Penghotbah 12 - Eipomek

“Allah atibuk pia tenenamlulume,” nyabuk yupu

¹ Ura, an kam unalam talak, ikin ning an dam kum upmakilye, keting tamun aniryuk, an kwepdeipkuknye Allah atibuk tenenamlyame. Ara, an akunum wisi daminye talak ara, ‘Kam una na like,’ tenepmince nyanamlama ati, nyapkine. Ati Allah atibuk pia tenenamlyame.

² Aminyan talak ikin upnamkila ati, nyapkine. Ikin upkilyopura, an asing kupkilye talak ara, keting ap, wala ap, kurya ap, sik dirina ton teleb kibuka kum eipnamlame. Atalak nirya ara, pia kunukna uk upnamkile. Tonda dua bum tobuka balamle talak ara, mok duk bobuka yangalule. Awininamle ning ara, ‘Na opnilyak’ tenen, an ilil pia weik unamkile.

³ An kam unalam talak ara, mikip weik unalam bukni, akunum wisi daminye talak ara, mikip kum upkilirye, yok birbir anamkile. Winipmanto ara, ninye kam ulamak talak ara, mikip weik arye aik kalikna nang unyak bukni, wisi akunum deibicopura, mikip kum ati apil kum doptinge. Winilamak touk upnamkile. Tonda mikip weiknye ulyam bukni, an wisi akunum danin baminye talak ara, nong mitang kanipnamkile. Tonda, minopa ara, an din weika arye dilamlum bukni, an si nirya lukuka sakilirye, kum upkilye talak ara, an din ning weika arye kum dinamlame. Tonda, wisi daminye talak ara, jendela pum bisik dipdenamlam bukni, asing kupnamkila ati, lakak kum eipdanamlame. Lelim-lelim anamkile.

⁴ Aning atonun an aik bublan tiriknamlam talak ara, yakong duk teikin ning arye teiklamakba, lelim weik nyanamla babye, kum kekenalame. Ara, an amul kunuknamkila atia. Bukni, maka yupu nyalamle talak upliba, maka yupu nyaplopura, adiparyuk kekepmince bulongonamlame. Tonda maka yupu nyan talak upliba, yupu nyabicopura, teleb kibuka kum kekenamlame. Tonda an yupu tapnuminye talak ara, birbir apmince sisikinamlame. Ati an bidamnye arye, mot kum senamlame.

⁵ Winipnalam talak ara, an weik mutuku dup welebana ati ikin upkilirye, ilil weik unamkile. Tonda an nong ara wiring-waring apdanin bamince, ‘Saknyak’ tenen, ilil weik unamkile. Tonda, an kul potong papkilye talak ara, yo kita oplirye, kurulamle touk upnamkile. Winipkilyopura, sul kwising dipnulye talak pol tengelamle touk unamkile. Pia wisi daminyopura, ‘Aminyan talak winipnamne, aning winipnamne,’ tenen ning ara, kum tenenalame. Aning atonun, ‘Kil ap neika maptinimnye,’ kum tenenalame. Aning nirya akunum upsilyeba, nun nirya ninye dibikirye wekelbanyak mutuku binamabe. Winibibiba sik kam tuba unamak nang arye, nunti tenekirye, weik bisikak nirya engepnin banamake.

⁶ Aning nirya kum wamkilye talak aryuk, an kwepdeipkuknye Allah atibuk, moubuka tenenamlyame. Kat ning perak arye rantai tapu memebuk ning, min kum bulukmalye talak ap, tonda, weik songgol makau emas deice memebuk ning, min kum copmalye talak aryuk, tamubuka Allah atibuk tenenamlyame. Tonda, mekwen dam deipmace makau, min kum copmalye talak ap, lokne mek palyamicak tapu dobuka, mekwen ati biryamikce ning kum bulupmalye talak ara, Allah atibuk tenenamlyame. Tonda tapu lilona ati, deibuka dolamak ning el si roda, min kum dakmalye talak ara, Allah atibuk tenenamlyame.

⁷ Aning atonun, nun ninye nong ara, tamubuka tukwak min kum danmapye talak ap, nun kanya tamubuka el arepsuknye Allah dam min kum binmapye talak ara, nunce Allah atibuk tenenamabe. Ayupu nirya nyapmakina ara, talye ati kume. Ara, ‘Na wisi daniryuka’ tenena meme, kam tuba unmaminye talak aniryuk, Allah diba tenebuka el si erepmince, ‘Allah atibuk tenebuka kentinilinamlyame’ tenen, nyapkine.

⁸ Na peterena deiyoknye birye nyapne. Na kanye tenenun ning ara, nyapnukine. Ara, nun tukwak ninye nirya arye wininyap ning ap, talye tukwak mutuku ulul ning ap nirya ara, talye-talye ninguk ulule. Deiyok ton pia kume. Tonda, nun tukwak nang arye, pil donyap ning nirya ara, talye-talye atibuk pil donyabe. Nong ton kum upnamsile. Nun tukwak ninye nirya ara, minopce dipna uk unyaba ati ara, ayupu nyapkine.

