Mika 4 - Eipomek

“Allah Yahweh arye, ninye mutuku-mutuku nirya ansinibuka, teleb kipdeiplirye, talinamle,” nyabuk yupu

¹ Aminyan doryanamle talak winipnamle ning ara, ani. Allah Yahweh el si eren aik domik mutuku ati, ninye mutuku-mutuku nirya arye, ‘Se, yuk mutuku ara, mitik mambul bukni, amutuku ara, weik mambul mutuku ulule,’ tenenamake. Allah el si eren aik domik mutuku erepdeipliba, yuk mutuku nirya ara, amutuku amu tam atonun unamle. Winipliba, im sirya, mutuku sirya nirya, daunyak ninye arye, amutuku uk, yanganamake. Amutuku yacopura, Allah el siuk erenamake.

² Amutuku yanganamak ninye, sikce nyanamak ning ara, “Yalulume, nun nirya Sion mutuku deice welebibirye, Israel ninye, sik ni Allah Yahweh, el si eren aik dam binuyabe. Winibibiba, elce nun wininamap ning nirya ati, bisik nukunamsile. Winibuka nuksiliba, nun nirya arye, abisikuk dobolbanamabe. Aning nyapmasina deiyok ara, Allah Yahweh el yupu ara, Yerusalem mutuku noutamuk ulula ati, amutuku uk, binuka unamabe. Tonda, Allah Yahweh ara, Sion mutuku deiceuk ulirye, el mapu koproba ati, yupu moubuka peterelule. Ati, Yerusalem mutuku uk, binuka unamabe,” nyabuka nyanamake.

³ Mutuku-mutuku nirya daunyak ninye, sik wininyak ning ati, Allah aryuk yupu bokeipnamle. Ara, pia weik mutuku ati, negara nyanyak sukum unyakce, mikip weik unyak ninye ap, pera mutuku yuk-yuk daunyak ninye nirya ap, dam mutuku unyak ninye nirya ap ati, yupu bokeipnamle. Tonda atalak ara, mal olanyak ninye nirya arye, sik mal olan ati talinyak ning, aning-aning nirya dobuka deibikirye, urdem darapdongobuka, teleb kanye bobikirye unamake. Sik mal olan ati, talilamik yin ap, parang ya ap, besi tace ning ap nirya dopdobikirye, uku dongobikiba, uku buppu arye mitang kiplyopura, wa win ning ap, yo duk dakna ning ap, kintinibuka delinamake. Deiyok ara, atalak ara, ninye im sirya, mutuku sirya nirya arye, ‘Mal olan ati, weik kel kina deiyok ning ara, nun like. Aning tonap kum kel kinamabe’ tenen, unamake. Ati, sik olana ati, kintinilinyak ning nirya ara, kum kipdeipnamake.

⁴ Ton tam ninye arye, yuk tam ninye ati, kum olanamake. Bukni, sik nirya yuk-yuk kam unamak talak ara, neika dukdongobuka, tonok kanye bobuka, telebuk unamake. Aunamak talak ara, anggur tapu duk wa ap ara, yo duk wa ap, sikce sik bidamnye wa wiamice, mutuku noutamuk bukikirye, talye kanye bobuka unamake. Atalak unamak ninye nirya ara, ilil asa arye, kum unamake. Yuk mutuku ninye arye, yuk mutuku ninye ati, ilil kanye kum bonamake. Alaka nyapmasin ning nirya ara, na Allah Yahweh arye, im deice yin talibuka unyak malaikat nirya, sik weik deiyoknye unirye, nyalin yupu nyapmasina ati, aning nirya dipkoprob nong upnamle. Nara, mikip weiknye birye, aning nirya teleb kibuka delinamna ati nyapsine.

⁵ Yuk mutuku-mutuku nirya daunyak ninye nirya arye, ‘Aning ara, nun ni yapu’ tenen, isa el siuk yuk-yuk si nyabuka, erenyake. Bukni, nun Israel ninye uk ara, diksukumuk teleb ubuka ubirye, na ni Allah Yahweh, el siuk erebirye, el amu tamuk pia aunamabe. Nun ni koproba Allah ati, pia kum batakanamabe.

