Nahum 1 - Eipomek

Allah arye, Asyur mutuku noutam bukni, sik Niniwe mutuku nang ati, yu ubuka ati, nyabuk yupu

¹ Allah arye, sik Asysur mutuku noutam bukni, Niniwe mutuku nang nirya ati, yu ubukba, yupu nyapdeibuk ning ara, ani. Ayupu nyapdeibuk ning ara, lengdar mana atonun deice arye, ninye si Nahum, nabi ulamuknye dam, yanuka nyabukba, nabi Nahum kekebuk. Nahum bira, Elkos mutuku noutam arye deiamiknye ulamuk. Ara, nabi Nahum bitia.

Allah Yahweh, el winilul ning ati, nyabuk yupu

² Allah Yahweh arye, tenelamuk ning ara, ani. Ara, ‘Tukwak mutuku unyak nang ara, yuk talye ning do, isa si do nirya ara, sikce atalye ning, pia si kum erenamake,’ tenelule. Ati ara, yata nang do nirya elti, ‘Nun likʼ tenen, talye ning si erenyak nang ati, wenelule. Tonda, yupu deice bisinyak nang ati ara, wenebuka ikin ning deipnamle. Ara, elti, malye kanye bobuka, ulamikce nang nirya ara, yu weik arye, pia weik tonun wenepnamle. Sik malye unyak ning ati, ‘Daupmalyeʼ tenen, kum namin kipnamle bukni, elti, yaninyak nang ara, kanye imun ning areplirye, yu weik arye wenepnamle!

³ Dipkoprop Allah Yahweh ara, minopce yu upliba, adiparyuk kum wenesulule. Bico tenepsilirye, namin asa aryuk melisulule. Bukni, el babye, mikip weiknye ulule. Ati ara, yata nang do nirya elti, ‘Nun likʼ tenebikirye, pia malye winibikcopura, sik wenenak arye batakliba, talye kum wininamake. Allah arye, sik malye uning ati, ‘Daupmalyeʼ tenen, talye namin kum kilule. Aning kum bukni, yu weik upliba, mikip arye anang ati wenepnamlarya. Dan mutuku do nirya, Allah Yahweh banamle mutuku noutam, el pil doplyopura, amutuku noutam ara, mikip weik kumanya dolamle. Tonda weik mok ap, kum ap, bebeya laklamle ning ap, ulule. Winipmanto ara, Allah Yahweh, el yan yanibuka, banamla sukum arye, atu sung-sunga ara, dua bum atonun unamle.

⁴ Allah ara, pia mikip weik ulula ati, el teneplye talak ara, Allah Yahweh arye, weik laut mekwen kama arye opliba, cepdopnamle. Atonun, weik tonun balamle mek nirya babye, kum kililule. Tonda, Karmel mutuku kon ap, Basan mutuku noutam teleb palul mutmuta ara, kum kipdeipliba, kolulule. Aning atonun, ‘Winipnamne,’ teneplye talak ara, Libanon mutuku noutam tiklamle teleb bunga keit, yuk-yuk nirya ara, tumakdopnamle.

⁵ Allah Yahweh, mutuku kon dam yalyopura, mutuku kon lulukdanamle. Tonda, el dam yalyopura, mutuku kon nirya ara, mek atonun upliba, tokna doplirye binamle. Allah Yahweh yangalyopura, mutuku nirya lokukaplirye, lulukdanamle. Winipnamle talak ara, mutuku sirya, im sirya nirya ap, amutuku sirya, im sirya nirya unyak nang nirya ara, ilil upliba, yok sirim talipdanamake.

⁶ Allah Yahweh el yu tenepnamle talak ara, yata nang nirya, ilil kumce, el dam yanuka tikting do? Kume, el yu upliba, kanye imun weik wenen ning, uku weik tonun dinmaliba, keil lyeiplirye butuklamle touk ubuka, atu buklopnamle. Winiplye talak ara, yata nang ton, el yu upnamle talak, el dam yanuka tikting do? Kume, ara kum winipmanto. El yu weik uplyopura, kat weik keil babye, el dam arye, atu butbuta atonun kipdeipnamle.

