Nahum 3 - Eipomek

Allah arye, sik Niniwe mutuku nang ati, ‘Wenepnamsine,’ nyapdeibuk yupu

¹ Se, sik Niniwe mutuku noutam unyak nang nirya arye, talye minin yupu nyana ap, ninye weik tonun ona ap, yuk mutuku nang ning ubula alubuka dopromlumce, bona yuk-yuk ning nirya delilulum nang ara, na Allah Yahweh arye opnamsine. Anggunce, bona pia weik alubuka dopromlumce, delilamlum ning yala nirya ara, nukmanto kum ulule.

² Anggun mutuku noutam ara, anggun mal olan nang arye, kuda basam ona ati, koulamak tapu bobikirye bakiba, sik kuda basam yan lelim nyabikiba, sik ninye ona ati, tuku deice balamle ning, el si kereta perang lelim babye, weik tonun kekelamlume. Minop talak ara, anggun mutuku noutam ara, alelim weik tonun kekelamlume.

³ Tonda, aning atonun ton, Niniwe mutuku yin talin nang arye, kuda basam deice bukuka olbalamik talak ara, sik yin talin nang nirya ara, pia kanye deibikce, mal olanak binamik. Winibuka binamik talak ara, sik yu parang ya talipmek ning ara, dirina pia upmok touk, sikce bopmek ninye ona ati, cang yo, el si tombak bopmek ning babye, bebeya laklamle atonun ubuk. Anggunce, yuk mutuku nang ati, mal olan talak noutam arye, akunum oplum nang nirya ara, kum nukmanto ulamuk. Anggunce oplumba, akunum diamik nang, sik nong nirya ara, tuku lukna kumce, tuku deiceuk ulamukba, aning ara, nukmanto kum ulamuk. Akunum diamik nang, sik nong ara, pia weik ati, anggun mutuku noutam balamik nang ara, akunum oplumba diamik nang, sik nong kum elilmikba, bisik ban talak ara, yan dum duknaba saklamik.

Allah arye, sik Niniwe mutuku nang ati, ‘Anggunda, ninye arye talye yolamak kilapu atonun ululume,’ nyabuk yupu

⁴ Se, anggun Niniwe mutuku ninye, anggunda ninye arye, talye yolamak kilapu atonun ululuma ati, narye wenen ning arepnamsine. Anggunce malye-malye winilulum ning ara, ani. Ara, talye yolamak kilapu nirya arye, sik urasin pia teleb kipdakirye, yuk ninye ati, kanye delin yupu ap, una ap, winilamaka atonun, anggunce yuk-yuk mutuku nang ati, ‘Nun tam kipdopnamlume,’ nyabuka, kanye delin yupu nyalamlume. Tonda, yuk mutuku ning nirya, ‘Nun tam yatingba, optepyeʼ tenen, teleb yupu nyabuka, sik lilolamlumba, yuk-yuk mutuku nang, anggun tam kepropbikba, olamrume. Akanye delin yupu ap, ninye ona ap, winilamluma deice arye, yuk-yuk mutuku nang, weik malye kilamlumce, Israel mutuku nang babye dobuka, anggun mutuku bobinamlume.

⁵ Allah Yahweh aning-aning nirya talibuka, deice tam mikip weik ununye birye nyapsine. “Se anggun Niniwe mutuku nango, narye anggun pia malye weik ulamlum ning wenena ati, kanye imun weik ning deipnamsine! Winipmanto ara, ninye arye malye un kilapu, ‘Alye weik daknamakʼ tenen, sik malye-malye wininyak talak ara, tomobikirye, sik akilapu ongolamik baju, el si kain sarung, tonda rok ara, yuk nang mutuku nirya, din sukum arye kwiribuka erepdipnirye, sik orok ara dangabuka, akilapu sik kisok deice koupdongobikiba, yuk nang nirya arye, sik nong bananguk elilamak touk, narye anggunti, alye weik dakan ning arepnamsine. Sik kanye imun ning akunum arepnyopura, sik yuk-yuk mutuku deiyok nang babye disikiba, anggun alye weik dakalanamlume.

