Nehemia 10 - Eipomek

Israel ninye nirya arye, “Allah nyapdeiamsuk Mem Yupu moubuka kekebibirye, ayupu talibuka dobolbanamaba ati, nun si sekna ning deice sekuka deipnuyabe,” nyabik yupu

¹ Hakailya el mi Gubenur Nehemia, elce minopce lak kilina ati, el si sekna ning deice sekuk. Ara, meterai delilamak ning deice tanda tangan kina ati, sekuka lak kililamaka atonun, akunum winipdeibuk. Winibukura, aminyan talak el dam bulubuka yayikce, dukdongobuka sekik nang sik si ara ani.

^2-8 Zedekia ap, Seraya ap, Akasarya ap, Yeremia ap, Pasyhuri ap, Amarya ap, Malkia ap, Hatus ap, Sebanya ap, Maluk ap, Marim ap, Meremot ap, Obaya ap, Daniel ap, Gineton ap, Baruk ap, Mesulam ap, Abia ap, Miyamin ap, Maasya ap, Bilgai ap, Semaya ap, tanda tangan kina ati, sekuka lak kililamaka atonun, akunum winipdeibik. Anang nirya ara Allah el si eren aik pum tam talibuka pil dona deiyok nang imam ulamik.

⁹ Aning atonun, Allah el aik pum tam pil dona deiyok nang, sik melin nang ara, Lewi yala nang ulamik. Sik asekna ning deice sik si sekuka deibik Lewi yala nang, sik si ara ani. Ara, Hazanya el mi Yesua ap, Henadad birye deiamukba, dadeipdanin yangalamik nang arye yanuka deibiknye, Binui ap Kadmiel ap, sik si sekdeibik.

¹⁰ Tonda, aninye sik kwit capu nang koprop atonun nang, sik si ara, Sebanya ap, Hodia ap, Kelita ap, Pelaya ap, Hanan ap,

¹¹ Mikha ap, Rehob ap, Hasabya ap,

¹² Zakur ap, Serebya ap, Sebanya ap,

¹³ Hodia ap, Bani ap, tonda Beninu ap, sik aLewi yala ninye nirya arye, tanda tangan kina ati, sekuka lak kililamaka atonun, asurat deice arye akunum winipdeibik.

¹⁴ Amutuku noutam talibuka ulamikirye, ‘Yupu nyanamak’ tenen, wipdeiamik nang sik si ara ani. Ara Peros ap, Pahat-Moab ap, Elam ap, Zatu ap, Bani ap,

¹⁵ Buni ap, Asgad ap, Bebai ap,

¹⁶ Adonia ap, Bigwai ap, Adin ap,

¹⁷ Ater ap, Hizkia ap, Asur ap,

¹⁸ Hodia ap, Hasum ap, Besai ap,

¹⁹ Harif ap, Anatot ap, Nebia ap,

²⁰ Magpias ap, Mesulam ap, Hazir ap,

²¹ Mesesabeel ap, Zadok ap, Yadua ap,

²² Pelaca ap, Hanan ap, Anaya ap,

²³ Hosea ap, Hananya ap, Husub ap,

²⁴ Halohes ap, Pilha ap, Sobek ap,

²⁵ Rahum ap, Hasabna ap, Maaseya ap,

²⁶ Ahia ap, Hanan ap, Anan ap,

²⁷ Maluk ap, Harim ap, tonda Baana ap, sikce amutuku noutam talibuka ulamik. Anang nirya arye, tanda tangan kina ati, sekuka lak kililamaka atonun, asurat deice arye sik si sekuka akunum winipdeibik.

