Nehemia 13 - Eipomek

Israel ninye tamubuka Yerusalem mutuku yangalamik talak ara, sik deiyoknye, Gubenur Nehemia birye winilamuk ning ati, nyabuk yupu

¹ Allah el si erena ati, Israel ninye weik Yerusalem mutuku bulubuka yayik sum ara, sik deiyoknye Nehemia birye, “Winipnulume,” nyapdeibukba, Allah arye nyapdeiamuk yupu yinibikba, aninye nirya kekebik. Ara, Allah arye, “Aning ara wininamlume, aning ara pia kum wininamlume,” nyabuka lak nyapdeibukba, Musa birye sekiamuk yupu, yininmekba awekmek ninye nirya kekenmek. Allah yupu kekenmek talak ara, Allah yupu noutam sekeibuk ning ton kekebuka kel bikik. Ara, Allah arye nyapdeibuk. “Moab yala ninye ap, Amon yala ninye nirya ara, asum-asum nirya ara, sik ayala ninye bitinye ap, neika dukdongobuka pia kum unamlume. Anggun Israel yala ninye unamlum mutuku nirya ara, abitinye yala kili sal ton, anggun dam kum yanganamyake. Aning ara pia meme,” Allah arye nyabuk. Aning ara, Allah yupu buku noutam eibuka kel bikik.

² Ayala ninye bitinye ap, neika kum unamaka deiyok ara, Israel ninye Mesir mutuku arye sakwetebuka, bisik yangalamik talak ara, abitinye mutuku ulamik ninye arye, din ning ap, mek ap, Israel ninye ati, ton pia kum arelamik. Kum arelamik atonun, amutuku taleamuknye Balak birye, ‘Israel ninye malye kipdeipnamle’ tenen, tonoknye el si Bileam yukubukura, yayukba, amutuku deiyoknye birye nyabuk. “Ance Israel yala ninye malye kilina ati, sik deice malye yupu nyapdeipminba, Allah arye aninye supdeipnamle,” nyabuka morobuk. Utenebuka unmok bukni, Nun ni koproba Allah arye Bileam biti, teleb yupu uk arebukba, teleb yupu uk Israel ninye deice nyabuk. Winibuka deice arye, amutuku taleamuknye Balak birye, ‘Israel ninye suptinye,’ tenyamuk ning ara, kum kipdeibukce teleb ning weik areamsuk.

³ Ati, Allah yupu buku yininmek talak ara, sik Israel ninye nirya arye ayupu kekebikce, adiparyuk Allah arye, “Ayala bitinye ninye ap neika pia kum unamabe,” nyapdeiamuk touk, “Atalak babye aninguk winipnuyabe,” nyapdeibik. Ati, asum aryuk, sik yuk mutuku yala nang nirya ap, yuk yala ninye deiamik mapu nirya ap ara, dobuka, sik Israel yala ninye kan-kan arye yukak dopdeibik. Winibikce, sik ap yuk yala ninye ap, neika kum ulamik.

Imam Elyasib birye, malye ning winibukba, Gubenur Nehemia birye, Elyasib arye malye winibuk ning ati, nyabuk yupu

⁴ Min yuma talak arye, imam Elyasib bira, Allah el si eren aik pum tam wilibuka domik aik, bona delilamik aik ati, Israel ninye arye, “Anyaik kalikna deiyoknye unamsilame,” nyabuka wipdeibik. Wipdeibik bukni, imam Elyasib bira, ninye ton el si Tobia biti, ‘Na kwit,’ tenyamuka anya arye, sik bitinye neika dukdongobuka yupu nyalamdik.

⁵ Tobia ap, dukdongobuka ulamdika anya arye, Elyasib birye weik kamar aik ton Tobia biti nukuk. Minop talak ara, ‘Anyaik ara Allah ati arenamak ning bulubuka delinamak’ tenen, kintinip deiamik. Ara, Allah el aik pum tam pil don nang ap, Allah ati arelamik gandum ap, nintong teleb ning el si ara, kemenyan ap, delina ati anyaik kintinip deiamik. Tonda, ‘Lewi yala nang ati arenamap’ tenen, persepuluan ning gandum ap, anggur tapu duk mek ap, zaitun yo duk mek ap, bulubuka anyaik delilamik. Tonda, aning noutam arye bokuka, sik pong-pong ana talibuka, mot sena deiyok nang ap, Allah el aik pum tam wekelban bisik bublan dam kalikna deiyok nang ap, sik yuk imam-imam nang ap ati, aning bokuka arelamik. Winilamika ati, aning-aning nirya dobuka, delinak ati anyaik kintinibuka delilamik. Bukni, Elyasib birye el kwit Tobia biti, anyaik nukuk.

