Penghotbah 1 - Eipomek

Kel weik bikamuknye, Peterena Deiyoknye birye tenyamuk ning ati, nyabuk yupu

¹ Abuku noutam ubuk yupu ara, kel weik bikamukce, moubuka teninanye, Peterena Deiyok Nye, Raja Daud birye deiamuknye, ulamuk. Anye bira, el li koproba Daud biti, punubukce, weik asik kota Yerusalem talibuka, Raja kiamuknye birye nyabuk.

² Peterena Deiyoknye birye, el kanye aryuk, ayupu nyabuk. “Yata yupu do, yata un ning do nirya ara, tia ninguk ulula ati, el nong deiyok noutam ning ton, pia kum upmasila ati, aning nirya ara, talye ning uka,’ teneptibya. Elce, ‘Yata ning do nirya, tukwak nang arye wininyak ning ap, teninyak ning ap ara, deiyok noutam ton, pia kum upnamsila ati, tia ninguk ulula ati, aning nirya ara, talye ning uka,’ teneptibye,’ tenebukce nyabuk. Tonda, ‘Nun kam unyaba ara, talye atibuk unyabe. Anirya ara, deiyok noutam ton, kum upnamle ati, tia wininyap ning nirya ara, talye ning uka,” nyabuk.

³ “Winipmanto ara, nun tukwak unyap nang nirya ara, tuba kam unyap talak nirya ara, keting noutam nirya, ikin pil donyaba deice arye, nun mikip nirya ara, talye atibuk batakanyabe. Bukni, nun pil dolamepye ning ati, yatato ning doproptibya deice arye, teleb kipsutu do? ‘Pil ton dopneba, nong teleb ning dopropnamne,’ teninyap ning ara, dan ning do? Kume, aning deice arye, teleb kipsutu ning ara, kum upmale,” nyabuk.

⁴ Tonda, ‘Ninye winin ning ati aning ara, tonok talak dadeipdanin yangalamik nang ton, nebuka unmakecopura, ton dadeipdanin bakiba, unamak nang babye, sikce ton kume, kum danalule. Bukni, tukwak mutuku ara, pia ati atonun tuba aupnamle,’ tenebukce nyabuk.

⁵ Tonda keting ara, asum-asum nirya, tuba panalyangalule. Atonun, keting ara asum-asum nirya, tuba kumulbalule. Na kanye ara, ‘Keting elda, mining bisikuk tuba-tuba tamubuka yanmana, minopce otam binmana kilul ati, pia lik ulule,’ tenebukce nyabuk.

⁶ Tonda, kumanya atonun ulule. Kumanya ara, pu aplirye, bobuka iknapye tam, (arah selatan) tam balule. Atam arye ubuka bilirye, tuba tamubuka dabu tam ara (arah utara) binuka tuba welelule. Abisikuk pia binmalya ani, yanmalya ani, ayanmana, obinmana kilirye, mining bisikuk tamultolule. Asum-asum nirya ara, atam arye, otam ton balyopura, akunuma.

⁷ Atonun ton, weik balamle mek nirya ara, oplirye bobilirye, weik laut mekwenuk dongopliba, delilbalule. Bukni, mekwen delilbalulak, weik laut mekwen ara, amek arye kum langdilsakalule. Mek pu tam arye, obukaplirye, dobuka mek dara tamuk balirye, tuba-tuba mek mining bisikuk tamulolule.

⁸ Se, yata ning do nirya, aning yuk-yuk ning nirya ara, atonun ulirye lik usulule. Ara, lik usulul nang ara, nunce kum nukuka bikmanto, tonda kum nyapmanto usulule. Tonda, nun asing arye, tuba-tuba aninguk dibirye, aminyan talak lik weik usulule. Atonun tonda, nun amul arye tuba-tuba aninguk kekebibirye, nun lik weik usulule.

⁹ Yata ning ton, akunum winipliba awamlyopura, aninguk ara, tonap tuba tamubuka winipnamle. Tonda, yata ning ton winyamibyopura, tuba aninguk tonap tamubuka wininyabe. Atukwak mutuku noutam ara, mince wamlye ninguk, tuba tamubuka ulule. Ninye arye, min kum kulamik ning ap, min kum elilamikce, kum kekelamik ning ap ara, ton pia kum ulule. Keting amu tam ulamle ning nirya ara, mince awamuk. Tonda aminyan talak babye, atonun apia upnamle!

