Nehemia 6 - Eipomek

Sik yuk nang arye, Nehemia biti yu ubukba, “Keil poka dopmalum ning ara, bataklulume,” nyabik yupu

¹ Ura, yuk ninye arye, “Yerusalem asik keil poka akunum dopmake,” nyabuka lak nyanmekba, yuk nang sik si Sanbalat ap, Tabia ap, tonda Arab mutukunye el si Gesyem ap, tonda, ‘Israel yala ninye nun lik,’ tenebuka olalamik nang, yuk nang ap, sik nirya arye kekenmekba, nunti, “Yerusalem mutuku weik cang keil poka akunum dobuka sirya dakmake,” nyabuka lak nyabikba kekebikce, yu ubuk. Atalak ara, nunce apala keil poka nirya dobuka sirya dakmaburye, bisik bublan nirya tirikuka kintinip deibupu bukni, wini talak ara, nunce bublan akunum tirikupu bukni, bublan talin ning el si ara, ensel arye min kum tirikupu.

² Ati nara, Sanbalat ap, Gesyem ap, sikce ninye ton dobuka deiplirye, “Anda nun dam yaminba, nun ap bulubuka yupu talipnamaba ati, tonok mitik mutuku lyu ak, el si ara Ono mutuku yanamlyame,” nyapdikba, yuk nang arye yanuka nyapnike. Nyapnik bukni, dipkoprob na kel bikamsa ara, sikce nati, ‘Anye bira obibyeba, el nong ara kum danamle,’ tenepnike. Aning ara, akunum kel biksa ati, kum bisirye yupu uk nyapdeipse.

³ Ninye dopdeipsirye, nyapse. “Anang dam bimince, ayupu nyapnulyame. ‘Wini talak, nara weik mambul pil donuna anya arye, anggun yupu talipnamalumak ara, kum yanamane. Aning ara talye ati kum nyapne. ‘Apil batakuka yupu talinak yanyopura, pil dobuka sirya kum daknyak’ tenen, kum yanamane,’ nyabuka laka nyalbinulame,” nyapse.

⁴ Winibuka yupu nyalilamnika ara, pia weik like dumbarye deice arye surat sekelilamnik touk, narye tamubuka minopce nyalilamse touk, ayupu uk tamubuka nyalilamse.

⁵ Sanbalat birye asurat pamubarye sum sekeibuk ning ara, el melinanye birye asurat boyanuka arepnuk. Sanbalat el melinanye birye bopmuk surat ara, kum kitipdongopmokce, asurat bopmukak eipse.

⁶ Asekne ning noutam ara, Sanbalat birye sekuka liamuk yupu ara ani. Amutuku noutam unyak ninye nirya arye, anggun Israel ninye ati nyasinyak yupu ara, na akunum kekenune. Na ka Gesyem birye, ‘Yo, sik aninye arye nyanyak yupu ara, dib nyanyake,’ nyapnuka ara, nyapnukine. Ara, an ap, an kwit capu sik Yahudi yala ninye ap, amutuku unyak ninye ati, yu kanye uk tenibuka ulyama anya arye, amutuku talina deiyok nang ati, ‘Obuka sirya daknamabe’ tenen, winipdenamsulume. Ati ara, Nehemia ap, el kwit capu nirya ap arye, ‘Nun mal olan nang arye, weik asik Yerusalem yanuka weksicak’ tenen, ‘Amutuku antanap dongobuka, cang keil poka donmake,’ nyakinyake. Aninguk kum bukni, ayupu ton nyakinyake. “Kume, Nehemia elda, ‘Israel yala nang, sik ninye deiyoknye unamne’ tenen, kintinipmale,” tenebuka nyakinyake. Tonda ayupu nyakinyake.

