Nehemia 7 - Eipomek

Yerusalem cang keil poka, dobuka sirya dakikura, Nehemia birye, winibuk yupu

¹ Ura, Yerusalem mutuku antanap dongobuka domupu cang keil poka akunum sirya dakupopura, na Nehemia birye winipse. Keil poka bublan ati, bublan memebuburye, narye nyapdeipsiba, abublan ara bisik bublan memebuka tirikik. Winipsirye, sik bisik bublan dam kalikna deiyok nang ap, sik Allah yupu mot sena deiyok nang ap, tonda Allah el si eren aik pum tam pil dona deiyok nang, sik melin nang, Lewi yala nang ap, wipdeipse.

² Tonda, ‘Yerusalem mutuku nirya kalikuka dinamle’ tenen, na weit koproba Hanani wipdeipsiba, kalikna deiyoknye kibuk. Tonda, el melina ati, yuknye ton, el si Hanania ton wipdeipse. Anye bira, cang keil poka antanap dongobuka dolamikba, oldan nang kum yanmanto asik kalikna deiyoknye biti, ‘Benteng panglima, nyalamik atonun unamle’ tenen, wipdeipsiba, na weit koproba ati melilamuke. Ura Hanania wipdeipsa deiyok ara ani. Anye bira, Nun ni Koprop Allah ati, pia dib tenelamukce, Allah ati, ‘Elda pia mambule,’ tenelamukce, ilil ulamukba, dipkoprob diksukumnye ulamuk ati, wipdeipse. Yuk nang ara, mitik teleb ulamikce, Allah ati dib tenelamik bukni, elda pia dipkoprob dib tenebuka telebnye ulamuk. Ati el ap, na weit koproba ap arye, Yerusalem mutuku kalikna deiyok nang ulamdik.

³ Ati, narye sikti, nyapse. “Yerusalem mutuku aik wekelbana ati, winiryuk memebik bisik bublan ara, keting kum deipmalirye buppu kum piripmalye talak ara, bublan kukultakna meme. Keting deiplirye, buppu piriplye talak arye, abublan kukulinamlulume. Winipmamunya ani, akunum iniplyopura, tuba tamubuka bublan tirikilongonamlulume. Ara, sik abublan kalikin nang arye sik tuba kalikinmakce talak ara, anang aryuk abublan tirikdongobikirye, bisik kin-kin botopdeiamika arye, besi arye dongopdongobuka tirikilongonamake. Ara, kanam inipnin banmalye talak arye tirikinamake. Tonda, Yerusalem mutuku unyak ninye sik kaliknak atibuk, ninye wibuka kintinip deipnamlume. Ara, anggun aik dam bisik bublan ap, keil poka dobuka botopdeiamupu bublan ap, yuk bisik bublan dam kalikinamakak ap ati, kintinip deipnamlume,” nyapse.

Yuk mutuku nang arye bobinamikba, daulamika ani, tuba tamubuka, sik mutuku yayik ninye, sik si sekeibik yupu

⁴ Pala weik mutuku, weik asik Yerusalem ara, lo weik aubuk bukni, amutuku ulamik ninye ara mitik uka. Aning atonun, ninye un aik babye, minop talak arye uluplomik ning ara, tuba tonap weik arye tamubuka kum dolamik.

⁵ Ati ara, Allah arye nati, ‘Amutuku unyak ninye nirya bulupdeipnamle,’ tenepnuka ati, aninye ap, amutuku talibuka ukirye, ‘Winipnuyabe,’ nyanyak deiyok nang ap, tonda amutuku ninye deiyok nang, sik amu tam pil melin nang ap nirya ebuka bulupdeipnyopura, ‘Yata wiribuka unyak do? Sik ni birye dipdongobuka, el mapu silip aunyak atonun nuknamne,’ tenepse. Minop deiyok kouna ara, sik apu yapu minop dorupnin yangalamik nang arye nukuka, sekelilamik buku deice arye eibuka yinipse. Tonda, yuk mutuku nang arye bobinamikba, otam binuka ulamik bukni, tamubuka yayik ninye nirya ati, nukuka sekiyamik ning babye, adeice uk eipsirye yinipse. Abuku noutamak eipse ning ara, ani.

