Nehemia 12 - Eipomek

Imam-imam nang ap, Lewi yala nang ap, sekdeiamik ning ati, nyabuk yupu

¹ Asekeipne ning ara, imam-imam nang ap, sik Lewi yala nang ara, Babel mutuku nang arye bobalamikba, daulamika ani, aminyan talak ara Sealtiel el mi Zerubabel ap, Yesua ap, sik ulamik mutuku koproba tamubuka yayik talak ara, anang ap neika yayik. Sik si ara ani. Seraya ap, Yeremia ap, Esra ap, sik nirya Yerusalem mutuku tamubuka yayik.

^2-7 Aning atonun, anang babye neika tamubuka yayik. Sik si ara, Amarya ap, Maluk ap, Hatus ap, Sekhanya ap, Rehum ap, Meremot ap, Ido ap, Ginetoi ap, Abia ap, Miyamin ap, Maaja ap, Bilga ap, Semaya ap, Yoyarib ap, Yedaya ap, Salu ap, Amok ap, Yedaya ap, Hilkia ap, Yedaya ap, sik anang nirya ara, imam deiyok nang uamik nang ara, sik weik deiyoknye Yesua ulamuk talak ulamik nang atia.

⁸ Allah el si eren aik pum tam pil dona deiyok nang, sik melilamik nang, Lewi yala nang sik Yerusalem mutuku tamubuka yayik nang si ara ani. Ara, Yesua ap, Binuai ap, Kadmiel ap, Serebya ap, Yehuda ap, Matanya ap, ulamik. Matanya ap, el kayapu nang ap arye, Israel yala ninye yuk-yuk bulubuka wekmanak uk, mot sepra bana deiyok nang ulamik.

⁹ Mot selamik talak ara, tia talak ati sikce ninye yuk-yuk bulubuka wekmanak uk, mot sebuka melilamik nang ara, sik si ani. Ara, Bakbukya ap, Uni ap, sik kayapu yuk nang nirya arye, winibuka ulamik.

¹⁰ Imam-iman nang, sik pil melina ati, deiyoknye Yesua bira, elce deibuknye el si ara, Yoyakim ulamuk. Yoyakim birye deibuknye bira el si ara, Elyasib ulamuk. Elyasib birye deibuknye bira, el si Yoyada ulamuk.

¹¹ Atonun tonda, Yoyada birye deibuknye el si ara, Yonatan ulamuk. Yonatan birye deibuknye el si ara, Yadua ulamuk.

¹² Deiyoknye Yoyakim ulamuk talak ara, Allah el si eren aik pum tam pil dona deiyok nang, sik asik yuk-yuk ulamika deiyok nang si ara ani. Ara, weik deiyoknye Yoyakim el pil don dam talibuka pil dolamik nang, sik mapu silip deiyok nang si ara ani. Seraya el mapu silip sik deiyoknye bira, Meraya ulamuk. Yeremia el mapu silip sik deiyoknye bira, Hananya ulamuk.

¹³ Esra el mapu silip sik deiyoknye bira, Mesulam ulamuk. Amarya el mapu silip sik deiyoknye bira, Yehoan ulamuk.

¹⁴ Melikhu el mapu silip sik deiyoknye bira, Yonatan ulamuk. Sebanya el mapu silip sik deiyoknye bira, Meraya ulamuk. Seraya el mapu silip sik deiyoknye bira, Yusup ulamuk.

¹⁵ Harim el mapu silip sik deiyoknye bira, Adna ulamuk. Merayot el mapu silip sik deiyoknye bira, Helkai ulamuk.

¹⁶ Ido el mapu silip sik deiyoknye bira, Zakaria ulamuk. Gineton el mapu silip sik deiyoknye bira, Mesulam ulamuk.

¹⁷ Abija el mapu silip sik deiyoknye bira, Zikri ulamuk. Minyamin ap, Moaja ap sik mapu silip sik deiyoknye bira, Piltai ulamuk.

¹⁸ Bilga el mapu silip sik deiyoknye bira, Syamua ulamuk. Syamua el mapu silip sik deiyoknye bira, Yonatan ulamuk.

¹⁹ Yoyarib el mapu silip sik deiyoknye bira, Matnai ulamuk. Yedaya el mapu silip sik deiyoknye bira, Uzi ulamuk.

