Penghotbah 4 - Eipomek

Weik Kel Peterena Deiyoknye birye, “Aning ara, talye ning anya,” nyabuk yupu

¹ Yuk talak ton, narye pia bita dinmasiba, tukwak mutuku im sirya, mutuku sirya nirya ara, ton tam nang arye, yuk tam nang ati, pia ikin ning dobuka, sik nong deice delinyakba, aning ara imun kanye bobuka unyake. Aning nirya ara, teleb winina kum ning ati, moubuka tenipdese. Atenepse ning ara, pia kanye imun weik ning noutam unyak nang nirya, aning winipca deice arye, weik tonun engenyake. Malye kanye bobuka engenyak bukni, ikin weik unyak ning ara, yuk nang arye ton pia kum melinyake. Yuk nang nirya arye, ‘Aning ara, dauplyeʼ tenen, luba kina uk unyaka ati, anang ara tuba ikin kanye bobuka unyake. Ninye tonoknye babye ton, anang ati, kum melilirye, sik talima kum kwadilule. Tonda, sik mikip pia weik nang arye, yu weik ukirye, sik mitang nang dam yanuka, weik ikin ning, sik nong deice deibikceura, imun kanye bobuka unyak bukni, yuk nang arye, kum melinyaka ati, ‘Seʼ tenen, engana uk unyake.

² Aning nirya tenipse ati, winibuka tenepse. ‘Se, diba, na kanye ara, min talak arye akunum diamik nang ara, pia telebuk unyake,’ tenepse. Bukni, wini talak tuba kam unyak bukni, ikin ning weik uplyeba, imun kanye bobuka unyak nang ara, pia ikin kanye uk bobuka unyaka ati, aning ara pia mambul weike. Sikda ikin weik unyake,’ tenepse.

³ Tonda, aning ton tenepse. Na kanye ara, sik min kum deiamik nang ara, teleb kanye deibuka telebuk unyake. Deiyok ara, ikin weik ning, sik dam yanmanto kum ulule. Tonda, min talak arye tukwak mutuku sirya, im sirya nirya ara, daunyak ninye arye, pia malye weik winilamik ning nirya ara, sik min kum diamik nang ara, amalye winilamik ning, sik el lina kum arye, aning kum bikinyake. Ati ara, ‘Sikda teleb kanye deibuka telebuk unyake,’ tenepse.

⁴ Tonda, yuk ning ton tenipsi ning ara, ani. Ara, na kanye ara, yata nang do nirya, sik mikip arye pil donyak ning ara, winibuka tenepse. Ara, sikcuk, ‘Sik yuk nang arye talinyak ning ara, na babye ton taliptinyeʼ tenen, sik kwit capu arye do, yuk talya daunyak nang arye do, anang arye talibuka ulamne ning tonok tenekirye, ‘Na ton, aning nirya ara taliptinyeʼ tenen, mikip arye pil donyake. Aninguk tenebuka ulamikce ning nirya ara, talye nong una kum ninguk teninyake. Winipmanto ara, kumanya mikip arye lulukunmaliba, ‘Aning talipnunʼ tenen, bikbik abuka dobolbatinga babye, kumanya ara kum talipmanto ati, atenen ning ap, mikip arye pil donyak ning ara, nong kum upnamle! Aning nirya ara, talye uka.

⁵ Tonda, aning ton tenipsirye, bikse. Ara, ‘Aminyan talak yata wiripnamnil do?’ tenena kumce, sik pia walwal unyak nang ara, talye kanye bobuka, sik taruk kitibuka talipdakirye, pil pia kum donyake. Wininyaka deice arye, din patalamtua babye, aning tenena kumce, talye kanye bobikirye, talye tunim abuka bunyaka ati, aminyan talak ara, din patana deice arye dipnamakca! Aning ara, sik bidamnye arye, sik bidamang nang ati, olan ning atonun ulanyake.

⁶ Na kanye ara, pia teleb ning ara, ninye arye talinyak ning nirya ara, tonok taruk arye, aning mitik tonun taliptinga babye, ‘Se yata wiripnamne do?’ tenena kumce, teleb kanye boptingce, tunim abuka utingopura, sikda pia telebuk unamake. Bukni, yata nang do nirya, anang arye, ‘Bona yala-yala nirya, weik tonun taliptibyeʼ tenen, ikin kanye bobuka, sik taruk bitinye arye, ikin pil mikip arye doptinga babye, sikce, ‘Se yata wiripnamnil do?’ tenena ap, ilil weik tenena ap arye, sik ato nang ara, akunum malye kililanyake. Na kanye ara, sikce wininyak ning ara, teleb winin ning pia kume. Winilamikce ning ara, deiyok ning ton pia kum upnamla ati, tia ninguk ulula ati, aning nirya ara, talye ning uka, teneptibye,’ nyapsine. Winipmanto ara, kumanya mikip arye donmaliba, ‘Akumanya talipnuyapʼ tenen, bikbik abuka dobolbatinga babye, kumanya ara, kum talipmanto ning ati, atenen ning ap, mikip arye pil donyak ning ap, nong kum upnamlarya! Aning atonun ning nirya ara, talye winin ninguk ulule.