⁶ Aning winipnamne talak ara, malye ning ap, bama donoklamakak, palilamle ning ap, nirya ara, dobuka anggun nong deice donoknamsine. Winipsinirye, narye anggunti, ‘Pia lik,’ tenenamsine. Tonda, anggunti ara, ninye arye kum winilamak ning atonun, kipdeipsiniba, alye weik dakdanamlume. Winipnamsin talak ara, yuk-yuk mutuku nang arye eipsikcopura, akutunamsiake.

⁷ Pia amu tamuk deipsinyopura, anggun elinamsiak ning ara, anggun dam arye, batakuka balonamake. Winipsikirye nyanamake, “Se, sik Niniwe mutuku nang akunum malye upmaka ati, kanye imun weik ning, akunum dopropmake! Ati, sik dam pia kum binamabe!” nyanamake. Ati, yata nang arye, sik Niniwe mutuku nang ati, “Se, sikda bicoe,” nyabuka engenamsiak do? Kume, kum winipnamake. Ninye tonoknye babye, bico kum tenenamsiake. Tonda, ninye yuk nang arye ton, ‘Pia telebe’ tenen ning ton, yanuka kum nyanamsiake. Lubakinauk unamsiake.

⁸ Se, anggun Niniwe mutuku nango, anggun tenipdelulume! Anggunda, yatato teneplum do? Anggunce, ‘Kume, Mesir mutuku noutam bukni, weik asik, el si Tebe mutuku ara, mitik teleb uamuk bukni, nunda pia teleb mutuku noutamuk unyabe,’ tenelamlum do? Kume, Tebe mutuku ara, weik balamle mek, Nil mek dam domikba, daulamuk. Sik anang ara, pia namin asa arye ulamik touk, anggun Niniwe mutuku nang ara, atonun ululum do? Tebe mutuku ara, Nil mek biyuka, lilun uamuk ati, amek ara, cang weik keil poka baribuka, mikip arye tiklamle touk, ulamuk. Sik mal olan nang ara, talye lukparabuka, akota dam kum yanmanto ulamik.

⁹ Atalak ara, sik Sudan mutuku yin talin nang ap, Mesir mutuku yin talin nang ap, sik nirya ara, ‘Tebe mutuku mal olan nang arye, yanuka opsicakʼ tenen, mikip weik tonun melilamik. Aning atonun, Libia mutuku ap, Put mutuku ap ara, Tebe sik kayapu nang mutuku ati, sikce ton, Tebe mutuku melilamik. Atalak ara, Tebe mutuku melilamik mutuku nang ara, sik mikip weik ara, sukmanto kum ulamuk.

¹⁰ Bukni, sik Tebe mutuku noutam ulamik nang nirya ara, sik mal olan nang arye, obuka sirya dakikce, anang dobuka, tapu koupdongobikce, sik pera mutuku noutam bobinuka, wenen aik dongamikce, ikin pil aruklamik. Dabinuka bobinuka deiamikba, ikin arye daulamik buk, sik mapu nirya babye, dobuka tuku deice pouklobikba, kalibuka mitik-mitik kibukce, nirya diamike. Tonda, sik mal olan nang arye, ‘Yatanye ton dopropniba, na talye pil melinanye unamle do?’ tenen, mitik keil deice, ninye si sekikce, tukwak dopkwetebikba, tukwak poubukopura, Tebe mutuku weik deiyok-deiyok nang nirya ara, doprobikce, kat tapu el si ara, rantai arye tapu koulamik. Tonda koupnopura, yuk nang dam bokukapnarye, dopdeipniba, yuk nang sik talye pil don nang ulamik.

¹¹ Se, anggun Niniwe nango, Tebe mutuku nang ikin weik ning dopropmik touk, anggun babye, kanye imun weik ning dopropnamlume. Winipsilyopura, anggun nirya ara, anggun kisok yung bindopnamsile. Kanye wangalamak mek dilamak nang, sik kanye pia walwalamak touk, unamlume. Ati ara, anggunce, ‘Se, adiparyuk opsicakʼ tenen, duknulbinamlume. Tonda, anggun nirya arye, ‘Nun mal olan nang dam arye, kisidakuka yukak binamapʼ tenen, piripdenamlume.

