Nehemia 3 - Eipomek

Yerusalem mutuku wiamik poka, tuba tabakuka dobik ning ati, nyabuk yupu

¹ Ura aning ara, Yerusalem mutuku domik poka, ‘Yata wiryamukba, tuba tabakuka domik do?’ tenena ati, lak nyapsine. Allah el si eren aik pum tam pil dona weik deiyoknye, Imam Elyasib ap, el kwit capu, yuk imam nang nirya ap arye, akeil poka tabakuka dolamik talak ara, domba basam bobuka wekelbalimik bisik bublan ara, tuba tabakuka dobik. Ara, ‘Allah el si erena atibuk dopnamabe,’ tenebuka dobik. Tonda acang keil poka tuba tabakuka domik keil poka deice arye, mitik cang aik ton domikce, anyaik pum tam kalikin nang tiklamikce, kalikuka dilamik. Anyaik cang, el si ara, “Anyaik Seratus Cang Aik,” nyabuka si domik. Seratus Aik dam arye, dib dongobuka otam domik aik, el si ara Menara Hananel Aik dam ara, apoka noutam nirya ara, Allah ati kintinibuka arebik.

² Yuk nang, Yeriko mutuku nang arye, Hananel Aik dam arye dipdongobuka otam poka dolamik. Yeriko mutuku nang sik dam ara, ninye si Imri el mi Zakur ap, el kweitcapu ap arye, otam keil poka dukdongobuka domik.

³ Mekwen pum bal dobuka boyangalamik bisik bublan nyalamik ning ara, Senaa yala nang arye domikce, abisik bublan botopdeiamik. Tonda abublan dana-dana tam delilamik yo ap, deice tam delilamak yo ap, ensel ap, bisik tirikilongon ning ap, dobikce dikdongobik. Tonda, abublan deice ara, kat ning besi beton dobuka taplak deibik.

⁴ Senaa yala nang arye memamik bublan dam arye dukdongobuka dobuka deiyoknye bira, Hakos el mi Uria birye deibuk mi el si Meremot ap, el kayapu nang ap arye, dukdongobuka tabakuka dobik. Asukum arye dukdongobuka deiyoknye bira, Mesesabeel el mi Berekya birye deibuk mi, el si ara Mesulam ap, el kayapu nang ap arye akeil poka dukdongobuka tabakuka dobik. Atonun, asukum arye dukdongobuka dobuka deiyoknye bira, Bahana el mi Zadok ap, el kayapu nang ap arye, akeil poka dukdongobuka tabakuka dobik.

⁵ Asukum arye dukdongobuka dopnin balamik nang ara, Tekoa mutuku nang arye dopnin balamik. Bukni, Tekoa mutuku ninye deiyok nang arye, ‘Nunda amutuku pil ton kum donamabe. Akel poka tabakuka donamak pil ara, nun like. Apil dona deiyoknye birye, ‘Apil doplulume,’ nyapsutua babye, kum kekepnamabe,’ nyabik.

⁶ Keil poka bisik botopdeibik bublan, el si ara Gerbang Yesyana nyalamik ning ara, ninye si Paseah birye deiamuk mi Yoyada ap, el kayapu nang ap arye dopnin balamik. Tonda, Besoja el mi Mesulam ap, anang ap neika dopnin balamik. Sik nirya arye, bublan si Gerbang Yesyana nyalamik ning ara, bisik botopdeiamik. Tonda abublan dana-dana tam delilamik yo ap, deice tam delilamik yo ap, ensel ap, bisik tirikilongon ning ap dobikce, tirikdongobik. Tonda, abublan deice ara, kat ning besi beton dobuka taplak deibik.

⁷ Asukum arye dukdongobuka dopnin balamik nang ara, Gibeon mutukunye, el si ara Melaca ap, tonda Meronot mutukunye el si ara, Yadon ap, sik neika dopnin balamdik. Tonda, Gibeon mutuku nang ap, Mispa mutuku nang ap arye melibuka dopnin balamik. Abitinye mutuku nirya ara, Efrat mek koubuka otam keting wekelban tam talibuka ulamuk ninye deiyoknye, Gubenur arye taleamuk.

