Nehemia 5 - Eipomek

Nehemia birye Yehuda yala ninye, bona utotoa kum ninye, sik patalamuk ning ati, melilamuk yupu

¹ Ura ouku pia weik daulamikce, Yahudi yala ninye kanye imun pia weik ulamuk. Ara sal ap, kilapu ap, akunum bulubikce ‘Se,’ tenebuka, sik neika ulamik ninye ati derelalamik.

² Utenebuka derelalameka deice arye nyalamik. “Se, nun mapu ap, nun kilmapu ap, pia weik usinyaka anya arye, din ning gandum arepsitingba diptibya deice arye, kam unamabe. Kumopura, kume,” nyalamik.

³ Aning atonun, ton nang arye nyalamik. “Kume, din patan talak unmasila ati, nara na wa wibuka koulamse wa tuku ayala-ayala nirya ap, na aik ap, kintinip deibuka deknirye aning deice arye gandum deknamne. Winipniba nun nirya dinamabe. Winibipyopura, din patan deice arye kum dipnamabe,” nyalamik.

⁴ Ton yuk nang ara nyalamik. “Nunda yuk nang uang yo bok ton tia ati dopropmapya ani, tuba aminyan tamubuka punupnamabe. Ayo bok ara, Nun ni koproba Raja arebibiba elce wa win tuku ap, anggur tapu duk wa win tuku ap ati, “Pajak yo bok ara, winibuka arenamnulume,” nyapsilye ning ara, nunce areptibye,” nyalamik.

⁵ “Ati ara, nunda Yahudi yala nang kum ati do? Atonun, nun mapu ap, yuk Yahudi yala nang sik mapu ap ara, atonun kum unyaka ati do? Nun kanye ara, nun mapu nirya ara, ato touk unyak bukni, nun mapu ara, yuk nang ati deklamupuba, anang arye nun mapu nong deice ikin ning weik delinyakce, sik nong deice ikin pil arukunyake. Yo bok ton dekna kum aryuk, talye piluk arukunyake. Tonda nun kilmapu, wel teleb ubuka nenyak kilmapu weike, nunce dekamupu deice arye, yuk nang ati, pil melin kilapu kibuka unyake. Bukni, nunda ninye asik nang atonun kipsika deice arye, nun mikip pia kum ati, yata wiriptibye do? Nun wa win tuku nirya ara, yuk nang sik uang yo bok deice arye akunum dekuka doprobikce, talinyak ati ara, yata ning deice arye dektibirye, nun kilmapu tuba tamubuka doproptibye do?” nyabuka weik arye engelamik.

⁶ Sik aninye arye patalamuk ning ati, malye kanye bobuka nyalamik ning ara, na akunum kekepsirye, yu upnukba weik arye derepse.

⁷ Winibuka derepsirye, nyapse. “Se, anggun deiyok talibuka, ‘Winipnuyabe,’ nyan nang ap, amutuku taliluluma deiyok nang ap ati, weik arye derepsine. Anggunda, anggun kwit capu koproba ati nun like tenebuka yu kanye bolalumce, amutuku nang arye, uang yo bok morosinyak talak ara, anggun deiyok nang ati, nyalulume. ‘Arepnusiyap ning ara, tamubuka arepnamsulum bukni, yuk ning tonap weik arye tabakuka arenamsulume,’ nyalulume. Nyaluluma deice arye, pia malye ululume. Ati ara, anggun nirya bulupmunba, yupu talibuka lipsisiknamabe,” nyapse.

⁸ Narye ayupu tonap dukdongobuka mikip asa arye nyapse. “Minop talak ara, yuk pera mutuku ninye, Yahudi yala kum nang arye, nun mapu weik dekuka bobinamsik bukni, wini talak ara, nunce nun dam aupmasin touk, nun mapu tuba tamubuka dekuka boyangalamupu. Bukni, anggunda Yahudi yala ninye ululum bukni, anggun bidamang arye anggun mapu ati, dekelulume. Winimunya ara, yata deiyok ati do? Dan talak arye, tuba tamubuka nun mapu dekdopnamab do?” nyabuka wenepse. Nyabuka wenepsiba sik amutuku noutam talina deiyok nang ap, ‘Winipnuyabe,’ nyan deiyok nang ap arye, yupu tamubuka nyapmanto kum ubukce, sik alye ubuk ati, yupu tunim abuka bukik.

