Pilipi 3 - Eipomek

“Nun bidamang mikip deice arye, kum teleb ulilanamabe,” nyabuk yupu

¹ Ura, na weit yapu atouk ninyeo, Yesus ap, dukdongobuka umunce, weik kanye deibuka unamlulume. Minop talak ara, anyapnusin yupu akunum nyamsise bukni, ila tonap, nyapnusin ara, na ikin una kume. Tonda, ‘Mankau arye malye ning tenepmunyak’ tenen, yupu seknusine. Tonap ayupu uk kekepmunyopura, ayupu moubuka melinamsile. Anya arye, anggun melina ati ayupu nyapnusine.

² Sik Yahudi yala ninye, malye unyakce, ‘Allah arye kanye deipnamsil’ tenen, “Sal den bam bol mouse ning sekenamlulume,” nyabuka peterenyak nang ara, yu ulamlye kam arye pia yu uplibuk, ubula dona ap, walana ap, malye winilamak atonun, anang babye, malye wininyake. Ara, nun yupu yanipsikirye, ‘Sik yupu kekenyak ninye ara, nun yupu uk kekebuka nun tam kepropsitinge’ tenen, malye yupu nyasinyake. Aninye ara, wininyaka anya arye, ‘Anang nun malye updeipsicak’ tenen, memelonamlulume. Anang ara, winibuka tenenyake. Ara, yuk nang, ‘Aninye ara, malye winin ning batakuka, Allah el na tenen nang unyake, tenepnamsiak’ tenen, bikilin ning ati, sal den bam bol mouse ning sekenyake.

³ Bukni, nunda dipkoprop malye ning batakuka, Allah el na tenen ninye unyabe. Ati, ‘Sik Yahudi yala nang ninye ara, malye updeipsicak’ tenen, memelonamlulume. Nunda, Allah El Dib Kanye arye, el mikip arisilya deice arye, Allah el si erenyabe. Nun kanye talima teleb ulin ning ati ara, nun bidamnye mikip ap, nun nong winilamap ning ap, adeice arye, ‘Telebuk winilinamabe,’ pia kum tenenyabe. Aning tenena kumce, ‘Yesus Kristus elda weik mambule’ tenen, ‘Elce pil dopsuka deice aryuk, teleb ulisulule’ tenen, dib tenenyabe.

⁴ Yuk nang arye, ‘Nun mikip ap, nun nong ap, ulamibya deice arye, teleb winilinamabe,’ tenenyak touk, pia kum tenenyabe. Bukni, aning atonun teneptibyopura, na babye, weik arye tonap, teneptinye. Yuk nang arye, ‘Nun mikip deice arye, winilamap ning deice arye, teleb winilinamabe,’ talye tenepting bukni, sik Yahudi yala ninye arye, ‘Pia mambul ning ara, ani-ani,’ tenenyak ning ara, na babye, weik atouk ulamse. Ati laka nyapnusine.

⁵ Ara, na weik yala ara, Israel yala nang arye deipnikba, like pin barye sum akunum ubukura, na den bam bol mouse ning seknike. Na yala koprop ara, Benyamin yalanye ununa anya arye, Yahudi yala nang arye, nyalamak yupu ap, winilamik ning ap, mem ning nirya ap, na weik arye, kel kibuka ulamse. Ara, Allah arye, “Wininalulume, aning ton kum wininamlulume,” nyamukba, Musa arye seklamuk yupu, mem yupu ning ati ara, sik Farisi nang arye, ayupu uk pia talibuka diksukumuk unyaka atonun, na babye, weik arye telebuk ubuka ulamse.

⁶ Narye aninguk diba tenelamsirye, ‘Yuk ninye arye, talye dib tenenyak ning, nong kum upnamle ning nirya kum daturye, nun tenenyap ninguk weik upnamle,’ tenelamse. Utenelamsirye, Yesus ati min dib kum tenyamse talak ara, Yesus dipkoprop akunum tenelamik ninye ati, sik nong deice ikin ning weik delilamse. Tonda, ‘Allah arye nyamukba, Musa seklamuk yupu, mem yupu talibuka, diksukumuk dobolbabyopura, adeice aryuk Allah arye nunti, teleb nang tenepnamsile’ tenen, Yahudi yala nang arye, wininyak ning nirya ara, na babye talibuka diksukumuk winilamse. Malye winin ning ara, tonok babye, ton kum winilamse.

