Rasul 21 - Eipomek

Paulus arye Yerusalem mutuku tamubuka biyuk yupu

¹ Mek bukna yo dam neika beipopura, sik unamika ati, nun babye, sik babye, bico upsuk akarye se tenepdaburye, “Anggun daunamlulume,” nyabuka weik mek bukna yo wekuka bukupu ura, kumanya mikip deice arye mekwen deice beipu. Miletus mutuku arye cung uk banmapu ani, adiparyuk Kos mutuku, ara, laut mekwen dana-dana sekdongamuk mutuku, beipu. Binuka mapmapua, berekukura, laut mekwen deiceuk banmapu ani, yuk mutuku laut mekwen dana-dana sekdongamuk mutuku, mutuku si Erodos mutuku bipopura, banmapu ani, Patara mutuku beipu.

² Patara mutuku bipopura, Fenisia tam balamik mek bukna yo ati enmapu ani, aenmapu mek bukna yo ara, akunum binuyika ati, kintinibikbuk eibupurye, nun babye, amek bukna wekuka bukuburye, mekwen deice beipu.

³ Kumanya mikip deice arye, mekwen deice banmapu ani, Siprus mutuku ara, laut mekwen sekdongamuk mutuku bisik noutamak ulamika anya arye, asinguk anyapce eitam eibupurye, Siprus mutuku eitam uabuk bukni, utam kirikuburye, laut mekwen deice pia banauk unmapu ani, Siria mutuku beipu. Siria tam bipopura, laut mekwen kup-kup mutuku si, Tirus mutuku mek bukna yo binuka deibukopura, sik amek lia yo lipmek bona yokuka deipnamek mutuku ati, nun babye, yokeipsuk.

⁴ Yokeipsukura, Yesus diba tenebuka amutuku ulamik nang ati, enmapu ani, eibupopura, nun ap, anang ap, tekbarye sum arye neika unmapu. Unmapubuk, anang ara, Allah El Dib Kanye arye sik talima tamubukura, sik anang el mikip deice arye Paulus ati, “An Yerusalem mutuku banmalam ara, bataklyame,” nyabuka malye nyabik.

⁵ Paulus ati malye nyabik bukni, nun mek bukna yo binuyuk talak ara, akunum ubukopura, sik asik-asik nirya nun mapmapu aik batakuka banmapu ani, amutuku Yesus diba tenebik nang ap, sik kilapu ap, sik mapu ap nirya, asik bisibuka neika banmapu ani, laut mekwen kup-kup bipopura, nun nirya mek wininga deice gutam dunukdongobupurye, Allah morobupu.

⁶ Allah morobupopura, “Telebe, anggunda bilulume,” nyabuka bisik yanuka kaipsikopura nunce, “Telebe daunamlulume,” nyabuburye mek bukna yo wekuka bukupu ura, sik anang ara, sik asik tamubuka biyik.

⁷ Nunda, Tirus mutuku arye banmapu ani, mekwen kup-kup mutuku si Petolemas mutuku yanuka mek bukna yo deibikura, sakupe. Sakuburye, amutuku Yesus dib tenebuka du weit atonun ulamik nang epdaburye, “Telebe,” nyapdapu ura, tonok sumuk neika unmapu.

⁸ Unmapua ani, mapmapua berekukura, Petolemas mutuku batakuka banmapua ani, Kaisarea mutuku beipu. Biburye, tonoknye, el si ara, Pilipus, el aik neika unmapu. Pilipus ara, ‘Yuk nang Yesus dib tenepnamak’ tenen, Yesus yupu laka nyalamuknye ulamuk. Tonda, ‘Youwak kilapu melipnamak’ tenen, minop arye tekbarye wibuka deiamik nang ara, Pilipus tonok aulamuk.

