Penghotbah 10 - EipomekNinye arye, walwal ulamikca deice arye, malye winilul ning ati, nyabuk yupu 1 Nintong pia teleb ulamle minyak aupmatua babye, deibum arye aning deice amulamliba, amek makau pum tam lyubuka tong nyalamlirye, malye ulamle touk, ninye arye kel weik bikamikirye, pia teleb pil doptingba, yuk nang nirya arye, aning ati, ‘E, aning ara pia telebe,’ nyabuka, si ereptinga babye, walwal nang arye, sik mitik tonun malye unyaka deice arye, aning nirya ara, malye kipdeibikirye, lubakinyake. Awininyak ning ara, mitikto malye wininyak bukni, awininyaka deice arye, kel weik bikin ning nirya ara, lubakinyake. 2 Diba teleb unyak nang ara, diksukum ubuka, pil donyak ning ara pia telebe. Bukni, sik pia walwal nang arye, malye un ning talibuka unyaka ati, kwanim tam atonun kibuka unyaka ati, sikda pia malyeuk unyake. 3 Sik malye un ning talibuka unyak nang ara, teleb karayong bisik deice banmace talak babye, sikda, moubuka kum tenipmanto nang unyakce, pia walwal nanguk unyaka ati, sik walwal unyak ning arye, lak upliba, yuk nang nirya eibikirye, akunuma, ‘Se, anang ara, pia dipkoprob walwal nang unyake,’ tenebikirye, bikinyake. 4 Aning ton bikse. Aminyan talak ara, anggun mutuku ara, ninye deiyoknye birye, anggunti yu weik upliba, wenepsilyopura, anggunce elti, melibuka pil dona ati ara, batakna kumce, tuba teleb ubuka pil dona uk unamlume. Deiyok ara, ani. Anggunce, ‘Seʼ tenen, kanye teniltona kumce, talye kanye bobuka, pil teleb ubuka tuba dolamunya ani, aminyan talak ara, elce aning eiplyopura, el yu kum upliba, anggunti tonap, kanye delinamsile. Anggunce malye weik ulamunya babye, adiparyuk mitang asa arye, “Se na malye ulamse,” nyabikirye, namin asa arye umunce, nimalyap pil donamlume. Winilamunya deice arye, elda, tuba tamubuka anggunti kanye delinamsile. 5 Tonda, yuk malye weik winin ning ton, tukwak mutuku noutam ulamik nang arye wininyak ning ara, narye akunum eipse deice arye bikse. Aeipse ning ara ani. Sik ninye yupu nyana ati, sisin nang, ninye deiyok nang arye, malye weik uptingiba, mambul weik ulamuk ning ati eipse. Ara, ani. 6 Pia walwal nang unyak bukni, ‘Deiyok nang unamakʼ tenen, walwal nang erebikirye, yuk nang deice tam deibikiba, mambul weik pil talibuka donyak bukni, malye kilinyake. Tonda, sik kel weik bikamikce, bona talin nang weik unyak nang ara, amu tamuk deibikiba, mambul kumce, talye piluk talibuka donyake. Aninye deiyok nang arye, walwal nanguk erelinyak bukni, kel nang ap, bona talin nang ap, amu tamuk delinyaka ara, malye weik unyaka ati nyapsine. 7 Aning atonun, yuk nang arye, ‘Nun ikin pil donamsiakʼ tenen, aning-aning kel kum bikamik nang bukni, yo bok deice dekikiba, ikin pil dikceba, donyak bukni, amelibuka pil don nang arye, kuda basam deice bukuka banyake. Tonda, ninye deiyok kibuka ulamik nang arye, diamik mapu ara, kuda basam balye deice buktingce, balamting bukni, aning kumce, tuku deice diamuk yanibuka banyake. Dipkoprop ning ara, yo bok arye dekikcak arye, talye piluk melibuka donyak nang ara, bisik diamuk balamting bukni, Sikda kuda basam deice bukuka banyake. Aning nirya ara, teleb winin ning kum bukni, malye un ninguk winibuka unmekak eipse. 