Nahum 2 - Eipomek

Israel nang nirya arye, Niniwe mutuku nang nirya, obuka sirya daknamik ning ati, nyabuk yupu

¹ Allah arye nyabukura, nabi Nahum birye, sik Niniwe mutuku nang ati, laka nyabuk. Se, anggun Niniwe mutuku noutam ululum nang niryao! Anggunda, moubuka kekeplulume! Anggunti, obuka kum kipdeipnamsilnye bira, akunum anggun dam yanamle! Ati, anggun mutuku noutam, weik asik antanap dongobuka doplum keil poka, el si tembok, adopluma deice tam welepmunce, anggun mutuku kalikin nang ton, wipdeipmunba, aning deice kalikinamake! Winibikirye, ‘Nun mal olan nang arye, dan bisik arye yanganamak do?’ tenen, anggun mutuku yangan bisik nirya moubuka dinamake! Winibikcopura, anggun amutuku ululum nang nirya ara, adiparyuk kintinibuka, kalikilanamlume. Anggun babye, mikip weik tonun, kipdeipdanamlume!

² Aning ara, talye ati kum nyapsine. Deiyok ara, ani. Allah Yahweh arye, sik Israel tam unyak nang nirya ap, Yehuda tam unyak nang nirya ati, teleb kipdeiplirye, tuba tonap mingne kipdeipnamle. Winiplyopura, yuk nang nirya arye sikti, ‘Se, mince sikda, pia teleb ulamik touk, wini talak babye teleb unyake,’ tenebuka, nyanamake. Dipkoprop, min talak ara, sik mal olan nang arye, obuka pia malye weik kipdeiamik bukni, wini talak ara, Allah arye sik mince tamubuka teleb ulamik touk, teleb kipdeipliba, telebuk unamake. Ara, sik mal olan nang arye, min kum bobinamik talak, urasin teleb ap, mikip weik ap ulamik touk, tuba tonap teleb unamake.

³ Wini talak ara, anggun Niniwe mutuku noutam ululum nang, anggun ninye olyanganamsiak nang ara, ninye olban talak ongobuka bana ati, tonda, ‘Mal opsicakʼ tenen, kalikna ati talinyak ning, el si ara perisai, bi ning aupmale. Tonda, sik ayin talin nang baju ara, bi ninguk ulule. Tonda, sik mal olan nang bukuka ban ning, el si kereta-kereta perang ara, banmanba, uku buk dilamle touk unmale. Aning atonun, sik kuda basam yan nirya babye, mal olbinamak talak ati, kintininmakce, ‘Adibaryuk bikbik abuka bitibyeʼ tenen, sik yan bibikuka tikikirye, sirim talilule.

⁴ Sik Niniwe mutuku mal olalbana ati, kereta-kereta perang nirya ara, pia batakna kumce, tuba bikbik abuka, libanuk unamake. Mal olalbana ati, kintinip deiamikak ara, sik anang nirya arye, sik bisik noutam ara, obinapna, ayanapna dobolanauk unamake. Wininamak ning ara, uku upmakiba, uku buk dilamle touk, unmakirye mikip arye banamakak ara, bebeya laklamle touk unamake.

⁵ Sik ayin talina deiyoknye birye, el amu tam yin talin nang ati, ‘Amutuku, olbinamlume,” nyapliba, ‘Menekuka olbinuyapʼ tenen, sik ayin talin nang, sik yan arye, yuk nang yan opdanin banamake. Ayin talin nang nirya arye, Niniwe mutuku dana-dana tam, antanap dongobuka domik kat keil poka noutam arye, botcamik bisik bublan, ‘Uluplobuka, anyasik wekikcakʼ tenen, keil tembok domika dam, delilbiyik. Delilbiyikopura, atembok bisik bublan ulubuka dolkwetena ati, aning deice tam dopnamak asik atonun bukni, kat kaluna atonun ning ton, minop kintinibuka dopnamake.

⁶ Sik mal olan nang nirya arye, binuka dobikopura, Niniwe mutuku dam, mek balamuk bisik noutam nirya ara, bisik bublan tirikamik ning kukdeipnamake. Winibikiba, Niniwe mutuku noutam ara, amek weik tonun obuka balamlirye, ninye deiyoknye ulamlye aik, el si istana dam binuka opliba, tokna doplirye banamle. Winiplyopura, aweik istana aik ara, luluklirye, lokuka poulbinmanto upnamle.

⁷ Winibikcopura, Niniwe mutuku noutam talibuka ulamuk ninye deiyok kil, sik mal olan yin nang arye talibikirye, el ongolamuk baju nirya kwiribuka deibikceura, Adeiyok kil, el pil melilamik kilapu nirya eibikirye, bico upliba, yalma maka engelamle touk, engebikirye, sik taram deice olanauk ubikirye, banamake.