⁶ Anoutamak arye ninye weik tam nirya ara, Babel mutuku nang arye bobinamikba, wangamne nang atonun ulamik ani, Babel mutuku batakuka, sik mutuku tamubuka yayikce, Yerusalem mutuku ap, Yehuda tam ap, sik mince ulamik mutuku uk, yanuka ulamik ninye nirya ara ani. Ara, minop talak Babel mutuku ninye deiyoknye Nebukadnesar birye, aninye bobuka Babel mutuku bobinamukba, daulamik ninye nirya ati nyapne.

⁷ Yerusalem mutuku tamubuka yangalamik talak ara, sik deiyok talibuka ulamik nang ara ani. Sik si ara Zerubabel ap, Yesua ap, Nehemia ap, Asarya ap, Ramya ap, Nahamani ap, Mordekai ap, Bilsan ap, Misperet ap, Bikwai ap, Nehum ap, Bahana ap winibuka.

⁸ Paros elce deibukba dadeipdanin biyik ninye yupa weik 2172 ninye deiamuk nang ara Yerusalem mutuku tamubuka yayik.

⁹ Sefaca birye deibukba dadeipdanin biyik ninye yupa weik 372 deiamuk nang ara, Yerusalem mutuku tamubuka yayik.

¹⁰ Arah birye deibukba dadeipdanin biyik ninye, yupa weik 652 deiamuk nang ara, Yerusalem mutuku tamubuka yayik.

¹¹ Tonda Pahat-Moab ap, Yosua ap, Yoab ap, sik winilye nang arye deiamik ninye yupa pia weik 2818 nang ara, Yerusalem mutuku tamubuka yayik.

¹² Elam birye deibukba dadeipdanin balamik ninye yupa weik 1254 deiamuk nang ara, Yerusalem mutuku tamubuka yayik.

¹³ Zatu birye deibukba dadeipdanin balamik ninye yupa pia weik 845 deiamuk nang ara, Yerusalem mutuku tamubuka yayik.

¹⁴ Zakai birye deibukba dadeipdanin balamik ninye yupa weik 760 deiamuk nang ara, Yerusalem mutuku tamubuka yayik.

¹⁵ Binui birye deibukba dadeipdanin balamik ninye yupa weik 648 deiamuk nang ara, Yerusalem mutuku tamubuka yayik.

¹⁶ Bebai birye deibukba dadeipdanin biyik ninye yupa weik 628 deiamuk nang ara, Yerusalem mutuku tamubuka yayik.

¹⁷ Asgad birye deibukba dadeipdanin biyik ninye yupa weik 2322 deiamuk nang ara, Yerusalem mutuku tamubuka yayik.

¹⁸ Adonikam birye deibukba dadeipdanin biyik ninye yupa weik 667 deiamuk nang ara, Yerusalem mutuku tamubuka yayik.

¹⁹ Bikwai birye deibukba dadeipdanin biyik ninye yupa weik 2067 deiamuk nang ara, Yerusalem mutuku tamubuka yayik.

²⁰ Adin birye deibukba dadeipdanin biyik ninye yupa weik 655 deiamuk nang ara, Yerusalem mutuku tamubuka yayik.

²¹ Ater ap, Hizkia ap, sikce deiprikba dadeipdanin biyik ninye yupa ara 98 deiamuk nang ara, Yerusalem mutuku tamubuka yayik.

²² Hasum birye deibukba dadeipdanin biyik ninye yupa weik 328 deiamuk nang ara, Yerusalem mutuku tamubuka yayik.

²³ Besai birye deibukba dadeipdanin biyik ninye yupa weik 324 deiamuk nang ara, Yerusalem mutuku tamubuka yayik.

²⁴ Harif birye deibukba dadeipdanin biyik ninye yupa weik 112 deiamuk nang ara, Yerusalem mutuku tamubuka yayik.

²⁵ Gibeon birye deibukba dadeipdanin biyik ninye yupa weik 95 deiamuk nang ara, Yerusalem mutuku tamubuka yayik.

