Rasul 11 - Eipomek

Peterus arye, Yerusalem mutuku ninye ati, laka nyabuk yupu

¹ Aning nirya wininmokba, amutuku unmek ninye arye, “Yuk-yuk mutuku ninye, Yahudi yala kum ninye babye, Allah yupu diba tenebike,” nyabuka, yupu laka nyalbiyik. Winibuka laka nyalbiyik ati, Yudea mutuku noutamak ulamik nang ara, Yesus diba tenebikce, du weit atonun ulamik nang ap, Yesus arye wibuka deibuk nang, sik 12 Rasul nang ap, sik nirya kekebik.

² Ayupu kekebika ati, Peterus tamubuka Yerusalem mutuku welebukura, Yesus dib tenelamik nang bukni, ‘Den bam bol mouse ning sekna ara, pia weik mambule. Aning kum wininyak nang ara, pia malye wininyake,’ tuba tenelamik nang arye Peterus ati wenebik. Wenebikce nyabik.

³ “Anda Yahudi yala kumnye, el si ara Kornelius el aik wekmomce, an ap, den bola mouse kum sekik nang, sik ap din neika ansinibuka dipmalum deice arye, pia malye winipmom atia. An kele, nun Yahudi yala nang arye, aning ara mem ning atonun anya arye, aning atonun kum wininyabe,” nyabuka wenebik.

⁴ Ati, im deice arye yayukura, aning nirya libmok baju ap, malaikat arye elti, nyabuk yupu ap, Peterus arye aning nirya dinmok anyak, winibuk ning ap, elce minopce eibuk ning nirya ap, kekebuk ning nirya ap, anyapce dukdongobuka, ayupu nirye dipkoprop winipmok touk, sik Yahudi yala nang ati lak nyabuk. Lak nyabuk akarye ayupu tonap nyabuk.

⁵ Nara, Yope mutuku ulamse talak ara, Allah moronmasi talak ara, lengdar malamaka atonun ning arye aning eipse. Eipsirye, dinmasibuk, im deice arye baju pala atonun ning arye yangabuka mouse dana-dana talibukce, nimalye dopketepnin yanganmoka ani, na dam boyanuka tikukura, eipse.

⁶ Eipsirye, narye baju deice dipdesirye, ninye winyakbuk yan dumbarye arye balul ning ap, tonda talye tukwak bukra balul ning ap, mun arye lilibuka balul ning ap, maka yala im alip balul ning ap, anirya baju pum bisik aupmokbuk narye eipse.

⁷ Eipsirye dinmasi bukni, ninye yupu atonun yupu deice arye nyapnukura, kekepse. “Tiklyame. Tikmince, aupmal ning obuka diplyame,” nyapnukura, kekepse.

⁸ Nyapnukura, narye tamubuka nyapse. “Naio, kume. Ato malye ning, Yahudi yala nang arye kum diptibye aning ara, pia kum dinune. Aning nirya ara, malye ning tenenyabe. Ati mem ning tenenirye, ‘Allah arye derepnilyak’ tenen, aning kum diptinye,” nyapse.

⁹ Nyapsibuk, ninye yupu atonun yupu deice arye tuba tamubuka tonap nyapnuk. “Yahudi yala nang arye, ‘Nun arye, aning kum diptibye,’ nyalamik ning ara, Allah arye akunum teleb kipdeibuk ati ara, wini talak ara, ‘Anggun diptume,’ nyapmasila ati, ance aning ati, ‘Aning ara, Yahudi yala nang kum diptinge,’ nyaminya ara, bataklyame. Pia kum nyanamlyame,” nyapnuke.

¹⁰ Awinibuk ning nirya ara, asum tonok bukni, like winilye arye winibukura, adiparyuk sirya tamubuka im deice welebuk.

¹¹ Awinibuk ning im deice welebuk talakuk, Kaisarea mutuku arye na dolyangana ati, dopkwetepmek nang, winilye anang ara, na unmasi dam tikilyayik.

