Mika 7 - Eipomek

“Israel ninye kan-kan arye, teleb winin nang ton kum wininyake,” nyabuk yupu

¹ Nabi Mika birye, Israel ninye nirya ati nyabuk. Nara, imun kanye bonune. Winipmanto ara, yo duk moulamle li talak upliba, ayo duk mouamliba, dakuka dibikce talak ara, aminyan din patapliba, ‘Ayo ara, duk ton mouptuba dakuka diptibye,’ tenenyak bukni, yo duk nirya akunum kum upliba, kum dakuka dilamak atonunye, unune. Tonda, anggur tapu ap, kwarang yo ap, min yuma teleb duk moulamle ning nirya ara, dakuka dibikirye, malye ning ara, bataklamaka atonunye unune.

² Aning ara, talye kum nyapne. Ayupu nong ara, ani. Minop talak ulamik ninye nirya ara, Allah arye nyapdeiamuk ninguk, diba tenelamikce, talibuka diksukumuk ulamik bukni, wini talak ara, aninye atonun, tonoknye babye kum ululume. Diksukum unyak ninye ara, akunum kum dayike. Ati, wini talak ara, diksukum winin ninye nirya ara, pia kum anya arye, el kwit birye el kwit biti, ‘Yata winiptinya deice arye optinye do?’ tenen, wena tapu webuka kaliklamak touk, winililanyake. Adeice arye amutuku noutam ara, malye winin ning akunum panaple.

³ Aning wininyaka deice arye, malye winin ninguk, kel kibikirye talinyake. Ara, ninye deiyok nang kibikirye, talibuka unyak ninye ap, malye winibikiba yupu lipsisikuka, bokolina deiyok nang ap, sik nirya arye, “Nun mapu anggun malye winipmalum nang ara, nunti, ‘Ninye opdeipsululume,’ nyabuka arin yo bok arepsilyame,” nyanyakba, Israel ninye arye, arenyakba, adeiyok nang arye dolonyake. Tonda ninye deiyok talibuka, unyak nang arye, ‘Nun tenepmap ning ara, adiparyuk doproptibye’ tenen, mikip arye nyanyakba, sik tenepmakce touk, dalubuka dolonyake. Winibikca deice arye, pia tuba-tuba malye yupu nyalanyake. Diksukum ubuka, ninye yupu kum bokolinyake.

⁴ Ati, sik amalye weik wininyaka deiyok nang arye, yuk nang nirya ati, malye winilinyake. Winipmanto ara, taca ning luksiliba, lik ulamsil touk, malye winilisinyake. Tonda tace ning, weika arye papliba, cang weik akunum upliba, tilib weik uplirye, ninye arye abisik kum binmanto ulamap touk, sikce teleb ban bisik sekelongosinyake. Mitik teleb ubuka unyak deiyok nang babye, pia kwanim bisik banyaka ati, sik nirya ara, dipkoprob malyeuk wininyake. Winimunya ati, Allah arye anggunti. weik arye wenepnusile. Anggun malyeuk winimunya dekna ati, Allah arye yupu bokeipsilirye, wenebuka oplopnamsile. Wini talak akunum dam uple nyapsine. Ara, Allah arye, “Sik amalye unyak ninye ati, malye kipdeipnamle,” nyapdeiamuk talak akunum dam uple.

⁵ Ati, na Mika birye anggunti, nyapsine. Anggun mining dam nang arye, nyanamak yupu ara, ‘E, dib nyapmasiyake’ tenen, diba tenebuka kum kekenamlulume. Tonda, ‘Na kwit unulule ati, el deiceuk unamne,’ pia kum tenenamlume. Aning atonun, anggun kilapu koproba arye, malye ulisikca ati, anggun ap, anggun kilapu ap, neika ululum talak ara, anggunce, ‘Wininamne, wininamne, tenepman ning ara ani,’ nyabuka laka kum nyanamlulume. Ara, ayupu kekebikirye, yu nang ati, laka nyabikiba, kekepsikirye, ‘Sik anang arye opsicak’ tenen, nyapsine. ‘Na tenepman ning ara, nyapnun do?’ tenen, pia moubuka tenepmunce, kalikelanamlulume.

⁶ Anyapmasin yupu ara, talye ati kum nyapsine. Deiyok ara, sik mining mapu silip aryuk, mal pilanamake. Winipmanto ara, sal mapu arye, sik ni yapu arye, nyabice yupu pia moubuka kum kekenamake. ‘Anang ara, talye nanguk unyaka ati, sikda daupmalye’ tenen, mangkau kinamake. Tonda, kilmapu arye, sik nin yapu nyabice yupu, pia moubuka kum kekebikirye, ‘Akilapu ara, nun like’ tenen, ‘Sik yupu yaninamabe’ tenen, sik kilmapu arye, sik nin yapu ati, lik ati batakanamake. Aning atonun, sik yamal kilapu arye, sik yamal nang ati, ‘Nun like’ tenen, yu upliba olanamake.

