Mika 6 - Eipomek

Allah Yahweh arye, Israel ninye ati, “Malye winilulume,” nyabuka, wenebuk yupu

¹ Allah Yahweh arye, anggun Israel ninye ati, “Anggunda malye winilulume,” nyabuka, nyasinyak nang ara, anggunda moubuka kekeplulume. Anggunce, ‘Deiyok kum upmalibuk, na ni Allah arye nunti, malye nyapmasil ning ara, minin yupu deice arye nyanmasile,’ tenenmalume. Utenelulum ning ara, anggunce tenepmalum ning ara, laka nyapnamlulume. Ayupu anggunce nyapmunyeba, mutuku kon ap, weik mutuku-mutuku nirya, daunyak ninye nirya ara, anggunce laka nyanamlum yupu kekebikirye, kel biknamake.

² Se, aning ati, anggun deice tam mutuku ululum ninye nirya babye, amu tam mutuku ululum ninye nirya babye, na Allah Yahweh arye Israel yala ninye ati, yupu nyapdeipnusin yupu ara, anggunda moubuka kekeplulume. Aning ara, urdem ati kum nyapsine. Na Allah Yahweh arye, ‘Naʼ tenen, ninye, Israel yala ninye arye, malye wininyak ning akunum kel kinuna anya arye, Israel ninye nirya ati, wenepnamsin yupu aupmanilba, nyapnusina ati, kekenamlulume.

³ Allah Yahweh arye, Israel ninye ati nyabuk. Anggunda, na mapu koproba Israel ninyeo, narye anggun dam, yata malye ning winyamsise do? Tonda, narye yata ikin ning, anggun dam arye winilamsiba, anggunce kanye imun kanye bobuka ulamlum do? Narye yata winilamsiba, anggunce nati, lik kanye bobuka, unululum do? Winimunye ning ati, anggunce na dam, ayupu laka nyapnamnulume.

⁴ Anggun ton teneipdelulume. Narye anggun Mesir mutuku ulamlumce, pia ikin pil dolamlum noutam ara, narye lyebuka boyanamsise. Mesir mutuku ninye arye, anggun Israel ninye nirya ati, tapu koubuka deiamsikce, pia ikin pil dilamsikba, na Allah arye lyepropsise. Tonda, atalak noutam nirya ara, anggun melin ati, narye Musa ap, Harun ap, Miryam ap, dobuka deiamsirye, sik deice mikip weik arelamsiba, sikce deiyok nang kibuka boyangalamsike.

⁵ Tonda, na mapu koproba, Israel ninyeo, anggunce akunum luba kiplum do? Anggun tuba tonap, moubuka tenepnululume. Ara, Moab mutuku ninye nirya taleamuknye, Balak birye, ‘Israel ninye nirya ati, wenepnirye opnamsine,’ tenepmasuk buk, Beor el mi Bileam biti yukubukba, yayukce, ‘Israel ninye luba kina meme,’ nyabuka morobuk bukni, Bileam birye, el dam yata yupu nyamuk do? Bileam birye, anggun Israel ninye ati, teleb yupu nyapsuk deice arye, telebuk upsuke. Tonda, minop talak Sitim mutuku arye batakuka, bisik balamlum ani, Gilgal mutuku noutam bilum talak ara, anggun melina ap, kel bikna ap ati, pil weik tonun dolamsise ning ara, akunum luba kiplum do? Kume, anggun Israel ninye ara, ‘Se, nun ni koproba, Allah Yahweh arye, nun lyena ati, pia dipkoprob mambul weik pil dosulul’ tenen, ‘Kel biknamlum’ tenen ati, narye weik mambul pil dolamsise ning ara, akunum luba kiplum do? Anggun aning nirya moubuka tenipdemunce, kel biknamlulume. Na Allah arye, dipkoprob lyepromsise.