⁷ “Aning ara, utenepmala ati, Allah yupu lak nyan nang nabi-nabi nang arye, ‘Nehemia nun ninye deiyoknye unamsile, nyabuka, lak nyalbinamak’ tenen, nabi-nabi nang wipdeipmale,” nyakinyake. Tonda, “Nehemia birye, ‘Yerusalem mutuku noutam ara, ninye deiyoknye Raja akunum aulule,’ nyaliba, amutuku ninye arye kekenyake,” nyakinyake. Ati anggun nirya nun dam yamunyopura, ayupu moubuka talipnamabe. Sanbalat birye asurat deice nyabuka sekeipnukba yinipse.

⁸ Nyabuka sekeipnuk bukni, narye ayupu ara tuba tamubuka yupu nyapse. “Kume anggun nirya arye nyasululum yupu ara, nunce dipkoprob kum wininyabe. Anggun nirya ara, tilila yupu deice aryuk nyalulume. Anggunce nyalulum yupu ara, dipkoprob kum ulule.” Ayupu nyapse ning ara, sik dam yupu tamubuka dopdeipse.

⁹ Na Nehemia birye utenepse ning ara ani. Sanbalat ap, el kayapu nang ap arye utenenyake. ‘Sik Israel ninye ara, nun yupu kekebikirye, ilil weik upliba, sik mikip ara, mitang asa ubicopura, apil donyak ning ara bataknamak’ tenen, winipdese. Bukni, narye aninye ati, ilil kum tenepse. Nun ni Allah ati moropsirye nyapse. “Na ni Allah ance nati mikip arepniminba, pil teleb ubuka donamne,” nyabuka moropse.

¹⁰ Atalak ara, narye ninye si Metabel birye deibuknye el si Delaya el mi Semaya el aik bise. Winibuka bise ning ara, el kum eipmanukce el aik uk bukmokak bise. El aik biseura, elce nyapnuk. “Yaminyeura, nun bitinye Nun ni koproba Allah Yahweh el si eren aik pum tam uk dungnul binaname,” nyapnuk. “Winipnimirye bisik bublan nirya tirikdongobuka duknupnaname. Tirikdongopnimnyopura, ‘Nehemia opnamap’ tenen, yanamak nang ara, lukunyan noutamuk yanamaka anya arye, ‘Alukunyan noutam arye yanuka opkicak’ tenen, nyapkine,” nyapnuke.

¹¹ Nyapnuk bukni, narye anye Semaya biti tamubuka nyapse. “Kume nara, ninye ati ilil upniliba, bai kum sakuka binamne. Nara anang atonun pia kum unune. Ati, Nun ni koprop Allah Yahweh el si eren aik pum tam pia kum wekuka duknupnamne. Ara, ‘Yuk nang arye na opnicak’ tenen, dipkoprob pia kum duknupnamne,” nyapse.

¹² Semaya birye nyapnuk yupu kekepsirye, kel bikse. ‘Kume anye birye nyapmanil yupu ara, elcuk tenibuka kum nyapmanile. Tonda Allah arye, anye biti, “Ayupu bobuka Nehemia dam lak nyalbinulame,” kum nyapdeibuk. Ayupu nyapnuk ning nirya ara, sik yuk nang Sanbalat ap, el kwit Tobia ap, sik kayapu ap arye, ‘Ayupu nyapminba, uang yo bok arepnamkiyabe,’ nyabika deice arye, tilila yupu uk yanuka nyapmanile. Ati Semaya birye nati talye minin yupu deice arye, na dam yanuka nyapdeipmanile,’ tenepsirye kel bikse.

¹³ Sik anang Sanbalat ap, Tobia ap arye, tenepmarik ning ara ani. Sikce nati aning winipnimiba, el ilil upliba, Allah el si eren aik dungnul bilyopura, malye winin ning wininamle. Amalye winin ning akunum winiplyopura, nunce yuk ninye kekenak ati, ‘Nehemia bira, dungnul binmala ara, pia malye upnamle,’ nyabibyeba, kekebikirye, dib tenebicopura, ‘Nehemia bira nun like,’ nyanamake. Sik anang bitinye arye, ‘Anye bira malye kipdeipnanam’ tenen nyanmanirike. Utenepsirye kel bikse.