⁷ Sik malye-malye wininyak ninye nirya ara, wininamak bukni, na nabi Mika binyuk ara, aning kum wininamne. Nun ni koproba Allah Yahweh, el tibuk, dib tenenuna ati, ‘Elcuk melibuka lyelonamnile’ tenen, el tibuk dib tenebuka kintinip deibuka dinamne. Winipnirye, Allahuk pia moronamne. Moropnyopura, kekeplirye, lyelonamnile.

‘Allah Yahweh ara, nun Ninye Lyena Deiyoknye ulule,’ tenenamlume, nyabuk yupu

⁸ Nabi Mika birye, Israel ninye ati, tenebukce nyabuk yupu ani. Na mal olan nang arye, malye kum nyanamnulume. Tonda, na mal olan nang arye, anggunce, ‘Bita merekuka obuka, kum danaipmakiyake’ tenen, weik kanye deibuka, kum lyek-lyek anamnulume. Deiyok ara ani. Dipkoprop na saktinya babye, aminyan talak tuba tamubuka erepdeipniliba, tiknirye teleb unamne. Tonda, wini talak ara, na kunuknak atonun unun bukni, aminyan talak ara, na ni Allah Yahweh, elce dobuka, weik dirina ak deipnamnile.

⁹ Ara, nun Israel ninye nirya arye Allah Yahweh el dam malye ulamupuba, el yu ara nun deice deipsiliba, imun kanye bobuka unamabe. Ati, nun nirya arye, Allah ati, malye ulamupuba, aning dekna ati wenepnamsile. Bukni, wenepsiliba, ikin kanye bobuka ulamibiba, aminyan talak ara, Allah arye nunti bico tenepsilirye, bobuka diksukum teleb dirinak deipnamsil talak, dipkoprob upnamle. Nun ti malye ulinamsiyak ninye ara, Allah elcuk aninye ati, yupu bokeipnamsilarya. ‘Na tenena ninye’ tenen, nun Israel yala ninye nirya bobukapsilirye, pia telebak bobisiliba, el dirina elinamabe. Aminyan talak ara, Allah arye nun malye winililamsik ninye ati, wenepnamle ning ara, eibibirye kel kipnamabe.

¹⁰ Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk.

Allah Yahweh arye, Israel ninye ati, ila tuba tamubuka teleb kilinamle ning, tenebukce,’ nyabuk yupu

¹¹ Nabi Mika birye, Israel ninye nirya ati, winipnamuk ning tenebukce nyabuk. Se, anggun Yerusalem mutuku noutam ululum ninyeo. Allah arye tenyamuk talak, akunum dam uplyopura, anggun umunye mutuku ara, weik cang keil poka tamubuka dopnamlume. Yuk nang arye, akeil poka dakuka batakik bukni, aminyan talak ara, akeil poka ila tuba lipsisikuka dopnamlume. Atalak ara, Allah arye anggun talinamlum tuku weik tonap tabakuka arepsilyopura, anggun keil poka lo weika arye, tonap anggunce tabakuka kisikmunce, weik kibuka dopnamlume.

¹² Allah arye, teleb kipdeipnamsil talak ara, akunum dam uplyopura, sik dana-dana tam ninye, yuk-yuk pera mutuku daunyak ninye nirya tamubuka yana bulupnamake. Sik aninye unyak sukum ara, iknapye tam, Asyur mutuku ton unyak bukni, sik kanye delina ati dilyanamsiyake. Tonda, sik dabu mutuku tam unyak ninye nirya babye, Mesir mutuku noutam unyak ninye arye, anggun kanye delina ati, dilyanamake. Ati, dabu tam unyak ninye ap, anyapce iknapye tam, Efrat mek dam unyak ninye ap, sik kanye delina ati, dilyanamake. Tonda, keting panalyangalye tam, weik laut mekwen otam arye dipdongobuka, otam keting wekelbalye tam, otam weik laut mekwen deibuk tam unyak ninye babye, sik nirya yanganamake. Tonda pera mutuku dabinuka unyak ninye, weik mutuku noutam unyak ninye babye, aninye nirya bulubuka, anggun dam anyuk dilyanamsiyake.

¹³ Bukni, ayanganamak ninye nirya arye, sik mutuku koprop noutamak arye, malye winin ninguk wininyaka dekna ati ara, Allah arye, amutuku tuku nirya malye kipdeipnamle. Ara, sik aninye malye ulamica deice arye, amutuku-amutuku nirya ara, malye kipdeipnamake. Mika birye, nyalin yupu deice arye nyabuk.