⁷ Anirya, winibuka ulamse bukni, yata diksukum winin ning do nirya, yuk nang arye, ‘Elda pia telebnye, tenepnamniyak’ tenen, mem pil atonunuk pil dolamse ning nirya ara, wini talak na kanye ara, ‘Anirya ara, talye ning uka,’ tenenune. Wininuna ara, ‘Yesus eluk dib tenepnirye, pia talibuka unamne. Kristus aryuk lyepnamnile. El uk ara, weik mambule, yuk ning nirya ara, pia kume’ tenen, unune.

⁸ Anyapmasin yupu uk kume. Tonda, teleb-teleb kibuka winilamse ning weik aupnuk bukni, Yesus dib tenepnirye, ‘Na deiyoknye Yesus Kristus ap, dukdongobuka unaname,’ akunum tenepne ning ati ara, ‘Mince arye tenelamse ning nirya ara, malye ning atouk, dauplye,’ tenenune. Ara, ‘Na Deiyoknye Yesus Kristus ap, talima dukdongobuka una ara, pia mambule,’ ati nyapsine. Minop talak ara, na diksukum ulamse deice arye, ‘Aning deice arye, teleb updeipnamnile,’ tenelamse bukni, wini talak na kanye ara, ‘Aning nirya ara, mal-malya, sukulonga donoklamak atonun ning ulule,’ tenenune. Tonda, ‘Lyun ning atonun ning ulule,’ tenenune. Winibukap tenenuna deiyok ara, ‘Weik mambul ning ara, Kristus eluk talibuka, el ap, talima dukdongobuka unaname’ tenen, nyapne.

⁹ Musa seklamuk yupu talibuka dobolbanirye, diksukum unya deice ara, Allah arye, ‘Anye bira telebnye ulule,’ kum tenenamnile. Aning kum bukni, pia patapnil ning ara, narye, Kristus ati diba tenenun deice aryuk, Allah arye, “Elda telebnye,” nyabuka deipnamnile. Aning ara, akunuma. Yuk winin ning deice arye, teleb kum kipdeipnamnile. Kristus ati, dib tenebibya deice aryuk, Allah arye, talye arena atonun, ‘Aning ara, diksukum teleb nang unyake,’ tenepsilirye, teleb kipdeipnamsile.

¹⁰ ‘Se, aning winiptinye’ tenen, pia patapnil ning ara, nyapnusine. Ara, dipkoprop Kristus ap, talima dukdongobuka unirye, Allah arye, Kristus kam bukeibukura, winira Kristus mikip weik ulye touk, ‘Na babye, winiptinye’ tenen, patanulule. Tonda, Yesus el kanye imun ning weik ulamuka ani, nun malye winina ati dibuk touk, na babye ikine upnutopura, akunum diamik ninye atouk uptinye. Akunum diamik ninye atonun uptinye nyanmana ara, diamik ninye, malye winin ning nirya kum patalirye, malye kum winilamak touk, ‘Na babye, malye ning kum patapnutu ura, malye kum winipnamne’ tenen, patanulule. Ara, Kristus arye, el mikip weik arinulula deice arye, ‘Malye ning arye, na talima kum lilonamnile’ tenen, nyapne.

¹¹ Winibuka dapia ulamtiniba, sirya talak ara, ‘Kristus arye, elti, diba’ tenena ninye nirya, diamice bukni, tuba tamubuka kam bukeipsilirye, im deice bulubuka deipnamsilak ara, ‘Na babye, dobuka, im deiceuk deipnamnil’ tenen, patanulule.

“Yesus arye, ‘Paulus winipnamle,’ tenepnuk ning winina ati, kintinilinune,” Paulus arye nyabuk yupu

¹² Na kayapu, anyapmasin ning nirya ara, ‘Akunum sirya dakuka winipse’ tenen, kum nyapsine. Tonda, ‘Nada, pia malye winina kum, diksukumnye akunum unune’ tenen, kum nyapsine. Apatanilye ning ara, min kum winipman bukni, Kristus arye nati, ‘Anye ap, na ap, talima dukdongobuka unimirye, diksukumuk ubuka pia unamname’ tenen, lyebuka talipnukce, tuba talinulule. ‘Winipnamle’ tenen, lyebuka talipnuk touk, na bidamnye, ‘Kristus dukdongopnirye, diksukumuk unamne’ tenen, pia pi deibuka, el piluk palibuka donune.