¹² Tikilyayikura, Allah El Dib Kanye arye, “Anang ara, yuk mutuku ninye anya arye ‘Na ap neika kum binamabe,’ tenena bataklyame. Ur talye neika ansinibuka bilulume,” nyapnuk. Tonda, anaku barye diba tenebik nang ap, neika beipue. Biburye Yahudi yala kumnye, el si ara, Kornelius aik wekupu.

¹³ El aik wekupu ura, Allah yupu lak lenanye, malaikat ara, Kornelius el aik kutukuka tikilyayuk akarye nyabuk yupu, Kornelius arye nunti laka nyapsuk. “Allah pil donanye malaikat arye nyapnuke,” nyabuka Kornelius arye laka nyapsuk. “Tonoknye el si ara, Simon bukni, Peterus ton nyanyaknye bira, dobuka boyangana ati, ninye wibuka dopdeipnulyame.

¹⁴ Anye bira dobuka yaceura, elce teleb yupu nyapnamsil yupu deice arye, an ap, an mapu silip ap, nirya ati Allah arye lyepnamsile,” nyabuka Kornelius arye ayupu lak nyapsuk. Peterus arye, sik Yahudi yala nang, Yerusalem mutuku ulamik nang ati laka nyabuk.

¹⁵ Laka nyabuk akarye, ayupu tonap, dukdongobuka nyabuk. “Winira, Allah El Dib Kanye nunti yanuka wekamsuk atonun, na yupu deiyok koubuka nyanmasi noutamak arye, anang babye sik yahudi yala kum nang bukni, sikti, yanuka sik talima noutamak wekuk.

¹⁶ Sik talima pum tam wekukura, nun ni Yesus nyapdeiamsuk touk tenepse. Ara, ‘Yohanes minop arye talye mek dem dongolamuk bukni, aminyan talak, Allah arye, el Dib Kanye dopkwetepsilyeura, anggun talima wekuka langdipnamsile,’ nyapdeiamsuk ning tenepse.

¹⁷ Nun min arye, nun ni Yesus Kristus diba tenebupu talak ara, Allah el talye arepsuk Dib Kanye ara, aning atonun, anang Yahudi yala kum ninye babye aribuk. Arebuka ati ara, nara yatatonye birye, Allah el tenyamuk ning ati, yupu sektinye do?” Peterus arye, sik Yerusalem mutuku ulamikce, Yahudi yala nang ati, nyabuk.

¹⁸ Nyabukura, sik anang kekebikce, yupu tonap kum nyabikce, Allah siuk erebik. Erebikce nyabik. “Winira akunuma. Sik yuk-yuk talye mutuku ninye, Yahudi yala kum ninye babye, sik malye unyak ning batakuka, ‘Pia kam unamap’ tenen, Yesus ati dib tenebiceura, Allah arye anang ati, bola koplobuka kam pia una deiyok ning akunum arepmale,” nyabik.

Antiokia mutuku diba tenebik nang ati, nyabuk yupu

¹⁹ Ura, atalak ara, Stefanus obik talak arye, yu nang arye, Yesus ati dib tenenang ati, sik nong deice ikin ning weik delilamik deice arye, yuk-yuk pera mutuku bik-bik abuka biyik. Sik biyik nang arye, weik pera mutuku ton biyik. Fenisia tam ap, Siprus mutuku ap, tonda, Antiokia mutuku ap, biyikopura, anang arye Yahudi yala nang ati, “Yesus arye lyesulule,” nyabuka, Yesus ati teleb yupu peterepra balamik.

²⁰ Bukni, yuk nang ton Siprus mutuku deiamik nang ap, Kirene mutuku deiamik nang ap arye, Antiokia mutuku biyikopura, Yunani nang ati peterebik. Ara, “Nun ni Yesus arye elcuk lyesulule,” nyabuka Yesus el teleb yupu peterelamik.

²¹ Allah arye anang ati, mikip weik melyamuk arye, amutuku, Antiokia mutuku ninye kekebikce, weika arye diba tenebikce, sik kanye tenen ning nirya, Yesus deiceuk deibikura, ‘Yesus elda nun yupu bokolinye ati, nun weik deiyoknye pia unamsile,’ tenebuka Yesus ati dib tenebuka ulamik.

