Penghotbah 2 - Eipomek

‘Kel weik bikamukce, Peterena Deiyoknye birye, ‘Kel weik bikna ning ap, mitik walwal deice arye tenen ning ap nirya ara, talye uka,’ nyabuk yupu

¹ Ura, na kanye pum tam arye utenepse. “Na babye teleb kanye bobuka, kanye deipdanirye, ‘Yata winin ning do nirya, kanye delisulul ning yala-yala nirya, talibuka unamne,’ tenepse. Utenebuka ulamsirye, aning nirya pirilamse bukni, akunum winipse ning ara, aning nirya tuba ton tenipsirye nyapse. “Kume, kanye delilana ning nirya ara, talyeuk ulule. Aninguk tenibuka ulamepya babye, dowinipnamle talak ara, kanye deibuka telebuk kum upnamabe. Aning babye, nong kum upnamle ning, pia talye-talye un ning ulule,” nyapse.

² Narye bita moubuka tenipdese ning ara, ani. “Kume, ‘Akutubuka ulamse ning ara, na walwal arye ulamseʼ tenen, bikse! Na kanye teleb kililamse ning nirya babye, talye-talyeuk ulamse. Abitinye deice arye, deiyok ton kum ubuka ati, nong kum upnamle.

³ Narye pirilamse ning ara, ani. Tonok ning ara, na kanye tenelamse deice arye, ‘Kanye wangalamak anggur mek, weik arye dipnirye, weik kwalya kwalibuka din deice arye, dipkoprob kanye deibuka, teleb unamne do, kum do?’ tenepse. Narye atenepse talak ara, weik kel bikamse ning arye, tuba pirilenauk ulamse. Tonda, ‘Talye-talye un ning talibuka, winibibye ura, aning arye dipkoprob kanye deibuka, teleb unamtibye do, kum do?’ tenepse. Tonda, na tenepse ara, ‘Nun tukwak nang nirya ara, keting im noutam uplyeba, nunda tukwak mutuku deice unamap talak ara, keting tamun pia yupa weik, kam kum unamaba ati, nun mitik tonun tuba kam unyap talak ara, yatato ning winiptibye deice arye, kanye deibuka telebuk unamtibye do?’ Dipkoprob nong teleb kipdeipnamsil ning ara, yatato ning do?’ tenepse.

⁴ Winibuka tenelamse ati, atalak ara, mambul weik pil ara, narye akunum dolamse. Ara, na winin ning ap, pil don ning ap, tonda, aik weik arye dolamse. Tonda, na anggur duk mek kintinibuka dina ap, anggur duk dakuka dina ap ati, na wa wibuka, koase noutam ara, narye anggur tapu duk yala koulamse.

⁵ Tonda, talye poka dona ap, to nyan din ning ati, awa noutam ara teleb duk moulamle ning yala-yala nirya koulamsiba, duk moulamuk.

⁶ Awa nirya akunum teleb kipdeipseura, ‘Awa noutam koupse ning ap, duk moulamle yo ap, yata barye mek kweptinye, aning nirya deice dikdongoptinye do?’ tenen, ‘Teleb mekwen deiptuʼ tenen, mekwen weik arye palibuka lokseba, mekwen deibukce, amek ara, na wa sukum ap, yo palpal ap, yala ning kounak ap ara, amek kwebuka dikilongolamsikba, aning nirya teleb ulamuk.

⁷ Na melibuka pil don nang ati ara, na yo bok deice arye deklamseba, na pil dolamik nang ap, kilapu ap, weik ulamik. Tonda, apil don kilapu deklamsirye, na aik pum tam ulamikce, delilamik nang ap, pia weik ulamik. Tonda, na wein ning domba basam, ap sapi basam ap, yupa pia weik arye dekamse. Ara, min talak Yerusalem mutuku deiyok koubuka ulamik Raja nang ara, sik babye kam ning ton mitik tonun weilamik bukni, nara yupa pia weik arye, dekukapsirye weilamse.

