Penghotbah 9 - Eipomek

‘Tukwak ninye nirya ara, talye dadipnamake,’ nyabuk yupu

¹ Aning-aning nirya akunum laka nyapmasin ning ara, dipkoprob na akunum tenepsirye kel biksa ati, na talima noutam moubuka deipse. Ara, yata nang do nirya, sik moubuka tenebikirye, pia diksukumuk unyak nang ap, kel weik bikamik nang ap, anang nirya arye wininyak ning nirya ara, dipkoprob, Allah elcuk talilula ati, sikce wininamak ning ara, akunum bikuke. Aning nirya ara, nong upnamle do, nong kum upnamle do, teleb unamak do, sik pil dolamikca ani, aning nirya kum danamle do? Aning nirya ara, Allah elcuk aning nirya akunum tenelule. Nun tukwak nang ara, aning nirya kum kel biktibye. Ninye arye wininyak ning deiyok ara, yuk nang ati bico tenece arye unyak do? Akumopura, ‘Yuk nang nun likeʼ tenenyaka deice arye pil donyak do? Aning nirya ara, nun kum biktibye. Ati aminyan talak winipnamal ning ara, pia kum bikinyake. Ninye nirya ara, ‘Winipnamabʼ tenen, pirinyak bukni, sik dam yanuka upnamle ikin ning ara, nong kum upnamle ninguk, talye-talye ning ton aupnamle.

² Anyapmasina deiyok ara ani. Ara, yata nang do nirya, ikin ning ara, sik dam yanuka unamle. Diksukum unyak nang babye, malye unyak nang babye, ikin sik dam yanuka unamla ati, ikin deice aryuk pil dobuka unamake. Tonda, aminyan sirya talak ara, ninye tukwak nang nirya ara, dipnamabe. Ati ara, malye unyak nang babye, diksukum kibuka teleb unyak nang nirya babye, ikin ning sik deice yanamle. Tonda, kam ulamikca ani, aminyan talak ara dipnamake. Tonda, aning atouk, Allah arye, “Aning ara pia kum wininamlume. Aning winipmunyopura, na si erena ati, na dam ton kum yatume,” nyabuka, akunum laka nyapsuke. Ati, amem ning tuba wininyak nang ara, sung-sunga duna atonun unyaka ati, Allah dam kum yatinge. Amem ning kum wininyak nang ara, sung-sunga duna kum nang atonun unyaka ati, Allah dam tuba yatinge. Aning atonun, Allah arena ati, kam ning opnarye boyanuka uku dabuka arenyak nang babye, aning dobuka kum boyanuka arenyak nang nirya babye, ikin sik deice yanamle ati, aminyan talak ara sik nirya babye, dibina uk unamake. Pia teleb, ubuka diksukumuk unyak nang babye, malye ninguk talibuka, malye unyak nang babye, ikin sik deice yanamle ati, aminyan talak ara sik nirya babye, dibina uk unamake. Tonda, Allah ati, “Naio, an si erebuka kina ati, winibuka-winibuka unamne,” nyabuka nyalin yupu nyanyak nang babye, Allah ati nyalin yupu pia kum nyanyak nang babye atonun, ikin sik deice yanamle ati, aminyan talak ara sik nirya babye, dibina uk unamake.

³ ‘Yata nang do nirya, teleb unyak nang babye, malye unyak nang babye, ikin yanuka sik deice yangalamlya ani, aminyan talak ara, dibina uk unamake. Na kanye ara, tukwak mutuku im sirya, mutuku sirya nirya ara, aning pia malye ulule. Tonda, tukwak nang nirya ara, ninye tuba kam unyak talak noutam arye, ninye tukwak nang nirya, siktalima nirya ara, malye un ning tuba ulule. Tonda, sik talima nirya ara, moubuka tenina kumce, motana talin nang ap, walwal un nang ap, ulamak atonun nang ton aulule. Tukwak mutuku nang nirya ara, tuba kam unyak talak nirya, aning atonun kibuka unamake. Bukni, daulamikca ani, aminyan talak ara, dibina uk unamake. Aning nirya ara, winibikak eipsirye bikse.

⁴ Yatanye do nirya, kam tuba unmalye talak arye, ‘Aminyan talak ara, teleb ning ton na dam yatuba, telebuk uptinyeʼ tenen, Allah ati morolule. Ninye nirya arye aning atonun unyabe. Aning ara talye ati kum nyapsine. Deiyok ara ani. Winipmanto ara, nun Israel nang arye, kam ati, kanye kum delinyap bukni, kam tuba ulye kam ara, tuba kam ulula ati, tuba teleb ulule. Tonda, nunce, bai tam ulya yu weik pus, el si singa kus ati ara, ‘Se, apus ara mikip weik, ning ulule,’ tenenyap bukni, asinga kus akunum diplyopura, el babye teleb kum ulule.

