Penghotbah 3 - Eipomek

“Aulul ning nirya ara, Allah arye el talak kiplya ati winilule,” nyabuk yupu

¹ Tukwak mutuku noutamak ulul ning ap, ninye arye wininyak ning nirya ap ara, Allah elcuk, ‘Atalak ani, asum ani, atanggal ani,’ tenelye touk arepliba, aning nirya winilule. Yata ning do nirya, ninye arye wininyak ning nirya ara, im amu tam ulul ning nirya, Allah arye tenelye touk, arepliba winilule.

² Aning nyapsin touk, mapu delinyak talak ap, ninye dibinyap talak ap, tonda koun ning kounyap talak ap, linyap talak ap, kwiniltakan talak ap nirya ara, Allah arye tenelye touk, lo arisiliba wininyabe.

³ Tonda, on talak ap, kweten talak ap, dakaltakne talak ap, lipsisikuka don talak ap, Allah arye tenelye touk, lo arisiliba wininyabe.

⁴ Tonda, engen talak ap, akutun talak ap, engelamak talak ap, kanye deibuka mot selamap talak ap nirya ara, Allah arye tenelye touk, lo arisiliba wininyabe.

⁵ Tonda keil donokne talak ap, keil bululin talak ap, tonda irilan talak ap, irilana kum bukni, talye un talak ap nirya ara, Allah arye tenelye touk, lo arisiliba wininyabe.

⁶ Tonda elkirikna ap, lik upsiliba, ‘Dauaplye’ tenen, batakalongon talak ap, ‘Naʼ tenen, bulubuka delin talak ap, talibuka sirya dakna talak ap nirya ara, Allah arye tenelye touk, lo arisiliba wininyabe.

⁷ Tonda, kwilikne talak ap, kwilikmalye ning wilongon talak ap, yupu tana kumce tunim abuka un talak ap, yupu nyan talak ap, Allah arye tenelye touk, lo arisiliba unyabe.

⁸ Tonda ninye arye bico tenelan talak ap, ‘Aning ara nun like’ tenen, batakna talak ap, mal olanmakce talak ap, ansinilin talak ap, Allah arye tenelye touk, lo arisiliba unyabe. Aning-aning nirya ara, Allah arye kintinilisilye touk usulule.

⁹ Ninye arye donyap pil nirya ara, ikin pil dobibirye, akunum sirya dakipyopura, ‘Dipkoprop yatato mambul ning dolonyap do? Yata deiyok ati, aning ara ikin pil donyap do? Aning ara tenelulum do?’ tenenyabe.

¹⁰ Na kam ulamse talak noutamak ara, dilamsirye na kel kiamse. Allah arye tukwak nang ati, weik ikin ning arisilye ning ara, na elinune.

¹¹ Aning-aning nirya, ikin ning babye, kanam ning babye, Allah arye, ‘Aning nirya ara, atalak teleb upnamle talak ara ani,’ tenelamle talak uk teleb ulisulule. Allah arye tukwak ninye nirya ati, patana deiyok ning arepsiliba, nunce, ‘Se, doryanamle talak, na babye dipna kumce, kam pia uptinye’ tenen, patasulule. Elcuk kel bikna ning arepsiliba, kel biknamap bukni, Allah arye kwepdeibuk talak arye dipdongobuka, aminyan sirya daknamle talak pil dolye ning nirya ara, ‘E, dipkoprob apil dolule, el deiyok ara ani,’ tenen, pia moubuka kum kel biktibye.

¹² Na kele, nun tukwak ninye ara, kam unyap talak noutamak nirya ara, weik teleb ning ara, ani. Ara, Allah arye arisilye ning doprobibirye, kanye deibuka diksukumuk unamabe. Kam unyap talak noutamak nirya ara, teleb un ninguk utibyopura, aning teleb uka.

¹³ Ati, Allah el kanye aryuk, nun tukwak ninye ati, weik teleb ning ara, talye dem arisilye ning ara ani. Ara, ninye tukwak ninye nirya, din ap, mek ap, dibuka ukirye, sikce pil donamak ning nong dopdobikirye, ‘Kanye deibuka unamak’ tenen, Allah aryuk talye yamubuka aresulule.

¹⁴ Na kele, Allah arye pil dolye ning nirya ara, pia ati aunamle. Ati ara, nun ninye arye el pil dolye ning ara, min kum winiptibye. Tonda, nunce ton kum tabaktibye. Allah arye winilya deiyok ara, nun ninye nirya, elti, ilil weik upsiliba, el amu tamuk unamabe.

¹⁵ Tonda, na akunum dilamsirye, kel kiamse ning ara, ulule. Minop talak uamuk ning ara, ila tuba tonap tamubuka wini talak ulule. Tonda, dotalak upnamle ning ara, minopce kintinip deiamuka ati, min yuma uamauk ning tamubuka aminyan upnamle. Allah arye akunum kentinyamuka ati, elcuk tenelye talak akunum uplyopura, min yuma uamuk ning ara, ila tuba tamubuka wini talak upnamlarya.

