Mazmur 91 - Eipomek

‘Allah Yahweh, elcuk kalikuka melinamsil’ tenen, moronyak ninye ati, nyabuk yupu

¹ Allah ara, aning-aning deice tam talibuka weik erena ap, mikip weik ap ululnye birye, el amu tam unyak ninye nirya ati, kalikuka melipliba, aninye ara, imun kanye bona kum diparyuk, kanye deibuka telebuk unamake. Allah aning-aning nirya deice tam talibuka, Mikip Weik Deiyoknye ulule. Ati, yata ninye do nirya, Allah el amu tam unyak ninye arye, pia ilil asa kum diparyuk, kanye deibuka telebuk unyake.

² Narye, na ni Allah el si Yahweh ati nyanune. Na ni Allah ance nati winipmanto, weik keil aik domica noutamak ulamak touk, nara an erebuka uminyeba, nara an amu tam unamne. Aning ara, talye ati kume, narye an Allah ati, ‘El bidamnye aryuk, melibuka kalikniliba, ikin ning na damak, kum yanamnila anya arye, elce pia lyelonamnile,’ tenebuka unune.

³ Yata ninye do nirya, Allah ati, dib tenebiceura, aning-aning nirya ara, sik opmanto ning dungnubuka yanganamle ning babye, Allah arye yupu sekliba, aning arye kum opsutue. Winipmanto ara, ninye arye maka wena wemikiba, mangkau yo duk dobuka diliba, youlule. Youpliba, ninye arye doprobikirye, batakanyak atonun, Allah arye elti, dib tenenyak ninye ati, melibuka lyelonamsile. Tonda, weik kanye imun uk, ninye weik dilamliba, ninye mutuku-mutuku nirya yupa weik arye dibinyakuk, ayala-yala nirya, nun dam yanganamle ning babye, Allah arye, ‘Na tenena ninye auk diplyak’ tenen, kalikuka lyepdopsiliba, telebuk unamabe.

⁴ Winipmanto ara, ayam mapu, sik nin birye dobuka, el pol amu deibuka irilamle tonun, Allah arye elti, dib tenenyak ninye nirya dobuka, el damak deilinamle. Tonda, sik nirya ara, Allah el mikip weik arye erebuka uliba, el amu tamuk unamlume. Winipmanto ara, el pol mikip arye, anggun nong iripdongopsiliba, kanye lamapdongobuka, nimalya asa arye, el amu tam unamlume. Winiminyeura, Allah arye, pia kum bataknamsile. Winipmanto ara, ninye arye mal oldan talak, ‘Mal biksilyak’ tenen, ting kinikikirye, kelapye dobuka, mal pibalamak touk, Allah el mikip arye, nunti, melibuka kaliksilibuk, opmanto ning, nun damak yalya babye, kum opnamsile. Aning atonun, Allah arye, ‘Ikin ning na amu tam unyak ninye damak yalyak’ tenen, el mikip arye nunti, pia melibuka kalikinamsile. Ati, el amu tamuk unamlume.

⁵ Pia melibuka kalikinamsile ati, lukunyan talak babye, anggun opmanto ning ap, Isa Mutuku Dongonye ap ati, ilil kum unamlulume. Tonda, keting duk-duk talak, mangkau daunmabip bukni, ‘Ninye olamak nang arye, mal arye opnamsiak do?’ tenen, ilil kum unamsile.

⁶ Iniplye talak ninye dipne uk yanamle ning ap, keting noutam talak yanganamle ning ap ati, ilil kum unamsile.

⁷ Atalak ara, ninye yupa weik, seribu nang auk dilamle deice arye, anggun dam dibikce babye, anggunda, auk disuta babye, anggun kum dipnamlume. Tonda, ninye yupa weik, takubarye ribu nang (10.000), anggun sirik tam yanuka dipnamak bukni, anggun Allah el amu tam unamlum ninye ara, mitik dila babye, ton kum saknamsile.

⁸ Anggun winibuka unamlum talak ara, anggun asing arye, amutuku nirya dinmalumba, ‘Sik amalye winilamak ninye, sik wenena ati, dolonyak dekna ati ara, ikin ning doprobikirye, dibinyake’ tenen, eipnamlume. Utenepmunce, sik malye wininyak ninye dipnamaka ara, anggun asing arye elinamlume.

⁹ Anggunce, ‘Allah ara, aning-aning deice tam talibuka, weik erena ap, mikip weik ap ululnye bira, elcuk lyelonamsile’ tenen, elti, dib tenepmunce, el amu tamuk umunyopura, Allah Yahweh arye, pia melibuka kalikinamsile. Tonda, nati, pia melibuka, kalikinululnye, Allah Yahweh arye, anggun babye ton, kalikuka melinamsile.

¹⁰ Winibuka melipsilirye, kaliksilyopura, anggun unamlumak ap, anggun asik ap nirya ara, weik ikin ning ton, anggun damak usilibuk, pia kum dopropnamlume. Tonda, anggun unamlumak ara, kanye imun ning, anggun damak yanuka, anggun nong deice kum upnamsile.

¹¹ “Imun kanye bona ning yalya babye, anggun nong deice kum upnamsile,” nyapmasina ara, talye ati kum nyapsine. Deiyok ara, Allah arye, el amu tam im deice pil don nang, sik malaikat weik arye dopdeipliba, anggun damak, tuba yanuka melibuka, kalikinamsiyake. Tonda, anggun unamlum mutuku ap, banamlumak nirya ara, sik malaikat melipsikirye, “Winiplulume,” nyapsikibuk, sik amu tamuk unamlume.

¹² Amalaikat, Allah pil donanye birye, anggunti melibuka, kalikinamsiyak talak nirya ara, malaikat arye anggun taruk ap, yan ap, nirya talibuka, ulamsikiba, anggun keil yan dum ton, kum duknamsile.

¹³ Malaikat arye anggunti, akunum melipsiceura, bai tam nong weik yu kuse, el si ara singa kuse, dungnubuka ulamlyak bimunya babye, si tobuka kum opnamsile. Tonda, ninye on kwatima dungnubuka, ulamlyak bimunya babye, si tobuka kum opnamsile. Ati ara, ninye si topliba diplamak kwatima ap, weik yu singa kuse ap, talye mangkau kibuka, yanipnamlume babye, kum opnamsiyaka ati, nyapsine.

¹⁴ Allah el si Yahweh arye nyabuk. Dipkoprop, na wipdeiamsinye birye, natibuk kanye deilinulula ati, narye el anye bira, lyelonamne. Lyepropniba, elda na amu tamuk uliba, nara el damuk, pia unamne. Ara, el anye birye, na siuk erenulula anya arye, narye elti, pia melibuka kalikinamne.

¹⁵ Anye bira, el ikin ning doproplirye, kanye imun uplye talak nirya ara, elce, “Na ti melipnilyame,” nyabuka, moropnilyopura, na kekepnirye, elti, pia kalikuka melinamne. Tonda, anye bira, el ikin ning dololamlye ning ati, lyepnirye, el dobuka ereipnamne. El anye bira, erebuka deipnyopura, yuk ninye nirya arye, el tibuk, si erenamake.

¹⁶ Erebuka deipnyopura, el kam una ati, keting tamun weik arye, tonap arepneba, el pia kam unamle. El anye bira, pia kam unamle talak ara, narye elti, lyelonamne. Tonda, narye ninye lyelonun ning nirya ara, elce eibuka kel kinamle.