Penghotbah 7 - Eipomek

“'Kel weik bikin ning ara ani,” nyabuk yupu

¹ Nun tukwak nang unyap talak nirya ara, yuk nang arye, ‘E, anye bira, pia dipkoprob, diksukum unanye ulule,’ nyabuka, si erepsikirye aning nyapsikcopura, “Aning ara pia telebe,” teneptibye. Winipmanto ara minyak mek, dengna pia weik ning, aupmatopura, Aning ara mitik teleb teneptibye bukni, yuk nang arye, nunti, Elda pia diksukum unanye ulule,’ nyapsitingopura, Aning ara pia teleb teneptibye. Tonda, na kanye ara, nun nin yapu arye deipsik sum ara, mitik teleb sum bukni, aminyan talak nun dipnamap sum ara, weik teleb sum ulule, teneptibye,’ tenepne. Tonda aning atonun, nun delisinyak talak ara, mitik teleb bukni, nun dibinyap talak ara pia telebe, tenepne.

² Aning atonun, pia teleb ning ara ani. Ninye dibikcopura, deipmakce aik ara bimunce, anang ap engena ara, pia telebe. Bukni, aning atonun kum buk, talye kwalya kwalibikirye, din dibuka talye kanye bobuka unmacak bimunyopura, aning ara mitik telebe. Deiyok ara, nun nirya ara aminyan talak dipnamabe ati, ‘Aning min kum upsilye talak ara, kam tuba unyak nang arye, ‘Nun aminyan talak dipnamap ning moubuka biktibyeʼ tenen, unyabe. ‘Anggun babye ton winiptumʼ tenen ati, ayupu laka nyapsine.

³ Na kanye ara, akutulamab talak ara, mitik teleb bukni, pia teleb weik ning ara, ikin upsilyeba, imun kanye bobuka, engenyap talak ara, teleb weik tenepne. Deiyok ara, mambul kanye bobuka unyap talak ara, nunce, ‘E, teleb un ning ara aning do, aning do?’ tenen, moubuka tenenyabe. Ati, imun kanye bobuka unyap talak ara, nun talima mikip kilisulule. Bukni, akutunyap talak ara, mambul ning moubuka kum teninyabe. Talye ninguk teninyabe.

⁴ Tonda, na kanye ara, ninye ara, tonok aik bulupmakirye, talye kanye bobuka unyakce, akutulamak talak ara, pia walwal nang arye aning ati, kanye deibuka unyake. Sikda ato aik wekelbana ati, pia piribuka mikip arye dobolbanyake. Sik talima noutam nirya ara, mambul weik ning ati, moubuka tenen ning ara,ton kum ulule. Bukni, sik kel weik bikamik nang ara, ninye dibikiba delinyak aik binuka bukmakirye, ‘E, nun nirya dipnamaba ati, kam tuba unamap talak ara, teleb uning dan do, malye winin ning dan do?’ tenen, moubuka tenebikirye, bikinamake. Ati ara, na kanye ara, pia teleb ning ara, ninye dipmace ati, delinyak aik bana ara, teleb uka.

⁵ Aning atonun ton, pia moubuka tenilulnye birye, wenenamsil talak ara, moubuka kekenamlume. Elce nyapnamsil yupu ara, mambul weike. Bukni, walwal kanye bobuka, malye unanye birye, mot nyanamle ning ara, moubuka kum kekenamlume. Elce nyanamle ning ara, mambul kume. Talye yupu uk nyanamle.

⁶ Deiyok ara ani. Sik malye un nang arye nyanamak yupu ap, wininamak ning ara, nong kum unamle ninguk ulule. Ati, sikce nyanamak yupu ara kekena meme. Winipmanto ara, pia koulubuk yo do, sisal semuk tace ning do, aning deice uku dinibikiba, uku dilirye lelim nyalamle ning kekeptibya babye, adeice arye mambul yupu kum kekenamabe. Alelim ara, talye lelim uka. Sik walwal nang arye nyanyak yupu babye, alelim atonun ulula ati, sikce nyanyak yupu ara, nong dipkoprob kum upnamle. Ati ara, ayupu kekena meme.

⁷ Dipkoprob yupu nyapsine. Kel weik bikamik nang unyak bukni, sikce tilila yupu nyabikcopura, sik babye, akunum walwal nang atonun unyake. Sikce yuk nang ati, sik nong deice ikin ning dobuka deibikcopura, awininyaka deice arye, sik bidamnye arye, sik bidamang ati, walwal kililanyake. Tonda, yata nang do nirya, malye una ati, namin kin yo bok arebikiba, doprobicopura, adeice arye, sik talima noutam nirya ara, malyeuk kililanyake. Ati dortalak ara, dipsukum ninguk teleb ubuka kum tenenamake.