⁵ Sik kam tuba unyak nang ara, ‘Se, aminyan talak ara, dipkoprob dipnamnarya tenen, akunum bikinyake. Wininyak bukni, sik akunum diamik nang ara, aning-aning nirya ara dipkoprob pia kum teninyaka ati, kum bikinyake. Sik akunum diamik nang ara, pil ton kum dopmanto unyaka ati, sik dengna ning tonap tabakuka pia kum dolonyake. Aninguk kum bukni, yuk nang arye, sik akunum diamik nang ara, sik si tonap kum teninyake. Anang nirya ara, adiparyuk luba kinyake.

⁶ Tonda, sik akunum diamik nang ara, tuba kam ulamik talak ara, bico tenelan ning ap, yuk nang ati, ‘Na likeʼ tenen ning ap, akunum kum dayuke. Tonda, sikce yuk nang talinyak ning ap, wininyak ning ati, ‘Se, naryuk aning taliptinye, aning ara, naryuk winiptinye tenelamik ning nirya ara, akunum kum dayuke. Aning ara, akunum diamika ati, tukwak mutuku noutam ara, yuk nang arye wininyak ning ap, talye dawinipnamle ning ap ara, Sikda neika pia kum uptinge. Tukwak mutuku noutam ulye ning nirya ara, sik ap pia kum uptinge. Na kanye ara, aning ara pia malye tenenune.

⁷ Ati ara, na kanye ara, ‘Pia teleb un ning ara ani,’ tenenune. Ara, nun nirya ara, talye kanye deibuka, din dinauk unamabe. Tonda, kanye wangalamak mek ara, talye luparabuka dinauk unamabe. Deiyok ara, Allah elda, anggun wininamlum ning nirya ara, akunum bikamuka ati, ‘Dawininamake akunuma,’ tenelule tenepne.

⁸ Tonda na kanye ara, anggun nirya arye, kanye deiplumce, anggun urasin deice ara, pia urasin pia teleb ning kipdamunce bol teleb baju ongonamlume.

⁹ Ati ara, ance an kil pia bico teneplum kil ap, neika kam unamlum talak nirya ara, kanye delilanamlume. Deiyok ara, anggun kam unamlum talak nirya ara, talye nong pia kum upnamle ning anggun dam yanganamle. Tonda, anggun ni Allah arye, ‘Aning ara wininamake,’ akunum tenepsuka ati, amutuku noutam unamap talak ara, el akunum tenyamukce, areamsuk touk unamabe. Ati ara, tukwak mutuku noutam unamap talak ara, nong kum upnamle ning, talye ning ara, nun dam yanganamsile. Ati ara, anggun tukwak mutuku noutam unamlum talak ara, pia pi dobuka, pil mikip arye donamlume. Allah arye, ‘Aning wininamake,’ akunum tenyamsuk touk wininmabe.

¹⁰ Ati ara, anggunce, ‘Apil doptinye. Apil talibuka piripnamne,’ tenepmunye touk, aninguk talibuka, pia pi dobuka, anggun pil donamlum talak nirya ara, mikip weik tonun pil donamlume. Deiyok ara, aminyan talak an pil dona ati, an kanye ara pia kum unamkile. Ara akunum diamik nang unyak mutuku, el si Sheol mutuku noutam ara, ninye arye teninyak ning ap, pil dona ap, kel weik bikin ning ap, mambul un ning ati, ‘Deiyok ara aniʼ tenen, moubuka tenen ning nirya ara, ton pia kum ulule. Tonda, ninye tukwak nang nirya ap, anggun ap, aminyan talak dipmunyopura, anggun babye, otam bimunyopura, pia asukumuk unamlume.

¹¹ Tonda, ‘Aning nirya kel biknamneʼ tenen, epra balamse talak ara, tukwak mutuku noutam ulamik nang ati, dipdesirye bikse. Ara bikbik an ning ati, mikip arye bikbik abuka banyak talak ara, mikip weik arye bikbik abuka banman nang arye, atalak nirya kum bisinyake. Aning atonun, yuk-yuk mutuku nang arye mal olan talak babye, sik mikip pia weik nang arye, yuk daunyak mutuku nang ati, adiparyuk kum oltakanyake. Tonda, sik kel weik bikamik nang ara, atalak nirya sikda din ning dobuka kum dinyake. Tonda, ‘Deiyok aniʼ tenen, mambul ning ati, weik tonun akunum kum bikamik nang arye, pil weik donyak bukni, atalak nirya ara sikce sik dengna ati, dengna weik ning ap, bona ap ton kum dolonyake. Aning atonun, pil pia teleb ubuka donyaka deiyok nang ara, sik pil dona deiyok nang arye, sikti, kanye deibuka, teleb ning kum arenyake. Deiyok ara ani. Nunce kum tenipmanto ning, nun dam ikin weik ning yanamsil talak ara, pia kum biktibirye, kum teneptibye. Nun tukwak nang nirya arye, ‘Winipnamabʼ tenen, piriptibye bukni, ikin ning nun dam yalyopura, aning deice arye winipmanto kum usulule.

