Mazmur 98 - Eipomek

Allah arye tukwak mutuku, im sirya, mutuku sirya nirya talilirye, Weik Mikip Deiyoknye ulula ati, nyabuk yupu

¹ Nun nirya arye, nun ni Allah Yahweh, el si erena ati, winiryuk kanye bobuka, Mazmur yupu deice, mot nyan yupu uk nyanamabe. Deiyok ara, Allah elce, pia mikip weik ninye, dopmankum pil dolule. Tonda, Allah el pia mikip weik taruk, sirik tam ap, el pia diksukum koprop ulye mikip deice arye, elti, ‘Nun like, elda daupmalye,’ tenenyak nang nirya ara, obuka sirya dakalule.

² Allah Yahweh arye, ‘Tukwak mutuku noutam unyak nang, yuk-yuk nirya ara, moubuka biknamak’ tenen, elce lyelosulul nang ara, akunum lak sukum arye, peteresulule. Diba, tukwak mutuku nang, yuk-yuk nirya ara, sik asing arye, Yahweh el diksukum winibuka, pia telebuk winilye ning ara, akunum laka delilula ati, elinyake.

³ Tonda, Allah arye, “Anggun ti, bico weik tenesununa ati, pia melisinirye, pia teleb kilinamsine,” nyalin yupu deice arye, nyapdeipsuk ning ara, akunum lak kibuka peteresulule. Atonun, Allah arye nunti, “Winibuka melinamsine. Anggun ti wininamsine,” nyasilye yupu atonun, batakna kumce, aninguk dipkoprob, tuba wininamsile. Ati ara, mutuku sirya, im sirya daunyak nang nirya ara, Allah arye, lyelosulul ning ara, akunum laksukum arye elinyake. Diba, nun Israel nang arye, si erenyap Allah ara, elce melibuka lyelamsuk ning ara, yuk mutuku nang nirya elilamikce, akunum biknamike.

⁴ Ati ara, anggun tukwak mutuku noutam ululum nang nirya arye, Allah Yahweh, el si erebuka kina ati, weik yupu deice arye nyanamlume. Ara, anggun nirya ara, adiparyuk deiyok koubuka, kanye deipmunce, kanye kil-kil mot nyan deice arye, Allah el siuk erenamlume.

⁵ Tonda, Yahweh el si erena ati, amot nyanamlum talak ara, kitar on ning, el si ara, kecapi deice arye, lelim nyamunce, mot yupu nyanamlume. Amot nyanamlum talak babye, ninye yupu ap, kecapi lelim deice arye, amot nyanamlume.

⁶ Aninguk kum bukni, tonda kitar on ning bitinye, ton ning el si ara, terompet ap, ton ning el si ara, sangkakala arye, amot nyanamlum talak ara, aning nirya dobuka onamlume. Ara, nun Israel nang ati, talipsuk ninye deiyoknye, Allah Yahweh ara, nun Raja usulule. Ati, el dam yanuka unamap talak nirya ara, yupu weik deice arye, el si erenamabe!

⁷ Weik laut mekwen noutam, mek lotik abuka weleplirye, lelim weik nyanamle! Tonda, weik laut mekwen pum tam, kam ulye ning nirya babye, weik yupu deice arye nyanamake! Atonun, tukwak mutuku, im sirya, mutuku sirya nirya, unyak nang babye, weik yupu deice aryuk, nyanamlume!

⁸ Winipmanto ara, ninye ara, kanye deibikirye, sik taruk bokikirye, lelim weik nyalamak touk, weik balamle mek nirya babye, sik obuka balamlirye, pia lelim weik nyanamlume! Tonda, mitik mutuku kon ap, weik mutuku nirya ara, tonok talak aryuk, sik nirya arye, Allah Yahweh yalyopura, luluknauk umunce, pia kanye kil-kil mot nyamunce, lelim weik nyanamlume.

⁹ Deiyok ara, Allah Yahweh arye yanuka, ninye tukwak nang nirya ati, dipdelirye, sik malye winilamikce ning ap, teleb winilamikce ning ati, yupu lipsisikuka bokeipsilirye, dengna arepnamsile. Allah arye, tukwak mutuku noutam unyak nang nirya ati, yupu lipsisikuka bokeipnamsil talak ara, elce, “Aning ara, wininamlume. Aning ara, pia kum wininamlume,” nyapdeiamsuk yupu deice arye, diksukum kibuka, yupu lipsisikuka bokeipnamsile. Diba, Allah arye, tukwak nang yuk-yuk nirya ati, sikce winilamikce ning moubuka dipdelirye, sik winilamice touk, yupu lipsisikuka bokeiplirye, dengna arepnamle. Nun winilamepye touk ubuka, “Anang ara, teleb wininyake, anang ara, malyeuk wininyake,” nyabuka, nun winilamepye ning ereplirye, aning atouk ubuka, yupu lipsisikuka bokeipnamsile!