⁸ Na kanye ara, yata un ning do nirya, deiyok koun talak ara, mitikto telebuk ulule. Bukni, pia teleb ning ara, sirya dakan talak anyak pia teleb tenepne. Tonda, ninye talima noutam ara, maknya kintinina ap, kwalina ap, talima erelana ap ara, pia malye bukni, yuk nang ning ara, ‘Aminyan talak yata wiripnamsil do?’ tenen, namin asa arye, talye tunim abuka ukirye, kanye deibuka unyak nang ara, pia telebuk unyake.

⁹ Ati ara, moubuka teninamlulume. Anggun talima noutam ara, minopce derena ap, yu tenina ap ara, meme. Deiyok ara, sik walwal kanye bobuka, malye unyak nang arye, sik talima noutam teninyaka ara, yu weik upliba, pia malye ning teninyaka ati nyapsine. Sik talima noutam ara, yu weik tenen ninguk tenebikirye, walwal un ninguk wininyake.

¹⁰ Ura, anggunce, aning kum nyanamlume. Ara asina ati, “Minop talak ara yata ati pia teleb ulamik bukni, wini talak ara, yata ati, malyeuk unyap do? Yata deiyok ati, nunda ikin uk unyap do?” nyabuka, pia kum asipnamlulume. Deiyok ara, anggunce ato yupu nyapmunye talak ara, anggun kanye moubuka tenina deice arye kum asilulume. Pia walwal nang arye ayupu yanuka asinyake.

¹¹ Ura kam tuba unyak nang ara, dipkoprob moubuka tenebikirye, weik tonun kel bikinyak nang ara, telebuk unyake. Sikda, moubuka tenebikirye kel bikinyak ning, nong upnamle ninguk nyanyake. Winipmanto ara, sikce nyanyak yupu nong ara, mambul weik ning ulule. Ati, sik nong dodarapce taleamik ning dobuka, sik deiamik mapu ati arenyak mutuku ulye ning talibuka ulamle atonun, sik kel nang arye nyanyak yupu babye, pia telebuk ulule.

¹² Aning nyapmasin yupu deiyok ara ani. Ara, aning atonun, yo bok weik talinyak nang ara, ‘Se, aminyan talak ikin ning na dam yalyeba, yata wiripnamnil do?’ kum tenenyake. Sikda talye kanye bobuka, talima namin asa arye, tunim abuka unyake. Aning atonun ton, sik weik tonun akunum kel bikamik nang arye, ‘Se, aminyan talak ikin uplyopura, yata wiriptibye do?’ tenen, unyake. Ikin ning sik dam yalyopura, sik kel weik bikamik ning teninyaka deice arye, teleb pil dokirye, lyelanyake. Winibikirye, kanye deibuka telebuk unyake. Sikce kel weik bikamika deice arye, teleb ubuka unyake.

¹³ Ura, yuk mambul yupu ton nyapnusine. Anggunda pia moubuka teninamlume. Ara, Allah elce pil domuk ning ap, tuba pil dolye ning ati ara, pia moubuka dimunce moubuka tenenamlume. Deiyok ara, yata nang arye do? Allah elce kwalipdeiamtu ning ara, yatanye birye tamubukapturye, moubuka lipsisikuka deiptu do? Kume aning ara, kum winiptue.

¹⁴ Ati ara, Allah arye anggunti, akunum teleb kibuka melisiliba, aning-aning nirya weik auplyopura, kanye deibuka, pin-pin asa arye unamlume. Bukni, ikin ning anggun dam yaliba, kanye imun upsilyopura, pia moubuka teninamlume. ‘Nun ni Allah arye abitinye ning nirya ara, kintinibuka arepmasila ati, akunuma. Talye kanye bobuka telebuk unamabe,’ tenenamlume. Allah arye ikin ning ap, caknam ning ap, yuk-yuk aresulula deiyok ara, ani. Ara, ‘Sik tukwak mutuku unyak nang arye, aminyan talak upnamle ning ara, pia walwal uk unamake. Aning ara, kel bikmanto kum unamakʼ tenen, kwepdeipsuke.

