Mazmur 96 - Eipomek

“Tukwak mutuku unyak ninye nirya arye, Allah Yahweh el si erena ati, mot yupu nyanamlume,” nyabuk yupu

¹ Tukwak mutuku ululum ninye nirya ara, nun ni Allah Yahweh, el tibuk winiryuk kanye teleb mot yupu nyamunce, unamlulume.

² Tonda, tuba-tuba el siuk ereipmunce, “Anda pia telebe,” nyabuka, kanye lon mot yupu nyanamlume. Allah el si Yahweh ulina atibuk unamlume. Ara, elce nun malye ulamupu ning ap, malye wininyap ning nirya ap ati, lyelosulule ati, el si erebuka teleb kilinamabe.

³ Ati, ‘Ninye mutuku-mutuku nirya kekenamak’ tenen, el pia teleb ulul ning ap, mikip weik arye, pil dolul ning ap ati, laka nyanamlulume. Ara, yata ninye do, ayala-yala nirya arye, ‘Allah el mambul weik winilul ning ati, kekenamak’ tenen, Allah arye ninye kum winipmanto ning ulye ning nirya babye, yuk yala ninye nirya kekenmakce sukumak, laka nyanamlulume.

⁴ Yuk ninye im sirya, mutuku sirya, kekenamakak nyanamlumak ara, talye ati kume. Deiyok ara, Allah el si Yahweh, Weik Erenanye ulula atibuk, teleb kilinamabe. Yuk talye ning ap, Isa Mutuku Dongonye ap ati, ‘Nun ni koprop,’ tenekirye, ilil ubuka unyak bukni, Allah ara, aning-aning nirya deice tam ulirye, Weik Erenanye ulula anya arye, el tibuk, ilil weik upliba, el si pia erenamlume. Ara, talye ati kume. Isa si erenyaka ara, Allah el mikip atonun ning ton, kum winilule.

⁵ Ninye mutuku-mutuku nirya arye, sik bidamang taruk arye, puturubuka delilamak ning memepdeibikirye, ‘Nun ni ani,’ tenen, aning talibuka, elti, si erenyake. Tukwak mutuku talibuka, si erenyak isa mer nirya ara, talye aulul ning, urasin atonun, ubuka deibikirye, si erenyake. Bukni, nun ni koprop Allah Yahweh arye, im deice ulul ning nirya kwepdeiamuke.

⁶ Allah elda pia teleb ulirye, elda weik erena ap, weik mambul weik ap, ululnye winilule. Tonda, el si eren aik pum bisik, el aulula anya arye, anyaik wekuka dinyap talak nirya ara, ‘Se, nun ni Allah ara, dipkoprob pia Mikip Weiknye ulirye, elda, pia teleb ulirye, el mambul winilya ara, laka kum nyaptibye’ tenen, unyabe.

⁷ Ati ara, nun tukwak mutuku noutamak unyap ninye, ayala-yala nirya arye, nun ni Allah el si Yahweh ati, “Se nun ni Allah ara, dipkoprob pia Mikip Weiknye ulirye, elda, weik teleb ulirye, el mambul ulya ara, pia telebuk ulule,” nyabuka, el si erenamabe.

⁸ Allah el ap, el si ap, weik mambulnye winilula anya arye, nun tukwak mutuku noutamak unyap ninye nirya arye, el si erena atibuk, el si adiparyuk erenamabe. Tonda, Allah el si erena ati, nun nirya arye, teleb arin ning dobuka, el si erena ati aik damak, boyabirye, arenamabe.

⁹ Nun tukwak mutuku unyap ninye, mutuku-mutuku nirya, Allah Yahweh ati, se, nun ni Allah, malye ning tonok ning babye kum winilirye, pia diksukumuk winilule. Elda, pia etekdopnye ulule. Ati ara, ninye mutuku-mutuku nirya unyak ninye nirya arye, el tibuk, ‘Se, weik mambulnye ulule’ tenen, ilil asa ubibirye, sirim talinamsile.

¹⁰ Nun dib tenenyap ninye nirya arye, sik yuk yala ninye mutuku-mutuku nirya unyak ninye nirya, kekenamakak arye, “Nun ni koprop Allah, el si Yahweh ara, aning-aning deice tam talibuka, ninye deiyoknye ulule,” nyabuka, laka nyalbanamabe. Tonda, Allah arye, tukwak mutuku nirya kwepdeibukba, pia darapdongbuka unamle. Allah tenyamuk talak, akunum uplyopura, tukwak mutuku noutamak unyap ninye nirya arye, wininyap ning nirya ati, “Teleb ning ani, malye ning ara, ani,” nyaplirye, elce ninye yupu bokuka, wilibuka deipnamsile. Ara, ninye nirya winilamak touk, diksukumuk ubuka, yupu bokeipnamsile.

¹¹ Im deice ap, im noutamak ulul ning ap, tukwak mutuku-mutuku nirya ulul ning ap, ninye nirya ap arye, kanye deibuka unamlume. Tonda, weik pala laut mekwen deibukak babye, laut mekwen noutamak ulul ning nirya arye, Allah atibuk, yupu weik deice arye nyapmunce, el si erenamlulume.

¹² Atonun, mutmuta palamle mutuku ulul ning nirya babye, tonda ninye arye, wa win dam koulamap ning damak ulul ning nirya babye, weik yo tikamlye noutamak ulul ning nirya babye, aning ayala-yala nirya, yupu weik arye, Allah ati, el si erebuka kinamake.

¹³ Nun nirya arye, Allah Yahweh ati, el si erebuka kinamapa ara, talye ati, kum wininamabe. Deiyok ara, Allah yanamle talak ara, nun yupu bokeipsilirye, wilipdeipnamsila ati, el si erenamabe. Tonda nun nirya ara, yupu weik arye, kanye pin-pin dobuka, el si erebikirye, kanye lon mot nyanamabe. Allah arye, tukwak mutuku tamubuka yalirye, tukwak mutuku-mutuku nirya noutamak unyap ninye nirya ati ara, ninye pil donyap ning ati, apil-apil donyap touk, Allah arye, ‘Teleb ning ani, malye ning ani,’ teneplirye, nun wenena ati, yupu bokdeipnamsile. Winibuka yupu bokeipnamsil talak ara, malye winina kum aryuk, tonda, tilila yupu nyana kum diparyuk, pia diksukum winibuka, yupu bokeipnamsile. Allah arye nyasilye yupu, el dipkoprob yupu deice arye, ninye pil donyap ning ati, apil-apil donyap touk, yupu lipsisikuka bokeipsilirye, wenepnamsile. Ati, Allah el tibuk, el si pia erenamabe.