²⁶ Tonda Betlehem mutuku ap, Netofa mutuku noutam ulamikce deibikba dadeipdanin biyik ninye yupa weik 188 nang ara, Yerusalem mutuku tamubuka yayik.

²⁷ Atonun Anatot mutuku noutam ulamikce deibikba dadeipdanin biyik ninye yupa ara 128 nang ara, Yerusalem mutuku tamubuka yayik.

²⁸ Bet-Asmawet mutuku noutam ulamikce deibikba dadeipdanin biyik ninye yupa ara 42 nang ara, Yerusalem mutuku tamubuka yayik.

²⁹ Kiriat mutuku ap, Yerim mutuku ap, Ketira mutuku ap, Berot mutuku ap noutam ulamikce deibikba dadeipdanin biyik ninye yupa ara 743 nang ara, Yerusalem mutuku tamubuka yayik.

³⁰ Rama mutuku ap, Gaba mutuku ap, noutam ulamikce deibikba dadeipdanin biyik ninye yupa ara 621 nang ara, Yerusalem mutuku tamubuka yayik.

³¹ Tonda Mikmas mutuku noutam ulamikce deibikba dadeipdanin biyik ninye yupa ara, 122 nang ara Yerusalem mutuku tamubuka yayik.

³² Betel mutuku ap, Ai mutuku ap, ulamik ninye yupa ara 123 nang ara, Yerusalem mutuku tamubuka yayik.

³³ Yuk mutuku ton Nebo mutuku ulamik ninye yupa ara (52) nang ara, Yerusalem mutuku tamubuka yayik.

³⁴ Elam birye deibuk yuk ninye nirya ara yupa weik (1254) nang ara Yerusalem mutuku tamubuka yayik.

³⁵ Harim birye deibuk ninye yupa ara weik (320) nang ara, Yerusalem mutuku tamubuka yayik.

³⁶ Yeriko mutuku noutam ulamik ninye yupa pia weik (345) nang ara, Yerusalem mutuku tamubuka yayik.

³⁷ Lod mutuku ap Hadid mutuku ap tonda Ono mutuku noutam ap ulamik ninye yupa ara (721) nang ara, Yerusalem mutuku tamubuka yayik.

³⁸ Senaa birye deibuk dadeipdanin balamik ninye yupa weik (3930) nang ara, Yerusalem mutuku tamubuka yayik.

³⁹ Asekeipnun nang si ara Babel mutuku bobinamikba daulamikani tuba tamubuka yayik talak ara, Allah el si eren aik pum tam pil dona deiyok nang imam-iman nang ulamik. Yedaya birye Yesua deibukba dadeipdanin biyik ninye yupa ara, 973 nang Yerusalem mutuku tamubuka yayik.

⁴⁰ Tonda, ninye el si Imer birye deibukba dadeipdanin balamik ninye yupa ara, 1.052 nang Yerusalem mutuku tamubuka yayik.

⁴¹ Pasyur birye deibukba dadeipdanin balamik ninye yupa ara, 1.247 koproba Yerusalem mutuku tamubuka yayik.

⁴² Harim birye deibukba dadeipdanin balamik ninye yupa ara, 1.017 nang Yerusalem mutuku tamubuka yayik.

⁴³ Aning atonun sik Lewi yala nang Babel mutuku arye tamubuka yayik talak Yesua ap, Kadmiel ap, Hodewa ap, sikce deibikba dadeipdanin balamik ninye yupa ara, 74 nang Yerusalem mutuku tamubuka yayik.

⁴⁴ Asekeipne nang sikda mot sena ati deiyok kin nang ap, tonda Allah yupu aik bublan dam kalikin nang ap ulamik. Sik si ara ani. Ara, Asaf birye deibukba dadeipdanin balamik nang yupa 148 nang ara, Yerusalem mutuku tamubuka yayik.

⁴⁵ Allah Yahweh el aik bisik bublan dam kaliklamik nang sik si ara ani. Ara, Salum ap, Ater ap, Talmon ap, Akub ap, Hatita ap, Sobai ap, sikce deibikba dadeipdanin balamik nang yupa 138 nang ara, Yerusalem mutuku tamubuka yayik.