²⁸ Ura, adeiyok nang nirya arye, asurat sekne ning deice, sik si akunum sekikopura, Nehemia birye nyabuk. Sik Israel ninye nirya arye, ‘Allah el yupu uk moubuka kekebibirye, aninguk talibuka diksukum unamap’ tenen, bikilina ati, sik si nirya kum seknuyak bukni, sik deiyok kouna ati, ninye deiyoknye, na Gubenur Nehemia birye, ‘Anyalin yupu dipkoprob wininamap’ tenen, na si akunum sekmane. Aning atonun, Allah ap, ninye ap, ansinilina deiyok nang, ara Allah el si eren aik pum tam pil dona deiyok nang, sik imam nang nirya, sik si ton sekmake. Tonda, Allah el si eren aik pum pil dona deiyok nang, sik amu tam pil melibuka don nang ara, sik Lewi yala nang ton, sik si sekmake. Tonda, Israel ninye, sik deiyok nang yupa weik 44 nang, sik si sekmake. Anang-anang nirya arye, ‘Nun dipkoprob anyalin yupu winipnamnyap’ tenen, lak kilina ati, sik si sekmake. Tonda, anggun Israel ninye weik arye, Nun ni Allah arye, ‘Aning ara wininamlume, aning ara ton kum wininamlume,’ nyabuka, areyamsulum mem yupu, ‘Aninguk talibuka unamap’ tenen, winipmake. Sik dana-dana tam ulamikce, Allah ati dib kum tenelamik ninye ulamikak batakuka, yuk tam kiprobik. Ara, ‘Yuk mutuku nang arye, sik malye wininyak ning, nun ton eibibirye, amalye winin ning nun ton winibibyak’ tenen, yukak libuka biyik. Yuk mutuku ninye ap, ansinibuka kum ulamik. Winibuka ulamik nang ara, Allah el si eren aik pum tam pil dolamika deiyok nang ap, sik amu tam pil melin nang, Lewi yala nang ap, anang sik amu tam bukni, anyaik talye pil melin nang ap, Allah mot nyalamik nang ap, Allah el si eren aik bublan dam kalikin deiyok nang ap, anang-anang nirya, sik kilapu ap, sik kilmapu ap, sik sal mapu ap, kanye akunum bomik mapu nirya ara, sik bidamnye arye, ‘Anyalin yupu ara, nun yuk arye, aninguk talibuka unamap’ tenen, nyalin yupu deice arye, akunum nyanmake.

²⁹ Aninye nirya arye sik si sekik ninye ap, nyalin yupu deice arye nyapmek ninye ap, awinipmek ning deiyok ara ani. Ara, nun ni koprop Allah arye, ‘Aning ara wininamlume, aning ara kum wininamlume,’ nyabuka, el amu tam pil dolamuknye, bira ‘Nun apu koproba Musa biti arepsuk mem yupu nirya ara, moubuka talibibirye, aninguk kekebuka unamap’ tenen, sik si sekmake. Tonda nyalin yupu deice arye, “Wininamabe,” nyanmake. Tonda, sik aninye nirya arye, nyanmake. “Allah el si deice arye nyapmabe. Allah arye nyapdeiamsuk yupu kekebuka, aning dipkoprob kum winibipyopura, nun wenena ati, ‘Allah arye, kanye imun weik ning nun nong deice deipsutue,’ nyapmake. Tonda, ‘Nun yala Israel ninye deiyok nang yala-yala nirya arye, nun ni koprop Allah, el si Yahweh, nun weik deiyoknye usulula ati, Allah arye, ‘Aning ara wininamlume, aning ara kum wininamlume,’ nyapdeiamsuk yupu, el yupu uk moubuka kekebibirye, aninguk wininamabe,’ nyabuka, lak kilina ati sik si sekik touk, ‘Nun babye atonun wininamap’ tenen, sik nirya arye, ‘Winibuka unamabe,’ nyalin yupu deice arye nyapdeipmake.” Nehemia birye nyabuk.

³⁰ Atalak ara, ayupu akunum nyabukopura, abulupka wekmek ninye nirya arye, ayupu ton nyabik. Nun Israel ninye nirya arye, nun ni koproba Allah ati, ‘Wininamabe,’ nyalin yupu ton dukdongobuka nyapnuyabe. Anyalin yupu ara ani. Ara, sik yuk-yuk yala ninye nun dana-dana tam unyak nang arye, delinamak kilmapu ara, nunce nun mapu kil dolana ati, kum donamabe. Tonda, nun mapu sik kilapu ati kum donamabe. Tonda, nun kilmapu ara, sik yuk-yuk yala ninye, sik mapu kil dolana ati ara, pia kum arenamabe.

