Penghotbah 8 - Eipomek

“Ninye deiyoknye, Raja nyalul yupu ara, kekenamlulume,” nyabuk yupu

¹ Kel weik bikinyak nang ara pia telebe. Yata nang ton, sik kel weik nang atonun unyak do? Ton kum unyake. Tonda, yata talye nang arye, mambul weik ning nong deiyok ning ara, laka nyapsiting do? Kume, sik kel weik bikinyak nang aryuk, nong weik noutam ara, kel bikikirye, sikcuk aning laka nyapsitenge. Kel weik bikin nang ara, sik kanye delilamikirye, sik si ara liltakana uk unyake. Winibuka libikiba, sik urasin ara teleb ulule. Yu nang arye, sik urasin yu tenen nang ara, atonun kum unyake.

Ninye deiyoknye Raja birye, nyanamle yupu ara, ‘Moubuka tenipmunce, aning talibuka unamlume,’ nyabuk yupu

² Ninye deiyoknye Raja birye, “Aning wininamlume, aning ara pia kum wininamlume,” nyabuka, nyapdeipsilye yupu ara, kekepmunce, aning moubuka talipmunce unamlume. Deiyok ara, minop talak ara anggunce Allah ati, “Nun ni Allah, ance wipdeipsulumnye Raja birye nyapnamsil yupu ara, kekebibirye, dobolbanamabe,” nyabuka, nyalin yupu deice arye akunum nyapdeipluma ati, aninguk dipkoprob wininamlume.

³ Ati ara, ninye deiyoknye Raja bira, elce sik malye unyak nang ati, ‘Winipnune,’ teneplyopura, aning nirya ara, adiparyuk winipnamle! Ati, elce yupu nyasilye talak ara, moubuka kekepmunce, pia teleb ubuka teninamlume. Anggunce, ‘Aning kum kekepnamapʼ tenen, minopce el dam batakuka, kum binamlume. Tonda, malye nang arye, ‘Raja nyasulul yupu pia kum kekepnamapʼ tenen, el yupu yanibikirye, elti, batakanyak nang ap, neika kum unamlume. Pia teleb ning ara, anang dam ara batakuka, kisikdopmunce yukakuk banamlume. Malye upmunyopura, Raja birye yu uplirye, el teneplye touk, adiparyuk anggunti, weik tonun wenebuka opnamsile!

⁴ Aning ara, talye ati kum nyapsine. Deiyok ara, ninye deiyoknye Raja arye, “Winipnamne,” nyalul yupu nirya ara mikip weik ulule. ‘Winipnamne,’ teneplyopura, adiparyuk aninguk wininamle. Ati, yatanye birye, ninye deiyoknye Raja ati, weneplirye, “Anda yata wiripmalam do,” nyabuka, elce nyalul yupu kekena kumce, mania kanye bobuka, yupu sekting do? Kume, aning kum winiptibye.

⁵ Dipkoprob ning ara, yata kel weik bikinyak nang do nirya ara, ninye deiyoknye Raja arye, “Anggunda wininamlume, aning ara kum wininamlume,” nyabuka nyapsilye yupu ara, adiparyuk wininyake. Anang ara, yu kum tenenamla ati, anang wenebuka kum opnamle. Ikin ning sik dam kum yanamle. Sik kel weik bikinyak nang ara, moubuka tenebikirye, ‘E, elce nyapmasil yupu ara, akunum kekepmaba ati, winibuka-winibuka unamabe. Anyapmasil yupu ara, wini talak arye winipnamapʼ tenen, moubuka tenenlamake.

⁶ Aning ara, talye ati kum nyapsine. Deiyok ara ani. Yata un ning do nirya, aning-aning nirya ara, el lo ati ara, teleb talak ara akunum aupmale. Tonda, awinin ning ara, el kamo una ati teleb ning ara, akunum aupmale. Ati moubuka tenepmunce, Raja arye nyasilye yupu atonun ubuka wininamlume. Bukni, tukwak nang nirya ara, dipkoprob dipnamap bukni, ‘Dan talak arye dipnamne do?’ teneptibya babye, yatanye birye, aminyan dotalak winipnamsil ning ati, atalak arye, ‘Aminyan talak ara winipnamsil nyabuka, laka nyapsutu do? Kume, aning ara, kum winiptinge.

