Penghotbah 5 - Eipomek

Peterena Kel Weik Deiyoknye birye, “Allah dam yamunce, yupu min kum nyapmunye talak ara, moubuka tenipnamlume,” nyabuk yupu

¹ Yupu min kum nyapmamunye talak aryuk, moubuka tenipnalume. Talye luparabuka nyana ara meme. Tonda, min nyanmamunye talak arye, anggunce Allah ati, “Aning ara winipnamkine,” nyabuka, nyalin yupu deice arye talye luparabuka kum nyanamlume. Anggun talima noutam aupmalye ning deice arye, minopce talye luparabuka nyaltakana pia meme. Pia teleb ning ara, Allah el aik dam bemumnyopura, ‘Nunda yupu nyana kumce, anyaik deiyok nang arye nyanamsiak yupu moubuka kekenuk unamabe,’ tenepmunce, winipmunyopura, aning ara pia telebe. Sik pia wal-waluk unyak nang ara, malye winin ning nirya ara, kum bataktinge. Malye winin ninguk tuba-tuba wininyaka ati, sikce Allah ti, arinyak ning ara, Allah arye kanye kum delilule. Malye wininyak nang arye, kam ning obikirye, Allah ati areptinga babye, aning ara talye nong dem. Anang ati Allah arye kanye kum delilule.

² Anggun si erelulum Allah ara, im deice ululnye bitia. Tonda anggunda talye tukwak mutuku noutamuk ululum nang arye yupu minop nyana meme. Ati anggunce nyanamlum yupu nirya ara, minopce pia moubuka tenipmunyopura, yupu mitik tonun aryuk nyanamlume.

³ Tonda, anggunce, ‘Se, yata wiripnamnil do? Awinipmanila ara, yata deiyok ati upmanil do?’ tenen, ilil weik upsilyopura, lukunyan noutam ara, lengdar mapnamluma deice arye, engen ning ton lak upliba, ilil pia weik unamsile. Tonda, yupu pia weik tonun nyalamak nang ara, dipkoprob walwal nanguk unyaka ati, anggunce, ‘Nara, yupu weik tonun nyapnune,’ pia kum tenenamlume.

⁴ Tonda, anggunda, Allah dam binirye, elti, nyaltakan yupu deice arye nyapnune,’ tenena meme. Anggunda minopce moubuka teninamlume. Anggunce Allah ati, “Naio an si erena ati, wininamne, wininamne,” nyabuka, nyalin yupu deice nyapnalum ning nirya ara, minopce aning dipkoprob wininalume. ‘E, aminyan talak aning winipnamnarya,” nyabuka, yupu nyaltakana pia meme. Deiyok ara, Allah arye tenelula ara, ‘Talye yupu deice arye nyaltakaninyak nang ara, na like. Nyalin yupu pia walwal arye nyaninyak nang babye, na lik,’ tenelule. Ati ara, Allah ati nyalin yupu min kum nyapmamunye talak ara, Minopce pia moubuka teninamlume.

⁵ Pia teleb ning ara, Allah ati talye nyaltakan yupu deice arye, “Naio, anti winipnamkine, winipnamkine,” nyabuka, kum nyanamlume. Bukni, pia malye weik winin ning ara ani. Ara, anggunce, “Naio winipnamkine,” nyabuka, talye luparabuka nyalulum bukni, batakmunce, kum winipmunyopura, aning ara, pia malye weik ululume.

⁶ Ati ara, anggun talye nyaplum yupu deice arye, malye pia kum kililanamlume. Ati anggun yupu tenina kum deice arye, Allah ati, “Naio winipnamkine,” nyabuka, nyalin yupu deice arye, Allah ati akunum nyapmunyopura, aminyan talak el pil dona ati ara, imam nang anggun dam yalirye, ayupu ati asipdesilyopura, anggunce tamubuka anye biti, “Kume na nio, anyapdeipse yupu ara, walwal arye nyapsa ati, aning kum winipnamne,” pia kum nyanamlume. Deiyok ara ani. Yata deiyok ati, anggunce talye nyamunye yupu ara, pia kum winiplumba, Allah arye anggunti weik tonun uapsilirye, wenepnamsil do? Allah arye yu weik upliba, anggun wenena ati, anggun taruk arye pil dolulum ning nirya ara, oplirye, sice buklopnamle. Ati ara, anggunce, ‘Winipsilyakʼ tenen, moubuka tenipmunce, anggun yupu ara, mitik tonun aryuk nyanamlume. Talye yupu pia nyana meme.

⁷ Anggun moubuka teninamlume. Anggun kele, lengdar man deice malulum ning nirya ara, yala-yala weik aulul bukni, pia el deiyok ara ton, pia kum ulule. Aning atonun, anggunda talye yupu weik tonun nyalatakalulum ning babye, deiyok pia kum uplirye, nong kum upnamla ati, anggun yupu talye luparabuka nyaltakana pia meme. Bukni, Allah arye, “Aning ara wininamlume, aning ara pia kum wininamlume,” nyabuka, nyasulul yupu moubuka taliplumce, anggun ni koproba Allah ati, ilil tenenamlume. Teleb ning ara, akunuma. Talye yupu nyana ara, pia meme.

