola deice ninguk pia eipnamlum bukni, ‘Deiyok anye’ tenen, dipkoprop kum kel kipnamlume.”

²⁷ Deiyok ara ani. Anang ara, sik talima kat akunum ubuka ati, ‘Ayupu kekebibyak’ tenen, amul kunukdongobuka unyake. ‘Nun dina like’ tenen, asing kulamak atonun unyake. Ara sik asing kum kuptingatoura, asing arye teleb kibuka eiptinge. Sik amul kum kunuktingtoura, amul arye teleb kibuka kekeptinge. Winiptingura, sik kanye talima noutamak tenena ara, teleb kibuka kel biktinge. Winiptinyeura, na tam kipdongobuka, narye sikti, kwetepnirye lyepnamsine. Allah arye nyapdeibukura, Yesaya arye sekuk. (Yesaya 6:9-10)

²⁸ Ura, Nyapsuka ati, wini talak ara, ‘Anggun dipkoprop kel kiplulum’ tenen, ayupu nyapsine. Ara, ‘Allah arye ninye lyepnamle’ tenen, laka dopkwetepsuk yupu, Yahudi yala kum ninye ati, akunum dopkwetepmale. Anang ara, dipkoprop kekepnamake Allah arye anang lyepnamlarya.” Paulus arye awekmek nang ati ayupu nirya nyabuk.

²⁹ Paulus arye ayupu akunum nyabukce sirya dakukura, sik Yahudi yala nang kekebikce, sik kanye talima yuk-yuk tenenmeka ati, yu weik ubukura, yupu weik arye nyaldanmekce, yukak bindobik.

³⁰ Paulus ara, el aik koprop kum bukni, yuk nang aik bukni, el yo bok deice arye dekuka, keting tamun bitinye deice arye anyaik ulamuk talak, el uruna ati yangalamik nang nirya ati, kanye deibuka kisal dolamuk.

³¹ Aulamuk talak nirya, yuk nang arye, ‘Bataknamle’ tenen, kum sekelongolamikbuk, Paulus arye ilil una kum mikip deice arye, nun ni koprop Yesus Kristus el yupu ap, Allah arye ninye weik arye, lyepsilirye, pia talibuka melisulul yupu ap, el dam yangalamik nang ati, peterenuk ulamuk. Telebe, akunuma. Na Lukas arye, asukumuk deipne.