²² Yuk nang arye Antiokia mutuku ninye winibik ning kel bikikce laka nyabikura, Yerusalem diba tenebuka ulamik nang kekebikce, ‘Barnabas ara, Antiokia mutuku dilbinamle’ tenen, wipdeibik. Wibdeibikce, “Dilbilyame,” nyabuka Barnabas dobuka Antiokia mutuku dopkwetebik.

²³ Dopkwetebikura, Barnabas Antiokia mutuku biyukopura, Allah arye anang ati, bico tenyamukce, pia teleb kibuka melipmok ning eibukce, pia kanye deibuk. Barnabas kanye deibukce, anang ati nyabuk. “Anggun Yesus diba tenelulum ning ara, batakna kum, pia talibuka unamlulume. Tonda, anggun kanye teniltona kum arye, anggun kanye talima bokoltona kumce, anirya ansinibuka, nun ni Yesus pia arenamlume. El tibuk pia arenamlulume,” Barnabas arye anang ati, teleb yupu nyabuk akarye, sik talima kwa dibuk.

²⁴ Barnabas, elda kanye teniltona kum diparyuk, Yesus ati pia mikip dibuka dib tenelamukura, Allah El Dib Kanye el talima ak langdibukura, pia telebnye ulamuk. Winibuka ulamukura, amutuku ninye, nun ni Yesus ati, weika arye diba tenebuka tabakikura, yupa ara, weik kipnin balamuk.

²⁵ Ura, aminyan talak, Barnabas arye, ‘Saulus elbinamne’ tenen, amutuku batakuka Tarsus mutuku biyuk. Tarsus biyukopura, pia dipdepnin banmoka ani, Saulus eibuk.

²⁶ Saulus eibukopura, Saulus dobuka Antiokia mutuku tamubuka boyayuk. Boyayuka ati, Barnabas ap, Saulus ap, Yesus diba tenebuka talyamik nang ap, keting tamun tonok talak arye ton sum arye ton, ton sum arye ton nirya, bulubuka wekelamikbuk, sikce Antiokia mutuku ninye weik Allah yupu peterelamrik. ‘Yesus ulamuka atonun uptibye’ tenen, patalamukbuk piribuka kel kibuka diksukum ulamik nang ati, yuk talye ulamik nang arye, Antiokia mutuku arye deiyok kibikce, “Aninye ara, Kristen ninye unyake,” nyalamik. Ara, minop talak Antiokia mutuku nang arye, deiyok koubuka, “Anang ara, Kristen nang unyake,” nyalamik.

²⁷ Barnabas ap, Saulus ap, sik peterelamrik talak ara, aminyan winipnamuk ning tenebuka laka nyalamik nang, nabi nang ton Yerusalem mutuku arye Antiokia mutuku yayik.

²⁸ Anang yayikura, sik kwit tonoknye, el si ara, Akabus tikukce, Allah Dib Kanye arye Akabus ati nyapdeibukura, elce aulamik nang ati, aminyan winipnamuk ning ati yupu nyabuk. “Aminyan talak, ninye unyak mutuku nirya ara, din pia kwaning patapnamle,” nyabuk. (Akabus nyabuk touk, Roma mutuku ninye deiyoknye, el si Kelaudius, talibuk mutuku noutamak nirya ara, dipkoprop amutuku-amutuku nirya ara, din ning kum dayukba, din weik patalamuk.)

^29-30 Akabus ayupu nyabuka ati, amutuku Yesus diba tenebik nang kekebikce, ‘Yudea tam diba tenebuka ulamik ninye ati, melipnamap’ tenen, sik yuk-yuk adeiamik touk bokuka arebik. Yerusalem mutuku Allah diba tenelamik nang, ‘Sik deiyok nang binuka arepnamdak’ tenen, Barnabas ap, Saulus ap, ati arebikura, abitinye nang arye aning dobuka Yerusalem mutuku binuka areprik.