⁸ Asukum arye dukdongobuka dobuka deiyoknye bira, Harhaya el mi Uziel ap, el kwit capu ap arye, akeil poka tabakuka dukdonga dobik. Uziel bira, dekna weik ning el si ara, emas dobuka memena deiyoknye ulamuk. Atonun, asukum arye dukdongobuk deiyoknye bira, Hanania ap, el kwit capu ap arye, akeil poka dukdongobuka tabakuka dobik. Hanania bira, nintong teleb minyak memena deiyoknye ulamuk. Anang arye, asukum arye dukdongobuka otam dopnin balamik cang keil poka, el si ara Tembok Lebar tabakuka dopnin balamik.

⁹ Asukum arye dukdonga dobuka deiyoknye bira, Hur el mi Refaya ap, el kwit capu ap arye, akeil poka dukdongobuka tabakuka dobik. Anang arye, asukum arye dukdongobuka otam cang keil poka dopnin balamik. Refaya bira, mining dam aulamukce, Yerusalem mutuku dana tam ton, bokuka deiyoknye kibuka taleamuk.

¹⁰ Asukum arye dukdonga dobuka deiyoknye bira, Harumaf el mi Yedaya, el aik mining dam, akeil poka tabakuka dukdongobuka dobik. Tonda, sik ap mining dam ara, Hasapnia el mi Hatus ap, el kwit capu ap arye, akeil poka tabakuka dukdongobuka dobik.

¹¹ Asukum arye dukdonga dobuka deiyoknye bira, Harim el mi Malkia akeil poka tabakuka dukdongobuka dobik. Tonda sik ap mining dam ara, Pahat-Moab el mi Hasub ap, el kwit capu ap arye, akeil poka tabakuka dukdongobuka dobik. Tonda din ning roti dana ati, weik cang aik tonok ton tabakuka dobik.

¹² Asukum arye dukdonga dobuka deiyoknye bira, Halohes el mi Salum ap, el kwit capu ap arye, akeil poka tabakuka dukdongobuka dobik. Anang arye, asukum arye dukdongobuka otam cang keil poka dopnin balamik. Salum bira, mining dam aulamukce, Yerusalem mutuku dana tam ton, bokuka deiyoknye kibuka taleamuk. Elce melibukba el ap el kilmapu ap arye, sik mining dam dipdebuka ulamik touk, acang keil poka winiryuk ning tabakuka dobik.

¹³ Atonun lyu mutuku bana ati, bisik bublan botopdeiamik. Ara, Hanun ap, tonda Zanoa mutuku ulamik ninye ap, sik nirya melipdayikce, abisik bublan winiryuk ning botobik. Tonda abublan dana-dana tam delilamik yo ap, deice tam delilamak yo ap, ensel ap, bisik tirikilongon ning ap, dobikce tirikdongobik. Tonda, abublan deice ara, kat ning besi beton dobuka taplak deibik. Awiniryuk tabakuka dobik cang keil poka el cang ara, yupa weik empat ratus empat puluh meter (440) ubuk. Asukum ara, domba basam dei eklebuka dolkwetelban bublan bisik awamuk.

¹⁴ Malye ning ap, domba basam dei ap, eklebuka dolkwetelban bublan nyalamik ning ara, Rekhab el mi Malkia birye bublan winiryuk ning tabakuka memebuk. Malkia bira, Bet-Kerem mutuku talina ati, deiyok kibuka taleamuk. Tonda abublan dana-dana tam delilamik yo ap, deice tam delilamak yo ap, ensel ap, bisik tirikilongon ning ap, dobikce tirikdongobik. Tonda, abublan deice ara, kat ning besi beton bobuka taplak deibik.

¹⁵ Tonda, mek pu uamukak mek kwelbana ati bisik bublan botopdeiamikba awamuk bisik ara, Kolhoze, el mi Salum birye, winiryuk ning tabakuka dobuk. Salum bira, Mispa mutuku taleamuknye ulamuk. Atonun, abublan tirikamik alip tam ara, aik aruma dopdongamik. Tonda, abublan dana-dana tam delilamik yo ap, alip tam delilamak yo ap, ensel ap, bisik tirikildongon ning ap dobikce tirikdongobik. Tonda, abublan alip tam ara, kat ning besi beton dobuka lamakdongobik. Tonda, Siloam mekwen deiamukak lilkwa ara, akeil poka tabakuka dopdongobik. Amekwen damuk, amutuku ninye deiyoknye Raja, el wa ara, ninye arye wiamikba awamuk. Asukum arye deiyok koubikce, keil poka dopnin balamik ani, minop talak Raja Daud ulamuk asik dam bana ati, moropdeiamik yo moromna dam binuka deibik.