8 Anggun nirya moubuka tenipnamlume. Yatanye do nirya, ‘Yuk nang ton opnunʼ tenen, elce tuku pum noutam palibuka delilulnye bira, aminyan talak, winilula deice aryuk, el bidamnye palilul tuku pum uk saknamle. Aning atonun, ninye arye, anggun asik do, anggun wa winak do nirya ara, ‘Yuk nang arye ubula dopropnuyabe tenebikirye, yasikcakʼ tenen, poka domik ning ati, malye unanye birye, ‘lokloplirye, wekuka ubula dopropnunʼ tenenululnye bira, yuk nang sik poka do, wa winak poka do, uluploplirye weklyopura, adiparyuk yu kwatima arye anye si toplyeba dipnamle. “Ati winina ara meme,” nyapsine. 9 Aning atonun, sik yata nang do nirya, sikce, ‘Kat weik keil telepnirye, aning dobuka, aik dopnamneʼ tenen, apil donyak nang ara, akeil uk besi arye telepliba dakuka saklirye, anang sik nong deice dila weik saknamle. Tonda aning atonun, yatanye birye do nirya, yo werelulnye bira, aminyan talak ara, opdanamle kum danya. 10 Ati, apil donamlum talak ara, moubuka teninamlume. Ara, Anggunda yo werelulum talak ara, anggun kapak kum ketepmamunyeba, yu kum upsilyopura, anggun pil dopnamluma ara, anggun mikip weik deice aryuk pi dobukamunce, pil donamlume. Aning atonun, ‘Kat keil telepnirye, mitik keil dobuka aik poka dopnamne,’ tenepmunyopura, min yuma ara, akeil telena ati besi ara, dipkoprob teleb ninguk kintinip deipnamlume. Kumopura, pia ikin pil dona deice aryuk, akeil telepnamlume. Ati, pil min kum dopmamunye talak aryuk, minopce anggun kanye tenen ning ara, pia teleb ninguk tenipmunce, kintinip deipnamlume. Bukni, kanam talak aryuk, weik tonun kel bikamtum toura, aning deice arye apil-apil nirya ara, caknam upnamle. 11 Ura, yu kwatima arye, ‘Si topsilyak,’ tenen, kel weik bikamikce nang arye, ninye si toplyak tenen, namin kibuka dobikca deice arye, kwatima ara, akunum mitang kipdeibicopura, aninye on kwatima arye, talima mitang upliba, ninye kum si tonamsile. Bukni, apil dona kumce, ayu kwatima talipmunba, akwatima arye, si akunum topsilyopura, yu kwatima mitang kina kel nang ara, ‘Minop yamunce kwatima mitang kipdeipsutume,’ kum nyanamlume. Kume, akunum topsilyopura, dadipnalume. 12 Aning ton bikse. Ninye ton, kel weik bikikirye, pia diksukum kanye uk tenebuka ululnye bira, kel yupu nyaplyopura, yuk nang kekebikirye, ‘E, anye birye nyasilye yupu ara, pia teleb,’ tenebikirye, anye biti, si erebuka kinamake. Bukni, pia walwal ulamlinye birye nyalul yupu ara, elce walwal yupu nyalula deice arye, akunum, el bidamnye ati malye kililalule. 13 Sik pia walwal unyak nang arye, sik yupu nyana deiyok kounyak talak ara, sik yupu talye nong kum yupu uk deiyok koubuka nyabikirye, talye nyalamikca ani, sik yupu talinyaka deice arye, aminyan talak ara, motona nang arye ulamak touk, malye ninguk wininyake. 14 Winibuka unyak bukni, sik moubuka tenina kumce, walwal uk unyak nang ara, talye yupu pia weik tonun tuba-tuba nyanyaka ati, pia kum tunim nyanyake. Tonda, dipkoprob nyapsine. Aminyan doyanamle talak winipnamsil ning ara, yatanye birye laka nyapsutu do? Kume, ninye tukwak nang ara, aminyan doupnamle talak winipnamsil ning nirya ara, pia kel bikmanto kum unyaba ati, tonoknye babye, dipkoprob kum laka nyapsutue. Aning nirya ara, duknulamaka atonun ulula ati, nunce yuk nang ati, doupnamle talak winipnamsil ning ati, dipkoprob pia kum laka nyaptibye. 15 Aning ton kel bikse. Sik pia walwal nang ara, ‘E, na aik ban bisik ara ani,’ pia kum tenenyake. Sik walwal uk unyaka ati, sik aik ban bisik babye, kum kel bikinyake. Pia walwal nanguk unyaka ati, sikce pia pi dobuka, mikip arye pil donyaka deice arye, sik nong mikip kum kipnin balamlyeba, winipmanto kum unyake. 