Nehemia 8 - Eipomek

Allah arye, ‘Wininamlulume, aning ara ton kum wininamlulume,’ nyalamuk yupu, Esra birye dobuka, lak nyabuk yupu

¹ Yerusalem mutuku noutam ara, mek kwelbalamik bublan dam bukni, weik lo uamukce, dalalamuk sukumuk Israel ninye nirya bulubik. Bulubukabikce, sikce Esra biti nyabik. “Naio, Allah el si Yahweh arye, nun Israel ninye ati, ‘Aning ara wininamlume, aning ara ton kum wininamlume,’ nyapdeipsuk yupu, kekenamaba ati, Allah arye nyapdeiamukba, Musa birye sekeiamsuk buku, Mem Yupu buku boyamince, yinipnamsilame,” nyabik. Esra bira, Allah nyalamuk yupu lak nyana ap, peterena ap deiyoknye ulamuk.

² Nyabika ati, tekbarye wala bukni, min yuma sum akunum kibukopura, Allah el si eren aik pil dolamuknye Esra bira, Allah el si Yahweh arye nyalamuk yupu dobuka boyayuk. Ara, Allah arye Israel ninye ati, ‘Wininamlulume, aning ara ton kum wininamlume,’ nyapdeiamuk yupu, Mem Yupu buku boyayuk. Israel ninye ara, urdem unmekak uk, Esra birye abuku boyayuk. Atalak akunum ubukopura, ayupu kekepmanto ninye nirya, Israel ninye sal ap, kilapu ap, mapu ap nirya, mek kweyangan bisik bublan dam yanuka tikmekbuk, Esra birye abuku yinibuk. Ara, Allah arye nyabukba, Musa birye sekeiamuk buku, Mem Yupu buku yinibuk.

³ Awala akunum ubukopura, Allah el si eren aik pil donanye Esra birye, mek kwelbalamik bisik bublan dam tikukce, Mem Yupu buku yinibuk. Esra birye yininmok talak ara, Israel ninye sal ap, kilapu ap, mapu ap nirya, tonda ayupu kekepmanto nang nirya ap, abublan damuk bulubuka wekmekce, pia moubuka kekenmek. Esra birye yininmok talak ara, beren tam talak arye yininmoka ani, keting duk-duk akunum ubukopura, akunum sirya dakukce, batakuk. Abuku Mem Yupu buku yinibuka nyanmok talak ara, sik sal ap, kilapu ap, mapu ap nirya, tunim abuka bukmekce, moubuka kekenmek. ‘Ayupu ara mambule’ tenen, pia moubuka kekenmek.

⁴ ‘Esra bira Allah arye nyalamuk Mem Yupu, buku yininamal’ tenen, cang yo dobuka deipmekak, welebinuka tikukce ayupu yinibuk. El binuka tikuk talak ara, el sirik tam ara, ninye ton tikik. Sik si ara, Matica ap, Sema ap, Anaya ap, Uria ap, Hilkia ap, tonda Maseya ap, neika tikmek. Aning atonun, el kwanim tam neika yanuka tikmek nang sik si ara, Pedaya ap, Misael ap, Malkia ap, Hasum ap, Hasbadana ap, Zakaria ap, tonda Mesulam ap tikmek.

⁵ Winibik talak ara, Esra birye, asum kintinep deipmek cang yo moropdeipmek deice, welebuka tikmoka ati, sik Israel ninye nirya, bulubuka wekmek nang nirya arye, tukwak bukuka Esra biti dinmek. Esra birye, ‘Abuku yinipnun’ tenen, yokeibuk talak ara, abulupmek nang nirya arye, ‘Si erepnamap’ tenen, tikmekce dinmek.

⁶ Winibikura, Esra birye, “Nun ni koproba Allah, el si Yahweh ara, pia teleb, mikip weiknye ulule,” nyabuka si erenmok talak ara, sik abulupmek ninye nirya arye, sik taruk erebukabikce nyanmek. “Pia dipkoprop, nyanmalama ati, ‘Dipkoproba akunuma’ tenen, ‘Amin,’ nyapmabe,” nyanmek. Nyanmek ning ara, Allah el si erena ati, atalak aryuk sik nirya nong kanupdongobikce, tukwak dinmekce, Allah el si Yahweh atibuk, el si erebuka winilinmek.