Nabi Mika birye, “Israel ninye ati, Allah Yahweh ance bico tenepsimince, melinamsilame,” nyabuka morobuk yupu

¹⁴ Nabi Mika birye, Allah ati morobuk. Se, na ni Allah Yahweh, ance an mapu koproba, Israel ninye nirya ati, wibuka deiamlumce, an mapu atonun ulamupu. Ati, ance sikti, bico tenebuka, pia moubuka kalikinamlame. Winipmanto ara, domba basam weina deiyok nang arye, sik domba basam pia teleb kibuka kaliklamak touk, ance nunti, kalikuka melinamsilame. Ara, ‘Nun Israel ninye ara, pia bai mutuku noutam atonun unyap bukni, ance lyepsimince, pia telebak deipnamsilam’ tenen, moropkine. ‘Lyepsimince, nun unamap sukum ara, pia sukulamle tuku ubuk mutuku binuka, talibuka uptibye’ tenen, moropkine. Tonda minop talak, Allah ance pia teleb mutuku, Gilead mutuku ap, Basan mutuku ap, nun Israel ninye nun apu yapu ati areamlumba, ulamik mutuku atonun, pia telebak arepsiminyeba, ‘Pia teleb mutuku noutamak unamap’ tenen, moropkine. ‘Pia teleb mutuku arepsiminyeba, nun din ning ara, weika arye dobuka dinamap’ tenen, moropkine.

¹⁵ Nun ni Allah Yahweh ance, ninye kum winipmanto ning ton winipnamsilyame. Ara, minop talak, Mesir mutuku noutam, ikin kanye bobuka ulamupu buk, ance dobuka bisik boyangalamsulum talak, ‘Ninye kum winipmanto ning weik donirye, weik mambul pil weik dolamsulum touk, ila tuba tonap winipnamsilam’ tenen, moropkine. ‘Winipsiminba, aminyan talak babye, teleb uptibye’ tenen, moropkine.

¹⁶ Winipsiminyopura, ninye mutuku-mutuku nirya yuk daunyak ninye arye, aning eibikirye, alye dakdakirye, ilil unamle. Ara, sikce winibuka tenenamake. ‘Se, min yuma talak, nunda mikip weik ninye unyabe,’ tenelamupu bukni, dipkoprob nun mikip, mitik tonun usulule. ‘Allah elda, pia mikip weiknye ulule’ tenen, kel biknamake. Aning kel bikica deice arye, sik aninye nirya arye Allah ati, ‘Se, elda weik mambulnye ulule,’ tenebikirye, sik kanye deibikirye kipnamake. Winipnamle talak ara, ‘Nun mikip weik nang unyaba,’ tenelamik nang ara, sik talima pum tam kunukulongona ap, amul kunukna ap, tonda si bam bol lililongona ap, unamake.

¹⁷ Sik aninye nirya ara, Allah arye donamle pil eibikirye, ‘Se, elda weik mambulnye ulul bukni, nun nirya ara, pia malye ninye uk unyabe. Nunda mambul pia kume,’ tenebikirye, ilil weik upliba, alye dakdanamake. Winipmanto ara, kwatima talye tuku deice balamlarye, mundip lilibuka balamle ning, pia amu tam ulamle touk kibuka, mambul kanye bobuka unamake. Atonun ubikirye banmakibuk, Allah Yahweh elce mambul weik pil dolul ning eibikirye, lukdanuka ilil weik unamle. Winibikirye, ‘Allah arye yata wiripnamsil do?’ tenen, el dam kekelyanganamake. Allah ati ilil weik unamle. Nabi Mika birye nyabuk.

Allah arye, el ‘Naʼ tenen, ninye ati, weik arye bico teneplirye, el mapu koproba ati, pia melilula ati, nyabuk yupu

¹⁸ Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.

¹⁹ Anda weik arye nunti, tuba-tuba bico tenesilyamnye uminya ati, ance nun Israel ninye nirya ati, bico tenesimince, nun malye wininyap ning nirya lyesimince, namin kinamsilyame. Winipsimince, nun malye wininyap ning nirya ara, dobukapmince, weik laut mekwen deibuka, kum-kuma noutam donoknamlyame.

²⁰ Allah an mapu koprop ara, Abraham arye deiamukba, dadeipdanin balamik nang, nun Israel yala ninye ati, tenepsimince, bico upkiliba, tamubuka lyepnamsilyame. Tonda, nun apu koproba, Yakub birye deiamukba, dadeipdanin balamika ani, deiamsik Israel nang ati, tenepsimince, bico upkiliba tamubuka lyepdopnamsilyame. Ara, minop talak ancuk, nun apu yapu nang ati, nyalin yupu deice arye, “Wininamsine,” nyapdeiamsulum touk, wininamsilyame. Pia kum bataknamsilyame. Ance nun apu yapu nang ati, “Wininamsine,” nyapdeiamsulum ning nirya ara, kum bataknamsilame. Aning nirya ara, dipkoprob pil donamsilyame. Aminyan talak babye, nun dam teleb winilinamsilyame. Ayupu nyabuka, nabi Mika birye Allah ati, nyabuka morobuk.