⁹ Pilipus elce deiamuk kil mapu ara, dumbarye weluk ulamik. Adumbarye kil mapu ara, Allah arye, ‘Na nyanye yupu dobuka laka nyanamak’ tenen, peterena deiyok ning talye aribukura, Allah el yupu lak nyalamik.

¹⁰ Ura weik anun asukumuk ulamubua ani, aminyan talak, tonok nabinye el si ara Akabus, Yudea tam arye nun dam kuluka yayuk. Anye bira, Allah arye aminyan winipnamuk ning lak lenanye, anabi birye ayupu dobuka, yuk nang ati, lak nyalamukce, Allah el pil ati dolamuk.

¹¹ Akabus arye nun dam yayukopura, Paulus el deiayatinga deililamuk cang baju, el si juba dobukce, Akabus el cang taruk ap, yan ap, koupdongobukura, ayupu nyabuk. “Allah El Dib Kanye arye nyapdeipmasile. Anyapmasin cang baju deiyoknye Paulus ara, na koupdanman tonun bukni, Yerusalem mutuku Yahudi yala nang unyak nang arye, anye biti dobuka, tapu koubikirye, ‘Wenena aik dongopnamak’ tenen, Yahudi yala kum ninye ati, arepnamake,” nyabuk.

¹² Akabus nyapsukura, kekebuburye, nun ap, Kaisarea mutuku ulamik nang ap arye, ‘Paulus Yerusalem mutuku banmok ning ara, bataknamle’ tenen, malye nyabuka morobupu.

¹³ Malye nyabuka morobupubuk, Paulus arye tamubuka nyapsuk. “Na akunum tenepsirye binamna anya arye, anggun malye nyabuka, engenmaluma deice arye, anggunce nati mitang kipdeipmanuluma ara, yata ati do? Tonda, Yesus el si ati ara, Yerusalem mutuku binibuk, tapu kouna babye, na nong ona babye, dawinipnamniake. Na akunum tenepsa ati, aning nirya ara, telebuka,” Paulus arye nyabuk.

¹⁴ Nun nyanmapu yupu kekebuka kum dopropsuka ati, nunda ayupu ara, tonap, kum nyapdeibu. Tunimanauk ubupu bukni, yupu tonok tonap, nyapmabu. “Allah arye akunum tenebuk touk winipnamkile,” nyapmabu.

¹⁵ Ara, anirya akunum winibukopura, nun nirya kintinibuburye, bisik balamubua ani, Yerusalem mutuku welebupu.

¹⁶ Yerusalem mutuku welebupu talak ara, Kaisarea mutuku ninye Yesus ulamuk ning piribuka kel kiyamikce, el ulamuka atonun ulamik ninye ara, neika ansinibuka welebupu. Welebuburye Kaisarea mutuku nang arye, tonoknye, Siprus mutuku deiamiknye, el si ara, Menason, el aik ulamupa ati, el aik bobisik. Menason ara, min arye diba tenebukce, Yesus el ulamuk ning nirya piribuka kel bikamuk akarye ulamuk.

Paulus arye, Yerusalem mutuku akunum biyuk yupu

¹⁷ Yerusalem mutuku akunum beipu ura, amutuku ninye Yesus akunum diba tenebikce, du weit atonun kibuka ulamik nang arye, nunti kanye deipsikce, “Telebe” nyabuka kisal dopsik.

¹⁸ Mapmapua, berekukura, Paulus ap, nun nirya arye, Yakobus el ap, ‘Yupu talipnamap’ tenen, el dam binuka wekupu. Tonda Yerusalem mutuku Yesus dib tenyamik ninye, sik deiyok nang babye awekmek.

¹⁹ Paulus arye, “Telebe,” nyabukce, yupu laka nyabuk. Allah arye Paulus ati meilyamuka deice arye, Yahudi yala kum ninye mutuku noutamak, Allah arye el mikip weik ning Paulus nong deice areamukba, adeice arye ninye kum winipmanto pil weik dolamuk pil nirya wibuka, tonok-tonok laka nyanmoka ani, sirya dakuk.