⁶ Aning winibukopura, atalak na Nehemia bira Yerusalem mutuku ton pia kum ulamse. Ara, Babel mutuku ninye deiyoknye Arthasasta talibuka ulamuk talak, keting tamun yupa pia weik 32 tahun akunum ubukba, nara Babel mutuku tamubuka binmase. Babel mutuku deiyoknye Artasasta el dam lak nyalbinamse ati, Elyasib birye malye winibuk ning ara, na ton kekebuka kum kel bikamse. Lak nyabuka daulamse ani, “Naio, na mutuku koproba tuba tamubuka bitinye do?” nyabuka moropsiba, elce, “Telebe,” nyapnukopura, Babel mutuku batakuka, Yerusalem mutuku tamubuka yase.

⁷ “Yerusalem mutuku tamubuka binamne,” nyabuka moropsiba, elce, “Telebe,” nyapnukopura, yangalamsa ani, Yerusalem mutuku yanuka dinmasiba, imam Elyasib birye, el kwit koproba Tobia biti, Allah el si eren aik koproba pum tam bukni, tonok aik wilibuka domik aik ara, arepmokba, eipsirye, na lukdase.

⁸ Narye Elyasib ap, Tobia ap ati, yu upnukba, uapsirye, “Tobia an ning nirya bopraka bilyame,” nyabuka, el ning nirya dobuka, bai tam dopkwetepse.

⁹ Winipsopura, narye, “Anyaik tuba tamubuka teleb kilina ati, winipnuyabe, winipnuyabe,” nyapsiba, anyaik pum tam nirya mek likukabuburye teleb kipdeibupu. Winibupopura, Allah el aik koprop noutam pil don ning ati narye boyanmase ning nirya ara aninguk tuba tonap, dobuka anyaik noutamak deibupu. Tonda, nintong teleb ning kemenyan ap, Allah arena ati gandum ap, delinak ati tuba tonap teleb ubuka kintinibupe.

¹⁰ Tonda, sik amutuku ulamik ninye arye, Lewi yala nang ati delilyangan ning weik tonun ton kum delilyangalamikba, anang nirya ara Yerusalem mutuku batakukabikce sik wa wina ati, yuk-yuk mutuku dabinamik. Aning atonun, sik Allah el yupu mot sena kel nang ati, melibuka kum arelamikba, anang babye Yerusalem mutuku batakukabikce, sik wa wina ati, yuk-yuk mutuku dabinamik.

¹¹ Aning nirya kekebuka biksirye, na malye kanye bopsirye, amutuku noutam talibuka, ‘Winipnuyabe,’ nyana deiyok nang ati uapsirye nyapse. “Anggunda yata deiyok ati, Allah Yahweh el si eren aik pil melin nang ati arin ning bataklum do?” nyabuka uapse. Nyabuka uapsirye, Lewi yala nang ap, mot sena deiyok nang ap ati, “Tamubuka yalulume,” nyapsiba, yayikopura, bulupdeipsirye, “Anggun min arye yuk-yuk talibuka pil dolamlum touk, apil talibuka donamlume,” nyapdeipse.

¹² Apil akunum arepsopura, Yehuda tam ulamik nang nirya arye Allah arena ati, persepuluan ning bobuka arelyangalamik. Ara, gandum ap, anggur tapu duk mek ap, zaitun yo duk mek ap, boyanaba aning dobuka delin aik taleamuka deiyoknye dam bobuka delilyangalamikba, elce aning dobuka adelin aik pum bisik delilamuk.