¹³ Na weit yapu atonun ninyeo, Yesus Kristus arye nati, ‘Diksukumuk ubuka, wininamle,’ tenepnuk ning nirya, dipkoprop min kum sirya dakse bukni, tonok mambul wininun ning ara, nyapnusine. ‘Ara, minop winilamse ning ara, batakukapsirye, aning tuba’ tenena kum bukni, aminyan nati winipnamnil ning ap, narye winipnamne ning ap, anyuk tenebuka unune.

¹⁴ Sik bik-bik abuka ban nang arye, pitin kilin ak bita dinmakirye, ‘Dekna ning dopropnuyap’ tenen, mikip arye, pia pi deibuka, bik-bik abuka balamak atonun unune. Ara, Allah arye, nati, ‘Im deice yalirye, dekna atonun ning dopropnamle,’ tenepnukce, yukupnuke. Yukupnukce, Yesus Kristus ap, na ap, kanye dukdongopnuka anya arye, el ap, neika unyama ati, anyuk tenebuka, pia pi deibuka, pil donune.

¹⁵ Nun kanye talima akunum wisipsuk ninye nirya ara, adiparyuk na nyapmasin touk, tenebuka wininamabe. Winibuka anyuk tenelamibya ani, yata ning do, tonok ning babye, anggun kanye yuk tenepmunyopura, Allah arye aning ati lipsisikuka peterepsilirye, lakak kipdeipnamsile.

¹⁶ Kanye yuk tenepmunyopura, lakak nyanamsil bukni, weik mambul ning ara, nun akunum kel kibuka diksukumuk unyap ning ara, ila tamubuka batakna kum, aninguk pia talibuka dobolbanamnyabe. Ila tamubuka tonap, talye-talye kum wininamnyabe.

¹⁷ Na nyanun yupu ap, na wininye ning ap ara, diba tenebikirye, dobolyangalamice ninye ap, anggun Pilipi nang ap, ansinibukabmunce, sik winilamak ning atonun wininamlulume. Tonda, “Wininamlulume, wininamlume,” nyabuka peterebupu ning uk, aninguk talibuka dobolbalamice ninye ara, moubuka eipmunce, sik winilamak touk, anggun Pilipi nang babye, atouk wininamlulume.

¹⁸ “Nun peterebupu ninguk talibuka, wininamlulume,” nyapsine yupu ara, urtalya ati kum nyapsine. Deiyok ara, ani. Minop nyalamsise touk, ila tamubuka tonap, engebukapnirye, ayupu deiyok ara, anye nyapsine. Ara, yuk nang weik, sik malye-malye winilamaka deice arye, ‘Kristus wanwanun yo deice obik ara, talye ning uk,’ tenebuka yaniltana nang atonun wininyake.

¹⁹ Aninye aning ara, sirya talak ara, Allah arye, weik wenebuka pia onamle. Oplirye, bataknamle. Anang ara, sikce, ‘Aning weik mambule,’ tenenyak ning ara, sik talye nong deice patalamle ning ap, sik babye, kanye deililana ning ap, anyuka. Sikce malye-malye winipmace ning deice arye, malye kanye bobuka, alye ulamtu bukni, amalye wininyak ning ati ara, maknya kintibuka kwalina ap, kimkimilana ap, unyake. Sik kanye talima nirya ara, talye tukwak deice ninguk delinyaka ati nyapsine. Tukwak ning deiceuk delinyaka ati, nyapsine.

²⁰ Sikda wininyak bukni, nunuk aning ara, nun mutuku kopropa ara, im deice tamuka. Nun yala ara, im deice nang kipdeipsuke. Tonda, nunce, nun Ninye Lyena Deiyoknye bira, ‘Dan talak im deice dolyanamsil do?’ tenen, elti, kanye deibuka, pia kalekuka dinauk unyabe. Dolyanamsilnye bira, yuknye kume. Ara, nun Ninye Lyena Deiyoknye, el uka. Ada, nun Weik Ninye Deiyoknye, Yesus Kristus el uka.

²¹ Yata ning do nirya, Yesus el weik mikip deice arye, aning-aning nirya talibuka, el amutamak delilule. Atouk el mikip deice aniryuk, nun talye tukwak nong bataksilirye, nun dobuka urasin pia yuk ning kipsilirye, el pia teleb im deice nong ulye touk ubuka, kwepdeipnamsile. El pia teleb ulye touk, nun babye, teleb winipsiliba unamabe. Na Paulus arye, anggun Pilipi ninye ati, nyapsine.