⁸ Tonda, na taleamse mutuku noutam, Provinsi deiyok nang ap, tonda, yuk karin mutuku talibuka ulamik nang, Raja-Raja nang arye, na dam bobuka arelyangalamnik teleb dengna weik ning ara, emas ap, perak ap arelamnikba, narye aning nirya bulubuka delilamse. Tonda, na kanye delilana ati, mot nyan nang sal ap, kilapu ap, dopdeipsiba, sikce mot nyalamika deice arye, nati kanye teleb kililamnik. Aninguk kum bukni, tonda na patalamnukba, naryuk tenelamse touk, kilapu babye, yupa pia weik arye dolamse deice arye na kanye delilalamse.

⁹ Aning-aning nirya winilamse deice arye, dipkoprob, min talak Yerusalem mutuku talibuka ulamik deiyok nang ara, na ulamse atonun nang ton kum ulamik. Sikce aning-aning yala-yala nirya talilamik bukni, nara aning-aning yala nirya ara, pia weik arye, kum nukmanto talilamsa ati, sikda mitik tonun uka. Ubuka winilamse bukni, narye aning nirya winilamse talak ara, narye moubuka tenen ning ap, weik kel bikamse ning ap, tuba awamnuk. Aning nirya kum lubakipse ati, tuba bikuka ulamse.

¹⁰ Atalak nirya ara, narye, ‘Aning ara, winipnamne, aning ara, dekuka talipnamne. Aning ara, eipmance kanye deipman ati, aning babye dopropnamne,’ tenelamse ning yala-yala nirya ara, atenelamse touk dobuka talilamse. Atalak nirya ara, ‘Na kanye deiptinyeʼ tenen, patapnuk ning ara, ‘Aning ton bataknune,’ pia kum tenelamse. ‘Atenepman ning nirya ara, winina uka tenepman, kanye deibuka ulamse. Tonda, narye pil dolamse ning nirya ara, na kanye teleb ulamnuk. Kanye teleb upnukba, apil ara dolamse deice arye, menenga atonun dadololamse,ara, kanye deibuka ulamse.

¹¹ Aning nirya akunum winilamse ning ara, aminyan yuk talak ara, tonap tenipdese. Ara, ‘Na pil yala nirya akunum domse ning ap, tonda apil yala nirya ara, na mikip arye dolamse talak ara, dikdik ulamnuka ati, tamubuka bita dipdesirye tenipdese. Winipsirye, aning nirya eibuka, bita biksirye, tenepse ara, ‘Kume, aning nirya ara, talye tonok pil dolamse. Nong pia kum upnamle deiyok ara, pia ton kume. Winipmanto ara, kumanya dopliba balamle ning, ninye arye, ‘Aning doptaliptebeʼ tenen, pirilamak atonun ulamse,’ tenepse. Keting im noutam daulamlyeba, ninye tukwak mutuku deice unyabak, mutuku sirya, im sirya nirya ara, dotalak arye teleb kipdeipsutu ning ara, nong kum upnamle atia.

¹² Aning akunum eibuka biksirye, aning nirya bataksirye, yuk ninguk tenepse. Winipse ning ara, narye deiyok kibuka, weik kel bikna deiyok ning ap, walwal uning ap, malye ning talibuka uning ap nirya ara, tuba tonap moubuka tenipdese. Deiyok ara, ani. Ara, na tenepse ara, ‘Kume, aminyan talak na punuplirye, amutuku nirya talibuka, Raja kipnamlanye bira, elce yatato yuk ning ton doptu do?’ Kume, yuk winin ning ton kum winilula ati, min talak ninye arye akunum winilamik ning, aninguk winipnamle. Tonda na babye winipse ning, el babye wininamle,’ tenepse.

¹³ Aning nirya tenipdese talak ara, ‘Diba, winida na kele. Weik kel bikna deiyok ning kel biktibyopura, aninguk ara telebe. Bukni walwal uk una ara, talye-talye uk ulule. Aning ara malyeuka. Aning atonun, dirina ara pia telebe, bukni kuna ara, pia malye ulule.

¹⁴ Ara, weik arye kel biklinye bira, elce, Teleb un ning ara, abisik binune,’ teneplye bisik ara eibuka kel biklirye balule. Bukni, walwalnye bira kuna bisikuk balamle atonun ulule. Bukni, aning babye na kele. Weik kelnye babye, walwalnye babye, nun nirya babye, sirya ara, atonun upnamsile. Ara, weik kel arye winilamak nang babye, walwal aryuk ulamak nang babye, daulamepya ani, sirya ara ato ninguk kibuka, adiparyuk dibina uk unyabe.