¹³ Aning delin aik pum tam talibuka ukirye, ‘Aning nirya moubuka kalikinamak’ tenen, narye yuk nang ton, apil dona ati wipdeipse. Narye wipdeipse nang ara, Imam el si Selemya ap, Allah arye nyapdeiamuk yupu sekna weik kelnye el si Zadok ap, tonda Lewi yalanye tonok el si ara Pedaya ap, wipdeipse. Anang sik amu tam pil dona ati, ninye si Matanya birye deibuknye Zakur, el mi Hanan wipdeipse. ‘Sik anang melibuka pil donamak’ tenen, wipdeipsa deiyok ara ani. Ara, anang-anang nirya ara, pia diksukum winin ninguk talibuka telebuk ulamikba, amutuku ninye nirya arye, sik anang ati, “Sikda teleb nanguk unyake,” nyabuka si erelamik. Ati ara, anang wipdeipse. Anang wipdeipsirye nyapse. “Anggunda Israel ninye nirya arye, Allah el arena ati, aning-aning ayala-yala nirya boyacopura, anggunce aning dobuka Allah ati arenamlume. Tonda, Allah el si eren aik pum tam pil melibuka don nang, sik Lewi yala nang ati, mitik tonun bokuka anang ati arenamlulume,” nyapdeipsiba, apil talibuka dolamik.

¹⁴ Apil-apil nirya dolamse ara, na ni Allah ati nyapse. “Diba na ni Allah, ance tenelamnulum touk, tonok ning babye kum bataksirye, ‘An aik noutam pil donamak’ tenen, wibuka deipman nang ap, sikce talibuka donamak pil nirya ap, an aik moubuka dolamse pil ap ara, Israel ninye arye an si erena ati, ‘Wininamlulume, aning wininamlulume,’ nyabuka lak nyalamse ning ap ati, ‘Ance bico tenebuka melinamnilam’ tenen, moropkine,” nyapse.

¹⁵ Atalak ara, narye dinmasiba, Sabat sum deice arye, yata barye nang do, Yehuda yala ninye weik arye, anggur tapu duk purulamikce, pil dolamikak eipse. Allah arye, “Sabat sum deice ara, pil tonok ning babye kum donamlulume,” nyapdeipsuk bukni, aninye arye yanibuka, ayupu kum kekelamike. Ton yuk ninye ara, gandum ap, anggur tapu duk ap, ara yo duk ap, yuk aning-aning nirya ap dobuka, keledai basam balye deice libuka deipmekce, Sabat sum deice arye Yerusalem mutuku yanganmek. Winipmekba narye eipsirye, “Yata ati Sabat sum deice arye, aning ara dekelyanganmalum do?” nyabuka wenepse.

¹⁶ Aning atonun, Tirus mutuku nang ton sik mining dam Yerusalem mutuku noutam aulamik nang arye, mek pum bal ikan ap, tonda yuk-yuk yala ning ap, sik talibuka ulamik ning nirya ara, Sabat sum deice arye boyanganmika ara, ‘Yudea tam ninye sikce deknamsiyak’ tenen, boyayik.

¹⁷ Wininmeka ati, narye, ‘Yata deiyok ati, Sabat sum deice arye wininmak do?’ tenen, Yudea tam talibuka ninye deiyok nang ati yu upnukba, “Yata deiyok ati malye wininamlum do?” nyapse. “Anggun aninye wininamlum deice arye, pia malye-malye weik wininmalumce, Sabat sum yanibuka malye kipdeipmalume,” nyapse.

¹⁸ “Yata deiyok ati malye wininmalum do? Anggunce amalye wininmalum touk, minop talak nun apu yapu arye malye ulamikba, ‘Allah arye nun apu yapu nirya obuka sirya daklamuk touk, nun babye atonun wenepsuturye ikin ning deipsutue’ tenen, wininamlum do? ‘Allah arye nun tonap tabakuka opsutue,’ tenebuka, anggun Israel ninye arye, Sabat sum malye kilinmalum do?” nyapdeipse.

¹⁹ Ara, Sabat sum otam upnin banamika nirya ati, asum arye deiyok koubuka nyanmase. “Yerusalem mutuku noutam poka antanap dongobuka dobuburye, botobupe bisik bublan ara, pia kum kukulinamlulume. Ara, pamu sum ara ipnamalya ati, min inipnin banmalye talak ara, adiparyuk bublan tirikilonamlulume. Winibuka tirikdongopmamunye touk upmale bukni, nakub barye sum babye apia upnin banamle. Naku barye sum inipnamalya ati, min inipnin banmalye talak ara, tuba tonap abublan titiknamlulume,” nyapse. Nyapsopura, na mapu ton dobuka, ‘Abisik bublan dam nirya talibuka kalikinamak’ tenen, wipdeipsiba, kalikinmek. Ara, ‘Yuk mutuku nang ton sik bona yuk-yuk talibuka dekenyak nang arye, hari Jumaat sum, beren tam talak arye dipdongobuka, Sabat sum noutam nirya, abisik bublan wekuka amutuku yanuka bona dekelyacak’ tenen, winipse.