^46-56 Babel mutuku bobuka binamik ninye bukni tuba tamubuka yayik talak arye deibikba Allah Yahweh el si eren aik pum tam talibuka pil dona deiyok nang ati melilamik ninye sik si ara ani. Siha ap, Hasufa ap, Tabaot ap, Keros ap, Sia ap, Padon ap, Lebana ap, Hagaba ap, Salmai ap, Hanan ap, Gidel ap, Gahar ap, Reaya ap, Resin ap, Nekoda ap, Gazam ap, Uza ap, Paseah ap, Besai ap, Meunim ap, Nefusim ap, Bakbuk ap, Hakufa ap, Harhur ap, Bazlit ap, Mehida ap, Harsa ap, Barkos ap, Sisera ap, Temah ap, Neziah ap, Hatifa ap, sik winibuka ninye nirya ara, Yerusalem mutuku tamubuka yayikce, Allah el si eren aik pum tam pil dona deiyok nang ati melilamik.

^57-59 Aning ara, minop talak ninye deiyoknye Raja Salomo el pil dolamik nang ara, Babel mutuku nang arye bobinamikba daulamika ani, sikce deibikba, dadeipdanin balamika ani, deibik mapu ara, tuba tamubuka Yerusalem mutuku yayik ninye sik si ani. Sotai ap, Soferet ap, Perida ap, Yala ap, Darkon ap, Gidel ap, Sefaca ap, Hatil ap, Pokheret ap, Hazebaim ap, Amon ap, sik winibuka nang Yerusalem mutuku tamubuka yayik.

⁶⁰ Ati ara, Allah Yahweh el aik pum tam pil dona deiyok nang, sik melilamik nang ap, ninye deiyoknye Raja Salomo el pil melibuka dolamik ninye ap, Babel mutuku nang arye bobinamikba daulamika ani, sikce deibikba dadeipdanin, balamikce deibik mapu ara, tuba tamubuka Yerusalem mutuku yayik ninye nirya sik yupa ara, 392 ninye ulamik. Aninye nirya ara, Yerusalem mutuku tamubuka yayik.

⁶¹ Aning atonun, Tel-Mela mutuku ap, Tel-Harsa mutuku ap, Kerub mutuku ap, Adon mutuku ap, Imer mutuku ap arye yayik ninye yupa ara, 642 ninye Yerusalem mutuku tamubuka yayik. Yayik bukni, sik ni yapu arye deiamik mutuku, lak len surat kum uamukba, sikce, “Nun ni yapu ara dipkoprob Israel ninye ulamik,” nyabuka, lak nyapmanto kum ulamik.

⁶² Tonda, Delaya ap, Tobia ap, Nekoda ap, sikce deibikba dadeipdanin, balamika ani, deibik mapu yupa ara, 642 ninye ulamik. Aninye babye Yerusalem mutuku tamubuka yayik.

^63-64 Tonda, Allah el si eren aik pum tam talibuka pil dona deiyok nang imam yala nang arye deibikba dadeipdanin, balamika ani, deibik mapu ara, tuba tamubuka Yerusalem mutuku yayik ninye sik ni yapu si ara ani. Ara Habaya ap, Hakos ap, Barsilai ap ulamik. Tonda, anye bira Barsilai bira, Gilead mutukunye ulamukce, Israel yalanye el si Barsilai birye deibuk kilmu dobuka anya arye, atalak ulamik ninye arye, aGilead mutukunye el si ati, Barsilai nyalamik. Anang arye deibikba, dadeipdanin yangalamik ani deiamik mapu ton Yerusalem mutuku tamubuka yayik. Sik anang nirya ara, “Nun ni yapu imam yala nang arye deiamsik ati, imam pil nunce talibuka doptibye,” nyabikce, sik delina ati sekuka deilin ning epdeyik bukni, kum eibika ati, Allah el aik deiyok nang arye, “Kume, anggunda Allah el si eren aik pum tam talibuka pil kum doptume. Ara, talye ati kume. Allah arye, ‘Imam yala nanguk apil talibuka donamake. Yuk yala nang nirya ara, na aik pum tam pia kum wektinge,’ nyapsuka ati, ‘Anggunda imam yala nang dipkoprob ululum do, kum do?’ tenen, teniltona unmasil ati, Allah el aik pum tam pil kum doptume,” nyabuka anang batakikba, talye ninye atonun kibuka ulamik.