⁹ Narye ayupu ton dukdongobuka nyapse. “Anggun amutuku umunce, pil domunye ning nirya ara, pia dipkoprob ton kum winilulume. Malye uk winilulume! Ati anggun kam unamlum talak nirya ara, adiparyuk Allah ati ilil tenebuka unamlulume. Aning kum winipmunyopura, nun mal olan nang arye tenenamsiyaka ara, ‘Allah ara, kum ulule,’ tenebikirye, ‘Sik Yahudi yala ninye ara, talye unyake’ tenen, nalinamsiyake.

¹⁰ Tonda, na Nehemia ap, na kwit capu ap, na mapu ap nun nirya arye, sik yuk Yahudi yala ninye, sik melina ati, uang yo bok ap, gandum ap, tia talak ati arenyabe. Bukni, nunce auang yo bok dolonyak ninye ati, ‘Weik arye tabakuka arenamsulume,’ kum nyanyabe. Ati ara, anggun amutuku deiyok talibuka ululum nang arye, sik yuk Yahudi yala ninye anggun amu tam unyak ninye ati, ‘Tia ati doproplum uang yo bok tamubuka arenamsulum talak ara, weik arye tonap tabakuka arenamsulume,’ nyaplum ning ara, adiparyuk bataklulume.

¹¹ Aning atonun, sik aninye nirya babye minop talak arye anggun kwit capu ning doproplumce, ‘Ila tuba tamubuka punupnamsin ja,’ nyaltakamunye ning nirya babye, adiparyuk punupmunce, kililtakanamlulume. Ara, uang yo bok do, gandum do, anggur tapu duk do, zaitun yo duk mek do, aning nirya ara tuba tamubuka arenamlulume. Tonda, sik wa win tuku ap, anggur tapu wa winak ap, zaitun yo duk mek wa winak ap, sik aik nirya ap ara, adiparyuk tamubuka arenamlume,” nyapse.

¹² Nyapse ning ati, sik amutuku noutamak talibuka ulamika deiyok nang arye, “Yo telebe. Anyapmasilam ning ara, wininamabe. Tonda, nunce dukdongobuka nyapnamabe. Winibibirye, sik taleamik ning nirya ara, tuba tamubuka arenamabe. Winibipyopura, nunce sik yuk Yehuda yala ninye ati, ‘Tonap tabakuka arenamsulume,’ nyabuka kum moronamabe,” nyabik. Nyabikopura, narye sik imam nang ap, amutuku talibuka ulamika deiyok nang ap, ‘Winipnuyabe,’ nyan deiyok nang ap ati, “Yalulume,” nyapsirye, sik amutuku noutam ninye deiyok nang ara, arup arye, ‘Winipnuyabe,’ nyapmangu ning ara, ‘Dipkoprop winipnamak’ tenen, “Nyalin yupu deice arye lak nyapdeipnululume,” nyapse.

¹³ Asum aryuk, na ongolamse baju deice talibuka bolom-bolom apsiba, na baju deice uamuk butbuta sakuk. Winipsirye ayupu ton nyapse. “Yata nang do nirya, Allah arye, ‘Aninye ara, ‘Naʼ tenen, ninye upnamak’ tenen, wibuka deiamsuk ninye noutam ara, anggun asum nyalinmanulum yupu, kekebuka kum doproplinye bira, abutbuta sakmo atonun, Allah arye anang nirya bataknamle. ‘Aning ara, winibuka unamabe,’ nyanmanulum yupu, kum kekenyak nang ara, sik aik ap, sikce talinyak ning ap nirya ara, Allah arye kum daneipnamle!” nyapse. Nyapsiba, awekmek ninye nirya kekebikce, ‘E, dipkoprob yupu nyanmasilama ati, anyanmasilam touk wininamap’ tenen, ‘Dipkoprop akunuma’ tenen, “Amin,” nyabik. “Dipkoprop akunuma,” nyapmekce, Allah Yahweh el siuk erebik. Amutuku noutamak ulamikce “Wininamabe,” nyapmek touk, dipkoprob kekebikce, asum arye diprongobuka dotalak nirya winilamik.