¹⁰ Anggun moubuka tenipdelulume! Ton tam nang arye, “Anggun bita dipdelulume! Ara winiryuk ning asukum aupmala ati, dilyalulume!” nyaptinga babye, diba kum tenepnamlume. Kume, aulul ning nirya ara, nun min kum deiamsik talak arye, akunum uamuk ning bukni, wini talak arye, tamubuka laka ulule.

¹¹ Tonda, pia min talak arye kam ulamik nang ara, wini talak unyak ninye arye, ton tamubuka, anang ati, tuba kum teninyake. Atonun, dotalak unamak nang ara, sik unamak talak bukni, dorapce, aminyan talak ton unamak nang arye, anang ton tuba kum teninamake. Ninye ap, awamlye ning, ninye arye wininyak ning nirya ara, doyanamle talak unamak nang nirya ara, ‘Aning uamuk ning ara, ton ani,’ pia kum tenepnamake. ‘Ninye arye, aning-aning nirya ara, luba kinauk unyabe.’ Kel weik bikamuk Peterena Deiyoknye birye, nyabuk.

Moubuka teninanye, Peterena Deiyoknye bira, el winilamuk ning ati, laka nyabuk yupu

¹² Peterena Deiyoknye birye nyabuk. Nara pia moubuka tenipnirye, Peterena Deiyoknye unune. Narye sik Israel nang nirya ati, ninye deiyoknye Raja kibukapsirye, weik asik Yerusalem mutuku noutam talibuka unune.

¹³ Nara, sik Raja ulamse talak nirya ara, tukwak mutuku noutam aulul ning nirya ara, pia moubuka dipdenirye, kel weik bikamsa deice arye, aning deiyok ara, pia bita biknamne,’ tenepse. Allah arye nun tukwak nang nirya ati, ‘Winibuka moubuka dipdekirye, aning-aning nirya deiyok ning ara, biknamak’ tenen, ‘Kintinip deipsuk ning ara, dipkoprob imun kanye bobuka, un ninguk areamsuke,’ tenepse.

¹⁴ Narye nun tukwak mutuku ninye, yala nirya unyap nang ara, pia moubuka elinune. Na kanye ara, nunce awininyab ning nirya ara, dipkoprob talye ati buk wininyabe. Ara winipmanto ara, kumanya pu abuka baliba, ninye arye, ‘Akumanya pu alamle ning taleptibye’ tenen, bikbik abuka ayanmana, obinmana kibuka pirilamaka atonun unyabe. Deiyok kum buk, talye ati unyabe.

¹⁵ Winipmanto ning ara, nyapsine. Ara, kwalyamlye ning ara, tamubuka kum lipsisiktibye. Tonda, sukulul ning ap, kum wamtu ning ap ara, tamubuka eiptibirye, kum nuktibye. Ara winipmanto kume.

¹⁶ Na kanye pum tam arye nyapdase. ‘Kume, kel bikna deiyok ning ara, weik tonun akunum bikse. Tonda, narye akunum bikuka tenepse ning ara, min talak Yerusalem mutuku talibuka ulamik ninye deiyok nang ara, aning atonun kel kum biklamike. Sikda mitik tonunuk kel bikamik. Bukni, nauk ara, weik tonun bikse. Tonda, nara kel weik bikna deiyok ning ap, ‘Teleb un ning ara ani,’ tenen ning ap, aning dopropsa deice arye, kel weik bikinune,’ tenenune.

¹⁷ Tonda, na kanye pum tam arye, nara, ‘Kel weik bikna deiyok ning arye, teleb un ning ara, ani,’ tenen ning ap, walwal un ning ara, aniʼ tenen, moubuka tenen ning ap, tonda lup kanye bonyap ning ap, pia malye winin ning ap ara, aning nirya moubuka tenipnirye, biknamne,’ tenepse. Bukni, nara akunum tenipse. ‘Aning biknun’ tenen, piripse ning ara, winipmanto ning ara, kumanya arye, pu abuka, baliba, bikbik abuka tomobuka taleptibye’ tenen, pirilamaka atonun unune. Aning ara, winipmanto kume.

¹⁸ Deiyok ara, nun ninye arye, kel weik bikna deiyok ning, kel weik biknin bakcopura, akel bikna deice arye, nun kanye talima pum tam arye, imun kanye bon ning ton yangalule. Aning atonun, yata nang do nirya, moubuka tenebikirye, kel bikna deiyok ning ara, pia weik bikinyak nang ara, sik bidamang arye, pia kanye imun kelilakirye, talima sukupliba, engenauk unyake. Weik kel bikamuk peterena Deiyoknye birye nyabuk.