²⁰ Sirya dakukura, awekmek nang Paulus nyanmok yupu akunum kekebikce, Allah el si erepmeka ani, aminyan ara, Paulus ati ayupu nyabik. Anda Yesus ati dib tenepluma anya arye, nun du weit atonun unyabe. An kele, Yahudi yala nang kum nukmanto beribu-ribu arye Yesus ati dipteinyamik. Yesus ati dib tenebikura, Allah arye, ‘Wininamlulume aning kum wininamlulume,’ nyapdeibukura, Musa arye mem yupu sekeipsuk yupu ara, anang nirya arye, ‘Ayupu ara, pia weik mambule. Aninguk talibuka dobolbanamabe’ tenen, tuba talinyake. Aning ara, an kele bikilyame.

²¹ Paulus, an peterelyam yupu ara, yuk nang arye erebuka laka nyabikura, aYahudi yala nang arye akunum kekebikak arye, Ara, ance Yahudi yala ninyebuk, Yahudi yala kum ninye tam noutamak turukuka unyak ninye ati, peterelyam yupu ati lak nyapsika ara, winibukap, Paulus arye nyasulule. Allah arye, ‘Wininamlulume aning kum wininamlulume,’ nyapdeibukura, Musa sekamuk mem yupu ara, donga ibuka yaniploplulume. Tonda, anggun mapu den bola mouse ning kum sekenamlulume. Tonda, Yahudi yala ninye sik ulamak touk kum wininamlulume. “Paulus ara, nyabuka peterelule,” nyabuka, yuk nang arye nyabkik anyak Yahudi yala nang arye kekebike.

²² Akunum kekebika ati, nun Yerusalem deiyok nang arye yata wiripnamap do?

²³ An yanmalama ara, sik Yahudi yala nang arye dipkoprop kekepnamaka ati, anang yukuna ati, nun nyapnamkiap yupu uk kekebuka unalame. Nun unyap noutamak arye, Allah ati, “Winipnamabe,” nyapdeibik nang, dumbarye nang unmake.

²⁴ Anang dumbarye nang dopminyak arye, sik kanye ak malye winipna ati, ‘Allah damak yatibye’ tenen, tuba tamubuka lipsisikil delinamak pil ara, ance meliplyame. Ance melipminyak arye sik kanye talima lipsisikil delinamak pil ati, Allah arenamak ning ara, deklyame. Tonda, apil dekna ati ara, ance melipmince dekuka arepminyopura, sik potong koptinge. Winipminya deice arye, yu nang arye anti minipdeipkik yupu ara, ninye nirya, ‘Ayupu ara, talye nyabik’ tenen, kel biknamkiake. Tonda, winipminye deice arye ninye nirya arye Allah arye, ‘Wininamlulume aning kum wininamlulume,’ nyapdeibukura, Musa sekamsuk yupu nyasilye touk, Paulus arye winipmal ati, ‘El babye, ayupu moubuka talilule’ tenen, kel biknamkiake.

²⁵ Bukni, akunum dib tenebik nang, Yahudi yala kum nang ati ara, yupu talibuburye tenebupu ning ara, “Winipnamlulume,” nyabuka sikti, surat akunum sekuka dopkwetebupe. Ara, yata din ning do nirya, sik si talye erenyak ning, ‘Kibuka si erepnamabe’ tenen, obuka arepsikce ning ara, nun Yahudi yala nang arye kum dipmanto ning ara, anggun Yahudi yala kum ninye arye Yesus ati dib tenebik nang babye, aning pia kum dinamlume. Tonda, ining yala ning nirya pia kum dinamlume. Tonda ngankotokuka obikcopura, ining kum saklamle ning nirya, nong pia kum dinamlume. Tonda, talye upulah kilapu pia kum yolanamlulume. Nyabuka surat sekuburye dopkwetebupe. Yerusalem mutuku dib tenebik nang, sik deiyok nang arye, Paulus ati ayupu nyabik.