⁷ Tonda, nara yuk mutuku noutam ara, aning ton eipsirye bikse. Sik anang wininyak ara, winipmanto ning ati, nyapkusine. Keting deiplye talak ara, kumanya mikip arye donmaliba, ‘Akumanya talipnuyapʼ tenen, bikbik abuka dobolbatinga babye, kumanya ara, eibuka kum taliptinge. Kumanya ara, kum talipmanto ning ati, sikce wininyak ning nirya ara, nong kum kipnamlarya! Aning nirya ara, talye ning uka.

⁸ Ara, ton nang arye, sik kam unyak talak nirya ara, sik tonok unyake. Sik anang arye, mapu ton delina kumce, talye urdemuk unyake. Tonda, sik kilapu ara, mi delina kumce, urdemuk pia daunyake. Ati ara, sikce mapu delina pia kumce, talye you kilapu unyake. Ati, sik mapu ton kum delinyake. Tonda, sik kwit capu nang ap, sik weit capu ap, sik du yapu ap, sik mapu silip ap, pia kum unamak ati ara, anang bicoe. Sik yuk unyak bukni, sikda pia mikip aryuk, ikin pil tuba-tuba dokirye, dikdik kum senyake. Tonda, sik pil weik donyaka deice arye, bona ap, dengna weik ning ap, weik tonun taliptinga babye, sik talima noutam telebuk kum unamake. Deiyok ara, ani. Winipmanto ara, kumanya mikip arye donmaliba, ‘Aning talipnuyapʼ tenen, bikbik abuka dobolbitinga babye, kumanya ara, talipmanto kum ati, aning ap, mikip arye pil donyak ning ap ara, nong kum upnamle! Aning ara, talye unauk ati, sik talibuka unyak ning yala-yala nirya ara, pia kum boulule. Anang ara, winibuka upnin bakirye, ‘Se, nara, dikdik sena kumce, ikin piluk dopnin banmanya ani, ‘Bona weik tonun doproptinya babye, na bidamnye kuma ati, yatanye biti melibuka areptiniba, kanye deipnamnil do? Kume ati, yata deiyok ati, ikin pil tuba donun do? Apil donuna ara, nong kum ninguk ulula ati, talyeuk ulule,’ tenenyake. Ati ara, narye nyapsine. “Aning-aning nirya ara, kumanya mikip arye donmaliba, ‘Aning talipnuyapʼ tenen, bikbik abuka dobolbitinga babye, kumanya ara, kum talipmanto ning ati, aning ap, mikip arye pil donyak ning ap, nong kum upnamle! Aning nirya ara, talye un ninguk ulula ati, apil donamna deice arye, kanye deibuka teleb kum unamne,” tenebikirye, moubuka kum bikinyake.

⁹ Nara, yuk ning ton moubuka tenipsirye, aning bikse. Ara, tonoknye bira el yuk, pil doptu bukni, elce yuknye biti, ‘Neika pil doptinimnye,’ nyabuka, yupu talipdadikirye, sik neika utiringce, pil neika doptiringtoura, aning deice arye, telebuk unamdake. Sik bitinye arye, pil dopnin balamdikirye, sik donamrak ning deice arye, aning-aning nirya, weik arye dolonamreke. Sik pil donamrak deice arye, nong weik upnamle.

¹⁰ Anyapmana deiyok ara ani. Ara, neika ururakce, pil donmarikca ani, tonoknye ton el mikip boun uplyoplirye, akunum saklyopura, el kwit birye, anye tomoplirye, erebuka tuba teleb kililirye, melimnamle. Bukni ninye tonoknye, el yuk pil dolinye bira, bicoe. Ara, elce pil donmalya ani, ikin upliba, saklyopura, el kwit kum uplyopura, anye pia bico. Anye sakturye optopura, el bidamnye kum lyepdatue. Ara, elti, yuk nang arye ton, kum melipnamake. Anye ara, ikin weik unamle.

¹¹ Aning atonun ton, lukunyan noutam bukni, moul weik ulamle talak ara, ninye tonoknye birye, el yuk maptopura, yata wiribuka buppu uptu do? Anye bira, el teleb kanye bobuka maptu do? Kume. Bukni, ninye bitinye ton neika melipdanuka maptiringopura, moul ulamle talak ara, amoul uptua babye, neika maptiringba, buppu uptue. Ati ara, moul una kumce, kanye deibuka marurake.