⁷ Tonda, atalak uk, Allah arye, ‘Wininamlulume, aning ara ton kum wininamlume,’ nyabuka minop talak nyalamuk yupu ara, sik Lewi yala nang, Mem Yupu peterena deiyok nang unmeka anya arye, anang arye, “Allah nyalamuk yupu deiyok ara, ani, ani,” nyabukabikce, Israel ninye ati lak nyabuka peterenmek. Sik Lewi yala nang, peterenmek nang, sik si ara ani. Yesua, Bani, Serebya, Yamin, Akub, Sabetai, Hodia, Maseya, Kelita, Asarya, Yosabad, Hanan, tonda Pelaya. Anang arye peterenmekba, sik atikmek nang moubuka kekenmek.

⁸ Mem Yupu buku noutamak sekamuk ning ara, Allah arye Israel ninye ati, ‘Wininamlume, aning ara ton kum wininamlume,’ nyapdeiamuk yupu dobukabikce, deiyok ning ati, lak nyabuka peterenmek. Ara, ‘Israel ninye nirya arye, ayupu deiyok ning moubuka kel biknamak’ tenen, sekuka kintinip deiamik ning pasal, ayat nyanmek talak ara, ayupu deiyok ning ton, lak nyanmek. Sik Lewi yala nang arye, “Anggun ni koprop Allah, Yahweh arye nyapdeipsuk yupu ara, ani. Tonda ayupu deiyok ara, winibuka nyapsuke. Nyapsuk ati wininamabe,” nyabuka, lak peterenmekba, abulupmek nang nirya arye moubuka kekenmek.

⁹ Lewi yala nang arye, Allah nyalamuk Mem Yupu yininmek talak ara, Israel ninye kekenmekce, ‘Se, ayupu ara mambul weike’ tenen, engenmek. Engenmekba, amutuku ninye deiyok taleamuknye, Gubenur Nehemia ap, tonda Allah el si eren aik pum tam pil dolamukce, Allah yupu peterena pil taleamuka deiyoknye Esra ap, tonda, atalak Allah el yupu peterenmek nang, Lewi yala nang ap, sik Israel ninye nirya arye bulubuka kekenmek nang ati nyabik. “Nun ni koprop Allah, el si Yahweh ara, arup ara el weik ilil sum uple. Ati ara, Allah yupu atalak nyapmap ning ati, kekebuka tenipmunce, engena meme,” nyabik.

¹⁰ Nyabikura, Nehemia birye sik Israel ninye nirya ati, nyabuk. “Anggunda kum engenamlum bukni, pia teleb din ning ap, to ning ap, teleb mek ap, dilbinamlume. Winipmunce, yuk tam nang ara, ateleb dina kum kintinipmace nang ati, dobuka arepnamlume. Arup ara, Nun ni koprop Allah, el si Yahweh, el weik mambul sum upmasile. Ati, wini talak ara, engena kume. Nun ni Yahweh arye, el melisilya deice arye, kanye pin-pin usulule. Ateleb kanye talima arisilya deice arye, mikip kilisulule. Ati ara, asum engena kume,” nyabuk.

¹¹ Ayupu nyapmok touk, sik Lewi yala nang arye, sik Israel ninye nirya ati nyabik. “Anggun nirya tunim aplulume. Ikin kanye bobuka engena kume. Asum ara, Nun ni koprop Allah, el mambul sum anya arye, talima ikin kanye bona kume. Tunimabuka unamlume,” nyabikopura, aninye nirya engenmek ning ara, batakuka tunim abik.

¹² Lewi yala nang arye nyabikopura, Israel ninye nirya kekebikce, abulupmeka batakuka, sik yuk-yuk bindobik. Bindobikce, teleb din ning ap, mek ap dilbiyik. Tonda, ateleb din ning kum kintinipmek nang ati, ton tam bokuka arelbanmek. Winipmekce, teleb kanye bobuka, pin-pin asa arye, Allah el si erelamik. Teleb kanye bobuka unmeka deiyok ara, sik Lewi yala nang arye, Allah nyalamuk yupu yinibuka, deiyok ning lak kibuka lak nyanmekba, Israel ninye nirya arye, ‘Deiyok ani’ tenen, akunum kel bikmeka ati, pia teleb kanye deibuka unmek.

¹³ Unmekce, mapmeka berekukopura, awala uk bukni, like bitinye sum ara, Israel ninye nirya, sik yala yuk-yuk aunmek touk, ayala-ayala deiyok nang nirya ap, Allah el aik pum tam pil don nang ap, tonda sik melin nang, Lewi yala nang ap, nirya bulubuka Esra dam yanmek. Winipmeka deiyok ara, Allah arye nunti, ‘Wininamlume, aning ara ton kum wininamlume,’ nyabuka minop talak nyapdeiamsuk yupu, ‘Allah yupu peterena deiyoknye Esra birye, ayupu nyapnusile’ tenen, el dam yanmekba, Esra birye ayupu peterebukba, moubuka kekenmek.