¹² Anggun Niniwe mutuku noutam ara, weik asik doplumce, ‘Nun mal olan nang yanuka opsicakʼ tenen, weik cang keil poka dolamlume. Winibuka doplum bukni, anggun mal olan nang yakirye, opnamsiak talak ara, anggun cang keil poka doplum ning, ulublopnamamake. Winipmanto ara, arah yo duk moubuka eklirye, minop sakliba ninye arye, ‘Aning dipnamapʼ tenen nang arye, arah yo lontokikiba, ayo duk sakliba dilamak touk, anggun mal olan nang arye yanuka, anggun cang keil poka babye, adiparyuk kanam arye, ulubuka bataknamake.

¹³ Tonda, anggun eipnamlume. Anggun yin talin nang, anggun mikip nirya ara, kum danmasila ati, anggunda kilapu arye, nong mitang ulamle touk unyake. Tonda, anggunce taliplum mutuku, weik asik dana-dana tam, antanap dongobuka domlum poka noutam ara, botopdeiamik bisik bublan nirya, talye uluplopnamake. Ati ara, sik yuk mutuku mal olan nang yakirye, adiparyuk talye lukparabuka, anggun asik noutam wekuka opnamsiake. Winipsicopura, anggunce, ‘Nun bisik bublan kum kukuka weksiktingʼ tenen, abublan deice, cang yo deiamlum ning ara, anggun mal olan nang arye, ayo nirya dobuka, weik uku dongobikiba, uku buk arye dipliba, aning nirya kum danamle.

¹⁴ Ati ara, anggun mal olan nang arye, minop yakirye, anggun asik nirya warekuka, antanap dongopnamaka ati, anggunda bai tam kum binmanto unamlume. Ati, anggun Niniwe mutuku nang arye, kintinip deipnamlume. Ara, anggun mek dina ati, mek weik tonun kwebuka, telebak dikdongobuka, kintinipnamlume. Tonda, anggunce, ‘Nun mal olan nang arye, kum wekuka opsitingeʼ tenen, anggun dam doplum mikip asik, aubuk benteng-benteng nirya ara, mikip tonap tabakuka, kintinip dopnamlume! Winimunce, anggun poka ulubuka bataknamak ning, tuba tamubuka lipsisikuka dopnamluma ati, mek bental noutam yanibukapmunce, kat keil, el si ara batu tehel, weik tonun tonap, memebuka kintinipnamlume. Tonda akeil, batu tehel yangap deipnamluma ati, aning deice taplakuka, mikip kilin ning, el si semen ton, kintinipnamlume. Tonda, akeil batu tehel memen yo babye kintinip deimunce, kintinibuka delinamlume!

¹⁵ Yata ning do nirya, anggunce wininamlum ning nirya ara, talye-talye ninguk wininamlume. Deiyok ara, aning nirya winipnamaluma babye, anggun mal olan nang arye, yanuka opnamsiak talak ara, dipkoprob uku arye dibuka, sirya daklamle touk, upnamsiake. Tonda, aning kumopura, anggun mal olanamlum talak arye, anggun mal olan nang arye, anggun ninye ona ati, yu parang ya arye, opsikirye, sirya dakanamsiake. Anggun tam nang ara, weik tonun dipnamlume. Winipmanto ara, kwising arye, ninye wa wibuka kouamikce ning dilamlirye, sirya daklamle touk, anggun mal olan nang arye, anggun tam nang obuka, sirya dakanamsiake. Wini talak ara, anggun Niniwe mutuku nang ara, minop arye kwising nebuka weik ulamikiba, nukman kumto ulamak touk, unamlum bukni, aminyan talak ara, anggun mal olan nang arye, weik tonun obuka, sirya dakanamsiake.