Israel ninye, yuk pera mutuku dabinuka ulamica ani, “Aminyan talak ara, Allah arye aninye dobuka, tamubuka boyanamle,” nyabuk yupu

⁶ Allah Yahweh arye nyabuk. Na tenepse talak, akunum uplyopura, sik wenena ati batakamsiba, yuk mutuku nang arye, dobuka bobinamikiba, imun kanye bobuka, ulamika ani, tuba daunyak ninye nirya ara, narye dobuka boyanirye, bulupdeipnamne. Sik kum binmanto ninye ap, yok kwalin kili sal ap, sik nong deice ikin ning deipseba, imun kanye bobuka ulamik ninye ap, teleb kipdeipnirye, sik mutuku koproba, tamubuka boyanamne.

⁷ Na mapu koprop ara, yuk mutuku ninye arye obuka dopropsikce, sik mutuku koproba bobiyikba, pera mutuku noutam binuka daulamika ani, wini tuba daunyakce, wini talak ara, mikip pia kumce, mitang asa unyak bukni, daulamik ninye nirya ara, mitik tonun dem tuba daunyak bukni, narye ila tamubuka weik kipdeipsiniba, anggunce deipmunyeba, dadeipdanin banamak nang nirya ara, pia weik upra banamake. Winipsinye talak ara, mikip weik ninye unamlume. Winipnamsen talak ara, na anggun ni koproba Allah ara, Sion mutuku deice unirye, anggun talinamsine. Narye anggunti, “Winibuka unamlume,” nyasiniba, pia aunamlume. Tonap tuba pia kum bataknamsine.

⁸ Yerusalem anda, na Allah arye, tonap tuba teleb kipdeipnamne. Na Allah ara, na mapu koproba, sik Israel ninye ara, Yerusalem mutuku noutamak unamake. Minop talak ara, Yerusalem mutuku daulamik ninye arye, yuk mutuku, dana-dana tam mutuku nirya talibuka, pia mikip weik ulamik touk, aminyan talak babye, narye anggunti, teleb kipdeipsiniba, tuba tonap tamubuka, anggun mikip weik ninye unamlume. Anggun Yerusalem mutuku unamlum ninye ara, ‘Se, sikda na kilmapu atonun unyake’ tenen, weik arye bico tenesununa ati, teleb kipdeipsinyopura, yuk mutuku unamak ninye nirya ara, anggun amu tamuk unamake.

⁹ Bukni, wini talak ara, anggun yata deiyok ati, weik arye engebuka, malye yupu nyalulum do? Tonda, yata ning ati, anggunda mi bomlye kil mi deipnulya ati, uk weik dinmaliba, malye nyabuka dolamle touk winimunce, malye yupu nyabuka engelulum do? Tonda, anggun ninye deiyoknye, Raja elce anggun asik dobuka umunya noutamak, tuba kum ulul do? Anggun melina ati, weik kel nang arye, ‘Teleb una ara ani, malye una ara, ani,’ nyabuka nyasikirye, yupu lipsisikilin nang ap nirya ara, akunum dipsika ati, anggun malye nyabuka engelulum do?

¹⁰ Se, anggun Yerusalem mutuku ululum ninye, malye-malye weik winilamluma deice arye, mi bomice kilapu arye, ikin kanye bobuka, ngalukuka ulamak atonun, anggun babye akunum winilulume. Talye ati, engebuka kum ngalukululume. Wini talak ara, anggun umunye mutuku arye batakuka, pata mutuku binuka, tia talak ati, unamlume. Unmamunya ani, Babel mutuku ninye arye anggunti, malye kipsikirye, anggun nirya tapu koubuka, adiparyuk Babel mutuku bobinamsiyake. Bobinuka dadeiamsikiba, daulamunye bukni, aminyan talak ara, na anggun ni koproba, Allah Yahweh arye, apera mutuku dabinuka ulamunye buk, anoutamak narye lyebuka dopropnamsine. Ara, anggun mal olan ninye noutam arye, lobuka bataksinirye, lyepropnamsina ati, nyapsine.

