Mika 1 - Eipomek

¹ Minop talak ara, Yehuda tam nirya ap, Yerusalem mutuku noutam ap, Samaria mutuku ap, winilamik ning nirya ati, Allah Yahweh arye elilamuk. Elilamukce, ninye tonok, mitik mutuku, el si Moresyet mutuku arye, deiamiknye el si ara, Mika ulamuk. Anye el dam, Allah Yahweh yangalamukce, el yupu laka nyalilamuk. Ayupu yanuka laka nyalilamuk talak noutamak ara, Yehuda yala ninye tam talina ati, sik ninye deiyok, Raja nang wibuka deipra balamikba, sikce ninye deiyok kibuka, talipra balamik nang, sik si ara, ani. Ara, Yotam ap, Ahaz ap, Hizkia ap, sik anang arye, ninye deiyok nang Raja kibuka, Yehuda tam ninye talipra balamik. Allah arye, nabi Mika biti, laka nyalamuk yupu ara, lengdar mapna deice arye laka nyalamukba, Mika birye eipman ning ap, kekepman ning ap ati, laka nyabuka sekelilamuk. Ara, Samaria tam ap, tonda Yerusalem mutuku noutam ulamik ninye ap ati, Allah arye laka nyalilamukba, Mika kekelamukce, seklamuk.

“Provinsi Samaria tam ap, Yerusalem mutuku noutam ululum ninye ara, weik ikin ning dopropmunce, engepnamlume,” nyabuk yupu

² Allah el si Yahweh arye, nyapnukba nyapsine. Se, na mapu mutuku-mutuku nirya umunye ninye ara, anyapmasin yupu ara, moubuka kekeplulume. Ayupu kekepmunce, kel biknamlulume. Tonda, anggun tukwak im sirya, mutuku sirya, nirya noutamak ululum ninye babye, anggun ululum ning nirya ara, Allah Yahweh aning-aning nirya talibuka, deice tam im deice, Pia Mikip Weik Deiyoknye ulirye, pia telebakuk ululnye birye, disulula ati, anggun Israel yala ninye ap, Yehuda yala ninye ap arye, malye weik winilulum ning dekna ati, wenebuka opnamsila ati, Allah im deice arye nyasilye yupu nirya ara, moubuka kekenamlulume.

³ Se, Allah Yahweh, el im deice pia telebak, pia telebnye ulul mutuku ulinye birye, tukwak mutuku kolukuka yalirye, nun tukwak nang unyap mutuku deice yanuka, yanibuka tikilyanamle. Yalirye, tukwak mutuku noutamak, weik mutuku deice banamle.

⁴ Winibuka tikilyanganamla talak ara, amutuku nirya, weik arye luluklirye, mutuku nirya, atu atonun kiplopnamle. Winipmanto ara, lilin dobuka, uku dinipdongobikiba, uku buk dilirye, mek balamle touk upnamle. Ara, nun ulamepye mutuku deice tikilyaliba, mek kutuklirye, tokna donamle. Tonda, mutuku deice arye, mek kutuklirye, tokna pakuka balirye, opnin banamlya ani, lu mutuku obuka, dalalbalamle touk, upra binamle.

⁵ Akanye imun ning nirya, winipnamla deiyok ara, talye ati kume. Deiyok ara, anggun Israel yala ninye ap, Yehuda yala ninye ap arye, Allah el yupu bisibuka yanimunce, el dam malye winimunye nang ati, dipkoprob anggunti, wenepnamsile. Ara, wini talak ara, yata nang arye, Israel yala ninye dam malye winipdeibikiba, opmanto unyak do? Ara, Israel yala ninye, sik deiyok mutuku, ibu kota Samaria unyak ninye arye, malye weik wininyakba, Israel ninye nirya eibikirye, sik babye malyeuk wininyake. Aning atonun, Yehuda yala ninye babye, yata nang arye, sik benepdeibikba, Isa Mutuku Dongonye siuk erenyak do? Ara, yuk mutuku arye kume. Yehuda yala ninye unyakak nirya, sik weik deiyok mutuku, ibu kota Yerusalem noutamak arye, isa siuk erenyakba, yuk Yehuda yala ninye nirya babye eibikirye, atonun isa si erenyake. Ati, sik Yerusalem mutuku unyak ninye ap, Samaria mutuku unyak ninye ap ati, weik arye wenepnamne.

⁶ Ati, na Allah Yahweh arye nyapsine. Samaria mutuku unyak ning nirya ara, dakuka bataklopniba, aik oldemuk upnamle. Tonok aik babye, ton kum bataknamne. Anyasik donyaka nirya daklopnirye, wa win dam atonun kiplopnamne. Tonda, amutuku nirya butbuta atonun kipdeipnamne. Tonda, amutuku noutam balamik bisik nirya ara, ninye arye anggur tapu duk wa wina ati, tuku palibuka, anggur tapu kounamake. Tonda, weik cang keil poka antanabuka domik ning nirya ara, daklopnirye, kum kipdeipnamne. Winipniba, aik oldem uplirye, oldem danamle. Winipnyopura, amutuku deice ubuk ning nirya bulubuka, tonok mutuku lyu utamuk, dopkwetepnamne. Winipnyopura, sikce keil poka ap, keil asik ap, domik ning nirya ara, amu tam deiamuk pala keil nirya ara, narye daklopniba, laka danamle. Anyasik nirya, pia weik keil deice domik bukni, akeil tuba aupmalye ning nirya ara, dakuka bataknamne.