“Bona talin nang ara, talye ning ulule,” nyabuk yupu

⁸ Tonok mutuku noutam balamlumce, dipdebuka, mikip weik deiyoknye birye, sik talye bona utotoa kum nang nirya ati, sik nong deice ikin weik ning deiplirye, sik anang ati dopropnyopura, aning ara anggunce, ‘Seʼ tenen, Yata upmal do?’ tenen, kanye teniltona kume. Deiyok ara ani. Amalye ulamlye ninye deiyoknye, el deice tam ton, ninye deiyoknye yuknye ton aulule. Atonun, anye el deice tam babye, yuk deiyok nang ton daunyake. Sik nirya arye, amalye ulamlanye ulul ning nirya ara, elikirye akunum bikinyak bukni, sik nirya ara, ‘Yo dauplye,’ tenebikirye, luba kinyake. Ati, sik nirya ara malyeuk unyake.

⁹ Sik adeiyok nang nirya ara, malye weik unyak bukni, dipkoprob teleb ning ara ani. Tonok pala mutuku, negara talibuka, ninye deiyok kibuka ulamlanye, sik Raja bira, elcuk amutuku nirya ap, amutuku wa tuku nirya ap, teleb kibuka kalikinamle. Winipyopura, awa tuku noutam arye, wa wibuka kouamikca ani, wisiplirye, nong uplyopura, libuka delilyak ning nirya ara, amutuku nang nirya arye binuka dobikirye, aning nirya dibuka teleb aryuk unamake. Raja birye teleb kibuka kaliktopura, aning atonun unamake. Bukni, amutuku nirya ara, sik deiyok nang arye aning atonun kum wininyake. Aning ara, pia malyeuk unyake.

¹⁰ Yata nang do nirya, ‘Yo bok ton pia weik tonun doproptinyeʼ tenen, sik asing labukabikirye, epra banyak nang ara, sik yo bok weik tonun doprobikca babye, sikce, ‘E, akunuma,’ tenen, sik kanye kum delinyake. Tonda, aning atonun, bona talina atibuk motona talin nang atonun ubuka elulnye bira, Aning ara pia weik tonun taliptinyeʼ tenen, elula deice arye talilye ning ara, weik auptua babye, kanye pia kum lonamle. Aning nirya ara, talye nong kum unamle. Winipmanto ara, kumanya mikip arye peiyang-peiyang apliba, tonoknye birye, ‘Aning talipnunʼ tenen, bikbik abuka dobolbitua babye, kumanya ara kum talipmanto ati, atenen ning ap, mikip arye pil dolye ning ara, nong pia kum upnamle! Aning nirya ara, talye ning diamuka.

¹¹ Aning atonun, yata nang do nirya, sik nirya ara bona weik tonun ton tabakuka bolamica ani, sik talinyak bona talin nang ara, tonap tabaknin balule. Bukni, winibuka tabakalul ning nirya ara, sik yuk nang aryuk, abona pia weik tam ara dolonamake. Ati sik ning ara tonap pia weik tonun ton tabakanamaka babye, yuk nang ton tabakuka yakirye, dolonamake. Ati, el abona utotoa talilula deiyoknye birye, aning ara, el asing arye elinamle bukni, aning nirya ara, elcuk kum talenamle. Yuk nang arye dolonamaka ati, elda dipkoprob bona talina ton kum upnamle.

¹² Tonda, yatanye do nirya, elce pil talibuka, mikip arye dolula deiyoknye bira, pil dopnin banmalya ani, lukunyan talak ara, din weik liplirye, weik tonun diplyopura, teleb ubuka malule. Akumopura, mitik tonun diplyopura, pil akunum dolamlya ani, pia teleb ubuka malule. Bukni, sik bona talibuka unyak nang ara, ‘Se, na bona talinun ning nirya ara, yuk nang arye yanuka alubuka doprobikcakʼ tenen, ilil weik ulula ati, aning ara dipkoprob bita mana kum arye wi pia kum ulule. Ati, sik anang ara, ‘Se, yata wiripnamne do?’ tenena uk unyake.

¹³ Tonda, narye tukwak mutuku, im sirya, mutuku sirya nirya ara, narye pia moubuka elinun ning ara, na talima noutam arye, ‘Seʼ tenen ninguk elinune. Ara ani. Ninye tonoknye birye, ‘bona talinanye unamnaryaʼ tenen, el tabakuka delilamuk dengna weik ning, ‘Naʼ tenen deililamuk bukni, aminyan sirya talak ara, bona talinanye ulamuka deice arye, pia ikin ning el dam yangalamukba, imun kanye bobuka ulamuk.