³¹ Tonda, nun dana-dana tam unyak ninye, yuk-yuk yala nang arye, nun pil kum donyap sum, Sabat sum deice ara, dekna ning, talye bona do, din ning do nirya, ‘Aning-aning deknuyap’ tenen, nun dam boyasicopura, nunce kum deknamabe. Ara, nun ni koproba Allah el si erena ati, mambul sum, Sabat sum deice arye pil kum donyaba ati, dekna ning boyasica babye, nun kum deknamabe. Aning atonun, an Allah arye, ‘Arup sum ara, na mambul sum anya arye, asum deice arye, na si erepnamnulume,’ nyapdeipsulum sum nirya ara, atonun wininamabe. Pil dona ap, dekna ap kum winipnamabe. Tonda, keting tamun nukdebuka, nakub barye keting tamun deice arye, talye wa wibuka, linamabe. Bukni, keting tamun nukuka tekbarye akunum uplyopura, tahun ketujuh (7) nirya ara, nun winiryuk wa kum wipnamabe. Tonda, nun wa tuku noutam ara, yala kum koupnamabe. Talye awamlye ninguk, talye palamle ning libuka dinamabe. Ara, mince nyapdeiamsulum touk, keting tamun tekbarye deice arye, nun tuku ap, wa ap nirya ara, dikdik sena atonun kipnamla atia. Tonda, yuk nang arye, nun uang yo bok do, yata ning do, tia ati dopropsik ning ara, tekbarye keting tamun deice arye, ‘Aning dauplye. Nun ning, tia ati dopromsulum ning nirya ara, tuba tamubuka arena kume,’ nyapnamabe.

³² Tonda, an Allah arye nyamsulum touk, kekebuka wininamabe. Ara keting tamun, keting tamun nirya ara, nun dekna deiyok ning, el si ara perak, tonok ning bokuka, seper tiga bokuka, arenamabe. Ara winipmanto 4 gram kintinip deibibirye, Allah el si eren aik lipsisikildeilina ati, Yerusalem dolinamabe.

³³ Auang yo bok bulupmakce, adeice arye yuk wininamak ning ara ani. Ara, arup ning atonun, ance, ‘Wininamlulume,’ nyamsulum touk, pil dona kumce, nun Sabat sum deice nirya ara roti din ning 12 kibuka dabuka, an mambul si eren aik pum tam bukni, yolana deice delilbanamabe. Aning atonun, ance, ‘Atalak ara, aning arenamnulume,’ nyamsulum touk, roti deiyok ning, el si gandum do, yuk yala ning do, arepnamkiyabe. Tonda, nun malye winina ati, talye mangkau asa arye oplopsutum bukni, nun punun ning ati, ‘Kam ning obuka uku dapmunce, arenamnulume,’ nyamsulum touk, tuba wininamabe. Tonda, Sabat sum deice arekinyap ning ap, tonda wala tikin talak weik kwalina yubuka anti arekinyap ning ap, tonda ance, ‘Asum-asum nirya weik kwalina yunamlume,’ nyapdeiamsulum ning ap, tonda pia teleb ning, anti teleb ning arekinyap ning ap, tonda nun malye winin ning kum danalina ati, arekinyap ning ap, pia kum bataknamabe. Ance, ‘Aning-aning nirya winibuka arenamnulume,’ nyamsulum touk arepnamkiyabe. Aning nirya ara, ance nunti, ‘Sik aninye ara, wenebuka kum opnamne,’ tenepsuluma ati, nun punun ning ati arekinyap ning kanye deibuka dololyame. Ati, na ni an si eren aik pil aning-aning nirya dolamice ning ara, kum bataknamabe. Tuba pil dona uk unamabe.

³⁴ Tonda nun ni koprop Allah, an si eren aik pum tam pil dona deiyok nang ap, nun pil melin nang, sik Lewi yala nang ap, tonda, nun Israel ninye nirya ap ara, nun nirya arye lak kilin ning akunum winipmabe. Ara, ‘Yata yala nang arye, Allah el aik damuk u sekenamakak delina ati, yo webuka boyanganmak do? Tonda dan talak arye, yuk yala nang arye boyanganmak do?’ tenen, lak kilin ning akunum wipdeibupu. Akunum winibupu anya arye, wini talak nun kele. ‘Ayala nang ara, aketing tamun noutam, ton sum wala ara, asum deice arye, Allah el aik damuk u sekenamakak ati, yo toubuka boyanganamake. Tonda yuk talak ara, yuk yala nang aryuk, yo toubuka boyanganamake,’ utenena ati akunum kel bikupe. Winibuka boyacopura, Allah arye nyalamukba, Musa birye Mem Yupu buku noutam sekeipsuk touk, Allah el si Yahweh, el si eren aik dam bukni, kam ning obikirye, keil yangabuka delilamakak, aning deice uku seknamakak ara, ayala-ayala nang yuk-yuk arye, yo boyanamake.