¹⁵ Ati ara, narye tenipdese, ‘Se, bita tenena kumce, pia walwal arye ululnye, el dam yangalul ikin ning ara, na babye dopropnamnarya. Aning ati ara, nara weik kel bikna deiyok ning kel bikamse ning ara dan do? Aning nirya kel bikamsa deiyok ning ara, yata ati do?’ tenepse. Winilula ati ara, aning nirya tenipsirye utenepse. ‘Kume, weik kel bikna deiyok ning babye, aminyan dotalak ara, teleb kum kipdeipnamsil ati, deiyok ara pia kum upnamle,’ tenepse.

¹⁶ Aning ara, talye ati kum tenepse. Deiyok ara ani. Ara, weik kel bikamlinye babye, tonda walwal uk ulamlinye babye, akunum diplyeura, aminyan talak yuk nang arye, sik anang si ton, pia kum tenenyake. Daupnin balamikca ani, sik si babye kum si nyanyake. Yata ning do nirya ara, dorupnamle talak ara, ninye arye aning-aning nirya, adiparyuk luba kilongona uk unyake. Se, nun nirya ara, kam ton kum unamabe. Ara, weik kel bikamlinye babye, walwal uk ulamlinye babye, nun nirya ara dibina uk unamabe. Se, aning ara yata ati do?

¹⁷ Aning nirya tenipdesa ati ara, utenepse. ‘Se, na kam ununa ara deiyok ton kum ati, tukwak mutuku ulye ning nirya ara na like. Talye tonok unune, yuk ton kume. Aunun ning nirya ara, doyanamle talak ara, kanye kum deipnamnil ati, tonda deiyok kum upnamla ati, pia talye atibuk unune. Winipmanto ara, kumanya dopnin balamle ning atie, ninye arye, ‘Aning doptaliptinyeʼ tenen, pirilamak atonun unune. Aning ara na like,’ tenepse.

¹⁸ Tukwak mutuku noutam kam ulamse talak arye, na pil dolamsirye, nong ongolamse ning yala-yala nirya ap, na dolonun ning ap, deiyok ton kum ulule. Aminyan talak ara, narye pil weik dolamse arye, talibuka ulamse ning nirya ara, na akunum dipnyeura, yuknye birye dopropnamle. Ara, na punupnamnilanye bira, narye taleamse ning nirya ara, elcuk dopropnamle,’ tenebuka bikse.

¹⁹ Yuk nang aryuk na taleamse ning dopropnamaka bukni, yatanye birye biktu do? Na punupnamnilanye bira, weik kel bikamlinye unamle do? Pia walwalnye unamle do? Bukni, na kam ulamse talak mikip arye talibuka akunum pil dolamse ning ap, weik kel bikna deice arye ulamse ning ap nirya ara, el anye biryuk talibuka unamle. Winipnamla babye, doyanamle talak ara nong uplyeba, teleb upnamle do? kume, nun walwal ati, ‘Aning nirya babye, talye-talye uk ulule,’ tenepne.

²⁰ Winibuka tenepsa ati, narye apil nirya, tukwak mutuku noutam arye dolamse ning nirya ara, wini talak arye tenepman ning ara, ‘Se, aning nirya ara, nong ton kum upnamle, talye-talye ati pil dolamse,’ tenepsirye, malye kanye bobuka, kanye pum tam engana uk upse.

²¹ Winibuka tenepsa deiyok ara, ani. Ara, ninye arye, weik kel bikna deiyok ning kel bikna deice arye, moubuka teneplirye, el pil talibuka kel bikna ap, mikip ap deice arye, pil teleb kibuka donamne, tenebuka pil dolamik atonun kibuka, nong teleb kililule. Bukni, sirya tam ara, el amikip arye pil talibuka dolamle ning nirya ara, adiparyuk batakuka dibina uk ulule. Akunum diplyopura, atalak ara, el pil pia kum dolamlinye bira, talinye birye aning nirya ara doproplirye, elcuk aning nirya talibuka ulule. Ati, na tenepse ara, ‘Apil donyap ning nirya ara, dipkoprob dotalak nong teleb ning ton kum upnamla ati, apil donyap ning nirya ara, talye-talye atibuk unyabe. Aning babye, pia malye tenepse.