Nehemia el talima mitang ubuk yupu

¹⁴ Nara, ‘Yehuda yala ninye anggun deiyoknye Gubenur upnamle’ tenen, wipdeiamnik talak ara, Persia mutuku ninye deiyoknye, Raja Artasasta el ulamuka noutamakuk keting tamun ara dua puluh (20) arye dipdongobuka, tiga puluh dua (32) tahun upse. Tonda, aketing tamun dua belas (12) tahun noutamak nirya ara, na ap, na kwit capu yuk nang ap arye, amutuku taleamuk ninye deiyoknye birye, “Din ning bokuka arenamnulume,” nyapdeiamuk ning ara, amutuku ulamik ninye arye arelamik bukni, nunce adin ning ayala-yala nirya ara, tonok ning babye dobuka kum dilamupu.

¹⁵ Na weiknye Gubenur min kum wipdeiamnik talak ara, yuk ninye deiyok nang amutuku taleamik. Aninye deiyok nang arye, amutuku ulamik ninye nirya ati, sik nong deice ikin weik ning delilamikce, “Sik uang perak yupa tonok keba obarye, empat puluh (40) arenamsulume,” nyabuka ubula dolamik. Tonda, “Din ning aning-aning nirya ap, anggur mek ap tabakuka arenamsulume,” nyabuka ubula dolamik. Nara, Gubenur min kum ulamse talak ara, amutuku talibuka ulamik ninye deiyok nang ap, sik amu tam pil melibuka dolamik nang, pegawai nang ap arye, winilamik bukni, nara aning atonun ton pia kum winilamse. Aning nirya kum winilamsa ara, talye ati kume. Teleb ubuka ulamse deiyok ara, na ni koproba Allah ati, pia ilil tenelamse ati ara, ato ning malye winin ning ton pia kum winilamse.

¹⁶ Ato malye un ning, pia ton kum winilamse bukni, ‘Nara cang weik keil poka don pil diamuk dolamepya ani, sirya daknamabe’ tenen, pia pi dobuka pil dolamse. Atalak noutamak nirya ara, narye tuku mitik tonun babye tonok ton pia kum dololamse. Aning atonun, na amu tam pil melin nang babye, tuku mitik tonun babye tonok ton pia kum dololamik. Na ap, na kwit capu ap arye, ‘Nunda amutuku unmaba deiyok ara, acang keil poka pil donamap’ tenen, yanmabe. Yuk deiyok ati kume. Ati, ‘Apil uk pia pi dobuka donamap’ tenen, ulamupu.

¹⁷ Na din ning kintinip deibuka, din yolana deice ara, Yahudi yala nang ap, amutuku ninye deiyok nang ap, yupa weik 150 nang wekuka neika din dilamupu. Aning atonun, nun dana-dana tam ulamik ninye taleamik ninye deiyok nang ap, boyangalamikba, nun ap neika din dilamupu. Narye adin ning aning-aning nirya kintinililamsiba, sik anang nirya arye din dilamik.

¹⁸ Asum-asum nirya, na amu tam pil melin nang arye, din ning kintinibuka delilamik ning ara ani. Sapi basam tonok ap, domba basam nong pia teleb ning nakub barye ap, dipmanto maka ayala-yala nirya weik ap, kintinibuka boyangalamik. Tonda, yupa weik tagu barye sum akunum kipnopura, anggur mek aning-aning nirya weik arye, kwebuka boyangalamik. Winibuka boyangalamik bukni, narye Gubenur ati moropmanto ning ara, ‘Din ning ayala-yala nirya tabakuka boyanamnulume,’ nyabuka kum morolamse. Sikce talye arye arelamnik ninguk dobuka dilamupu. Yuk ning ap tabakuka kum morolamsa deiyok ara, ani. Sik amutuku ulamik ninye ara, ikin kanye bobuka ulamikba, ikin kanye bobuka ulamik ning ara, na akunum kel bikamsa ati, yuk yala ning ton pia kum morolamse.

¹⁹ Nara, winibuka diksukumuk ulamse ati ara, na ni koprop Allah, ‘Ance nati kanye deipnutum’ tenen, moropkine. Ara, narye amutuku ulamik ninye nirya ati, melibuka ulamse ning ara, na ni Allah ance tuba tenenamnilame. Winilamnimince, nati pia melinamnilame. Nehemia birye nyabuk.