Mazmur 95 - Eipomek

“Allah elda aning-aning nirya, deice tam talibuka, Weik Erenanye ulirye, nunti melibuka kalikisulule anya arye, el si erebuka mot nyuanamabe,” nyabuk yupu

¹ Nun nirya ara, kil-kil kanye deibuka, nun ni Allah Yahweh elti, mot nyabibirye, el siuk erenamabe. Allah elda, nun lyelosulul anya arye, weik yupu deice arye mot sebuka, el si teleb yupu deice arye erenamabe. Mutuku yangan keil, mikip weik arye bulamle atonun, Allah el babye, aning atonun, mikip weik arye lyesulule.

² Aning ati ara, nun nirya arye, el damak bulubuka wekibirye, kanye deibuka, elti, “Telebe,” nyabuka, mot sebuka, telep mot yupu nyanamabe. Tonda kanye deibibirye, mot sena ati, pong-pong ana ap, mot yupu nyana ap ati, yuk ning ap deice arye, “Allah ulul ning nirya ara, pia telebe. Elda weik mambulnye,” nyabuka, Allah el si erebuka, si eren mot nyanamabe.

³ Allah Yahweh el si erenamapa ara, talye ati kume. Deiyok ara, nun ni koprop Allah, el si Yahweh, elda aning-aning nirya deice tam erebuka, talibuka Mikip Weik Deiyoknye ulula anya arye, talye ning bukni, ninye arye, ‘Nun ni,’ nyabuka, si erenyak Isa Mutuku Dongonye ap, isa mer nirya ap, yuk mikip ulul ning, aning-aning nirya ap, el amu tamuk unyake. Allah elda, mikip weik ubuka, aning nirya Deice Tam Erenanye ulule.

⁴ Tukwak mutuku ap, tukwak mutuku noutamak ubuk ning, ayala-yala nirya ap, tukwak mutuku amu tam uliba, ninye arye kum elinyak ning ap, tonda mutuku deice ulul ning ap nirya ara, elcuk kwepdeiamukce, talilule. Tuku amu tam arye diprongobuka, weik mutuku deice ubuk ning nirya, elcuk kwepdeiamukce, talibuka ulule.

⁵ Aning atonun, weik pala laut mekwen ap, tukwak mutuku nirya ara, Allah elcuk kwepdeiamukce, talibuka ulule. Aning-aning nirya talibuka, Mikip Weik Deiyoknye ulule.

⁶ Aning ati ara, Allah Yahweh elcuk, nun nirya kwepdeiamsuk anya arye, nun nirya arye, gutam tuku dipdongobuka, nun ni Allah Yahweh, el si atibuk erenamabe.

⁷ Deiyok ara, talye ati kume. Nun ni koprop Allah elda, nun deiyoknye ulule. Nunda, el amu tamuk ulamepebuk, elce nunti, moubuka kalikisulule. Winipmanto ara, domba basam weina deiyok nang arye, sik domba basam moubuka kalikinmakirye, sik din ning ati, mutmuta maning telebak deibikirye, teleb ubuka weilamak touk, nun ni Allah arye, nun Israel yala ninye nirya ati, ‘Na tenena ninye’ tenen, melibuka kalikisulule.

⁸ Allah arye nyasulule. Atalak noutamak, na Allah arye nyasinye yupu nirya, kekepmunyopura, ayupu moubuka talepmunce, dobolbalulume. Anggun deipkirikdop nang, Meriba mutuku noutamak ulamikce, ‘Nun lik’ tenen, kat kanye bomik touk, kum unamlulume. Aning atonun, mek pia kumak ati, ninye kum unyakak, weik pata mutuku, el si ara, Masa mutuku noutamak, anggun apu yapu yangalamikce, malye yupu weik nyapnin yangalamik tonun, kum nyanamlulume.

⁹ Anggun apu yapu nirya ara, narye pia mambul pil weik dolamsa deice arye, sikti, melilamse ning nirya ara, moubuka elilamik bukni, aning nirya ati, moubuka tenena kum arye, sik amutuku bisik bitinye yangalamik talak ara, anggun apu yapu arye, nati malye ulamika deice arye, nati asilelamnik. Ara, narye sik damak ati, ninye winipmanto kum ning, winipnin yangalamsiba, sikce nati, asilelamnik.

¹⁰ Awinilelamnik ning ara, keting tamun yupa tonok, keba odeikin, 40 puluh tahun noutamak nirya, anggun apu yapu bisik yangalamik talak ara, malye weik winilamika anya arye, narye sikti, yu ulamnukba, pia malye kanye bolamse. Tonda, narye sikti, nyalamse. “Narye nyalilamse yupu ap, diksukum ubuka winilamse ning ap ara, moubuka kum tenyamikce, talye kanye bobuka, malye winipnin yangalamikba, yu ulamnuk.

¹¹ Ati ara, narye sik aninye nirya ati, pia yu ulamnuke. Winibuka, ‘Aninye ati teleb kilisiniba, sik ilil tenena kum arye, teleb kanye bobuka unamake,’ nyabuka, nyalilamse yupu ara, ‘Aninye ati, pia kum arenamsine,’ nyapdeiamse.” Allah arye nyabuk.