⁷ Tonda, amutuku noutam umunce, talye ning ati, ninye taruk deice arye, puturubuka memepdeipmunce, kam kum ulul ning bukni, anggunce, ‘Aning ara, weik mambul ning’ tenen, “Nun ni koproba,” nyabuka, aning ati, si erelulum ning nirya ara, kum kipdeipnamne. Atalye ning si erenyakce, talibuka unyak ning nirya ap, tonda talye-talye yolanyak ninye nirya ap ara, obuka atu kiplopnirye, uku dongopniba, dibuka atu buklopnamle. Atonun, sikce dekna weik deklamik ning nirya ara, ‘Pia aunamsil’ tenen, ‘Naʼ tenen, moubuka, aik pum tam delilamik ning nirya ara, aning babye daklopnirye, aning nirya dobuka, uku dongopniba, uku arye diplirye, kum danamle. Winipnamna deiyok ara, ani. Sik dekna weik ning, dokola delilamik ning nirya ap, tonda, “Nun ni koproba,” nyabuka, si erenyak ning nirya ap ara, yo bok weik tonun, dekamikce delilamik. Ayo bok ara, talye-talye yolamak kilapu dekuka yolalamikce, deklamika deice arye, dololamik. Ati, adekna weik ning nirya ara, dobukapnirye, yuk mutuku ninye ak arepneba, amutuku ninye babye, adekna weik ning dopdobikirye, talye-talye yolamak kilapu ati, arenamake. Allah arye, nabi Mika biti, lak nyapdeibukba sekamuk.

⁸ Nabi Mika birye, ayupu nirya kekebukce, ayupu nyabuk. Se, Allah arye, Yehuda yala ninye ap, Israel yala ninye ap ati, weik tonun wenepnamla ati, na nabi Mika bira, weik kanye imun upmanile. Ara, se tenen, na kanye talima uk dinilya ati, na nong ara, baju ongona kum, talye bananguk banamne. Tonda, na yan ongon ning sandal babye, kwiribuka, urdem yan bananguk, yanibuka banamne. Engena ap, alye dakna ap deice arye, pia malye kanye bobuka banamne talak ara, nara bai kam ninye eiplirye, lukulalamla atonun unamne. Weik yupu arye, malye nyabuka ngalukunamne. Winipmanto ara, bip maka wena tapu youpliba, yupu weik arye ngaluklamle touk, engebuka malye nyanamne.

⁹ Aning nirya wininamna ara, talye ati kume. Deiyok ara, sik Yehuda yala ninye unyak mutuku noutam ap, tonda Yerusalem mutuku noutam unyak ninye, sikce cang keil poka dobuka, wiamikce, wekelbalamik bisik bublan dam babye, malye-malye weik wininyake. Winipmanto ara, ninye nong bol deice, barye suse dilamle ning, pia kum nipmanto ulamle. Sik Samaria tam unyak ninye ara, atonun unyaka anya arye, sik malye-malye weik wininyak ning ara, kum bataknamake. Nabi Mika birye nyabuk.

“Yerusalem mutuku dam unyak ninye ati, ayupu laka kum lelbinamlyame,” nyabuk yupu

¹⁰ Allah arye, nun malye unyap ning dekna ati, wenepnamsila ara, ayupu bobuka, nun mal olan nang, sik kota Gad mutuku unyak ninye dam, nyalbana meme. Sikce, ‘Akanye imun ning nun dam upmasila ati, nun mal olan nang eipsikirye, bico tenebuka, namin kipnamsiyak’ tenen, laka kum engenamlulume. Duknubuka engenamlulume. Tonda, sik Bet-Le-Afra mutuku unyak nang babye bicoe. ‘Se, nun bidamang malye winilamupe dekna ati, nun nong deice ikin weik ning dolonamabe’ tenen, imun kanye bobikirye, ‘Yata wiribuka lyepdatibye do?’ tenebuka, malye kanye bopmunce, engebuka atu butbuta deice, mabuka donamlume. Wininamlum ning ara, ‘Se, imun kanye bobuka donmake, tenepnamsiyak’ tenen, lak kina ati winilanamlulume.

¹¹ Tonda, anggun Safir mutuku ululum ninye ara, yuk mutuku ninye arye anggunti, obuka sirya daksikirye, anggun ululum mutuku batakuka, yuk pera mutuku bobinamsiyak talak ara, baju ongona kumce, talye nong bananguk binamlume. Winipmunyopura, anggunda, alye weik dakanamlume. Tonda, anggun Zanan mutuku ululum ninye ara, anggun umunye mutuku ara, batakuka yuk mutuku ton, kum bitume. Ara, ‘Yuk mutuku ninye arye, yanuka opsicak’ tenen, anggun asik nirya antanabuka, doamlum cang pala keil poka, bai tam kum binmanto upnamlume. Bukni, sik Bet-Haezel mutuku unyak ninye ara, sik olan ninye arye, sik domik aik ap, keil poka domik ning ap nirya ara, dakuka uluplopnamake. Tonda, ‘Aning pia aunamle’ tenen, tuku pum tam deiamik pala keil babye, palibuka daklobikirye, sik aik nirya uluplobikiba, atu butbuta atonun unamla ati, nyapne.