²⁶ Nyabikopura, mapmeka, berekukura, Paulus arye adumbarye nang dobukce, sik talima ak malye winipnarye lipsisikildelin pil ara, el ap, neika dobik. Dobikce Paulus ara, Yahudi yala nang, sik malye ulamik ning dekna ati, Allah arilbalamik aik wekukopura, ayupu nyabuk. “Ura talima ak malye upnirye, ‘Tuba tamubuka lipsisikuka delinamap’ tenen, atalak nirya talye pil dolamibya ani, sirya akunum uplyopura, adumbarye nang, sik talima ak malye upnarye tuba tamubuka lipsisikil delina ati, Allah ati arin ning ara, asum atalak arye arepnamabe,” nyabuka lak nyabuk. Nasaret nang winilamik touk, adumbarye nang babye, ‘Winipnamabe,’ tenebik bukni, anya arin ning kum ati, tenipdebuka batakalongolamikura, Yerusalem mutuku sik deiyok nang arye Paulus ati, ayupu nyabik. “Ance anang melina ati, aning dekuka melipnamlyame,” nyabik.

Sik Yesus ati diba tenena kum nang, Yahudi yala nang arye, Paulus ati opmanto ubik yupu

²⁷ Ura, ‘Allah arye, nun malye winina ning kilipsute’ tenen, Allah ati arelamik sum, tekbarye sum dam akunum ubukopura, Yahudi yala nang tonok-tonok, Asia tam arye yayik. Yayikce, Paulus ara, Yahudi yala nang, sik malye ning dekna ati, Allah arilbalamik aik dam unmoka eibik. Eibikce, anyaik dam wekmek nang nirya arye, “Opnuyabe,” nyabuka, sik yupu nyabika deice arye anang kekebikce, yu ubukura, anang nirya arye, “Anye bira opnuyabe,” nyabuka Paulus talibik.

²⁸ Talibikce yupu weik arye nyanmek. “Anango, anggun Yahudi yala nang nirya melipsululume! Anye bira nun Yahudi yala nang ap, Allah arye, ‘Wininamlulume, aning kum wininamlulume,’ nyapdeibukura, Musa arye sekeiyamsuk yupu, mem yupu ap, ton anyaik, nun Allah el si erenyapce elti, kam ning obuka arinyap aik ati, anye Paulus birye, ‘Anirya ara, malye,’ nyabuka peterelya deice arye yanilule. Tonda, Yahudi yala kum ninye, Yunani ninye dobuka, nun Allah si erenyap aik dam delilyasuk deice arye, nun Allah si erena ati wibuka deibupu aik, ateleb aik ara, malye kipdeipsuke.” Nyabikce yupu weik tonun nyanmek.

²⁹ Asia tam arye yayik nang, sik Yahudi yala nang arye Efesus mutukunye, el si ara, Teropimus, el ap, Paulus ap, Yerusalem asik noutamak barikbuk, eiyamika ati ara, sik Allah ati arilamik aik dam dipkoprop kum eiyamik bukni, sik kanye talima pum tam aryuk, ‘Paulus arye anye biti, Yahudi yala kumnye dobuka, Allah arena aik damak bobanmasile. Anyaik damak, banmarak do?’ tenen, yu ubukura, nyabik.

³⁰ Yupu weik arye nyanmekopura, Yerusalem asik noutamak ulamik ninye nirya kekebikak arye, kanye ebuk ati, yu kibikce, dana-dana tam nirya, bik-bik abuka ayupu nyanmek sukumuk wekelyayik. Wekelyaikce Paulus talibikce, sik Allah ati arilamik aik pum tam arye, bobuka buru tam bobiyikopura, adiparyuk yuk nang arye, Allah arin aik noutamak wilibuka wiyamik poka buplan tirikdongobik.