¹⁵ Nara, Peterena Deiyoknye birye nyapsine. Na kam ulamse talak nirya ara, nong kum upnamle ning ati dobolbalamse bukni, wini talak ara, pia mambul weik ning, nirya akunum elilamse. Ara ton tam ning ara, Allah arye, Aning ara wininamlume, aning ara pia kum wininamlume,’ nyapdeipsuk yupu, pia moubuka talilamikce, daulamikani aminyan talak, dipkoprob pia telebuk tuba unmek ani dibike. Tonda, yuk nang, sik cang arye kam ulamik bukni, pia malye un ning talibuka ulamik nang ara, malyeuk ulamika ani, sik tuba malyeuk ulamik talak ara, sik adiparyuk dibike.

¹⁶ Ati ara, na kanye aryuk tenepse ning ara, nyapnusine. Ara, anggunce, ‘Se, nara pia teleb kibuka, diksukumuk pia unamneʼ tenen, pia pi dobuka pirilulumce, mikip weik pil ara kum donamlume. Aning atonun ton, anggunce, ‘Se, nara dipkoprob kel weik bikna deiyoknye unamneʼ tenen, pia pi dobuka piripmunce weik pil ara kum donamlume. ‘Deiyok ara, weik pil doptinyeʼ tenen, pia piribuka mikip pil dolamluma deice arye minop mitang usilyeba dipnamlume. Ati aning ara, winina meme.

¹⁷ Aning atonun, pia yu kanye bobuka, pia malye una ara pia meme. Tonda, pia walwal kanye bobuka, nong kum upmanto ning unyak nang arye ulamak touk una ara pia meme. Yata deiyok ati, anggun dibin talak min kum upmasilbuk, walwal ululuma deice arye, minopce dipnamlum do?

¹⁸ Na kanye arye tenenun ning ara, nyapnusine. Ara, pia teleb ning ara ani. Ara, kel weik bikin ning ara, moubuka talipnamlume. Walwal un ning ara, bataknamlume. Teleb un ning ara, moubuka talipnamlume. Malye un ning ara, adiparyuk batakmunce leibuka kisikdopnamlume. Winibuka unamlum talak nirya ara, nun ni Allah arye, “Aning wininamlume, aning ara, pia kum wininamlume,” nyapdeipsuk yupu, moubuka talipmunce, Allah ati ilil upsilyopura, winipmunya deice arye, dipkoprob nong unamle ninguk, winipnin banamlume. Winipmunyopura, Allah arye, teleb updeipsiliba, telebuk unamlume.

¹⁹ Winipmanto yupu ton nyapnusine. Ara, sik pia mikip weik nang, takubarye nang tonok mutuku weik asik noutam, uptingce, kaliketingopura, amutuku ara, mitik mikip unamle. Bukni, pia teleb ning ara, kel weik bikamting nang arye tonok mutuku weik asik noutam uptingce, teleb yupu nyaptingopura, amutuku ara, dipkoprob mikip weik mutuku unamle.

²⁰ Tonda, narye bikse. Tukwak mutuku im sirya, mutuku sirya nirya ara aunyak nang kan-kan arye ton nang ara pia teleb ubuka unyak nang ton unyake. Bukni, ateleb unyak nang babye sikda ton talak ara, malye ton wininyake. Tukwak mutuku noutam ara, malye ning tonok babye, kum upmanto ning ara, pia kum ulule. Ninye tukwak nang nirya ara, malye un ning pia wiminyake.

²¹ Tonda, anggun kam unamlum talak ara, ninye arye yupu nyanmak ning nirya ara, pia kum kekenamlume. Deiyok ara, ton talak ara, talye nang arye, ‘E, anye bira, el pil melinanye birye, el deiyoknye biti sun yupu nyabukba, kekebupu,’ nyabikiba, kekebuka bikicopura, ikin kanye bobuka unamlume. Ati, ninye arye talye nyanyak yupu nirya ara kekena meme.

²² Tonda, anggun babye, anggun talima noutam ara, anggun kele. Aning atonun anggunce, sik yuk nang ati, yu upsukba, moubuka tenena kumce, sikti, ton yupu nyaplume.

²³ Ura, aning-aning nirya ara, narye, na kel weik bikamse ning ap, moubuka kanye tenina ap deice arye, aning nirya ara asipdese. Ara, dipkoprob kanye tenina teleb ning ara, yate ning ulul do? Kanye tenina talye ning ara dan ning do?’ tenen, piribuka asipse. Tonda, narye, ‘Se, kel weik bikina deiyoknye uptinyeʼ tenen, patalamnukba, piripse bukni, pia teleb ubuka kel kum bikamse. Mitik walwal kanye bon ninguk, tuba unulule. Pia teleb kel weik bikina deiyok ning ara, na dam arye, yuk pera atonun ulula ati, min kum dopropse. Aning eipnyopura, asipdenamne.