¹⁴ Ara, adengna weik ning, weik tonun tabakuka, ‘Naʼ tenen delilamikce, ‘Aminyan talak ara, adengna weik ning dopropnirye, winipnamne, winipnamne tenyamik bukni, sik bona aning-aning nirya ap, dengna weik ning nirya ara, kum danin balamuka ani, pia kum dayuke. Sik anang ara, mapu weik ton delilamik bukni, sik talilamik ning nirya kum dayuka ati, sikce deiamikba, dadeipdanin banamak mapu nirya ati, tonok ning babye, kum areptinge. Sirya talak ara, sikce talinamak ning ton, pia kum ubuka ati, teleb kum unamake.

¹⁵ Ati ara, sik nirya ara, sik ni yapu arye diamik talak ara, talye nong dem diamik atonun, kam daulamikca ani, sirya talak ara, nong dem dipnamake. Bona pia kum talipnamake. Ati ara, moubuka teneipdelulume! Anang arye, bona talin ning weik tonun bulubuka delinamne tenelamik ning ara, nong kum ubuk. Ati, sikce talibuka ulamikce, ‘Se ara mambule,’ tenelamikce, malye kanye bobuka pil dolamik ning nirya ara, sikce ton pia dobuka kum bobinamake. Winipmanto ara, kumanya mikip arye peiyang aplyeba, tonoknye birye, ‘Aning talipnunʼ tenen, bikbik abuka dobolbitua babye, kumanya ara kum talipmanto ati, atalilamik ning ap, mikip arye pil dolamik ning ap, nong pia kum ubuka ati, aning nirya ara, talye diamuka. Kumanya atonun taliptinga babye, adeice arye teleb kum upnin banmake.

¹⁶ Se aning ara, pia dipkoprob bico tenen ning ulule! Tonda, pia malye ning ulule. Ati, nun dibibyopura, nun tamubuka binamaba nirya ara, talye deipsikba, yapu touk talye nong yoka dem binamabe. Aning atonun, sik anang nirya arye, lik upman diparyuk, ‘Se, ‘tenen, kumanya mikip tonok dobolbalamik ning ara, el nong ton kume, aning nirya ara talye diamuk winilamike.

¹⁷ Tonda, aning ton tenipse. Sikda, ‘Bona taliptinyeʼ tenen, pia motona talin nang atonun unyak nang nirya ara, sik kam tuba ulamik talak ara, lukunyan noutam nirya, teleb ubuka kum malamik. Sikda mambul kiriklamak nang atonun ulamik. Ati sik anang arye tenilamik ning nirya ara, ‘Se, na dengna weik ning kum upnuka ati, yata wiripnamne do?’ tenen, sikce ‘Seʼ tenen ning ap, ‘Na likʼ tenen ning ap, sik talima noutam arye, ‘Se, yuk nang arye, yata deiyok ati malye ulamnik do?’ tenen, uk taleamukba, se tenen pia piribuka tenilamik. Ati, sik anang arye winilamik touk, pia kum wininamlume.

¹⁸ Ati ara, na akunum bita tenipsirye, bikse ning ara, pia teleb weik ning nyapnusine. Ara, ani. Nun ni Allah arye, ‘Sik tukwak nang nirya ara, kam ouku weik kum unamak talak ara, ‘Aning dinamakʼ tenen, arisulul ning ara, akunuma. Allah arye, ‘Wininamake, aning ton dolonamake,’ tenyamukce arisulul ning ara, akunuma. Ati ara, pia teleb ning ara, ani. Ara, nun tukwak nang ati akunum arisulul ning ara dobuka, nun din dina ap, mek dina ap uka. Aning atonun, teleb weik ning ara, nunce wa wibuka koubibiba, nong uplyeba libuka dinyap ning ara, akunuma. Tonda, Allah arye aepbsukba, pil talibuka donyap ning ara, akunuma. Aning talibuka ubirye, kam tuba unamap talak nirya ara, kanye deibuka telebuk unamabe. Allah arye, ‘Sik, aninguk talibuka unamak tenen, akunum arepsuk ning ara, aning uka. Pia teleb ning ara akunuma tenepsirye, bikse.

¹⁹ Aning atonun ton, Allah arye, ‘Anye bira, bona talinanye unamle,’ tenyamuk ning ara, atonun unamle. Atonye babye, el bona talibuka un ning ap, ninye arye talinyak bona yala-yala nirya ap, Allah arye areamuk ning ara, talipturye, talye kanye deibuka unamle. El anye bira, ‘E, bona talibuka un ninguk talibuka unmana ara, Allah arye areamnuka ati, ‘Na ni Allah ati, akunum teleb,’ nyapnyopura, teniltona kumce, talye kanye deibuka unamne,’ teneptue. Aning nirya ara, el li Allah el kanye aryuk, anye biti, aning-aning arelule.

²⁰ Allah elcuk arelul ning nirya talibuka ululnye bira, el talima noutam arye kanye pia delilule. Winilula ati ara, anye bira, ‘Se, nara keting tamun weik tonun ton kam tuba unamne do? Mitik tonun unmanya ani, dipnamne do?’ tenen, pia ilil kum tenelule. Aning nirya babye, Allah aryuka!