⁷ ‘Aminyan talak winipnamleʼ tenen, dinyak ning ara, ninye yuk nang arye ton pia kum bikinyake. Aning ara, ton bikina kumcuk, aminyan talak winipnamle ning atibuk winipnamle nyanyake. Aning ara, aminyan yata wiripnamle do?

⁸ Tonda, yata nang do nirya, yatanye birye, kumanya ati, “Asukumuk peiyang-peiyang anamlume, asukum ara, tunim apnalume,” nyabuka, kumanya ati, yupu sektu do? Kume aning ara, kum winipmanto. Aning atonun, tonda ninye dibin ning yatopura, yatanye birye, “Dauplye, aning ara, kum talipnamnila ati, nara kum dipnune,” nyaptua deice aryuk, tuba kam uptu do? Kume, aning ara kum winiptibye. Aning atonun, ninye olan talak, tonoknye birye, ‘Kume, na ilil ati, adiparyuk batakuka, na mutuku tamubuka binamneʼ tenen, mal olanak batakuka, kisikuka yukak bindoptu do? Kume, aning kum winiptinge. Tonda, yata nang do nirya, malye un ning talibuka malye unyaka deice arye, ikin weik unamakak arye batakuka, sik bidamnye aryuk sik bidamnye ati, lobuka, lyepdating do? Kume, malye unyaka deice arye, dipkoprob kum lyepdatinge.

Ninye teleb unyak nang ap, malye unyak nang ap ati, nyabuk yupu

⁹ Aning-aning nirya ara, ninye tukwak nang mutuku sirya im sirya nirya arye wininyak ning nirya ara, narye moubuka dinmasirye eipse ning ara, amutuku noutam ulamik nang nirya arye winilamik ning eipse. ‘Aning nirya ara, deiyok ning dan do?’ tenen, moubuka tenilamse. Tonda, narye eipse ning ara, ton nang ara, ninye deiyok kibikirye, sik amu tam unyak nang ati, “Wininamlume, wininamlume,” nyabuka, mikip weik kililamikirye, yupu nyanyake. Wininyak deice arye, sik amu tam unyak nang ati, ikin ning dobuka, sik nong deice deibikiba, imun kanye bobuka unyake.

¹⁰ Tonda, aning nirya kel bikina ati dilamsirye, elamse talak ara, aning ton eipse. Ara, na asing arye dilamsiba, malye ning talibuka ulamikce, weik yupu nyalamik nang ton dibikba, akunum tuku lukike. Bukni, sik anang ara, min talak ara sikce ton, Allah el si eren aik dam yangalamikce, Allah ati aren ning arelamikba, sik ulamik mutuku tuba kam unyak nang arye anang ati, ‘Se, sikda mambul nang ulamik,’ nyabuka, si erenmekba, eipse. Ati, na kanye ara, awininmek ning nirya ara, pia nong una kum, talye ninguk winimeke. Winipmanto ara, kumanya mikip arye don maliba, ‘Aning talipnunʼ tenen, bikbik abuka dobolbitua babye, kumanya ara kum talipmanto ati, aning nirya ara nong pia kum upnamla ati, ‘Aning ara, talye ning uka tenepne.

¹¹ Aning ton eipsirye kel bikse. Ara yata deiyok ati, tukwak nang nirya arye, sik talima noutam ara, ‘Malye un ning ap, yu arye malye un ning ap ara, talye luparabuka winiptibye,’ tenen, wininyaka deiyok ara ani. Ara, sikce malye weik ubikiba, deiyok nang arye anang tomobuka, ninye yupu lipsisikuka bokolinak ara, minopce kum bobanyake. Tonda, sik malye ulamik ning wenen ning nirya ara, ‘Winipnamsiabe,’ nyabuka, talye nyanyak bukni, dipkoprob ning ara, minopce sik nong deice ikin ning kum delinyake. Ati, sikce talye mangkau arye malye ninguk tuba wininyake.