²⁴ Yatanye do, kel weik bikina deiyok ning ati eipnamle do? Atenen ning ara pia pera weik tonun daulula ati, tonda nun talye tukwak nang arye, aning kel bikman kumto ulula ati, eptibye bukni, kanam aryuk kum biktibye!

²⁵ Bukni nara, ‘Adibaryuk moubuka tenipnirye, kel weik bikina deiyok ning ati, piribuka biknamne. Tonda kel bikin ning ara, ‘Dan sukum do?’ tenen enamne. Tonda aning nirya ara nuknamne. Winilamya ani, atenen ning ara eipnirye, kel biknamne. Winipnirye aning nirya ati asinamne ning ara, nuknirye, “El nomor nirya ara winibuka ulule,” nyabuka, laka nyanamne,’ tenepse. Tonda, narye winilen ning akunum kel biknyopura, “Dipkoprob malye un ning ara ani. Pia teleb, diksukum un ning ara ani,” nyabuka laka nyapnamne tenepse. Na kel bikse ning ara, ani. Ara, ‘Malye ning talibuka un ning ara, pia walwal un ninguk ulule. Tonda, moubuka tenina kumce, talye luparabuka walwal arye wininyak ning ara, motona talin nang ulamaka atonun unyake,’ tenepse.

²⁶ Tonda, aning ton kel bikamse ning ara ani. Ara, ninye akunum dibikcopura, dipkoprob kanye imun ning usulule. Bukni, kanye imun weik usulul ning ara laka nyapnusine. Ara ani. Ninye arye talye yolamak kilapu ara, pia malye weik unyake. Akilapu ara, Ninye ton tomopnuyapeʼ tenen unyake. Winipmanto ara, ninye arye, ‘Ikan tomobibirye, obuka dipnuyapʼ tenen, dolamak ning el si ara jala, kintinibikirye, mekwen pum tam dongobikca deice arye, ikan tomobuka onyake. Aning atonun, sik talye yolamak kilapu babye, Ninye tomopnuyapʼ tenenyake. Akilapu sik kanye ara, basam ona ati tapu arye, wena welamak touk wininyake. Sik taruk ara, rantai tapu atonun ulula ati, anang ara walwal nang arye akilapu ara, epdakirye iribikcopura, akunum tapu koubuka delilanyake. Ati akilapu arye anang akunum tomobikcopura, loplobuka kum binmanto unyake. Yata nang do, sikce Allah el yupu ati moubuka kekebikirye, dobolbanyak nang ara, Allah arye anang ati kanye delilule. Anang ara, diksukumuk unyaka ati, sik talye yolana kilapu arye, anang kum tomoptinge. Aning ara, Allah arye nyalul yupu moubuka kekebikirye, dobolbanyake. Bukni, sik malye ninguk talibuka, malye weik unyak nang ara, akilapu arye, ato nang ara kanam aryuk tomonyake. Ati, ‘Winipsikcakʼ tenen, anggun nirya moubuka tenipmunce, kalikilanamlume!

²⁷ Ura, nara Peterena Deiyoknye birye nyapsine. “Aning-aning nirya ara narye eipnamne. Akunum eipnyopura, aning nirya nuknirye, ‘El nomor ara ani,’ nyabuka, laka nyapnamne, tenepse.

²⁸ Tonda, ‘Kel weik bikina deiyok ara, eipnirye kel biknamane,’ tenepse bukni, narye tuba yuk nang dam arye laka nyan ning ati ena uk ulamse bukni, kum eipse. Bukni, aning ara eipse. Sik ninye yupa pia weik, seribu nang kan-kan noutam dipdesiba, pia diksukum, teleb ubuka ulamuknye bira, tonok eipse. Bukni, sik yupa weik seribu (1.000) nang kan-kan noutam ara, pia diksukum ubuka, teleb ulamuk kil ara, pia tonok babye, ton kum eipse.

²⁹ Bukni, tonok ning kel bikamse ning ara, laka nyapnusine. Ara, ani. Nun ni Allah arye kwepdeipsuk talak ara, Diksukum unamakʼ tenen, pia teleb kibuka, kwepdeipsuke. Bukni nun tukwak nang ara, nun talima deice aryuk, ‘Yata wiribuka, nunce malye ninguk taliptibirye, malye un ninguk winiptibye do?’ tenen, malye kanye bobuka, talye-talye pil dobuka, malye winin bisikuk banyabe. Ati ara, malye ninguk talibuka unyabe.