Dotalak winipnamle ning nirya ap, yupu lipsisikuka bokolina deiyok ning ap nirya ara, Allah el ninguk ulula ati, nyabuk yupu

¹⁶ Na kam ulamse talak noutamak ara, dilamsirye na bikamse ning ton ani. Na kele, tukwak mutuku noutamak, keting amu tam mutuku-mutuku nirya ara, ninye yupu lipsisikuka bokolinak ara, Allah arye ‘Diksukumuk unyakce, teleb unamak,’ tenepsuk bukni, ninye tukwak mutuku nang arye, aning batakuka, tilila yupu nyana ap, malye un ning winina ap, aninguk pia unyabe. Aning atonun, Allah arye, ‘Pia diksukumuk unamak,’ tenelamsuk ning nirya ara, ninye tukwak nang arye, malye winin ninguk unyabe.

¹⁷ Unyap ati ara, na talima pum tam tenenuna ara, ‘Allah aniryuk wibuka, malye nang arye malye unyak ning ara ani, teleb nang arye, diksukum unyak ning ara ani, tenebuka lipsisikuka bokeipanamsile,’ tenepse. Aning tenepsa deiyok ara, talye ati kume. Deiyok ning ara, nun tukwak ninye wininyap ning ap, nun pil donyap ning ap nirya ara, Allah arye, ‘Atalak ani,’ tenyamuk touk, el dem arye nunti yupu lipsisikuka bokeipsilirye, teleb ning ati dekna arepnamsilirye, malye ning ati, wenepnamsile.

¹⁸ Na kanye talima pum tam tenepsirye, nyapse ning ara, ani. Narye aning ton tenebuka kel bikse. Ara, nun tukwak ninye ap, talye kam ulul ning ap nirya ara, mitik tonun unyabe. Ara, nirya dipnamaka atia. Ati ara, Allah arye, ‘Sirya talak dipnamak ara, kel kipnamak’ tenen, nun ninye tukwak nang ati, ikin ning arisilya deice arye peteresulule.

¹⁹ Nun tukwak ninye ap, talye kam ulul ning ap, sirya talak winipnamsil ning ara, atonun winipnamsile. Ara, tonok ning diplyopura, ton ning babye dipna uk upnamake. Ati ara, nun bidamang, talye kam ulul ning babye, isin unyak ning ap, kam una deiyok ning ap atonun usulula atia. Anggun babye, nun babye, mikip mitik tonunuk usulule. Ati, tukwak ninye arye tenenyaba ara, ‘Ninye ara, nun kam una ap, mikip ap, weik mambule’ tenen, unyap bukni, ‘Sik talye kam ulul ning ara ikin kume,’ tenenyabe. Bukni, talye kam ulul ning ap, nun ninye ap ara, kam unyaba deiyok ning ap, isin usulula ap ara, ato touk usulule. Nun nirya dipnamabe. Ati, na kanye aniryuk nyapne, ‘Aning-aning nirya ara, talye urdemuk ulule. Nong noutam ara, weik mambul ton kum upmale,’ tenenune.

²⁰ Aning tenenuna deiyok ara ani. Na kanye aniryuk nyapne ning ara, talye ati kume. Tukwak ninye babye, talye kam tuba ulamle ning babye, sik dibicopura, sik nirya tamubuka tonokak uk banyake. Ara, Allah arye tuku dobuka ninye babye, kam ulul ning babye, kwepdeiamuk ati, daulamica ani, aminyan talak dibikcopura, tamubuka tuku uk kilolule.

²¹ Tonda anyapne ning babye ara, yatanye birye kel bikamturye, moubuka nyapsutu do? Ninye dibipyeba, nun kanye arye im deice welelul do? Tonda talye kam unyak ning, dibicopura, sik kanya ara tuku pum uk banyak do? Na kanye aryuk nyapne. Aning moubuka teniptibya babye, bita kel kum biktibye tenenune. Nun nirya bita kel kum bikupa ati nyapne.

²² Aning nirya tenepdesirye, kum kel bikmanto kipsa ati, na kanye aryuk nyapne. Nun tukwak nang ati, weik teleb ning ara, ani. Ara, nun pil dobibiba, nong ulul ning ara, doprobibirye, talye kanye deibuka unamabe. Aning kum winibipyopura, yata ning ton uptibye do, kum ati, Allah elce tenelamsuk ning ara, akunuma tenepne. Yuk ning ara, ton kum uptibye. Tonda, akunum dibipyopura, yata winina deice arye, aminyan winipnamsil ning ara, yata wiribuka kel kiptibye do? Ara, nun kum kel biktibya ati, nun pil dopye ning ara, talye kanye bobuka wininamabe. Penghotbah yupu nyabuka sekeibuknye birye nyabuk.