²⁰ Salu el mapu silip sik deiyoknye bira, Kalai ulamuk. Amok el mapu silip sik deiyoknye bira, Heber ulamuk.

²¹ Hilkia el mapu silip sik deiyoknye bira, Hasabya ulamuk. Yedaya el mapu silip sik deiyoknye bira, Netaniel ulamuk.

Imam pil dolamik nang, sik mapu silip nirya ap, Lewi yala nang ap, sik si sekik yupu

²² Lewi yala nang sik du weit ati, deiyok kiyamik nang ap, imam nang sik du weit ati, deiyok kiyamik nang ap, sik nirya nukuka bikna ati si sekik. Asi sekna deiyok kiamik talak ara, imam nang nirya, sik ninye deiyok nang ara, ani. Ara, Elyasib ap, Yodaya ap, Yohanan ap, Yadua ap, sikce imam nang ninye deiyok nang kibuka, talibuka ulamik talak arye, si sekna pil babye, deiyok kibuka si seklamik. Wilamik bukni, Persia mutuku ulamik nang nirya ati, Darius birye ninye deiyoknye Raja kibuka taleamuk. Ataleamuk talak arye, imam nang ap, Lewi yala nang ap, si seklamik ning ara, atalak arye batakik.

²³ Bukni, Lewi birye deibukba, dadeipdanin yangalamik nang, el yala nang ara, sik du weit nirya ati, deiyok koubuka taleamik nang, sik si sekuka deililamik ning ara, Elyasap el mi Yonatan birye, deiyok kibuk talak arye, si sekuka deiamik ning ara, akunum batakik.

Allah si eren aik noutam, pil dona ati, bokik yupu

²⁴ Allah el si eren aik, pil talibuka donamik ati, deiyok kibik nang, sik si ara ani. Asabya ap, Serebya ap, Yesua ap, Binuai ap, Kadmiel ap, sikce Lewi yala nang, sik bulubuka yuk-yuk ati deiyok kibik. Atalak ara, sik nirya arye, asum-asum unyak bitinye-bitinye kipdeibik. Ara, Allah el si eren aik noutam, el yupu keken talak, mot nyana ati, tonok bulubuka ton kibik. Tonda Allah ati, ‘Telebe,’ nyabuka, si erena ati, yuk bulubuka ton kibik. Sik bulubuka yuk-yuk ulamik touk kibuka, ayupu nyanmek. Akibik ning ara, min talak Allah el pil dolamuknye Raja Daud birye, ‘Aning ara, wininamlume,’ nyapdeiamuk touk, winibik.

²⁵ Allah el si eren aik wekelban bisik bublan dam kalikna ara, sikcuk Allah el si erena aik pum tam wekelban bisik bublan dam domik uku bulung aik, ‘Noutam deiamik ning nirya ati, kaliknamak’ tenen, wipdeibik. Anyaik kalikna ati, deiyok kin nang sik si ara, ani. Ara, Matanya ap, Bakbukya ap, Obaja ap, Mesulam ap, Talmon ap, tonda Akub ap, sik anang nirya wipdeibik.

²⁶ Sik anang ara, Yosadak birye Yosua dibukba, elce deiamuknye Yoyakim ap, Nehemia birye Gubenur kibuka, amutuku nirya taleamuk talak ap, tonda Imam Esra bira, ‘Malye ning ara, ani, teleb ning ara, ani’ tenen, lipsisikuka yupu nyalina deiyoknye ulamuk talak ara, sikce ninye deiyok kibuka taleamikce ulamik.

Yerusalem mutuku winiryuk keil poka dobik ati, Israel nang nirya bulubuka deibukce, “Allah si erepnamab,” nyabuk yupu

²⁷ Ura, “Yerusalem mutuku tuba tamubuka dobupu cang keil poka ati, kwalina yubuka, si erenamabe,” nyabuka, Nehemia birye Lewi yala deiyok nang ati, deiyok koubuk. Tonda, ayupu nyabuk. “Sik Lewi yala nang yuk-yuk aulamik touk, Yerusalem mutuku bulubuka yamunce, anggunce, ‘Winipnuyabe,’ nyabuka, winipnin bamunye touk, sik yuk ninye nirya, aninguk melibuka wininamake. Ara, Allah ati kanye deibuka, teleb nyan mot sena ati, nyan ning bung-bung ana, el si ara gambus ap, kecapi ap bobibirye, mot sebuka, si erebibirye, banamabe,” nyapdeibuk.