¹² Ikin doprobupu ning ara, nun wenena ati, nun ni koproba Allah Yahweh arye, nun dam arepsukba, Yerusalem mutuku aik bublan dam yanmasile. Ati, sik Marot mutuku unyak nang arye, ‘Dan mutuku ninye yanuka, melipnamsiyak do?’ tenen, dinmak bukni, utenena meme. Allah arye, nun malye wininyap ning wenena ati, kanye imun weik ning, weik tonun arenamsile. Ati, yuk mutuku nang arye yanuka, kum lyepdopsitinge.

¹³ Tonda, anggun Lakis mutuku ululum ninye ara, anggun adiparyuk kuda basam balye tam, tapu kirikuka, tuku deice bukuka ban ning, memebuka kintinip deipmunce, ‘Yuk mutuku ninye arye, nun ton yanuka opsicak’ tenen, minopce bindopnamlulume. Ara, talye ati kum nyapsine. Yehuda mutuku noutam unyak ninye weik, daunyak bukni, anggunda, minop talak arye, Isa Mutuku Dongonye si erelalumce, pia malye winilamlume. Ara, sik Israel yala ninye arye, Isa Mutuku Dongonye si erelamik touk, ‘Nun babye aninguk, si eremnamap’ tenen, winilamlume. Winilalumba, sik Yerusalem mutuku unyak ninye elilamikce, ‘E, nun ton amalye winin ninguk, winipnamap’ tenen, malye weik winilamik. Ara, anggun Lakis mutuku ululum ninye arye, malye winiluluma deice arye, aminyan talak, sik Yerusalem mutuku unyak ninye babye, malye ning deiyok akunum doprobikce, malye wininyake. Bukni, deiyok ara, anggun Lakis mutuku ninye, malye winilamluma deice arya.

¹⁴ Se, anggun Yehuda yala ninyeo, sik Moresyet-Gat mutuku unyak ninye ati, surat sekuka dopdeiplulume. Ara, “Yo, sikda yuk pera mutuku bobinamlulume,” nyabuka, yupu nyapdeipnamlulume. Winipnamlum ning ara, talye ati kume. Moresyet-Gat mutuku ara, anggun mutuku yuk nang yatingce, kum lyepstinga ati, nyapsine. Amutuku nirya ara, pia kum kipdeipnamle. Tonda, sik Akzib mutuku unyak ninye arye, Israel yala ninye ati, “Kume, nunce anggun ikin kanye bobuka, unamlum noutam nirya ara, nunce lyepsitibye,” nyalilamikba, sik Israel yala ninye arye, ninye deiyok nang Raja kibuka, ulamik nang nirya babye, ayupu kekebuka, diba tenelamik bukni, sik aninye arye nyalilamik yupu ara, tilila yupu uk, nyalilamik. Akizib mutuku ulamik ninye arye, ‘Israel yala ninye talibuka, unyak ninye deiyok nang arye, bico tenebuka melibuka lyepdopsiting’ tenen ning ton, pia kum dopropnamlulume. Tilila ati, nyalamik.

¹⁵ Se, anggun Maresa mutuku ululum ninyeo. Nun ni Allah Yahweh arye dopdopsilirye, anggun mal olan nang deice deipnamsile. Winipsiliba, amutuku nang arye, anggun Maresa mutuku ululum ninye ati, obuka sirya daksikirye, anggun aik ap, anggun mutuku nirya ap ara, alapdopnamsiyake. Winipsikcopura, Israel yala ninye, sik mikip weik deice arye talibuka, unyak ninye deiyok nang nirya ara, dopsikirye, tapu koubuka, Adulam mutuku dam bobinamsiyake.

¹⁶ Se, anggun Yehuda yala ninye nirya ara, ‘Nun pia malye winilamupu,’ tenepmunce, anggun kisok potong nirya kopnamlulume. Kopmunce, pia engenauk unamlulume. Ara, anggun mapu ati, bico tenepmunce, lak kilin ning ati, wininamlulume. Ara, anggun kisok potong nirya ara, kobuka, delo kukulanamlulume. Winipmanto ara, sololong maka arye, mana ap, maka ap, oplirye dipnulya ati, potong nirya deploplirye dilamle touk, winipnamlulume. Ara, talye ati kume. Deiyok ara, sik mitik mapu nirya ara do, bukabikirye, tapu koubicopura, yuk mutuku bobanamaka ati, nyapsine. “Allah arye ayupu lak nyapnukba, anggun kekena ati, laka nyapsine,” nyabuka, Mika birye laka nyabuk.