Ayupu nirya sirya dakna ati, nyabuk yupu

⁹ Kel bikna deiyok ning, weik arye kel bikamukce, amutuku ninye ati, peterena deiyoknye ulamukce, pia moubuka peterelamuk. Elce, teleb kibuka kel bikamuka deice arye, elce yuk kili sal ati, ‘Teleb kibuka unamak’ tenen, peterelamuk. Ara, winipmanto domon yupu ap, weik kel bikna deiyok ning ap, moubuka kel bikamuka deice arye peterelamuk. Weik kel kina deiyok ning nirya ara, ‘Deiyok anye’ tenen, moubuka tenelamuka deice arye, nong lakak kibuk ninguk, teleb kibuka sekuka kintinip deiamukce, peterelamuk.

¹⁰ Apeterena deiyoknye birye, pia pi dobuka, ‘Yupu teleb ninguk peterepniba, ninye nirya kanye deibikirye, kel biknamak’ tenen, yupu teleb ninguk wibuka peterelamuk. Elce wibuka peterelamuk yupu ara, pia diksukum teleb kibuka una yupu ap, pia dipkoprob yupu ap uk, wibuka peterelamuk. Tilila yupu ap tabakuka pia kum peterelamuk. Dipkoprop yupu uk, wibuka sekelamukce, peterelamuk.

¹¹ Weik kel kina deiyok ning, kel bikamikce nang arye, nyanyak yupu ara, pia telebuk ulule. Winipmanto ara, domba basam weina deiyok nang arye, pia tace kama bobikirye, sik domba basam ati, ‘Teleb bisikuk binuyak’ tenen, mitik ton yakuka tonokak kipnin bakibuk, teleb bisik balamak touk, sikce nyasinyak yupu babye, teleb kibuka delisinyake. Ara, sik nyasinyak yupu deice arye, ‘Dipkoprop bisik ani,’ tenen, kel kinyabe. Winipmanto ara, kat yo deice, pakudakuka deiamikba, tace belyamlya arye, yakakibuk, uk diplyopura, tenepmalye bisik balamle touk, sik weik kel nang arye, nyasinyak yupu uk kekebibirye, teleb bisikuk banyabe. Anya arye, anyasinyak yupu nirya ara, Allah elce nyalisilye touk, nyabuka peteresinyake. Ati, anye bira nun nirya ati, teleb bisik peterena deiyoknye ati ara, nun domba basam weina deiyoknye atonun usilirye, nunti, teleb yupu nyalisulule.

¹² Tonda, apeteren deiyoknye birye, ayupu ton nyabuk. Na mapu, anyapmasin yupu nirya ara, moubuka asok deice deipmunce, aninguk tenebuka moubuka unamlume. Ara, yuk yupu ap tabakana meme. Buku sekna kel nang arye, buku ayala-ayala nirya, weika arye tonap tabakuka sekda banamake. Aning ara, kum sirya dakmanto. Pia dukdongobuka sekda bana uk unamake. Asekenamak yupu ara kili sal nirya arye, ‘Nong lakak kel keptibye’ tenen, abuku noutamak nirya ara, pia pi dobuka nukikirye, ‘Kel keptibye’ tenen, pirilenamak bukni, awinica deice arye, sik kanye tenen ning ap, sik nong ap, mikip kum upliba, batakanamake. Aning nirya ara, pia kum sirya dakmanto.

¹³ Wini talak ara, na tenyamse ning nirya ara, anggunti akunum laka nyapmasinba, akunum kekenmalume. Bukni, sirya nirya dakne ning ati, tonok tonap nyapnusine. Ayupu ara, ani. Abuku noutamak sekeiamsik ning nirya ara, ‘Weik ikin ning ara, dan do?’ tenen, tenilelamsirye, ‘Aning ara weik mambule,’ tenepse ning ara ani. Ara, Allah el tibuk ilil tenebuka unamabe. Winibuka ubirye, Allah arye nun tukwak ninye ati, ‘Aning wininamlulume, aning ara kum wininamlulume,’ nyapdeiamsuk yupu ara, aninguk moubuka talinamabe. Aninguk talibuka bobibirye dobolbanamnyabe. Anyapmasin ning ara, urdem ati kume. Deiyok ara, Allah arye, ninye tukwak mutuku unamak ninye arye, ‘Aning ara weik mambule, tenepnamak,’ tenesilye ning ara, akunuma. Elce nyasilye yupu moubuka kekebibirye, elce nyasilye touk kibuka, el amu tam unamabe. Weik mambul ning ara, akunuma.

¹⁴ Ayupu nirya ara, urdem ati kum nyapsine. Nun tukwak ninye nirya arye, pil donyap ning ap, tenebuka duknunyap ning aning-aning nirya ap ati, Allah eipsilirye, kel kisulula anya arye, aning nirya ati wenebuka yupu lipsisikuka bokeipnamsile. Ara, ‘Malye winilamik ning ara ani. Teleb winilamik ning ara ani,’ tenen, wipsilirye, nun pil erebirye winilamepya touk, Allah arye dekna arepnamsile. Ayupu ara, abuku Penghotba sekamuka deiyoknye birye nyabuk.