Mazmur 99 - Eipomek

Allah Yahweh arye, aning-aning nirya talibuka, weik deiyoknye Raja ulula ati, nyabuk yupu

¹ Allah Yahweh arye aning-aning nirya talibuka, weik deiyoknye ulule. Ati ara, ninye tukwak mutuku noutam unyak yala nang nirya ara, ilil upliba, sik nong nirya sirim talinauk unamle. Malaikat sik si ara, Kerub unyaka deice tam ara, Allah bukukce, aning-aning nirya talibuka, weik deiyoknye ulule. Allah el mikip weiknye ulula ati, tukwak mutuku im sirya, mutuku sirya nirya lulukuna uk unamle.

² Allah el si Yahweh ara, pia mikip weik ulirye, Sion mutuku deice ulule. Tonda, nun ni koproba Allah Yahweh ara, yuk-yuk mutuku unyak nang, yuk-yuk nirya ara, el amu tamuk unyake. Elda, tukwak mutuku unyak nang nirya talilule.

³ Ati ara, sik yuk-yuk mutuku yala nang nirya babye, sikce Allah el siuk erebikirye, ‘Anda pia telebe,’ nyanamake. Allah Yahweh ara, pia mikip weiknye ulula ati, ninye tukwak nang nirya arye elti, ilil weik unamle. Allah ara, malye winin ning tonok babye, pia kum winilule. Elda pia yuke, tonda pia teleb lek weiknye ulule.

⁴ Tonda, Allah ara, Pia Mikip Weik Deiyoknye, Raja ulule. Tonda, el Allah arye, “Aning ara, wininamlume. Aning ara, pia kum wininamlume,” nyapdeiamsuk yupu nyasilye touk, ninye tukwak nang ati, yupu lipsisikuka bokeipsilirye, dengna aresulule. Elce nyapdeiamsuk yupu ati, kanye delilule. Allah elcuk, ninye yupu lipsisikuka bokolina ati, “Talye yupu ap, nong kum talye nyan yupu ap, minin yupu ap, nyana kumce, diksukumuk ubuka, yuk nang ati, ninye yupu lipsisikuka bokolinamlume,” nyapdeipsuke. Allah arye, “Aning ara wininamlume. Aning ara, pia kum wininamlume,” nyapdeiamsuk yupu nyasilye touk ubuka, nun Israel nang ati, diksukum kibuka, melibuka teleb kilisulule.

⁵ Nun Israel yala nang nirya arye, Allah Yahweh, el siuk erenyaba ati, elti, ara, “Naio anda pia telebuk ulyame,” nyabuka, el si tuba erenamabe. Tonda, winipmanto ara, dikdik sena ati, el yan erebuka delilula dam, anggun nirya arye, kutam tuku deice dipdongobuka, kisok kanubuka, el siuk erenamlume. Nun ni koproba Allah, elda pia yuke. Malye winin ning tonok babye, pia kum winilirye. Teleb, lek dem ulule.

⁶ Musa ap, Harun ap ara, Allah el si eren aik pum tam, pil talibuka dona deiyok nang, imam nang pil talibuka dolamdik. Tonda, Samuel babye, nun Israel nang melina ati, imam deiyoknye ulamukce, Allah el si nyabuka, nunti morolamuk. Aimam deiyok nang, winilye nang arye, nun ni Allah Yahweh ati, ‘Naio, nun Israel nang nirya ara, melipsilyame!” nyabuka morolamik. Sikce Allah ati, morolamikopura, Allah kekelamukce, nun Israel yala nang ati, yanuka melilamuk.

⁷ Ara, Mesir mutuku noutam arye, lobuka lyepdopsukce, pia pata mutuku noutam balamupu talak ara, weik dua noutam arye, Allah arye, “Wininamlume. Abisikuk banamlume,” nyabuka melilamsuke. Tonda, Allah arye, “Aning winina ara, telebe uka. Aning winina ara, meme,” nyabuka, keil pala deice sekuka, areamsuk yupu babye, sikce aninguk talibuka ulamik.

⁸ Se, nun si erenyap Allah, nun ni Yahweh, sik Israel nang arye, anti, ‘Naio melipsilyame!’ nyabuka morolamikba, ance ayupu kekeplumce, sik morolamik ning ati, melilamlume. Allah, anda sik Israel yala nang nirya ati ara, sik mitik malye winilamik ning ara, luba kiplumce, kum kililamlume. Bukni, sik pia malye weik ulamik ning ara, tuba tamubuka kwang daklamlumce, wenelamlume.

⁹ Ati ara, nun Israel yala nang nirya arye, nun si erenyap Allah, el si Yahweh ati, “Anda pia teleb ulyame,” nyabuka, el si weik tonun erenamabe. Wininamap talak arye, Allah el si eren aik domik mutuku kon deice, amutuku dam yanganamabe. Amutuku deice yapyopura, el si erebibirye, kutam tuku deice dipdongobuka, kisok kanubuka, el pia diksukumuk teleb winilul ning tenebuka, el siuk erenamabe. Aning wininamap talak ara, talye ati kume. Deiyok ara, nun ni Allah Yahweh, elda pia teleb leknye ulula ati, el siuk erebibirye, el ulye mutuku kon dam yapyopura, kutam tuku dipdongobuka, kisok kanupdongobibirye, el siuk erenamabe.