¹⁴ Aning kel biksa ati, narye na ni Allah ati moropsirye nyapse. “Na ni koprop Allah, sik anang Sanbalat ap, Tobia ap, sikce nati, ‘Malye winiptue’ tenen, winipnirik ning ara, an akunum kel biknulume. Ati, ance tenilaminya ani, sik anang ati wenepnalame. Aning atonun, tonok kil ton el si ara, nabi Noaja ap, yuk malye wininyak nabi-nabi nang ap arye, malye yupu nyaninyak ning ara, ance tenilaminya ani, sik anang ati wenepnalame. Anang arye nati, ‘Ayupu nyabibya deice arye el ilil upnamle’ tenen, yupu nyaninyak ninye nirya ara, ance wenepnalame,” nyabuka Allah ati moropse.

Weik cang keil poka, akunum dobuka sirya dakdongobik ati, nyabuk yupu

¹⁵ Ura, cang keil poka antanap dongobuka dolamupu talak ara, yupa weik lima puluh dua (52) sum deice arye, akeil poka uluplomik ning tuba tamubuka dolamupu. Dolamupu ani, wala si Elul nyalamupu wala, tanggal 25 deice arye akunum sirya dakupu.

¹⁶ Akunum dobuka sirya dakupopura, sik amutuku noutam ulamikce, nunti, ‘Lik,’ tenebuka mal pilamsik nang nirya ara, aning kekebikce ilil ubukba, ‘Nunda sik ap urasin kum dildanamabe’ tenen, duknuprobik. Min yuma talak ara, malye tenebuka, mikip weik ubuka, ilil kum asa ulamik bukni, akeil poka dobuka sirya dakupu talak ara, ilil ubuka ati, talye kanye bobuka, nimalye asa ulamik. Ara, amutuku ninye arye tenebik ning ara, ‘Se, aweik cang keil poka nirya ara, sikcuk kum sirya daktinge. Allah el mikip deice arye melibukba, minop sirya dakmake’ tenen, sik ilil ubuk.

¹⁷ Atalak noutam nirya ara, sik Yahudi yala ninye talibuka “Wininamabe,” nyalamik nang nirya arye, surat sekuka, Tobia dam dolkwetelamikce ulamik. Aning atonun, Tobia birye surat sekuka sik dam dolkwetelamukce, ulamuk.

¹⁸ Atalak noutam ara, Yahudi yala ninye weik arye Tobia biti, ‘Nun deiyoknye atonun usulule,’ tenelamik. Utenelamik deiyok ara, sik yala weiknye el si, Arah birye deibuk mi, el si Sekanya birye deibuk kilmu ara, Tobia dobuka ati, ‘Elda weiknye ulule,’ tenelamik. Aning atonun, Tobia birye deibuk mi Yohanan birye dobuk kil ara, talye kil kume. Ara, ‘Nun yalanye Berekia birye deibuknye el si Mesulam bira, Tobia birye Mesulam el kil dobuka ati, weik mambulnye ulule,’ tenelamik. Aning nirya ara, aninye nirya arye Tobia biti, ‘Ance nyanamsilam yupu nirya ara, moubuka kekepnamabe,’ nyabuka nyalin yupu deice arye, nyapdeiamik.

¹⁹ Tonda, Tobia birye nati, tuba surat sekuka dolkwetelamnuk ning ara, ‘El babye ilil upnamle,’ tenyamnukce, asurat sekuka na dam dolkwetelamnuke. Tonda, sik Yahudi yala ninye nirya arye, ‘Tobia biti el si teleb kipdeiptibye’ tenen, tuba-tuba na dam yangalamikce, elce teleb ulamuk ning ati, lak nyalamnik. Ton yuk ning ara, narye nyapdeiamse ning nirya ati, sikce bobuka Tobia dam tamubuka lak nyalbalamik.