²⁸ Aning atonun, sik Allah el yupu mot sena kel ninye ton yukubukopura, anang arye Yerusalem mutuku arye dipdongobuka mining dam mutuku ulamik ninye ap, Netofa mutuku ulamik ninye nirya bulubikce, Yerusalem mutuku tamubuka mot selamik.

²⁹ Tonda, Bet-Gilgal mutuku ap, Geba mutuku ap, Asmawet mutuku ap nirya arye, mot sena weik kel ninye ara, Yerusalem mutuku uk bulubuka yayik. Ara, Babel mutuku arye tamubuka yayik talak ara, amutuku-amutuku noutam sik aik dobuka ulamikak ara, amutuku arye tamubuka, Yerusalem mutuku dam yayik.

³⁰ Minop talak ara, Allah arye sik imam nang ati nyabuk. “Na si eren aik pum tam wekelbinamunye talak ara, anggun nong ap, anggun talilulum ning ap, anyaik pum tam pil donamlum ning ap, aning-aning nirya teleb updeipmunce, malye winina kum nanguk upmunyopura, atalak aryuk, na aik wekna telebe. Ara, aning-aning nirya pia malye ulina ati nyapsine,” nyapdeibuk. Nyapdeibuka ati, sik imam-iman nang ap, Lewi yala nang ap ara, ‘Allah arye nyapsuk touk winipnamapca’ tenen, kintinip deibikce, aning ap, sik nong koprop ap ati, teleb kipdeibik. Aning atonun, ‘Nun amu tam ninye nirya babye, malye winina kum nanguk upnamak’ tenen, Allah arye ‘Wininamlulume,’ nyapdeiamuk touk, teleb pil dobuka kintinibik. Winibik ning ara, weik keil poka donmek ning ap, apoka bublan botopdeiamik ning babye, ‘Pia teleb, malye ton kum upnamle’ tenen, apiluk dobuka kintinibik.

³¹ Atalak ara, na Nehemia birye winipse. Sik Yehuda mutuku deiyok nang ati, ‘Winiplulume,’ nyapsiba acang keil poka deice welebikce, neik diksukum tikikce kintinibik. Winibikopura, akeil poka deice tam amutuku nirya antanap dongobuka, denepdongobik. Tonda, ‘Allah el si erena ati kanye delin mot sepra banamak’ tenen, ninye yupa weik bitinye kipreipsiba, akeil poka deice banmek. Yupa tonok ning ara, weik cang keil poka deice tam, sirik tam arye neik diksukumuk banmekce, domba basam dei ap, sikce talibuka wilamik yuk yala ning dei ap, dolkwetelban bisik bublan dam biyik.

³² Winibuka banmeka sik donga tam ara, yuk nang ap tabakuka banmek. Sik si ara ani. Ara, Yudea tam deiyoknye el si ara, Hosaya banmokba, Yehuda yala ninye sik ninye deiyok nang noutam arye bokuka, yupa ton banmekce, mot sepnin banmek.

^33-35 Atalak sik deiyok nang banmekba, aminyan dukdongobuka banmek nang sik si ara, Asarya ap, Esra ap, Mesulam ap, Yehuda ap, Benyamin ap, Semaya ap, Yeremia ap banmek. Aning atonun, sik donga tam dukdongobuka banmek nang ara, imam-iman nang ton pong-pong ana, el si ara terompet yupu sepnin banmek. Sik ap banmek nang si ara, Yonatan el mi Zakaria ap, Semaya birye deiamuk mi ap, Mataya birye deiamuk mi ap, Zakur birye deiamuk mi ap, Asaf birye deiamuk mi ap, sik kayapu nang ap, neika banmek.

³⁶ Atonun, sik anirye dukdongobuka aminyan tam tikuka banmek nang ara ani. Semaya ap, Asareel ap, Milalai ap, Gilalai ap, Mahai ap, Netaniel ap, Yehuda ap, Hanani ap, banmek. Sik anang nirya ara, mot sen ning aning-aning nirya bopmekce, banmek. Ara, minop talak Allah el pil donanye, Raja Daud birye, ‘Wininamlulume,’ nyapdeiamuk atonun winibuka unmek. Tonda Allah arye, “Wininamlulume, aning ara kum wininamlume,” nyapdeiamuk yupu talibuka seklamuknye, el si ara Esra, elce menekuka banmokba, sik aninye nirya, el donga tam banmek.