¹² Aning ara, talye ati kum nyapsine. Yata nang do nirya ara, ‘E, aminyan talak noutam, asum deice arye, ikin weik ning yanamle. Asum deice arye imun ning ton yanamsil,’ tenen, kum biktibya ati, kum laka nyaptibye. Winipmanto ara, talye lakuka balamle maka arye, kum tiniptu bukni, mangkau kanye bobuka banmalyeba, ninye arye maka wena wemikca pum bisik wekelbiliba youlamle touk, nun babye atonun wininamabe. Tonda ikan youn ning, el si ara jala, mek pum tam dongobuka kalikmakiba, ikan mangkau arye bilyeba, youlamle touk unamabe. Aning atonun, ninye arye, ‘Se, ikin ning ara, atalak arye nun dam yanamle,’ tenen, aning min kum yanamlye talak, adiparyuk kum biktibya ati, kum laka nyaptibye. Nun tukwak nang nirya ara, dibina uk unamaba ati, nun mangkau kanye bobuka unyap talak ara, minop aryuk, ikin ning yalyopura, imun kanye bobuka unyabe. Aning min kum winipsilye talak ara, kum biktibye.

Moubuka teninamak ning ap, malye teninamak ning ap ati, nyabuk yupu

¹³ Na Peterena Deiyoknye birye anggun nirya ati, ayupu ton nyapsine. Tukwak mutuku noutam ara, aning ton eipsirye bikse. Ara, ton tam nang arye, kel weik bikamik ning bikuka unmekba, eipse ati, narye, ‘Se, aning winibuka unmaka ara, pia telebe,’ tenepse.

¹⁴ ‘'Amutuku noutam ara, tonoknye bira, dipkoprob weik tonun kel bikamuka deice arye uamuk ning ara, pia teleb wininmokba, eipse. Ara, tonok mutuku noutam ara, ninye arye mitik asik domika noutam ara, ninye mitik tonun anyasik noutam ulamike. Talye kanye bobuka daulamik bukni, aminyan talak ara, pia mikip ninye deiyoknye, yuk mutuku Raja birye, “Amutuku nang opnyopura, sik bona nirya alubuka dopropnamnarya!” nyabuka, sik dam yayuke. Yayukopura, ‘Amutuku dana-dana antanap dongobuka domik keil poka deice tam welepnirye, sik mutuku noutam weknyopura, anang nirya obuka sirya daknamne,’ tenebuk. Winibuka tenebuka ati, tuku weik tonun palibukce, sik cang keil poka dam deibukce kintinibuk.

¹⁵ Kintinibuk bukni, amutuku noutam ara, ninye talye bona utotoa kumnye bira, aning-aning nirya pia kumnye tonok ulamuk. Anye bira, moubuka bikinanye ulamuk. Winilamuka ati, el weik tonun kel bikamuk ning arye, el mutuku nang ati melibuka, lyepdobuk. Bukni, amutuku noutam ‘Telebe,’ nyana kumce, elti, tonok ning babye, kum arebik. Sikce elti, pia kum tenelamikce, akunum lubakina uk ulamik.

¹⁶ Aning nirya eipsirye biksa ati, ‘Se, mikip weik una ara mambul ulul bukni, dipkoprob pia teleb ning ara, kel weik bikina uka. Bukni, atalye bona utotoa kumnye, el kel weik bikamukce winibuk ning ara, sik amutuku nang arye, ‘Dauplye, elda mambul kume,’ tenebikce, elti, luba kina uk ulamik. Tonda, anye birye, “Teleb un ning ara ani, ani,” nyabuka laka nyalamuk yupu nirya babye, sikce kum kekelamik.

¹⁷ Aning deice arye kel bikse. Ara, pia teleb ning ara, el kel weik bikinanye birye, namin asa arye mur-mur alamle yupu nirya ara, mambul weik ulula ati, ninye arye aning moubuka kekeptingce kel biklamtinge. Bukni, tonok ninye deiyoknye Raja mikip weik uptu bukni, el mutuku noutam, walwal uk ubuka unyak nang ara, weik yupu arye nyaptua babye, sikce pia moubuka kekena kumce kum bikinamake.

¹⁸ Yin talin nang arye bonyak yin ap, mal ap, yuk ninye on ning ara, mitikto mambul ulul bukni, kel weik bikina deiyok ning ara, dipkoprob pia mambul ning ulula ati, pia teleb ning ara, akunuma. Tonda, walwal nang tonok, el kanye walwal arye nyaplyopura, pia teleb un ning weik sukum babye, anye birye ateleb ning nirya ara, malye kilisulule.