²⁰ “Wininamabe,” nyapdeipse yupu ara, sik yuk mutuku arye dekelyangalamik nang kum kekebika anya arye, Sabat sum deice arye Yerusalem mutuku wekelban bisik bublan dam yayikce, ‘Anyasik, weknuyap’ tenen, pirideyikce, bublan tirikmaupa arye, yanmanto kum ubikce, akeil poka buru tam mabuka unmek. Aning atonun, yata wiribuka sum do, yanuka piripdeyikce, kum winipmanto ubukba, bai tamuk yanuka ulamik.

²¹ Winilamikopura, narye anang ati ayupu ton nyabuka uapse. “Anggunda talye kanye bobuka kalikilulum do? Yata deiyok ati, nun cang keil poka dam malulum do? Sabat sum deice arye amutuku noutam akunum yangana ati, kum wekelyatume. Tonap aning atonun winipmunyopura, na mikip arye wenepnamsine,” nyapse. Nyapsiba, ayupu kekebikce, asum arye dipdongobuka dotalak nirya, Sabat sum deice ara, kum dekelyangalamik.

²² Tonda narye, sik Lewi yala nang ati nyapse. “Anggunda abublan dam kalikna ati, anggun nong ap, anggun baju ap mek likinamlulume. Tonda, Allah arye, ‘Anggun nong teleb kilina ati, apil-apil donamlume,’ nyapdeiamsuk touk, apil ton donamlume. Winipmunyopura, tuba tamubuka yamunce, abublan nirya kaliklamunya ani, Sabat sum ara, pia malye ton kum unamsile. Teleb uk unamsile. Asum ara, Allah el siuk erenamabe,” nyapse. Nyapsa ati, narye Allah ati moropse. “Se, na ni Allah, narye, ‘Sabat sum tuba-tuba telebuk unamsil’ tenen, aninye arye malye winilamik ning nirya ati, kum daneipse ning ara, kum luba kinalyame. Awinipse ning ati, ance nati weik arye bico tenebuka melinamnilame,” nyabuka moropse.

²³ Atalak narye dinmasiba, Yahudi yala nang weik arye yuk mutuku Asdod mutuku kilapu ap, Amon mutuku kilapu ap, Moab mutuku kilapu ap, dolalamikba eipse. Allah arye, “Yuk mutuku kilapu ton bobuka kum dolanamlume. Israel yala kilapu uk dolanamlume,” nyapdeiamsuk bukni, yuk mutuku kilapu uk dolamika ak eipse.

²⁴ Yahudi yala nang arye, yuk mutuku kilapu dolalamika ati, akilapu nirya ara, sik mutuku yupu koproba uk peterelamikba, sik mapu nirya ara ayupu uk kel biklamik. Ati, Yahudi yala mapu ulamik bukni, noutamak arye bokuka ton tam mapu ara, yuk mutuku yupu uk kel biklamik. Ara, Asdod mutuku yupu ap, tonda yuk-yuk mutuku yupu nirya ap kel biklamik. Israel ninye nyalamik yupu ara, kum nyalamik. Yudea mutuku noutam nyalamupu yupu ara, moubuka kum nyalamik.

²⁵ Narye sik aninye ati wenebuka supse. Winipsirye ton tam nang ara kama arye deplopse. Ton tam nang ara, sik potong nirya kobuka batakse. Winipsopura, narye tamubuka nyapse, “Anggunda dipkoprob Allah el si deice nyalin yupu nyaplulume. ‘Nunda tuba tonap, nun kilmapu dobuka, sik yuk mutuku nang ati kum arenamabe. Tonda, nun mapu sik kil dona ati, yuk mutuku kilapu dobuka kum arenamabe. Tonda nun babye, yuk mutuku kilapu ton, pia kum dolbanamabe,’ nyalin yupu deice arye nyaplulume,” nyapse.

