Nehemia 11 - Eipomek

Yerusalem mutuku noutam unyak ninye ati, si sekna ap, Yehuda yala ninye si sekna ap ati, nyabuk yupu

¹ Yerusalem mutuku noutam talibuka ulamikirye, yupu talinyak nang ap, amutuku noutam unyak ninye nirya arye, ‘Dekna dopropnamap’ tenen, dolamak ning el si ara, undi donamlume. Undi donmamun bukni, aning arye akunum kintiniplyeura, tonok mapu silip tagu barye atonun, apia teleb mutuku Yerusalem binuka wekikirye unamake. Bukni, aning undi donmakibuk, atonun kum winiplirye, wibuka kum deiplye ninye ara, Yerusalem mutuku ton kum unamake. Yuk-yuk mutuku uk daunamake.

² Anoutamak kan-kan arye wipdeibikiba, talye mangkau kanye bobuka Yerusalem mutuku noutam unamak ninye nirya ati, yuk ninye arye si erenamake.

³ Tonda Israel yala ninye yuk-yuk mutuku daukirye, Lewi yala imam-imam nang, Allah el yupu aik pum tam pil don nang ap, Salomo ap ulamikce, el pil melibuka dolamik ninye nirya ara, sik mutuku koproba kibuka akunum unyake.

⁴ Ura, Yehuda yala ninye ap, Benyamin yala ninye ap, Yerusalem mutuku noutam unyak ninye sik si ara ani. Ara, Yehuda yala ninye sik amutuku nang ati, Uzia el mi Ataya, elda Zakaria birye deibuk noutam sik apu yapu ara, yata wiribukap do, ara, Amarya ap, Sefaca ap, Mahalalel ap, Peres ap, sik winibuka ulamik.

⁵ Yehuda yala ninye ara, yupa pia weik 486 ninye ara, pia mikip kanye bobuka, ilil kum ninye ulamik. Baruk el mi ara, Mahasea elce deibuknye bira Kolhoze, el li bira Hazaya el li bira Adaya, el li bira Yoyarib, el li bira Zakaria. Sik anang nirya ara, Syela birye deibukba, dadeipdanin yangalamik nang ulamik.

⁶ Peres birye deibukba, dadeipdanin balamikce, Peres yala ninye pia weik Yerusalem mutuku ulamik. Aninye yupa ara ani, 468 ninye ara, mikip weik ubuka, ilil kanye kum bolamik ninye ulamik.

⁷ Benyamin yala ninye ara ani. Mesulam el mi Salu, Mesulam el li koproba Yoed, Yoed el li koproba Pedaya, Perdaya el li koproba Kolaya, Kolaya el li koproba Maseya, Maseya el li koproba Itel, Itel el li koproba Yesaya ulamuk. Winibuka nang ulamik.

⁸ Tonda, Gabai ap, Salai ap, sik nirya ara, mining dam anyuk Salai ap, sik nirya dukdongopdanuka ulamik. Aninye sik yupa pia weik 928 ninye talibuka ulamik.

⁹ Zikria el mi Yoel bira, amutuku ninye talibuka ulamuk. Tonye bira Hasenua, el mi Yehuda ap, sik bitinye taleamdik.

^10-11 Anang winibuka taleamika noutam arye, Allah el aik noutam pil melibuka don nang imam nang ara, Yoyarib el mi Yedaya ap, Yakin ap, tonda Hilkia el mi Seraya ap, Zadok el mi Mesulam ap, Ahitub el mi Merayoy ap, sik nirya ara, weik nang ulamikce, Allah el yupu aik noutam talibuka pil dolamik.

¹² Ura, Allah yupu aik pum tam talibuka pil dolamik nang imam-imam sik yupa pia weik 822 nang ulamik. Anang sikce dadeipdanin yangalamik nang ara ani, Yeroham el mi Adaya elce deibuknye Pelaya ap, Zakaria el mi Amzi ap, Malkia el mi Pasyur ap ulamik.

¹³ Aning atonun, sik ap neika dukdongobuka ulamik nang sik yupa ara, pia weik 242 ninye ulamik. Asareel el mi Amasai, tonda Minop talak arye, deibukba dadeipdanin yangalamik nang ara, Mesilemot el mi Asai, el li Imer ap ulamik.

¹⁴ Tonda olana ap, ‘Aning nirya winipnuyabe,’ tenena ap, mandipna kanye bobuka ulamik nang ara ani, 128 ninye ulamik. Sik deiyok talibuka, ‘Wininamabe,’ nyalamuknye, el si ara Gedolim, el mi Zabdiel ulamuk.

¹⁵ Allah el yupu aik talibuka, pil dona deiyok nang Lewi yala nang ara ani. Hasub el mi Semaya. Hasab el li ara, Asrikam. Asrikam el li ara, Hasabya. Hasabya, el li ara, Buni ulamuk.

