Mazmur 93 - Eipomek

“Allah elda, weik deiyoknye kam pia unamle,” nyabuk yupu

¹ Allah el si Yahweh arye, aning-aning deice tam ulirye, aning nirya talibuka weik deiyoknye ulule. Winipmanto ara, tukwak mutuku ninye deiyok nang, Raja weik nang arye, pia urasin teleb baju ongobikiba, ninye eibikirye, “Se, elda telebe,” nyalamak touk, Allah elda, pia teleb ulirye, pia mikip weiknye ulule. Winibuka ulula ati, ninye mutuku-mutuku nirya unyak ninye arye, ‘Elda weik mambulnye ulule’ tenen, unyake. Allah Yahweh arye, aning-aning nirya ap, tukwak mutuku nirya ap, kwepdeiamukce, talibuka, aning nirya, pia darapdongobuka unamle.

² Nun ni Allah, anda aning-aning nirya, min kum kwepdeiyalum talak arye, anuk ulalume. Tonda, pia tuba aunalame. Minop talak dorapce, aminyan yanamle talak babye, ancuk aning-aning nirya talibuka, weik deiyoknye pia aunalame.

³ Se, nun ni Allah Yahweh, laut mekwen mek kup-kup ak ara, mek kait mikip arye weleplirye, lelim weik lelamle bukni, amek mikip ara, mitik uka. Anda pia mikip weiknye ulyama ara, mikip pia weik ulyame.

⁴ Mek oplirye banmalya ani, lelim weik nyalirye banmaleba, ninye kekebikirye, ‘Se, amek uanmal ning ara, mikip weik onmale,’ tenenyake. Bukni, dipkoprob olamle mek ara, mikip mitik uka. An mikip arye winilyam ning nirya ara, mikip pia weik arye ulyame. Nun ni Allah Yahweh, anuk im deice umince, aning-aning nirya, mikip arye talimince, Weik Erenanye ulyame.

⁵ Nun ni Allah Yahweh, ance, “Wininamlulume. Aning ara, pia kum wininamlulume. Teleb winina ara, ani,” nyapdeiamsulum yupu nirya ara, pia ati aunamle. Tonda, an si erenyap aik ara, pia telebuk ulule. Malye ning tonok ning babye, kum ulule. An si erenyap aik, pia telebuk ulirye, pia aunamle.