²² Aning ton tuba ton ap tenepsirye. Ara, ninye nirya, kam tuba ulamlye talak ara, ikin unmalibuk, kanye ikin deice aryuk pil dolule. Elce, ‘Akanye imun unmalibuk, nong kipnamlarya tenebuka pil dolul ning nirya ara, dipkoprob nong upnamle do, kum do? Kum tenepmana ati, aning nirya ara talye-talye uka!

²³ Tukwak nang nirya ara, yata yala pil don ning nirya ara, sikda, ‘Nong teleb kipnamsilarya tenebikirye sik kam tuba ulamikce talak arye, mikip arye pil donyaka deice arye, sik anang nong deice, uk dina ap, ikin un ning ap, kanye ikin kilina uk unyake. Tonda, sik anang lukunyan talak mapmacak babye, pia kum maluk unyake. ‘Na pil dopmana ara, teleb upnamle do? Talye pil doplopnamne do?’ tenen, tuba teninauk unyake. Na tenepmana ara, ‘Aning nirya ara, talye tonok ulule. Do upnamle talak ara, dipkoprob nong teleb kibuka kum upnamle,’ tenepne.

²⁴ Aning nirya ara, narye tenepne. ‘Ninye arye atenebuka donyap pil nirya ara, pia teleb ning ton kum unyabe. Ati nun winipnamtibye ning, pia teleb ning ara, ani. Ara, mek dina ap, din dina ap, tonda nun pil dopmatibye touk, apil donyaba deice aryuk, kanye deibuka unamtibye. Aning dotalak ara, nong teleb upnamnil do? Yata tonye birye aning nirya dopropnamle do?’ tenen ning ara, kume. Aning ara, teleb uka ati, narye tenepse ara ani. ‘Ara mitik babye, nun dam aupsilye ning ara, nun ni Allah, elcuk aning nirya ara, el taruk aryuk aresululeʼ tenen, unamabe.’ Utenebibye ning ara, aninguk talibuka moubibyak arye, tunim abuka una ara, teleb uka tenepse.

²⁵ Aning ara, talye ati kum nyapne. Deiyok ara ani. Ninye arye talye din ninguk dipturye kanye deipdanuka uptu ura, elcuk yata wiribuka aning winiptu do? kume, Allah elcuk, bico tenepsilirye, nun ninye ati aning nirya kum arepsilyopura, yata wiribuka doproptibye do? Kume, kum winipmatoe. Aning nirya ara, el deice aryuk, dolonyabe.

²⁶ Tonda, Allah ati diba tenebuka ululnye bira, Allah arye, Winipnamake,’ tenelul touk winiplinye tonok, Allah el kanye deiplirye melilule. Ara, Allah arye, atonye tonok, weik kel bikna deiyok ning babye, moubuka teneplirye, teleb kibuka pil don kel bikina babye, tonda teleb un ning babye, kanye delina deiyok ning babye, aning nirya ara arelule. Bukni, Allah elti, diba kum teneplirye, malye un ning tuba ululnye bira, Allah arye ikin uning arelule. Ara, atonye birye, ikin pil dolamlirye, bona tonok imun kanye bobuka, ikin unmalibuk pil doplirye, aning nirya bulubuka delilule. Bukni, anye bira, adeililul ning ara, aminyan talak Allah arye dobuka, elti, diba tenelulnye uk tabakuka arelule. Allah ati, diba tenena kumce, ikin pil dolamlinye bira, aning nirya kum arenamle. Ati, na kanye ara, ninye tukwak nang tonok ikin kanye bobuka pil donyap ning nirya ara, talye-talye atibuk pil donyabe. Aminyan doupnamle talak ara, dipkoprob nong teleb kibuka kum upnamlarya. Winipmanto ara, kumanya dolamlyak, ninye arye, ‘bikbik abuka bibirye, kum mikip taliptibyeʼ tenen, ulamak touk unyabe tenepne. Peterena Deiyoknye birye nyabuk.