Allah Yahweh arye, ‘Na ti arenamniak ning ara, aninguk arepnitinge,’ tenelula ati, laka nyabuk yupu

⁶ Allah Yahweh arye, Israel ninye sik wenena ati, pia asilena atonun nyabuk yupu ara, ani. Ati ara, nunce yata ning doprobibirye, Allah Yahweh el si erena ati, el dam boyanganamap do? Allah ara, el im deice tam ululnye biti, yatato ning dobuka, el arena ati yatibirye, el dam kisok kanupdongobuka, yanuka arenamap do? Ara, nun malye unyap ning ati, adiparyuk oplopsutu bukni, nun pununa ati, adiparyuk sapi basam yim dobuka obibirye, el si erena ati, uku dongolyanamap do? Aning areptibiba, kanye deipnamsil do? Aning atonun, sapi basam winiryuk ning, keting tamun tonok uk mabuk ning dobuka, Allah el si erena ati, yanuka areptibiba, kanye deipnamsil do?

⁷ Aning dopropsuturye, kanye kum deipsutuba, nun domba basam, pia kum nukmanto ning, beribu-ribu bobitibirye, el si erena ati, areptibye do? Aninguk kum bukni, aning ap, Zaitun yo duk teikukaptibirye, puruptibirye, nintong teleb mek, pia weik tonun deiptuba, kwebuka arelbitibyopura, Allah Yahweh arye, kanye deipnamsil do? Akumopura, nun mapu pia winiryuk mapu dobuka, Allah el si erena ati, amapu obuka areptibyeba, nun malye wininyap ning ara, Allah elce namin kipnamsil do? Ara, nunce malye wininyap ning wenen ati, pununa ara, nunce deilinyab mapu dobuka obibirye, Allah ati areptibiba, kanye delinamsil do?

⁸ Kume, aning-aning nirya, akunum winiptibya babye, adeice arye, pia kum lyepnamsile. Bukni, nun ni Allah Yahweh arye, nun tukwak mutuku unyap ninye nirya ati tenesilya ara, ‘Na kanye delina ati ara, wininamake,’ tenesulule. Utenesilya ati, el minop talak akunum laka nyapdeiamsuk ara, ani. Yata ninye do nirya, pia diksukum teleb kibuka unyakce, yuk ninye nirya ati, bico tenelakirye, kanye talima, amu tam nimalyap asa kanye deibuka, telebuk unamake. Wininyakce, Allah el amu tamuk unyakce, kanye talima erena kumce, Allah ap, kanye talima dukdongobuka, neika ubicopura, Allah arye aninye ati, kanye delinamle. Aning ara, ‘Wininamake,’ tenesulule.

“Tilila yupu nyana ap, ninye ona ap, tenepce arye nyana ap, unyak ninye ara, Allah arye wenepnamle,” nyabuk yupu

⁹ Anggun ululum ninye nirya ara, Allah Yahweh arye nyasilye yupu, moubuka kekenamlulume. Sik kel weik ninye ara, ‘Nun malye wininyap ning ati, Allah arye wenepsilyak’ tenen, Allah Yahweh ati, pia ilil usiliba, pia moubuka kum unyake. Ara, talye ati kum nyapsine. Sik asik dobuka, amutuku unyap nang nirya ati nyasulule. Ara, “Pia moubuka tenenamlume,” nyabuka nyasulule. Allah Yahweh arye, yu yin talin nang, yupa pia weik tonun akunum dopdeipmalba, nun wenena ati, olyanusiyake. Ati, nun amutuku noutam unyap ninye nirya, elce nyasilye yupu ara, moubuka kekepnamabe.

¹⁰ Allah arye nyasulule. Anggun malye ning weik winilulum ninye nirya ara, anggun ululum aik pum noutam ara, tilila yupu nyaluluma deice arye, ubula dololulum bonauk, bululyalulume. Winipmanto ara, anggun din ning el si ara, gandum ap, yakong ap, libuka yuk ninye dekna ati, tilila yupu deice arye, “E, aning ara, winibuka arepnusilyame,” nyabuka, tilila yupu nyabuka, yo bok weik tonun dololulum ning nirya ara, na kum elisunun do? Tilila yupu nyaluluma deice arye, bon-bona weik tonun, duknubuka delilulum ning ara, ‘Luba kipnamle,’ tenenululum do? Kume, narye aninye wininyak ning nirya ati, yu kanye bonune. Ati, sik anang ara, narye wenebuka opnamsine.