³⁵ Tonda, aketing tamun aketing tamun nirya ara, nun wa koulamap ning ap, nun ning duk moulamle li talak ara, min yuma ning ara, libukabibirye, anti arelyanganamkiyabe. Ara, nun ni Allah an si Yahweh, an si eren aik dam, nun winiryuk ning nirya ara libuka boyanamabe. Apil babye kum bataknamabe. Dona uk wininamabe.

³⁶ Tonda, Allah ance nyalamlumba, Musa birye sekeiamsuk touk, nun min yuma ning aning-aning nirya, an si eren aik dam boyanganamabe. Ara, nun min yuma mapu ap, nun sapi basam min yuma delinamak ning ap, nun domba do, kambing do, min yuma delinamak mi, aning nirya ara, an aik dam boyanamabe. Ara, an si eren aik pum tam pil dona deiyok nang, sik dam boyabirye, anang pil dolamice talak, sik dam deipnamabe.

³⁷ Aninguk kum bukni, an aik pum tam pil dona deiyok nang, sik dam boyabirye anang ati arenamap ning arebibiba, doprobikirye, an aik pum tam mambul ning dokola delilamakak ton, delinamake. Aning ara, ani. Ara, nun roti dana deiyok ning gandum do, yuk yala ning do, teikikiba atue atonun uplye ning ap, tonda teikina kum ning ap, yo duk moulamle duk aning-aning nirya ap, anggur duk purubikiba, winiryuk mek ap, tonda, zaitun yo duk teikikiba, minyak zaitun balamle ning ap ara, kwebuka boyanamabe. Aninguk kum bukni, an aik pil dona ati melina deiyok nang, sik Lewi yala nang arena ati, nun wa wibuka koulamap ning ayala-yala nirya, boyanganamabe. Tonda, wa win dam arye libibirye, aning nirya, noutam bokuka yuk-yuk tagu barye deibibirye, tonok ning, seper sepuluh (10%) nyalamak ning, doprobibyopura, sik Lewi yala nang, sik melina ati arenamabe. Ara, urdem ati kume, deiyok ara sik Lewi yala nang arye, nun binuka pil donyap mutuku noutam nirya ara, nun bokuka arenyab ning, seper sepuluh (10%) ning bulubuka delilamaka ati, anang dam aning arenamabe.

³⁸ Nun kele, nun apu koprop Harun birye deibukba, dadeipdanin balamika ani, deibik yala nang nirya, deipkirikdop nang arye, sik Lewi yala nang ap, arup nyanmap pil donamak talak ara, anang melibuka donamake. Ara, sik Lewi yala nang arye nun arenamap ning, arelyangalamap talak nirya ara, Harun el yala nang arye delilamik nang, Lewi yala nang ap melibuka, apil donamake. Nun arenamap ning, sik Lewi yala nang arye doprobikcopura, aning nirya bulubuka deibikirye, noutam bokuka, tagu barye ton deibicopura, tonok ning ara seper sepuluh (10%) dobuka, Allah an si eren aik boyanamake. Ara, an si eren aik pum tam, mambul ning dokola deilin aik dongobuka deipnamaka atia.

³⁹ Ati, nun Israel ninye nirya ap, tonda sik Lewi yala nang babye, nun ni koprop Allah arena ati, aning ayala-yala nirya boyanganamabe. Ara nun roti dana deiyok ning gandum ap, anggur mek winiryuk ning ap, minyak zaitun winiryuk ning ap, libibirye, Allah an si eren aik dam deibipyopura, anyaik pum tam mambul ning ati, dokola deilin aik deipnamake. Mambul ning delilamak aik pum tam ara, Allah el si eren aik pum tam pil dona ati, weik mambul ning ton, imam nang talinyak ning dokola deilinamak. Tonda anyaik dam ara, sik bublan dam kalikin nang ap, sik mot sen nang ap, anyaik pum tam pil dona deiyok nang, sik imam-iman nang ap, anyaik pum tam ton unyake. Ati, nun ni Allah, an si eren aik ara, kum bataknamabe. Ance, ‘Wininamlulume,’ nyamsulum touk, aning-aning nirya anyaik dam boyangana uk unamabe. Ati, ayupu nirya ara, nyalin yupu deice arye, nyapdeipmabe. Ara an ap, nun ap, neika teleb una ati nyalin yupu asukum deibabe. Sik Israel nang ap, sik deiyok nang ap, nirya arye, Allah ati ayupu nyapdeibik.