¹⁴ Allah el si Yahweh arye, ‘Aning ara wininamlume, aning ara ton kum wininamlume,’ nyabuka, Israel ninye ati nyalamukba, Musa birye sekiamuk buku ara, Esra birye yininmokba kekebik. Abuku uamuk yupu noutam arye, aning ton kel bikik. Ara, abuku noutam, ayupu uamuk. Allah arye nyabuk. “Tek barye wala akunum uplyopura, Israel nang nirya arye, mitik bai tam doltakne aik dopna arye, tekbarye wala noutam nirya ara, bai tam doltakne aik pum bisikuk unamake. Ara, kwalya kwalinamlum talak noutam arye anyaik unamlume,” nyabuk. Ayupu ara, abuku noutamak sekeiamuk ning ara, Esra birye eibuka yinibukba, kekebuka kel bikik.

¹⁵ Tonda ayupu ton uamukba kekebikce kel kibik. Ara, Allah arye nyabuk, “Yerusalem mutuku noutamak ap, anggun unamlumak nirya ap ara, ayupu bobuka lak nyalbinamlume. Ara, bai tam bimunce, yo kan-kan arye, yo taruk sekuka boyanamlume. Ayo taruk yala ara, ninye arye kouamik zaitun yo taruk ap, talye bai tam palamle zaitun yo taruk ap, kepyal yo taruk ap, palma yo taruk ap, tonda yo bok weik ulamle yo taruk ap, yo bata ap kakapmunce, boyanamlulume. Yamunba, talye bai tam asik atonun aik, mitik doltakne aik dopnamlume. Dopmunyopura, tekbarye wala noutam nirya ara, anyaikuk tia unamlume. Aunamluma ara, Allah nyalamukba, Musa sekeiamsuk yupu noutam anyapdeipsuk touk wininamlume,” Esra birye yinibuka nyabuk. Ayupu uamuk ning ton kekebuka kel kibik.

¹⁶ Esra birye ayupu yinibukba, kekebikopura, atalak aryuk, sik Israel nang nirya arye, Allah yupu nyalamuk touk, bai tam binmekce, yo bok weik uamuk yo kakabikce, tuba tamubuka Yerusalem mutuku noutam boyanganmek. Boyayikopura, sik nirya arye yuk-yuk mitik bai tam asik atonun ning, doltakne aik yanuka dolamik. Ara, sik min arye keil aik lu kibuka domik aik deice tam, mitik doltakne aik dobik. Ton nang ara, sik asik dam dobik. Ton nang ara, Allah el si eren aik mining dam dobik. Ton nang ara, mek kwelban bisik bublan dam dobik. Ton nang ara, tonok pala lo ubukak noutam dobik. Tonda Efraim yala nang arye balamik bisik bublan dam ton dobik. Ara, yuk-yukak mitik doltakne aik weik dolamik.

¹⁷ Minop talak, sik Persia mutuku nang arye, Israel ninye ati obuka sirya dakikce, ninye weik dobuka bobiyikba, daulamika ani, tuba tamubuka Yerusalem mutuku winiryuk tamubuka yayik ninye nirya arye, amitik doltakne aik domik. Akunum dobikce, atalak ara bai tam aik pum bisikuk, tia talak ati unmek. Anang unmek nang ara, ninye si Nun, el mi Yosua ulamuk talak arye dipdongobuka, danoutam talak nirya ara, anang ton kum ulamik. Aketing tamun, aketing tamun yupa weik noutam nirya ara, Allah el si erena ati, mitik doltakne aik dobuka kum ulamik bukni, atalak ara tuba tonap ubik. Winibika ati ara, sik nirya kanye teleb bobuka pin-pin asa aryuk unmek.

¹⁸ Aunmek talak noutam, like tekbarye sum deice ara, Esra bira, Allah arye nyalamuk yupu, Mem Yupu noutam arye yinibuka peterenmok. Ara, Allah arye, Israel nang ati, ‘Wininamlume, aning ara ton kum wininamlume,’ nyapdeiamuk yupu, Mem Yupu buku yokuka yininmok. Atalak noutamak nirya, akwalya kwalilamikce, pin-pin asa arye unmek. Min yuma sum arye dipdongobuka, tekbarye sum ubukopura, sirya sum upnopura, sirya dakalongolamik. Dakalongon sum akunum ubukopura, Allah yupu deice nyalamuk touk, sik nirya tonokak uk bulubukabikce, yupu talipmek.