¹⁶ Salum birye, akeil poka dopnin balamuka ani, sukdongamukak ara, asukumuk Asbuk el mi Nehemia, Bet-Zur mutuku bokuka taleamuknye birye, acang keil poka dukdongobuka dopnin balamuka ani, Daud ap, el mapu ap, dipnopura, weilamikak binuka, dobuka dakdongobuk. Winibukopura, elcuk dukdongobuka dopnin balamuka ani, ninye arye palyamikba deiamuk mekwen dam ton dobuk. Tonda, ninye deiyoknye Daud Raja ulamuk talak arye, sik yin talin nang, ilil tenena kum nang ati, sik si erena ati, aik domik dam ara, keil poka dopnin balamika ani, asukumuk binuka deibik.

Sik Lewi yala nang arye, aninguk dukdongobuka, keil poka winiryuk ninguk, dobik yupu

¹⁷ Ura, aning atonun sik Lewi yala nang arye akeil poka uk dukdongobuka dolamik talak ara, Bani el mi Rehum birye, deiyok kiamukba pil dolamik. Tonda, sik mining dam dipdanuka keil poka dona deiyoknye, Hasabya ap, el taleamuk mutuku nang ap, sikce acang keil poka winiryuk ning ton, dukdongobuka dopnin balamik. Hasabya bira, Kehila mutuku dana tam ton bokuka taleamuk.

¹⁸ Atonun, sik dam ara, Henadad el mi Binui bira, Kehila mutuku dana tam bokuka taleamuk deiyoknye, el ap el kayapu yuk nang ap, sik nirya arye, aweik cang keil poka winiryuk ning tabakuka dopnin balamik ani, asukum binuka deibik.

¹⁹ Atonun, sik dam ara, Yesua el mi Ezer, Mispa mutuku taleamuk deiyoknye ap, el kayapu nang ap arye, acang keil poka winiryuk ning dukdongobuka tabakuka dopnin balamik ani, pin lukdeibikce, dopnin balamik ani, yin talin nang arye, ninye olbana ati, talilamik ning aning-aning nirya, delilamik aik dam bana ati, welebuka ban bisik dam binuka deibik.

²⁰ Aning atonun, Zabai el mi Baruk ap el kayapu nang ap arye, asukum arye dipdongobuka akeil poka dopnin balamik ani, Allah el si eren aik pum tam pil dona weik deiyoknye, Imam Helyasib, el aik bublan dam binuka deibik. Ninye si Baruk el yupa ara, pia pi dobuka dopnin balamik.

²¹ Ninye si Hakos birye deibuknye, Uria el mi Meromot ap, el kayapu nang ap arye, acang keil poka winiryuk ning dopnin balamik ani, Imam Helyasib el aik wekelban bisik bublan dam binuka deibik.

Sik imam-imam nang, yuk mutuku noutam ulamik nang nirya arye, apoka uk, dukdongobuka dobik yupu

²² Sik Imam-imam nang aryuk, mining dam aulamne atonun, anang aryuk dukdongobuka dopnin balamik. Ara, Yerusalem mutuku dam ap, Yordan mekin ap ulamik nang arye, akeil poka uk dukdongobuka dopnin balamik.

²³ Asukum ara, Benyamin ap, Hasub ap arye, sik mining aik dam dukdongopdana ulamdik touk, wibuka dukdongopdik. Aning atonun, Ananya el mi Maseya ap, el mi Asarya ap sik babye mining asik dam dipdanuka ulamik touk, akeil poka dobuka dukdongobik.

²⁴ Ninye si Henadad, el mi Binui birye abatakikak arye dukdongobuka dopnin balamuka ani, Asarya el asik dam ulamukak binuka deibuk.