³¹ Anang arye, Paulus tuba olinmek talakuk, yuk nang arye, Roma yin talin nang sik deiyoknye ati nyabik. “Yerusalem mutuku unyak nang ara, ‘Paulus opnamap’ tenen, yu weik upmal ati kwelanmake,” nyabuka laka nyabikura, kekebuk.

³² Kekebukce adiparyuk el mapu yin talin nang, el amu tam yin talin nang bukni, ninye deiyok nang atonun nang ap, sik talye yin talin nang ap, wibuka dobukce, akwelanmek nang dam el ap, neika bik-bik abuka biyik. Bik-bik abuka biyikopura, akwelanmek nang ara, yin talin nang ap, yin talin nang sik deiyoknye ap, eibikopura, ilil ubukura, Paulus onmeka batakik.

³³ Batakikura, ayin talin nang weik deiyoknye Paulus dam yayukce, Paulus dopdeibukce, el yin talin nang ati nyabuk. “Anye bira, kawat rantai tapu bitinye arye koupdongoplulume!” nyabuk. Nyabukce, awekmek nang ati asipdeyuk. “Anye bira, yatanye do? El winipmo ning ara dan do?” nyabuka asipdeyuk.

³⁴ Asipdeyukura, aunmek nanguk ninye bokuka ton tam weik yupu yuk ton nyanmek, ton tam weik yupu yuk ton nyanmeka deice arye, weik arye lelilanmeka ati, ayin talin nang deiyoknye birye, ‘Anye bira dipkoprop yata wiripmo do?’ tenen, bita tenipmanto kum kibuk. Winibukura, elce el yin talin nang ati nyabuk. “Paulus ara, nun unyap aik bobilulume!” nyabuk.

³⁵ Nyabukura, sik Paulus dobuka bobiyikce, poka buplan dam apia welebayikba, ayu unmek nang ara, yu weik ubukura, ‘Paulus opnuyap’ tenen, yu arye talipkiriknin bayikce, dobolbiyikbuk, ayin talin nang, ‘Paulus dobuka obicak’ tenen, Paulus el nong dobuka alip ereptalibikce bobiyik.

³⁶ Ayu ubukura, dobolbanmek nang arye, yupu weik arye nyanmek. “Paulus opmabye,” nyanmek.

Paulus arye yu ubukura, wekmek nang ati, nyabuk yupu

³⁷ Ayin talin nang arye, Paulus dobuka, sik aik buplan dam wekelbinuyik ati, bayika ani, Paulus arye ayin talin nang deiyoknye ati, Yunani yupu deice arye asipdeyuk. “Anti yupu ton nyapkitinye do?” nyabuka asipdeyuk. Asipdeyukura, ayin deiyoknye birye tamubuka nyabuk. “Yunani yupu ara, kel kilyamce nyalyam do?

³⁸ Min arye Mesir mutukunye, ‘Amutuku talilyanganyak nang obuka bisipnamap’ tenen, ninye on nang yupa weik 4 ribu nang bulubukaplumce, buru mutuku bobilumnye bira, an do? Yuknye do?” nyabuka asipdeyuk.

³⁹ Asipdeyukura, Paulus arye tamubuka nyabuk. “Nara, Yahudi yalanye, Kilikia tam, mitik mutuku kume. Pia teleb mutuku, Tarsus mutuku deipniknye unune. Awekmek nang ati, yupu nyaptinye do?” nyabuka morobuk.

⁴⁰ Morobukura, ayin talina deiyoknye birye, “Telebe ur nyaplyame,” nyabukopura, Paulus arye ayin talin nang, sik aik atolongna dam tikukce, ‘Yupu tunimapnuyak’ tenen, awekmek nang ati taruk kunupdeibuk. Taruk kunupdeibukura, sik nirya akunum tunim abikopura, Ibrani yupu deice arye anang ati Paulus arye nyabuk.