Penghotbah 11 - Eipomek

Kel weiknye birye, ‘Winipnamlulume,’ nyapdeibuk yupu

¹ Anggun talilulum ning nirya ara, noutamak arye bokuka, ninye yuk nang ati bico tenepmunce, weika arye arepmunyopura, dipkoprob dekna ning aminyan talak anggun dam tamubuka yalyeura, weika arye dolonamlume.

² Anggun talilulum ning noutamak arye bokuka, ninye tekbarye atonun ap, tonda ninye pinbarye atonun ap, bokuka arepnamlume. Wininamluma deiyok ara, ani. Ara, aminyan talak weik ikin upnamsil ning ara, ‘Atalak ara, aikin ning yanamle. Yuk talak ara, aning yanamle’ tenen, kel kum biktuma ati nyapsine. Ara, anggunce, anggun ning koproba bokuka yuk nang ati, melibuka arepmunyopura, aminyan talak anang arye, anggun ikin ning dopropmunye talak, anggun arelamlum nang arye melipnamsiaka ati nyapsine.

³ Winipmanto ning ara, im deice arye mirin dua paliplyopura, asukum arye mok bululamle. Akunum minopce buluplyopura, weik mok yalirye, tukwak mutuku nirya celule. Tonda, weik yo, el yuk arye tobuka poulamle ning ara, eitam do, outam do, el poulbinamlye tam uk, poulbilirye, asukumuk malule.

⁴ Yatanye birye ton dua ap, mok ap ati, ‘Aning yata wiripnamnil do? Aning kum daturye, dou maptuba, din yala ning doktinye,’ tenen, pia dilulnye bira, kum koupnamle. Kum kouamlyopura, nong libuka kum dinamle.

⁵ Ati ara, aning nirya ara, Allah aniryuk tenelul touk winilule ati ara, ninye arye el tenebuka winilul ning nirya ara, kel kum bikinyabe. Aning atonun, kilapu mi bomica ani, mi nong kina talak babye, kel kum bikinyabe. Tonda, kilapu mi bomice talak ara, ami isin yangalye bisik babye, kel kum bikinyabe. Ara, Allah arye tenebuk touk winilula atia. Ati ara, mitik ikin ning kum kel kinyap touk, Allah arye tenebuka pil dolul ning nirya ara, ninye arye tenebuka, noutam ning moubuka kum kel kinyabe.

⁶ Tonda beren tam talak arye, anggun yala ning dokonmamunya ani, sintam kiplya babye, batakna kumce, dukdongobuka dokonamlulume. Adokmamunye ning ara, yatato ning teleb ubuka paptuba, kel biktibye do? Tonda, beren tam dokmapye ning babye, sintam dokmapye ning babye nirya, telebuk ubuka paptu do? Aning ara, nun walwal anya arye, kel kum biktibya ati, pia pi dobuka pil dona uk unamlulume.

⁷ Beren tam talak keting panaplirye, dirina weik uplye talak ara, pia telebuk ulule. Winiplyeba aketing ara, dirina lak deiplyopura, ninye nirya arye, pia teleb kanye bobukabikirye, sik kanye deibuka unyake.

⁸ Yata nang do, sik nirya arye, pia kanye deibuka ukirye, ‘Telebe,’ nyanamake. Tonda, sik anang kan-kan arye, sik kam un talak, lo ton ap tabakuka arelula deice arye, keting tamun weik tonun unyak nang babye, sik kanye pia delinyake. Bukni, sik babye moubuka teninamake. Ara, anggun amutuku noutam kam tuba unamlum talak ara, yambul anun ton tupa aupmal bukni, dibikcopura, aminyan talak pia kunuknak unamlum talak ara, yupa pia weik, nukmanto kum unamle. Tonda, tuba kam unamlum talak anggun dam yanganamle ning nirya ara, talye nong kum upnamle ninguk yanganamsile. Winipmanto ara, kumanya mikip arye donmalirye baliba, tonoknye birye, ‘Akumanya talipnamneʼ tenen, mikip arye bikbik abuka bitua babye, akumanya ara, kum talipmanto ning ati, aning ara, nong pia kum upnamle. Talyeuk winilule.

Sik wel nang moubuka una ati, nyabuk yupu

⁹ Ati ara, anggun wel nanguk tuba ululum nang ara, anggun tuba weluk unamlum talak ara, kanye deibuka umunce, pin-pin kanye bobuka unamlume. Anggun talima noutam arye, ‘E, aning ara wininamne, aning ara, ton piripnamaneʼ tenen, teninamlum ning nirya ara, dobolbanamlume. Tonda, anggun asing arye eipmunce, ‘Se, aning ton taliptibye,’ tenelulum ning nirya babye, ‘Talipnunʼ tenen, dobolbanamlume. Wininamlum bukni, kanye moubukapmunce, teninamlume. Anggun wel tuba unamlum talak wininamlum ning nirya ara, Allah arye, anggun malye wininamlum ning nirya ati, dipdelirye, yupu bokeipsilyopura, wenepnamsile. ‘Dauplyeʼ tenen, talye luba kina kum unamle. Ati, pia moubuka teninamlume.

¹⁰ Ati, anggun wel nang ap, ninye dona kum kilapu ap ara, wisi min kum danmamunye talak nirya ara, anggun talima noutam arye, ‘Se, yata wiripnamnil do? Tonda, anggun talima noutam arye, ‘Na tenyamse ning nirya ara, aminyan talak, talye karin arye kum danamnil do?’ tenelulum ning ap, tonda, ‘Se, na nong noutamuk dinulul ning ara, yata ati do?’ tenelulum ning nirya ara, yakuka dopkwetepmunce, tuba tenina meme. Bukni, aning ton teninamlume. Anggun wel tuba unamlum talak ara, minopce kum danamsile. Aning nirya babye, nong kum upnamle ning, ‘Kumanya doliba, telebʼ tenen, bikbik abuka dobolbana meme, aning ara, pia talye ninguk ulula ati, nyapsine.