¹² Tonda, tonoknye birye, yuknye tonok ati, olanmarikca ani, ton talak ara tonoknye birye, ayuknye biti, optue. Bukni, ninye bitinye neika batiringce, sik ona ati ara, tonoknyeuk yalyopura, sik bitinye arye, anye biti, dipkoprob adiparyuk obuka bataktiringe. Aning atonun ton, tapu winilye arye tabakuka wibikcopura, atapu ara, mikip weik ton aupnamle. Atapu ara, pia bulukmanto kum upnamle.

¹³ Aning ton bita tenipsirye bikse. Ara, tonok welnye bira, bona yala-yala nirya talina kumce, pia bona utotoa kumnye uptu bukni, anye bira, bita teniplirye, weik tonun kel biklyopura, elda pia telebuk unamle. Bukni, yuknye bira, ninye deiyoknye ulamtu bukni, wisi akunum daliba, yuk kel weik nang arye, elti, nyanyak yupu tuba kum kekepmanto uplyopura, elda pia walwal nang atonun ulule. Anye bira, teleb kum unamle.

¹⁴ Tonda, aning bikse. Tonoknye ton, el lin birye deiptuba, daulamtua ani, aning-aning talina kumce, pia bona utotoa kumnye ulamtunye, aminyan talak ara, ninye arye anye wibuka ereptingba, ninye deiyoknye Raja kiptue. Aning atonun, tonoknye ton, wenen aik pum tam dongoptingba, daulamtua ani, aminyan talak ara, anye dobukapturye, ninye deiyoknye akunum kiptopura, amutuku nirya talibuka Raja uptue. Raja nang bulamak kursi, el si ara taktha, adeice buktue. Bukni, aninye deiyoknye Raja akunum wisi datu talak ara, kel weik nang arye nyanyak yupu tonap kum kekeptopura, aminyan talak ara, ikin upnamtue.

¹⁵ Ati ara, narye eibuka bikse ning ara, ani. minop talak ara, amutuku noutam ulamik nang arye, awisi dayukba, teleb nyan yupu kum kekepmanto deiyoknye bira, batakikce, weik bikamuknye, welnye ulamuk bukni, sikce anye erepdeibikba, elda amutuku ninye nirya talilamuk. Elda, sik ninye deiyoknye Raja ulamukce, wisi danamuknye punubuk. Winibuka punubuka ati, amutuku ulamik nang nirya ara, elce nyalamuk yupu kekelamikce, winibuka dobolbalamik.

¹⁶ Awelnye bira, ninye deiyoknye kibukabukce, amutuku taleamuk talak ara, elce talibuka ulamuk mutuku noutam ara, amutuku ulamik nang nirya ara, el nyalamuk yupu moubuka kekelamikce, elti, dobolbalamik. El yupu kekelamik nang ara, yupa pia weik ati, kum nukmanto ulamikba, eipsirye bikse. Winilamik bukni, sik nirya teleb ubuka daulamika ani, aminyan talak ara, yuk nang ton yangalnamakce, awelnye nyalul yupu ara, ‘Nun likʼ tenen, pia kum kekenamakce, anye biti si erebuka kina kumce, bataknamake. Na kanye ara, aning babye, pia talye uka. Aning ara, pia diba aning ara, nong pia kum upnamla atia. Aning ara, talye-talye ning, nong kum ninguk ulule. Winipmanto ara, kumanya mikip arye don maliba, ‘Aning talipnuyapʼ tenen, bikbik abuka dobolbatinga babye, kumanya ara, talipmanto kum ning ati, awininyaka ara nong kum upnamle! Aning atonun ara, talye ning uka.

Kel weik bikamukce, Peterena Deiyoknye birye, ninye nirya ati, “Allah dam yanuka, nyalin yupu ara, talye luparabuka kum nyanamlume,” nyabuk yupu

¹⁷ Anggun nirya moubuka kekepnululume! Allah Yahweh el si eren aik dam binumunyopura, anggunda moupmunce banamlume. Anyaik binumunyopura, talye luparabuka yupu nyana meme. Pia teleb ning ara, Allah el dam binuka winipmunyopura, ‘Nun ni Allah, yata yupu nyapnamsil do?’ tenen, moubuka kekenauk unamlume. Anggunce talye luparabuka yupu nyana kume. Tunim abuka bukmunce, kekebuka bikinamlume. Anggunce, ‘E, nun ni si erebuka kina ati, kam ning obuka bobibirye, uku dongolbana ati yanmabe,’ tenena pia kume. Aning ara, sik walwal nang arye wininyaka ati, sikce winilamaka atonun una pia meme. Sik walwal nang ara, ‘Aning ara, pia teleb ning, aning ara, pia malye ning aululeʼ tenen, moubuka tenipmanto kum unyaka ati, teleb ninguk wibikirye kum wininyake.