²⁶ Narye ayupu tonap dukdongobuka nyapse. “Amalye wininamlum ning ara, minop talak nun Israel ninye, nun ninye deiyoknye Raja Salomo birye winilamuka deice arye, malye weik winibukba, Allah arye elti, wenebuk. Salomo birye winilamuk touk yuk mutuku kilapu dopmalumce, talye kanye bobuka winimalum do? Salomo bira pia weik kel bikna ap, weik bona utotoa talinanye ulamukba, Allah arye bico tenebuka kanye delilamukce, ninye deiyoknye erepdeiamukba, Israel ninye ayala-yala nirya taleamuk. Yuk mutuku ninye deiyok nang ara, Salomo pia teleb ulamuk touk, ton pia kum ulamik. Bukni, Raja Salomo birye, yuk mutuku kilapu weik dolamuka deice arye, pia malye weik winilamuk. Ara, Raja Salomo ulamuk talak ara, yuk mutuku kilapu pia weik dolamuka deice arye, sik akilapu talilamik ninguk, el babye taleamukce malye winilamuk.

²⁷ Aning nirya ara, anggun akunum Luba kipmalum do? Dipkoprop anggun ilil kumce, mandip kanye bobuka, malye wininmaluma ara, Allah ati bisimunce, malye winilulume. Ara, anggunce yuk bai tam kilapu ak donmalumce, malye wininamlum ning ara, nun kekena like! Allah arye, ‘Winina meme’ nyapdeiamsuk yupu yaniptaplum ning ara, pia malye wininmalume,” nyabuka wenepse.

²⁸ Tonda imam weik deiyoknye, el si Elyasib el mi Yoyada birye, Bed-Hor mutukunye, el si Sanbalat birye deiamuk kilmu dobuka anya arye, narye Yoyada biti, “Yerusalem mutuku noutam ara, pia kum unamlyame,” nyabuka yakse.

²⁹ Ati, narye Allah ati nyabuka moropse. “Se, na ni Allah ance, ‘Anang ara imam nang upnamak’ tenen, wibuka deiamlum bukni, an si yanibuka malye winilikinyake. Tonda, ance, sik imam nang ap, Lewi yala nang ap ati, ‘Aning ara wininamlume, aning ara kum wininamlume,’ nyapdeipsulum yupu ara sikce yaninyake. Ati, sikce malye wininyaka ara, ance tuba tenipmince, anang ati wenenalyame,” nyabuka moropse.

³⁰ Winibuka Israel ninye ap, bai tam ninye ap, sikce ansinibuka malye winilamik ning nirya wibuka dopropse. Tonda, sik imam nang ap, Lewi yala nang ap arye, yuk mutuku ning dobuka talilamik ning nirya ara, dobukapsirye, kum kipdeipse. Winipsirye, Allah arye, ‘Anang teleb kilina ati, apil donamlume,’ nyapdeiamsuk touk, apil dopsiba sik nirya tuba tonap teleb kipdeipse. Apil nirya dobuka sirye daksopura, sik imam nang ap, sik Lewi yala nang ap ati, Allah arye, ‘Wininamlulume,’ nyapdeiamuk touk, ‘Sik yuk-yuk talibuka pil donamak’ tenen, pil dona deiyok ning yuk-yuk bokuka arepse.

³¹ Narye, “Winibuka wininamlume,” nyapdeiamse ning nirya, akunum kintinipsopura, ‘Sikce apil donamap, tenebice talak uk donamak’ tenen, kintinipse. Ara, ‘Amutuku unamak ninye arye sik wininamak ning nirya delilyakiba, uku dongonamak’ tenen, narye yo nirya akunum kintinibuka deipse. Tonda, ‘Amutuku ninye arye sik ning min yuma ning nirya boyakiba, sik imam nang ati arebikiba, Allah el si erena ati, uku dongonamak’ tenen, narye kintinipse. Winipse ning ati Allah moropsirye, “Na ni Allah na winipman ning ati, ance kum luba kipnamlyame. Pia tenenamlyame. Winibuka tuba tenenimince natibuk bico tenebuka na dam aunmince, teleb kibuka melinamnilame,” nyabuka moropse. Na Gubenur Nehemia birye nyapse. Akunuma.