16 Se yata mutuku nang do nirya, sik mutuku talibuka ulul ninye deiyoknye bira, dipkoprob kel weik bikamuknye kum bukni, talye pil melibuka dolulnye uplyopura, anggunda bicoe. Ikin kanye uk bobuka unamlume. Aning atonun, yata mutuku nang do nirya, sik mutuku talibuka unyak deiyok nang arye, beren tam talak bukikirye, pil dona kum bukni, talye kanye bobikirye, weik kwalya kwalibikirye, din weik tonun dibikcopura, aminyan talak ara, anggun amutuku ululum nang nirya ara, ikin weik unamsile. Ati, anggunda bicoe nyapsine. 17 Aning kum bukni, yata mutuku do nirya, anggun deiyoknye, Raja birye, dipkoprob pia teleb diksukumuk ululnye uptopura, anggunda teleb unamlume. Tonda, anggun mutuku talibuka, ninye deiyoknye Raja amu tam, el melibuka deiyok pil talibuka unyak nang arye, dipkoprob din keting uk, din dabuka dinyak nang uptingopura, anggunda telebuk unamlume. Ara, anggun mutuku deiyok nang ara, moubuka tenina kumce, talye kanye bobuka talye-talye un ning wininyaka ati nyapsine. Sik adeiyok nang ara, ‘Din ning dibipya deice arye, tonap nun mikip upsilyopura, nun mutuku nang teleb kibuka talinamapʼ tenen, din ning din ketinguk, dinyake. Sikda, yu mek kanye wangalamak mek ara, pia kum dinyake. Winikirye sik moubuka un ninguk talibuka unyake. Ati, anggun amutuku ululum nang ara, telebuk unamlume. 18 Tonda, aning ton winilamukba elilamsa ati, bikamse. Yata nang do nirya, sikce moubuka kum tenebikirye, ‘Ikin pil ara na likʼ tenebuka, ulamiceba, sik asik donyaka nirya ara, malye kibuka lyuna uk upnamle. Tonda, ‘Pil ara na like,’ tenekirye, talye bukuka, pil mikip arye kum donyak nang ara, sik aik aruma deice ara, malye kibuka lyupnin balamlirye kin-kin uk upnin balamliba, mok ceplye talak ara, anyaik pum tam ara, mok weik sakalule. Aning nirya winilya deiyok ara, sik pil dona lik una deice arye winilule. 19 Tonda, na kanye ara, weik kwalya kwalibuka din talak ara, akwalya dinyak nang nirya ara, akutuna ap, kanye delilana ap, unyake. Atonun tonda, anggur mek din talak ara, kanye pia teleb kanye uk bobuka ukirye, ikin ulul ning ara, tenina kumce, adiparyuk lubakinyake. Tonda, yo bok ap, dengna ning ap weik talinyak nang ara, sik patan ning ayala-yala nirya ara, aning deice arye arebikcopura, aning-aning nirya dekikirye, telebuk unyake. 20 Tonda, amambul yupu ton nyapsine. ‘Ikin ning ara, nun dam yanuka upsilyakʼ tenen ati ara, anggunce anggun mutuku talibuka, ulul ninye deiyoknye biti, sikak suna pia meme. El ti, ninye sun yupu ara, lakak arye nyana babye, anggun talima noutam arye, ‘Supnamapʼ tenen, tenina babye, pia kum teninamlume. Anggun talima noutam tenebuka bataknamlulume. Suna ara, meme. Tonda, aning atonun, bona utotoa talibuka unyak nang ati, ‘Anggunda nun like,’ nyabuka, lak arye nyana babye, anggun man aik pum tam unamlum talak babye, suna ara, pia meme. Deiyok ara, ani. Winipmanto ara, ato yupu nyapmunyopura, im tam lakuka balamle maka tonok arye, anggunce nyanmamunye yupu ara, kekepsilyopura, anggunce, ‘Anye supnamne,’ tenepmamunye dam binuka laka nyalbanamle do? ‘Winiplyakʼ tenen ati, ato yupu tenina ap, nyana ap ara, pia meme nyapsine. |
© 2023, Wycliffe Bible Translators, Inc. All rights reserved.
Wycliffe Bible Translators, Inc.