⁸ Se, sik amutuku nang winilanamak talak ara, winipmanto ara, mekwen deiamlyak arye langdipsaklirye, mikip aryuk talye mutuku nirya balamle touk, sik Niniwe mutuku noutam ulamik nang nirya ara, amutuku noutam nirya dalapnamake. Atalak ara, ton nang ara, “Kume, anggunda tamubuka yalulume. Tamubuka yalulume,” nyabuka, yupu weik tonun, ngaluka nyanamak bukni, sik nirya ara, tamubuka yangana kumce, Niniwe mutuku batakuka, bai sakuka bindopnamake. Tonoknye babye, tamubuka kum yanmanto, upnamake.

⁹ Sik amutuku nang, akunum bikbik abuka bindobikcopura, sik mal olan nang arye, nyanamake. “Ura, amutuku nang arye, ‘Dokolanunaʼ tenen, dekna weik ning perak ap, emas ap ara, yanuka alubuka doproplulume! Atalak ara, anggun mal olan nang arye, “Kume, amutuku noutam talibuka ulamik bona yala-yala nirya ara, pia weik arye, nukmanto kum ulule. Dipkoprop adekna weik ning, dokola deililamik ning nirya ara, min kum kum danamle! Aning yala-yala nirya ara, nukmanto kum upmala atia!” nyanamake.

¹⁰ Niniwe mutuku noutam nirya ara, sice bukuka bataknamake. Winibikirye, amutuku noutam uamuk ning nirya ara, pia kum kipdeibikiba, asik oldemuk upnamlarya! Amutuku nang domik ning nirya babye, pia sice buklobikirye, amutuku noutam nirya ara, malye kipdeipnamake. Winipnamak talak ara, sik amutuku unyak nang nirya, sik talima noutam arye asilana ap, teniltona ap, kanye talima dakalsakna ap, upnamake. Winipnamaka deiyok ara, sik ilil weik atia. Tonda, sik kutam nirya, mitang uplirye, yok sirim birbir apnamle. Sik amutuku nang nirya, sik urasin ara, uk weik dilamle nang, sik urasin malye delilamle touk, ubuka malye kanye bobikirye, unamake.

¹¹ Atalak ara, yuk-yuk mutuku unyak nang nirya ara, nyanamake. “Se, minop talak ara, Niniwe mutuku noutam ulamik nang ara, mandipna weik ulamik. Sikda, bai tam talye kam ulamle ning, yu weik pus, el si Singa pus, keil deiya pum tam ulamle atonun, sik amutuku noutam ulamik nang babye, atonun ulamik. Bukni, atalak ara, ilil weik unyak ati, minop talak mandipna kanye bobuka, ninye yupu kekelamik do? Kum do? Tonda, winipmanto ara, yu weik singa kus, el mapu ati, din arebikirye, sik unyakak, keil deiya pum tam binuka, talye tunim abuka uceura, yuk kam ulamle ning ara, asukum pia kum yanganyake. Ilil ati, ninye babye, akeil deiya dam kum yanganyake. Aning atonun, minop talak ara, ninye yuk mutuku nirya ara, Niniwe mutuku nang ati, ilil weik ulamikba, amutuku dam kum yangalamik bukni, wini talak ara, Niniwe mutuku nang, pia lamabuka unmaka do?

¹² Bukni wini talak ara, Allah arye utenelule. ‘Kume, winipmanto ara, minop talak ara, amutuku noutam ulamuk yu singa kus, yim arye, el din ati, yuk kam ulamuk ning obuka dilamukce, el mapu ati, weik tonun ton arelamuk. Tonda, ayim singa kus arye, el kil singa kus ati, sik din ati, kam ning ton obuka arelamuk. El winipnopura, el malamuk aik pum tam, akam ning nirya ati, pia weik tonun obuka boyanopura, seknarye kalibuka delilamukba, kanye deibuka, neika dilamik. Aning atonun, anggun Niniwe mutuku ululum nang babye, yuk mutuku nang, weik tonun olamlume.

¹³ Aning nirya ara, anggun moubuka kekeplulume! Ati, nara anggun mal olananye atonun unune. Nara, Allah Yahweh, aning-aning nirya, deice tam talibuka, Pia Mikip Weik Deiyoknye unune. Im deice yin talin malaikat nirya ara, sik weik deiyoknye unune. Naryuk, anggun Niniwe mutuku nang ati, nyapsine. Anggun ninye olbana ati, tuku deice menekuka balamle ning, el si kereta-kereta perang nirya ara, uku dongobukapnirye, kum kipdeipnamne. Winipnamne touk, anggun yin talin nang ara, mal olanak arye, yu parang ya arye, obuka sirya daknamsine. Anggun nirya ara, narye kum kipdeipnamne. Winipnyopura, anggunce minop talak, yuk mutuku nang ning yala-yala nirya, dopromlum ning nirya ara, narye tuba tamubuka, alubuka dopropnamne. Tonda, anggun Asyur mutuku nang arye wipdeiplum nang ati, “Otam mutuku unyak nang ati, ‘Nunce olyanamsiabe,’ nyapdeiplumba, ninye yupu nyalban nang nirya ara, pia kum kipdeipnyopura, sik yupu ton ninye nirya arye, tonap pia kum kekenamake.” Allah arye, sik Niniwe mutuku nang ati nyabukba, nabi Nahum birye, lak nyalbiyuk.