⁷ Bukni, Allah Yahweh elda pia teleb ulule. Winilirye, elda elti, diba tenenyak nang nirya ati, kanye imun upsilye talak ara, elce pia melisulule. Ninye arye, ‘Nun mal olan nang yanuka opsicakʼ tenen, kat keil arye dobuka, cang keil aik ap, poka ap dobikirye, akeil aik pum tam dungnubuka balamak touk, Allah Yahweh ara, ‘El dam ati, yanuka melibuka lyepropsutueʼ tenen, el dam yanganamak nang, sikti, kalekuka melinamle. Kanye imun ning, sik dam kum yanganamle. Weik mok ceplirye, weik mek deipturye, obuka tokna dobuka, ninye asik dam yatua babye, Allah arye elti, diba tenenyak nang ati, kalekuka melipliba, telebuk unamake.

⁸ Bukni, Allah ati, ‘Nun likʼ tenen, bataklamaka nang ara, Allah Yahweh arye, anang dobolbinamle. Sirya ara, anang obuka, atu buklopnamle. Allah ati, lik upliba yaniptapnamak nang nirya ara, opliba, sik nirya ara, dibikcopura, kunuknakuk weknamake. Winibikiba, adiparyuk kum danamake.

Allah arye, sik Niniwe nang ati, yu ubukura, ‘Wenepnamne,’ tenebuk ning ati, nyabuk yupu

⁹ Ati ara, yata deiyok ati, anggun Niniwe mutuku nang tenipmunce, Allah Yahweh elti, batakuka, el deice bisiptibyeʼ tenen, yupu sisikilulum do? Anggunce, ‘Winipnamabe,’ tenepmunye ning nirya ara, dipkoprob pia kum winiptume. Anggunce Allah ati, ‘Nun likʼ tenen, batakalulum nang ara, Allah Yahweh arye, dobolbinamsile. Sirya ara, anggun nirya obuka, atu buklopnamsile. Yata nang do nirya, elce akunum wenebuka oplopsilyopura, anggunuk like bitinye talak tonap tikuka, elti, malye kum kinamlume. Sirya ara, anggun nirya obuka, atu buklopnamsile.

¹⁰ Allah ati, ‘Nun likʼ tenen, yaniltakanyak nang ara, sik adiparyuk, uku buk dipnamla noutamuk, dongopnamsile. Ara, ninye arye, akunum kolulamle maning dobuka, uku dongobikiba, uku arye dilamle touk, Allah arye anggunti, kum kipdeipnamsile. Sik kanye erebuka, mandipna kanye bobikirye, elti, yaninyak nang nirya ara, sikda tace belelamle ning, kau ulamle touk, tonda, kanye wangalamak mek dibikiba, sik kanye wangabikirye, kum bikilanyak nang atonun ubuka, Allah arye anggunti, wenebuka kum kipdeipnamsile.

Allah Yahweh arye, Asyur tam nang nirya, wenebuka kum kipdeipnamla ati, nyabuk yupu

¹¹ Se, anggun Niniwe mutuku noutam ululum nango, anggunda bicoe. Anggun kan-kan noutam arye, tonoknye ton, akunum panabukce, ‘Allah Yahweh ati, yanibibirye, malye-malye winin ning, el deiceuk deipnamabe,’ nyalule. Tonda, anggun nirya ati, elce, ‘Kume, nun nirya ara, malye-malye winin ninguk, talibuka unamabe. Ara, el anye birye, ‘Allah Yahweh el yupu ara, yanipnamneʼ tenen, akunum yanuka tikilule.