²⁵ Tonda, Uzai el mi Palal birye, akeil poka ulamukak arye dukdongobuka dopnin balamuka ani, itam ninye deiyok nang, Raja ulamik aik dam ap, bisik kalikna nang bulubuka weklamika dam binuka deibuk. Ninye si Palal birye, dopnin balamuka ani, binuka deibukak arye, Paros el mi Pedaya birye, asukum aryuk dukdongobuka dobuk.

²⁶ Asukum ara, pia pera kum bukni, mining dam sukumuk mutuku si Ofel mutuku nyalamik mutuku ara, Allah Yahweh el aik pum tam pil don nang, sik pil melin nang Ofel mutuku deice ulamik. Ati, Allah Yahweh el aik pil melin nang arye, keting yangan tam arye mek kwelbana ati, balamik bisik bublan uamukak arye, dukdongobuka akeil poka dopnin balamik ani, binuka deibik. Ara, mek kwelbana ati, balamik bisik bublan botamik dam weik cang aik, el si menara nyabuka domik aik dam binuka deibik.

²⁷ Ura, aning nirya winibuka dopnin balamik ani, tuba abatakikak ara, yuk nang arye dukdongobuka dopnin balamik. Asukum ara, Tekoa mutuku nang arye acang keil poka tabakuka dopnin balamik. Ara, akeil poka deice tam weik cang aik el si menara nyabuka domik aik dam arye, dukdongobuka dopnin balamik ani, Ofel mutuku dam antanap dongobuka, domik poka dam binuka deibik.

Yuk pil don nang nirya ati, nyabuk yupu

²⁸ Tonda, sik imam-imam sik asik dam yuk-yuk mining dam aulamik touk, akeil poka moubuka dopnin balamik. Ara, kuda basam wekelbana ati, botopdeiamik bisik bublan dam arye dipdongobuka, poka winiryuk ning tabakuka dopnin welyamik.

²⁹ Asukum ara, ninye si Imer el mi Zadok birye, acang keil poka el aik dam arye, dukdongobuka domuk. Abinuka dopnin balamuka ani sukdongamukak ara, yuknye ton el si Sekhanya, el mi Semaya birye, dukdongobuka dopnin balamuk. Semaya bira, keting yangan tam botopdeiamik bisik bublan dam, kalikina deiyoknye ulamuk.

³⁰ Abinuka deibukopura, Salemya el mi Hananya ap, yuknye ton Zalaf el mi, Hanun ap, sikce aning nirya, tabakuka dopnin balamdik. Zalaf el mapu nirya ara, nakub barye deiamuk bukni, Hanun bira, nakubnye ulamuk. Hanun ap, Hananya ap, keil poka dolamdikak arye, dipdongobuka pil dobuknye bira, Berekya el mi Mesulam el asik dam arye, dukdongobuka, keil poka winiryuk ning tabakuka dopnin balamuk.

³¹ Asukum ara, ninye si Malkia birye, apoka winiryuk ning tabakuka dopnin balamuk. Malkia bira dekna weik ning, pia teleb kat ning el si ara, emas arye dobuka, yuk ning memena deiyoknye ulamuk. Anye birye acang keil poka dukdongobuka dopnin balamuka ani, Allah si eren aik pum tam, pil dona ati melin nang, sik ulamik aik ap, tonda bona yuk-yuka talibuka deken nang ap, sik ulamik aik ap, anyaik dam keil poka dopnin balamuk. Dopnin balamuka ani, deiamuk bisik bublan ara, ‘Malye ning boyanmak do, teleb ning boyanmak do?’ tenen, wibuka dilden bublan nyabuka, botopdeiamik bublan dam binuka deibuk. Abublan si ara, Gerbang Mifkad nyalamik. Abublan dam ara, Malkia birye, keil poka dopnin balamuka ani, binuka deibuk. Apoka mouse dam ara, aik ton domik.

³² Asukum domik aik dam arye dipdongobuka otam keil poka dopnin balamik. Ara, urasin pia teleb kat ning, el si ara emas arye, dobuka memen nang ap, bona yuk-yuk talibuka dekna deiyok nang ap, sik nirya arye akeil poka mouse dam dukdongobuka dopnin balamik ani, domba basam bobuka, wekelbalamik bisik bublan dam binuka deibik.