⁶⁵ Ati ara, Yehuda yala ninye mutuku talibuka ulamuknye Gubenur arye, “Allah ati arenamak teleb ning nirya ara, anggunce ton kum dinamlume,” nyabuka yupu seklamuk. “Tonda sik imam nang min kum wipdeipmapa ati, Allah arenamak teleb ning kum diptume. Bukni, imam nang wipdeibibyeura, sikce, ‘Aning winibice deice arye lak kipnamsil’ tenen, talibuka pil donyak ning el si Urim ap, Tumim ap deice arye, pil dobice talak uk, amambul ning dobuka diptum bukni, wini talak ara, kabula,” nyabuk.

^66-69 Babel mutuku bobinamik ani, tuba tamubuka sik mutuku yayik ninye yupa nirya ara, pia weik 42 ribu 360 ninye ulamik. Tonda aninye sik aik pil melin nang ara atonun yupa weik kilapu ap, sal ap 7.337 ninye ulamik. Tonda mot nyan ati yala ninye nirya ara sal babye, kilapu babye, sik yupa ara 245 ninye ulamik. Aning atonun, sik aninye arye talibuka ulamik kuda basam yupa ara, 736 kuda bobuka yayik. Tonda mitik tonun kuda atonun bukni, yuk yala basam el si ara bagal basam ara, yupa weik 245 tamubuka boyayik. Aning atonun, unta basam yupa weik 435 tamubuka boyayik. Tonda keledai basam yupa weik 6.720 tamubuka boyayik. Anang nirya ap, sik weilamik ning aning-aning nirya ap, Yerusalem mutuku tamubuka boyayik.

⁷⁰ Ura, amutuku ulamik ninye nirya arye, Allah Yahweh el si eren aik winiryuk ning donamak ning ap, keil poka dopnamak ning ap, melibuka arena ati, sik ni yapu uk, auang yo bok bulubuka arelamik. Ton nang ara sik ap neika dukdongobuka aik don pil ap, keil poka dona pil ap tabakuka dolamik. Tonda sik deiyoknye Gubenur bira, dekna weik ning el si ara, emas 8 kilogram arebuk. Tonda, sik imam nang melina ati, yangalin ning baskom 50 ap, tonda, ‘Sik imam anyaik pum tam pil donamak talak ongonamak’ tenen, kemeja baju 530 arebuk.

⁷¹ Aning atonun yuk aik deiyok nang ton sik neika dukdongobuka ulamik ninye arye, dekna weik ning el si emas bulubuka 168 kilogram emas arebik. Tonda, dekna weik ning el si perak ara, 1.250 kilogram arebik. Ara, urdem ati kume. ‘Allah el si eren aik dona ap, akeil poka dona ap, kanam uptu’ tenen, arebik.

⁷² Aning atonun, sik talye daulamik Israel ninye arye dekna weik ning, el si emas bulubuka 168 kilogram emas arebik. Tonda, dekna weik ning el si perak ara, 140 kilogram arebik. Tonda, sik imam nang melina ati, ‘Sik imam anyaik pum tam pil donamak talak ongonamak’ tenen, kemeja baju 67 arebik.

⁷³ Sik imam nang, Allah el si eren aik koprop pil dona deiyok nang ap, sik Lewi yala ninye ap, Allah Yahweh el aik bisik bublan dam kalikna nang ap, tonda Allah yupu mot sena deiyok ninye ap, Allah el aik pum tam pil dona deiyok nang, sik pil melibuka dolamik ninye ap, Israel nang ayala-ayala nirya daulamik ninye ap, Yehuda mutuku noutam tamubuka yayikopura, sik min arye ulamik mutuku uk, yanuka yuk-yuk ulamik.