³⁷ Sik nirya banmeka ani, mek pu dam balamik bisik otam biyikce, Raja Daud el ulamuk mutuku dam bana ati, moropdeiamik bisikak obinuka poka kwanibuka dopdongamikak obinuka keplamapdongobuka, keting yangan tam, mek pu dam balamik bisik bublan deice tam biyik.

³⁸ Sik anang nirya ara, anyapman touk banmekce, mot senmek bukni, ninye weik yupa bitinye ning ara, kwanim tam banmek. Ara, na Nehemia ap, Israel ninye noutam arye bokuka yupa weik tonun tonap, sik mot senmek nang menekuka banmekba, nunda sik donga tam uk banmapu. Weik cang keil poka deice kwanim tam arye ubuka banmapu ani, roti dana ati, weik cang aik el si ‘Menara,’ nyabuka domik ning ara, kirikuka otam biburye, pala keil poka nyalamik ning dam beipu.

³⁹ Winibuka pia bana uk unmapurye, Efraim yala ninye sik bisik bublan kirikuburye, minop talak domik bisik bublan dam biburye, mekwen pum bal ikan bublan dam beipu. Abiburye, weik cang ning, el si Menara Hananael ap, tonda Menara Seratus nyabuka domika dam biburye, domba bobuka wekelbalamik bisik bublan dam beipu. Winibupu ura, nunce deiyok koubuka banmapu nang yupa nirya ara, Allah el si eren aik wekelban bisik bublan kalikna deiyok nang, sik aik dam sukumuk binuka deibupu.

⁴⁰ Ayupa bitinye mot sepra banmapu ninye nirya ara, Allah Yahweh el si eren aik dam abinuka deibuka tikmopu. Ara, na ap yuk Israel yala ninye deiyok nang, noutam bokuka neika banmapu nang ap, asukumuk bulubupu.

⁴¹ Asukum binuka deibubopura, sik imam-imam nang arye pong-pong ana, el si terompet yupu nyabuka banmek nang ton asukumuk bulupmek. Sik si ara ani. Elyakim ap, Maseya ap, Minyamin ap, Mika ap, Elyoenai ap, Zakaria ap, Hananya ap atikmek.

⁴² Anang atonun, sik aminyan tam arye dukdongobuka banmek nang babye, anyaik dam tikmapuak uk, yanuka tikik. Sik si ara ani. Ara, Maseya ap Semaya ap, Eleasar ap, Uzi ap, Yohanan ap, Malkia ap, Elam ap, Ezer ap, sik winibuka nang ara, anyaik dam bulubuka tikmek. Sik mot sena kel nang ara, mot sepra banmek. Amot senmek talak ara, ‘Winipnulume,’ nyana ati, sik deiyoknye bira Yisraya ulamuk.

⁴³ Israel ninye sik deiyoknye Gubenur Nehemia birye deiyok kibukba, weik asik Yerusalem dana-dana nirya weik cang keil poka donmek ning ati, keil yangabuka dadeipdanin balamikce, antanap dongobuka dolamika ani, apil akunum dobuka sirya dakdongobikura, kanye deibuka weik arye mot sebuka lunmek. Tonda, sik ninye deiyok nang ayala-yala nirya ap, Allah el si eren aik pum pil dona deiyok nang, sik imam nang ap, tonda sik amu tam pil melin nang, Lewi yala nang ap, Allah mot selamik nang ap, pia weik arye winimekce, mot senmek. Tonda, ‘Nun ni koprop Allah, weik meliamsuk deice arye, weik asik Yerusalem dana-dana keil poka dona ati, keil dikuka dadeipdanin balamuburye, antanap dongobuka domupu cang poka akunum sirya dakmaba ati, kanye deibabe’ tenen, pin-pin asa arye unmek. Ati, Allah el si erena ati, kam ning weik obukabikce, elti, arebikce, weik arye kanye deibik. Sik Israel yala ninye nirya, sal babye, kilapu babye, sik mapu babye, sik kilmapu nirya babye, kanye deibikce, pin-pin asa arye unmek. Weik asik Yerusalem noutam arye winimekce, lelim weik nyanmekba, sik pera mutuku ulamik nang arye kekenmek.