¹⁶ Tonda, Sabetai ap, Yozabad ap, sik winibuka Lewi yala nang ara, pia weik nang kibuka, Allah el si eren aik, bai tam bukni, anyaik dam talibuka, pil dona deiyok nang ulamdik.

¹⁷ Winibuka ulamikce, Mika el mi Matanya ap, Lewi yalanye ulamuk. Asaf el mi Sabdi ap, sikda Allah ati kanye debuka, mot nyana ap, Allah morona ap ati, deiyok nang kibuka ulamik. Sik anang arye, ‘Wininamabe,’ nyapne touk winilamik. Tonda aminyan wibiknye el si, Bakbukya bira, el kwit Syamua, el mi Abda ap, Yedutun birye deiamuknye Galal ap, sik uk dukdongobuka neika ulamik.

¹⁸ Sik Lewi yala nang pia teleb mutuku noutam anyuk ulamik nang yupa ara, pia weik 282 ninye ulamik.

¹⁹ Aning atonun, amutuku asik bisik bublan dam kalikne nang ara, yupa pia weik 172 nang kaliklamik. Sik kalikmik nang ara, Akub ap, Talmon ap, sik kwit capu nirya kaliklamik.

²⁰ Israel ninye yupa pia weik ulamik touk Lewi yala nang sik Imam nang babye pia weik tonun ulamika, anya arye Yehuda mutuku tam nirya ara sik mutuku koproba atonun kibuka ulamik.

²¹ Bukni, sik pil melibuka dona ati, Allah yupu aik noutam ulamik nang sik ulamikak ara Yerusalem mutuku noutam bukni, asukum mutuku el si ara Ofel mutuku nyalamikak uk, sik deiyok nang Siha ap, Gispa ap, talibuka ulamdikba, asukumuk bululbalamik.

²² Allah yupu aik pum tam talibuka pil dona ati, Lewi yala nang sik Yerusalem mutuku Allah yupu wekna arye, Allah yupu keken talak ara, mot sena ati olamak ning gitar ati, ‘Winibuka nyanamabe,’ nyan nang, sik si ara ani. Bani el mi Uzi ap, elce deibuknye bira, Hasabya. Anoutam ulamik nang sik apu yapu ara, Mika el mi Matanya bira, Asaf birye deiamuknye.

²³ Sik anang arye, talibuka dolamik pil ara, atalak-atalak nirya Allah yupu aik weknarye mot sena ati olamak ning gitar ati, kintinilina ap, tonda ninye deiyok nang, Raja biti, ‘Wininamak ning ara ani,’ nyamuk touk winilamik.

²⁴ Aning atonun, Mesesabeel el mi Petahya bira, Zerah yalanye Yehuda el mi ara, ninye deiyoknye Raja el dam melibuka ulamukce, Israel ninye Persia mutuku ninye deiyoknye bulamuk amu tam ulamik ninye nirya ati, yupu nyalamuk.

Yuk-yuk mutuku daulamik ninye ati, nyabuk yupu

²⁵ Sik yuk-yuk unamak mutuku nirya ara, wa win damuk unamake. Yata wiribuka nang do nirya, Yehuda yala nang mutuku unamak ninye ara eitam, Bersyeba mutuku ap, Dibon mutuku ap Yekabzeel mutuku ap, amutuku nirya unamake.

²⁶ Yosua ap, Maloda ap, Bet-pelet ap,

²⁷ Tonda Hazar-Sual ap, Beryeba ap, amutuku noutam arye dipdongobuka mitik mutuku nirya atia.

²⁸ Ziklak mutuku ap, Mekhona mutuku ap, amutuku noutam unyak ninye nirya atia.

²⁹ En-Rimon mutuku ap, Sora mutuku ap, Yarmut mutuku ap atia.

³⁰ Zanoa ap, Adulam ap, Aseka ap, Lakis ap, tonda Bersyeba mutuku bukni, Hinom mutuku dam danoutam nirya unyake.

³¹ Benyamin yala nang unyak mutuku noutam daunyak ninye nirya ara, yata barye nang unyak do? Amutuku noutam unyak nang ara ani. Geba ap, Mikmas ap, ulamdik. Tonda, Ai mutuku nang ap, Betel mutuku dana-dana mitik asik dobuka unyak nang nirya atia.

³² Anatot ap, Nob ap, Ananya ap,

³³ Hasor ap, Rama ap, Gitaim ap,

³⁴ Hadid ap, Zeboim ap, Nebalat ap,

³⁵ Lod ap, Ono ap, aik don nang unyak ap,

³⁶ Lewi yala nang yupa yata barye unyak do? “Yehuda tam min kum ulamik talak arye, Benyamin yala ninye unyak tam ton unamlume,” nyanamlume. Ara, Benyamin yala nang anggun ap, neika una atia.