¹¹ Dipkoprop wini talak ara, yuk pera im sirya, mutuku sirya nirya, daunyak ninye arye, bulubuka, Yerusalem mutuku yakirye, ‘Aninye nirya opnamabe’ tenen, yanuka warikinamsiyake. Anggunda, amalye wininyak ninye arye, ‘Se, Sion mutuku ara, weik mambul mutuku nyanyak bukni, nunce amutuku nirya ap, amutuku noutam ulul ning nirya ara, malye kipdeipnamabe. Israel ninye arye, ‘Aning weik mambule’ tenen, Sion mutuku noutam duknubuka deiamik ning ap, Allah el si eren aik ap ara, nun asing koproba arye, mining dam elinamabe,’ tenenyake.

¹² Bukni, dipkoprob nyapsine. Sik anang ara, na Allah arye, ‘Wininamne,’ tenenun ning ara, tenebuka kel kum bikinyake. Sik aninye ara, ‘Allah arye nun bulubuka tonokak deipsilirye, wenebuka opnamsile,’ kum tenenyake. Winipmanto ara, gandum sekuka bulubuka, tonokak deibikirye, yamuplobikiba, tonokak sakliba, malye ning ap, teleb ning ap, wilamak touk, na Allah arye winipnamne ning ara, pia moubuka kum tenenyake. Sik amalye wininyak ninye babye, wenebuka opnamnarya.

¹³ Na Allah Yahweh arye, anggun Yerusalem mutuku noutam ululum ninye nirya ati, nyapsinye. Yerusalem mutuku noutam ululum ninye, anggun adiparyuk bamunce, anggun mal olan ninye nirya ati, yaniplobuka binamlulume. Ara, na anggun ni koproba Allah arye, anggunti, mikip weika arye arepnamsine. Winipmanto ara, sapi basam kisok deice, yang belelamle kat ning ulamle touk, mikip weik kipdeipnamsine. Tonda, sapi basam el yan kala tace kat weik ulamle touk, anggun yan nirya babye, mikip weik kipdeipnamsine. Winipmanto ning ara, kat ning el si tembaga ap, tonda kat ning, el si besi ap, mikip weik ulamle touk, kipradeipnamsine. Winipsiniba, pera mutuku yuk daunyak ninye ayala-ayala nirya, anggunce aninye ati, malye kibuka yaniptapnamlume. Winibuka unamlum talak ara, anggun mal olan nang arye, ubula dalubuka dopdobikirye, talinyak bon-bona aning-aning nirya ara, anggunce dalubuka dopropmunce yamunyopura, na Allah Yahweh, si erena ati arenamnululume. Sik yuk mutuku ninye arye, koulamak ning nirya ubula libuka, na dam boyamunce, na si erena ati, arenamnululume. Na Allah Yahweh ara, im sirya, mutuku sirya nirya talibuka, deice tam unirye, weik eren mikipnye unune.

¹⁴ Se, anggun Yerusalem mutuku noutam ululum ninyeo, ‘Nun ni koproba, Allah arye melinamsil’ tenen, Allah ati moubuka tenepmunce, pia pi dobuka moropmunyeba, elce anggunti, melinamsile. Wini talak ara, nun mal olan nang yakirye, ‘Israel ninye ap, sik ninye deiyoknye ap, opnuyabe’ tenen, warikil yanganamsiyake. Nun ninye deiyoknye bira, kama dobuka, el katum deice opnamake. Ati, ‘Nun ni koproba, Allah arye melibuka lyepnamsil’ tenen, pia mikip arye moronamlulume, nyapsine. Nabi Mika birye, sik Israel ninye nirya ati nyabuk.