⁴⁴ Ura, atalak ara, sik Israel ninye nirya arye, Allah el si erena ati, arelyangalamik ning ara, weik ulamuk anya arye, aning delin aik kalikna deiyok nang ton wipdeibik. Ara, sik Israel nang arye wa wibuka koulamik ning, minop fabuka nong ulamuk ning ap, sik wilamik ning min yuma ning minop delilamik ning ap, tonda, ‘Nun ni koprop Allah ati, telebe nyapnuyap’ tenen, arelyangalamik ning ap, Allah el si erena ati, anyaik delilyangalamikba, anang arye dopropna arye, anyaik deibuka kaliklamik. Aning winilamik ning ara, ani. Sik ulamik mutuku dana-dana nirya, wa wibuka koulamik ning, akunum duk moulamukba, winiryuk ning lipnopura, Allah el si erena ati arelyangalamik. Winilamik ning ara, Allah arye el mem yupu nyapdeiamuk noutam arye, ‘Na si eren aik pum pil dona deiyok nang ap, sik amu tam pil melin nang, Lewi yala nang ap, sik patan ning melina ati, aning-aning nirya anoutam arye bokuka, boyamunce arenamlume,’ nyapdeibuk. Ati, Allah arye nyapdeiamuk touk, arelyangalamik. Sik Yehuda tam ulamik nang nirya arye, Allah el si eren aik pum pil dona deiyok nang, sik imam nang ap, tonda sik pil melin nang, Lewi yala nang ap ati, kanye deibuka bico tenelamika ati, Allah arye nyapdeiamuk touk, sik ning ayala-yala nirya, tagu barye arye diprongobuka utam kintinip deipnopura, noutam bokuka tonok ning dobuka, Allah ati arelyangalamik. Ara, seper sepuluh (10%) nyalamak ning, bokuka arelyangalamik.

⁴⁵ Allah el si eren aik pum pil dona deiyok nang, sik imam nang ap, sik amu tam pil melin nang, Lewi yala nang ap arye, Allah el si eren aik pil teleb ubuka dolamik. Tonda, ‘Israel ninye arye Allah el dam yating’ tenen, sik malye ulamik ning kum danalina ati, Allah arye, ‘Wininamlulume,’ nyapdeibuk touk, apil ton dolamika deice arye, Israel ninye ati tuba tonap teleb ulilamik. Aning atonun, sik Allah mot selamik nang ap, weik asik Yerusalem dana-dana domik poka bublan botcamikak, kalikna deiyok nang ap, sik pil babye teleb ubuka dolamik. Aning-aning pil dolamik ning ara, minop talak Allah arye nyapdeiamukba, Raja Daud ap, el mi Solomo ap arye, “Winibuka unamlume,” nyapdeamdik touk, apil dolamik.

⁴⁶ Minop talak ara, Israel ninye taleamuk ninye deiyoknye, Raja Daud ap, tonda yuknye Asaf ap, ulamdik talak noutam ara, Allah mot sena ati, deiyok nang ton wibuka delilamik. Adeiyok nang arye, sik Allah mot selamik nang ati, ‘Allah mot sena ati, winibuka-winibuka senamlulume,’ nyalilamikba, Allah mot selamik. Ara, Allah ati, ‘Se anda pia mambulnye ulyama ati, anti telebe nyapkiyabe,’ nyana ati, Allah mot selamik. Minop talak ‘Winibuka wininamlume,’ nyapdeiamik yupu tuba ubuka anya arye, atalak babye, ayupu nyalamik touk, tuba ulamik.

⁴⁷ Tuba ulamika ati, Gubenur Nehemia ap, tonda Zerubabel ap, ulamdik talak babye, sik Israel ninye nirya arye, asum-asum nirya sik taleamik ning noutam bokuka, sik Allah mot sen nang ap, Yerusalem mutuku dana-dana domik poka bublan domika, abublan dam kalikin nang ap ati, aning-aning nirya boyanuka arelamik. Aning atonun, sik Lewi yala nang patan ning melina ati, sik Israel ninye arye, sik taleamik ning noutam bokuka, arelyangalamik. Akunum arepnopura, sik Lewi yala nang arye, aning bokukapna arye, Harun birye deiamukba, dadeipdanin yangalamik nang ati arelamik. Ara, Allah el si eren aik pum pil dona deiyok nang, sik melina ati arelamik. Apil-apil nirya ara, Allah arye, “Aning ara wininamlume, aning ara kum wininamlume,” nyapdeiamuk touk winilamik.