Mazmur 94 - Eipomek

Ninye tukwak nang nirya ara, sikce winilamice touk, Allah teniplirye, sik wenena ati, yupu lipsisikuka bokeipnamsila ati, nyabuk yupu

¹ Se, nun ni Allah Yahweh, ninye malye wininyak ning ati, anda kwang dakna deiyoknye ulyama ati, ance, “Aning wininamlume. Aning ara, pia kum wininamlume,” nyapdeiamsulum yupu nyasulul touk ubuka, ninye nirya kum winibikirye, malye wininyak ning ati, wenenamsilame. Diba nun ni Allah, anda sik malye wininyak nang ati, kwang dakna deiyoknye ulyama ati, minop yanuka, ninye nirya ati, yupu lipsisikuka bokeipmince, wenenamlame!

² Se, tukwak mutuku im sirya, mutuku sirya nirya unyak nang nirya ati, anda Allah, yupu bokolina deiyoknye ulyama ati, minop yanuka, ninye tukwak nang nirya ati, wenenamlame! Ara, ‘Sik mandipna kanye bonyakce, maknya kintinikirye, sik malye weik winilamikce touk ubuka, wenenalam’ tenen, moropkiabe!

³ Se nun ni Yahweh, anti, ‘Nun pia lik,’ tenebuka, an nyasilyam yupu nirya, yaniltanyak nang ara, yata talak ton, tuba malyeuk wininamak do? Ara, sik malye winin ninguk talibuka, malye-malye weik wininyak nang ara, maknya kintinibuka, talye luparabuka, kanye delinyaka ara, dan talak ton, pia wininamak do? Ance tuba naminuk kipnamlam do?

⁴ Winipmanto ara, ninye arye, weik mek makau dobuka, mek kwebikirye, adiparyuk dikiltakalamak touk, maknya kintinin nang arye, malye yupu weik tonun, tuba-tuba nyasinyake. Sik malye winin ninguk talibuka, malye weik wininyak nang ara, kwalin yupu weik tonun nyanyake.

⁵ Anang ara, wininyaka ati, ance, ‘Na tenen nang unamak’ tenen, wipdeiamsulum nang, nun Israel nang ati, pia ikin ning dobuka, nun nong deice delisikiba, nun talima dakalsakasulule. Diba, nun Israel nang ati, ance, ‘Ayala nang ara, ‘Naʼ tenen nang, pia unamak’ tenen, wiamsulum bukni, sik malye wininyak nang arye, ikin pia weik aresinyake.

⁶ Anang arye, youwak kilapu ap, tonda nun mutuku noutam ninye asik nang unyak ati, talye lukparabuka onyake. Tonda, sik ni yapu ap, sik nin yapu ap, akunum diamikba, kwaknamne mapu unyak buk, talye yanuka, deiyok ton kum upmalibuk, yu nang arye, amapu talye onyake.

⁷ Amapu ap, yuwak kilapu ap, obikce talak ara, sik yu nang arye, “Kume, Allah Yahweh arye, nun wininyap ning pia kum elisulule. El walwale,” nyabuka, mandipna kanye weik ubikirye, malye yupu nyanyake. Tonda, sikce, “Kume, sik Israel nang, sik apu koproba Yakub biti, melibuka kaliklamuk Allah ara, nun wini talak unyap nang arye, wininyap ning ara, pia kum elilula ati, el walwale,” nyanyake.

⁸ Sikce winibuka nyanyak bukni, na aMazmur yupu sekenanye bira, ayupu nyapsine. “Tukwak nang kan-kan noutam ara, mitik tonun walwal nang unyak bukni, anggun amutuku ululum nang ara, pia wal-waluk ululume. Ati, narye nyapnusin yupu ara, moubuka kekepnamnulume! Anggun pia wal-waluk ululum nang nirya ara, dan talak arye, teleb yupu kekepmunce, etekdop nang ton unamlum do?

⁹ Anggun moubuka tenipdelulume! Nun amul kwepdeipsuk deiyoknye birye, anggunce nyalulum yupu ara, kum kekepsutu do? Nun asing kwepdeipsuka deiyoknye birye, nun tukwak nang wininyap ning, moubuka kum elilirye, kum biksutu do?

¹⁰ Kume, yuk-yuk mutuku noutam unyak nang, yuk-yuk nirya ara, Allah elcuk, sik malye winin ning ati, yupu lipsisikuka bokeiplirye, wenebuka olule. Tonda, tukwak mutuku, im sirya, mutuku sirya nirya unyak nang ara, Allah elcuk, weik kel bikina deiyok ning peterelule. Yuknye birye kume. Elce petereliba, tukwak mutuku noutam unyak nang, yuk-yuk nirya arye binyake. Ati ara, tukwak mutuku nang arye, malye wininyak ning ati, talye mangkau kinauk ulul do? Kume, elce, sik malye winin ning ati, dipkoprob wenebuka opnamle!

¹¹ Diba, nun ni Allah Yahweh ara, nun tukwak nang arye, teninyap ning nirya, el akunum bikisulule. Biklirye, nun tukwak nang ati, akunum tenesulula ara, ani. ‘Kume, tukwak mutuku unyak nang arye, teninyak ning nirya ara, nong kum upnamle ninguk ulule. Talye-talye ninguk teninyake.’ Allah arye, utenesulule.