¹⁶ Tonda, anggun kayapu nang arye, bona deibuka deken pil talibuka, unyaka deiyok nang ara, im deice tikilul kurya ara, weik upliba, nukmanto kum ulamak touk, pia weik tonun, anggun mutuku noutam bulubuka wekamikce, daunyake. Bukni, aminyan talak, sik nirya babye, kum danamake. Winipmanto ara, kwising el pol weik uplirye, lakuka duknulbalamle touk, upnamake. Ikin ning, sik dam yalyopura, sik dekna deiyok nang nirya, bindobikcopura, kum upnamake.

¹⁷ Anggun mutuku deiyok-deiyok nang ap, anggun mutuku ilil ning sekenyak nang ap ara, pia weik tonun unyake. Wini talak ara, anggunda kwising yupa tonok kibikirye, arukna li talak, ‘Bupu kipsutuʼ tenen, keil poka deice bulubuka bulamak touk unyake. Wininyak bukni, kwising ulamle touk, keting panalyalye talak ara, buppu akunum kiplyopura, sik minop adiparyuk lakuka banyake. Aning atonun, anggun mutuku deiyok-deiyok nang ap, ilil ning sekna deiyok nang ap ara, ikin ning, sik dam yalyopura, anang nirya bindobikcopura, kum danamake. Winipnamak talak ara, ninye tonoknye babye ton, ‘Sik amutuku binmakʼ tenen, pia kum biknamake.

¹⁸ Se, anda Asyur mutuku nirya ap, yuk-yuk mutuku ap talibuka, ninye deiyoknye ulyam bukni, anda bicoe! An amu tam mambul pil talibuka unyak deiyok-deiyok nang nirya ara, akunum dipnamake! Amutuku noutam, sik ninye deiyoknye Gubenur babye, akunum dibuke. Tonda, sik yupu bokolina deiyok nang babye, pia ati manauk upnamake. Sik akunum dipnamaka ati nyapne. Ance taliminye mutuku nirya, sik deiyok-deiyok nang nirya ara, akunum dipnamaka ati, sikce talinyak mutuku nang nirya babye, ‘Se, yata wiriptibye do?’ tenen, wal-waluk ukirye, talye banauk wininyake. Winipmanto ara, domba basam weina deiyok nang nirya obikirye, sirya dakikcopura, sik weilamik domba basam ara, kanye walwal upliba, talye banauk, wininyake. Aning atonun, ance taliminye mutuku noutam nirya unyak nang ara, yuk-yuk mutuku iknapye dam tam, mutuku kon deice akunum bindobikce, talye banauk wininyaka ati, yatanye birye ton, anang dobuka, tamubuka, sik mutuku boyatu do? Kume, aning kum winiptue. Anang tamubuka, kum bobuka yatue.

¹⁹ Aning nirya ara, anda Asyur mutuku nirya talibuka, ninye deiyok kibuka taliminye bira, anti opnamkiak ning ara, yatato ning deice arye, kwetebuka teleb kipdeipnamting do? Kume, aning ara, kum winipmanto. Tonda, an suse dilamkiliba, dila sakanamkil ning babye, pia kum kweteipnamkitinge. Dipkoprop dipnamlama atia. Aminyan talak ninye arye, ‘Kume, sik Asyur mutuku nang ara, sik mal olan nang arye, akunum obuka sirya dakmake,’ nyabuka, laka nyabikiba, yuk-yuk mutuku nang nirya arye, ayupu kekebikcopura, adiparyuk kanye deibuka, sik taruk tatang obuka, pin-pin kanye pia deipnamake. Deiyok ara, sik yuk-yuk mutuku nang nirya ara, sik Asyur mutuku nang arye, malye winilamluma ara, batakna kum deice arye, sik kanye imun weik, kanye bobuka ulamika ati, anggun mal olan nang arye, anggun Asyur nang opsikirye, sice buklopsikcopura, sik yuk-yuk mutuku nang nirya arye, ‘E, merekuka obuka sirya dakmakeʼ tenen, kanye pia deibikcak arye, sik taruk tatang boknamake.