¹² Winibuka unyak bukni, narye kel bikse ning ara ani. Sik malye ning talibuka unyak nang kan-kan arye, tonoknye birye malye un ning nirya ulul ning ara, yupa pia weik seratus arye malye wililucuk, tuba kam ulule. Tonda el una ati lo ara, pia weik tonun upnamle. Bukni, na kele, aminyan sirya talak ara, ikin weik ning el nong deice yanuka upnamlarya! Bukni, yata nang do nirya, Allah arye, Aning ara wininamlume, aning ara pia kum wininamlume,’ nyapdeiamsuk yupu, moubuka talibikirye, dipkoprob telebuk ubikcopura, aminyan sirya talak ara, sikda tuba telebuk unamake. Sik anang arye Allah ati, Elda pia mambul weikʼ tenen, ilil unyaka ati, aminyan sirya talak ara, Allah arye sikti, teleb kipdeipliba, sikda tuba telebuk unamake.

¹³ Bukni, sik malyeuk unyak nang ara, Allah dam bikca babye, sikce moubuka tenina kumce, Elda pia mambul kumnyeʼ tenen, elti, ilil kum ulule. Aning utenenyak nang, sik kam una ara, minopce kanya kum danalamle touk, sik babye kum danin banamake. Aning utenenyak nang ara, sik kam una ara, weik tonun ton kum unamake. Adiparyuk minop dipnamake. Anang ara, Allah Yahweh ati, kanye kum delinyak nang ati nyapne.

¹⁴ Tonda, tukwak mutuku noutam dilamsirye, eipse ning ara, malye weik ning elilamsa ara nyapnusine. Ara, nong pia kum upnamle talye ning, malye weik ning ara ani. Atalak ara, ton nang pia dipsukum unyak nang bukni, ton deiyok nang arye, anang ati, ikin ning dobuka, sik deice delinyake. Ara, dipkoprob malye weik wininyak nang ati wenelamak touk, dipsukum unyak nang ati, wenenyake. Aning atonun, yuk ninye ton malye ninguk wininyak nang ati, deiyok nang arye kum wenenyak bukni, anang ati teleb diksukum unyak nang ati, ‘Teleb unmaluma ati, kum wenepnamsiabe,’ nyanyake. Ikin ning sik nong deice kum delinyake. Ati, aning wininamaka ati na kanye ara, aning nirya nong pia kum upnamle ninguk, talye dem ati wininyake.

¹⁵ Nong kum upnamle ning, pia talye-talye uk wininyaka ati, na kanye arye, ‘Wininamabe,’ tenepmana ara, nyapnusine. Ara, anang nirya ara, moubuka tenina kumce, pia kanye deibuka unamake. Tukwak mutuku im sirya, mutuku sirya nirya unyak nang nirya arye, talye kanye bobikirye, din dina ap, mek dina ap, tonda talye kanye deipdanuka un ninguk unamake. Winibikcopura, tukwak mutuku tuba kam unyakce, ikin pil donamak talak nirya ara, din dina ap, mek dina ap, unyakce, kanye deipdanuka un ning ap, pia unamake. Allah arye tukwak nang kam una ati lo tuba aresilye talak ara, winibuka unamake. Na kanye ara, teleb un ning ara aning anyak tenepne.

¹⁶ Narye, ‘Kel weik bikin ning moubuka tenipnirye, kel bikmane,’ tenen, pirilamse talak ara, tukwak mutuku im sirya, mutuku sirya nirya ara, ninye arye pil donyak ning nirya ara, dipdesirye, akunum eiamse. Eibuka bikse ning ara, anang nirya ara, teleb kibuka kum manyake. ‘Se, yata wiripnamap do?’ tenen, keting noutam talak babye, lukunyan noutam talak nirya babye, teleb ubuka kum manyake.

¹⁷ Tonda, narye, ‘Kel weik bikin ning nirya ara, moubuka tenipnirye, kel biknamneʼ tenelamsirye, pirilamsa deice arye dipkoprob kel bikse ning ara ani. Ara, tukwak mutuku sirya im sirya nirya ara, Allah arye teneplye touk, ulule. Bukni, tukwak nang nirya ara, aminyan winipnamle ning ati, ‘Se aning kel biktibyeʼ tenen, pia pi dobuka, piribuka biktinga babye, aning kum biknamake. Ton nang ara, “Kume, nunda kel weik bikamupu nang unyaba ati, aminyan winipnamsil ning ara, nun kel ati, aning laka nyapsitibye,” nyabuka, talye yupu uk nyaltakanyake. Bukni, na kele, pia dipkoprob ning ara, anang babye, aminyan winipnamsil ning ara, sik babye, pia kum kel biktinge.