¹² Bukni, nun ni Allah arye, yata nang ati do nirya, sikce malye wininyak ning ati, “Anda, aning bataknulyame. Aning ara, meme!” nyabuka, wenelule. Allah arye wenelul nang ara, akunum kekebikcopura, kanye deibuka, telebuk unamake. Tonda, ance, “Aning wininamlume, aning ara, pia kum wininamlume,” nyapdeiamsulum yupu deice peteresilyam nang nirya ara, kanye deibuka telebuk unamabe.

¹³ Allah ance nunti, tuba tamubuka, teleb kipdeipsimince, nun ikin weik asa unyap ning nirya dopropsiminba, tuba tamubuka, telebuk unamabe.

¹⁴ Ance lyepropsiminba, talye kanye bobuka ulamepya ani, aminyan sirya talak ara, an yupu yanikinyakce, malye ninguk talibuka wininyak nang nirya ara, wenepmince, sikti, yupu lipsisikuka bokeipmince, ikin weik ning arenalyame. Diba nun ni Allah Yahweh, ance, ‘Israel yala nang ara, ‘Naʼ tenen nang pia unamak’ tenen, wiamsulum nang ara, pia kum bataknamsilame.

¹⁵ Aning ara, talye ati kume. Deiyok ara, Allah ance, “Aning wininamlume, aning ara, pia kum wininamlume,” nyapdeiamsulum yupu, moubuka kekebikirye, dipkoprob uk wininyak nang ara, ance pia teleb kibuka, yupu lipsisikuka bokeipsimince, ton ap tamubuka, teleb kilinamsilame. Allah ancuk, “Winipnamne,” nyabuka, diksukum ulyama deice arye, nyanamsilam yupu nirya ara, sik talima noutam dipkoprob uk wininyak nang arye, ayupu kekebikirye, pia moubuka talibikirye, aninguk wininamake.

¹⁶ Anggun nirya ara, moubuka tenipdelulume! Pia malye wininyak nang arye, ‘Anye opnuyabe’ tenen, na dam yakcopura, yatanye birye tiklirye, nati melibuka, kalikinulul do? Tonda, sik pia malye winin ninguk talibuka, malye-malye weik wininyak nang arye, ‘Anye el deice ikin delinamabe’ tenen, na dam yakcopura, yatanye birye tiklirye, nati melibuka, lyelonulul do?

¹⁷ Yuknye birye kume. Nun ni koproba Allah Yahweh, elcuk nati, pia melibuka lyelonulule. Diba, Allah arye kum meliamnutopura, yu nang arye, akunum opmanitingba, nara akunum dibilamak nang wininyakakuk, akunum binuka unmatinye. Wininmatinirye, akunum diamtinye.

¹⁸ Min talak ara, narye, ‘Se na mitanguk ununa ati, narye diba tenyamse ning nirya ara, akunum kum danin banmanile,’ tenepse. Aning tenepsirye, kum winipmanto unmase bukni, na ni Yahweh ance, “Nara anggunti, weik tonun bico tenesinirye, pia telebuk kilinamsine.” “Pia kum bataknamsine!” nyalin yupu deice nyapdeiamsulum yupu, tonap tenipsa deice arye, aning ara, kum batakse. Ayupu deice arye, na mikip tonap arepnuluma ati, kum batakse. Tuba kamuk unune.

¹⁹ Na talima noutam ikin unilye talak ara, Allah ance, na talima melipniminba, tonap tamubuka, kanye deibuka unune.

²⁰ Ninye deiyok nang arye, pia malye winin ninguk talibuka wininyak nang ara, Allah an ap neika, pia kum uptinge. Sik anang ara, ninye deiyok pil talibuka donyak bukni, sikce, ‘Aning wininamlume. Winibuka unamlume,’ nyabikirye, ayupu sekuka, aresinyak bukni, sikce nyasinyak yupu ara, dipkoprob malye yupu uk ulule.

²¹ Tonda, anang arye, ‘Sik teleb ninguk talibuka, diksukumuk wininyak nang ara, yanibuka opnamabe,’ tenebikirye, tonok kong bulupdeibikirye, anang arye neika olbanyake. Winibikirye, ninye yupu lipsisikuka bokolin talak ara, amalye wininyak nang arye, deiyok kum upmalibuk, yuk teleb wininyak nang ati, “Malye winipmaka ati, adiparyuk anang opnamabe,” nyabuka, tilila yupu nyabikirye, onyake.

²² Wininyak bukni, Allah Yahweh arye, nati, pia melibuka kalikinulula ati, yuk nang arye, kum opnitinge. Diba, winipmanto ara, weik mutuku bulamle keil dam, dungnubuka unmatini buk, yu nang arye, kum opnamnitinga atonun, Allah dam binuka uniba, elcuk melibuka kalikinulule.

²³ Sik pia malye winin ninguk talibuka, malye-malye wininyaka deiyok nang ara, anang arye malye wininyak ning ati, Allah weneplirye, kwang daknamle! Tonda, sik malye-malye weik wininyak ning ati, yu weik upnamla deice arye, anang nirya obukaplirye, kum kipdeipnamle. Diba, nun ni Allah, el si Yahweh ara, amalye winin ninguk talibuka, malye weik wininyak nang nirya ara, obukaplirye, kum daneipnamle.