¹¹ Aning atonun, sik bon-bona ap, din ning ap, dekna ati, ‘Ikin ara, yata barye uple do?’ tenen, kiklilen ning deice delilulum bukni, dipkoprob ning deice, kum delilulume. ‘Ikin weik uple,’ nyabuka, tilila yupu deice arye nyabipyopura, ‘Nun dekna ning weik tonun dolonamabe,’ tenelulumce, anggun kayapu ati, tilila yupu uk nyalulume. Winipmunce, pia malye weik winilulum ning ara, narye namin kinamsin do? Kume, aning ara, na pia kum namin kinamsine. Ati aning ara, na like. Sik tilila yupu deice, talye nyaltakanyak nang ati, narye anggun anang ati, adiparyuk wenebuka opnamsine.

¹² Na kele. Sik bona utotoa kum noutam unyakce, weik bona talinyak ninye ara, pia malye wininyaka deice arye, bon-bona weik ubula dolonyake. Anang arye, sik amu tam unyak bona utotoa talina kum ninye ati, tilila yupu deice nyabikirye, ubula dolonyake. Tonda, sik amu tam unyak ninye obikirye, sik ning ubula dalubuka dolonyake. Wininyaka ati, tilila yupu lena ap, aunyak ninye ona ap deice arye, bona weik talin ninye unyake. Anang ara, sik tuba-tuba tilila yupu uk nyanyaka anya arye, wini talak ara, dipkoprob sik yupu kum nyapmanto unyakce, bona utotoa talin nang ara, tilila yupu nyan nanguk unyake.

¹³ Pia malye weik winimunya ati, wini talak ara, na Allah arye, anggun malye winilulum ning ati, wenebuka opsinirye, pia kum kipdeipnamsine. Anggun pia malye weik winimunya ati, narye anggunti, pia malye kipdeipnamsine.

¹⁴ Ati, anggun din ning weik tonun dinamlum bukni, pia kum bounamsile. Pia tuba patanauk unamsile. Tonda, anggun bon-bona ara, pia weik tonun, dobuka talinamlum bukni, ‘Abon-bona ning, pia tuba kum unamsile. Anggunda, abona ning weik tonun, ‘Naʼ tenen, dokola deibipyopura, aminyan talak telebuk unamap’ tenen, abona delinamlum bukni, aning deice arye, teleb kibuka kum unamlume. Aning nirya ara, narye kum kipdeipniba, kum danamsile. Tonda, abona bobuka, teleb kibuka delilamunya babye, narye lo arepneba, anggun mal olan nang yakirye, onamsiyak talak arye, ubula dalubuka dolonamsiyake. Narye, abona nirya yamubuka bataknirye, kum kipdeipnamsine.

¹⁵ Tonda, anggunce gandum duk ap, yuk yala ning nirya ap, dobuka dokamlum bukni, duk teleb ning ton moupliba, pia kum dakanamlume. Anggun kounamlum ning yala nirya ara, teleb ubuka nong upliba, kum linamlume. Urtalya ati, kounamlume. Tonda, anggun Zaitun yo duk dakuka, anggun nong likna ati, mek purupmunce, minyak mek dobuka, dokola delinamlum bukni, anggunce aminyak mek dobuka, anggun nong deice, kum likinamlume. Yuk nang arye, aminyak mek ara, alapdopnamsiyake. Aning atonun, anggur tapu duk dakukapmunce, mek purunamlum bukni, anggur mek kintinibuka deipnamlum ning ara, anggun ton dobuka, kum dinamlume. Yuk nang arye, anggur mek babye, ubula alapdopnamsiyake.

¹⁶ Aning nirya winipnamlum bukni, nong kum upnamsila deiyok ara, anggunce Raja Omri ap, el mi Ahab ap, sik malye winilamdik ninguk talibuka, anggun babye, melibuka dobolbamunce, malyeuk winimunya ati, winipnamsine. Abitinye Raja nang arye, pia malye weik winilamdik touk, anggun wini talak ululum ninye babye, malye weik winiluluma anya arye, narye anggunti, wenepnamsine. Winipsinirye, anggun yala ninye nirya ara, pia malye kipdeipnamsine. Winipsinyopura, mutuku-mutuku nirya daunyak ninye eipsikirye, anggunti malye nyabuka nyalinamsiyake. Allah Yahweh arye, Israel ninye ati nyabuk.