¹² Ati ara, anggun Yehuda tam ululum nang, anggun nirya ara, Allah Yahweh arye, “Kume, sik Asyur nang bukni, sikda mikip weik nang unyakce, tonda sikda yupa pia weik tonun, bulubuka unyake. Winibuka, mikip weik nang, yupa pia weik tonun unyak bukni, sik adiparyuk kum kipdeipnirye, atu bukuka bataknamne. Ati ara, se, anggun Yehuda tam ululum nango, ‘Naʼ tenen nang ululuma ati, mince anggun malye ululum ning ati, narye kanye imun weik ning, dobuka areamsisiba, imun kanye bobuka ulamlum bukni, wini talak arye, dipdongobuka, dounamle talak ara, narye anggun dam, imun kanye bon ning, tonap pia kum delinamsine.

¹³ Ati ara, wini talak ara, na Allah ara, sik Asyur mutuku nang arye, mikip weik deice anggun Yehuda tam nang deice, ikin ning, anggun nong deice delisinyak ning ara, narye aning kum kipdeipnamne. Tonda, winipmanto ara, anggun dam kat weik tapu, el si ara rantai arye, anggun koupdongopsik ning ara, narye buluplopnirye, anggunti lobuka lyepdopnamsine.

¹⁴ Aning ara, dipkoprob Allah Yahweh arye, ‘Winipnamne,’ nyabukce, anda Asyur mutuku weik deiyoknye biti, akunum nyapdeibuk. “An ap, ance taliminye nang ap, nirya ara, anggunce anggun mutuku noutam unamak nang arye, deibikceura, dadeipdanin yanganamak nang ara, pia kum kipdeipnamne. Anggun mapu ton kum deiplum ati, anggun noutam ara, anggun si babye ton, kum kipnamle. Tonda, anggun mutuku nang arye, ‘Nun ni,’ nyabuka, talye ning ati, si erenyak isa mer ap, aisa si erena ati, patung-patung memebuka delinyak ning nirya ara, narye obuka, sice buklopnamne. Winipnirye, sik isa si eren aik pum tam nirya ara, aning nirya kum kipdeipnamne. Tonda, Asyur mutuku noutam ara, ninye dibikiba weinamakak ara, na Allah aryuk, sik opnirye, sik nong weinamakak ara, kintinip deipnamsine. Winipnamna deiyok ara, anggun Asyur mutuku nang ara, pia malye-malyeuk ululume. Narye, anggunti, ‘Daupmalye, sikda na like,’ tenesinya ati, anggun nirya kum kam unamlume!” Allah Yahweh arye nyabuk.

Allah arye, sik Yehuda tam ulamik nang ati, nyabuk yupu

¹⁵ Ura, anggun Yehuda tam ululum nang nirya ara, moubuka dipdelulume. Ara, ninye tonoknye ton, wibuka deipyeura, mutuku dup deice tam arye yanamle. Ayanamlanye bira, laka pia teleb yupu boyanuka nyalnyanamle. Anye birye, laka teleb yupu boyanuka nyalyanamle ara, olana kumce, pia kanye teleb ubuka, talima dukulongona ati, yupu boyanamle. Ati ara, ‘Se, anggun Yehuda nango, wini talak anggun Allah si erena ati, weik sum ara, moubuka tenepmunce, asum ara, weik kwalya kwalibuka, Allah ati, si erebuka kinamlume. Tonda, minop talak, ikin weik ulamlum talak noutam arye, anggunce, ‘Allah arye lyepdopsutopura, nunce Allah ati winipnamabe, winipnamabe. El si erebuka kina ati, aning ton, aning ton arenamabe,’ nyapbuka, nyalin yupu deice, nyapdeiamlum ning nirya ara, dipkoprob aninguk winipnamlume. Ilil una kumce, talye lukparabuka, winipnamluma deiyok ara, ani. Atalak arye dipdongobuka, dounamle talak nirya ara, anggun mutuku noutam nirya ara, yu nang ton yakirye, pia kum olyanganamsiake. Ara, Allah arye, anggun mal olan nang ati, akunum obuka, sice bukloplirye, anang nirya kum kipdeipnamla ati, tonoknye babye ton, pia kum unamake. Anggun el ‘Naʼ tenen nang ara, kanye deibuka, telebuk unamlume. Allah arye nyabuk.