Mazmur 9 - Eipomek

Allah ara, pia teleb, diksukumuk ulula ati, elti, morona ap, ‘Telebe’ nyana yupu

¹ Daud birye amot sekukce, Allah yupu mot nyana deiyoknye biti, arebuk. Tonda, ‘Yuk mot, el si Mut-Laben ara, el lelim, Laben birye welilba senyak mot atouk, amot babye atonun nyanamlume,’ nyabuk.

² Na kanye talima pum tam nirya ara, na ni Allah Yahweh ati, “Pia telebe,” nyapkine. Allah ance aning-aning nirya talemince, pia deice tam ulumince, Pia Mikip Weiknye ulyame. Ance, pia ninye dopman kum pil ap, pia mikip teleb pil ap dolyam ning ara, ‘Yuk nang ton kekenamak’ tenen, lak nyanamne.

³ Narye an tonok ati, kanye deipnirye, pia kil-kil kanye bobuka unamne. Se, na ni Allah, anda aning-aning nirya talibuka, deice tam erebuka, Pia Mikip Weiknye ulyama ati, an siuk erepnirye, an si ati, “Pia telebe,” nyanamkine.

⁴ Na mal olan nang arye, olyangalamnik talak ara, sik ilil ubukba, tuba tamubuka, bikbik abuka bindobik. An Allah arye, na mal olan nang ati opminye talak ara, bisik noutamuk banmakiba, yan dum dukliba, sakuka poulbikirye, an dam adiparyuk dibinyake.

⁵ Deiyok ara, malye nang arye nati, minin yupu nyaninyak bukni, an pia melinilyama deice arye, sik yupu bokolina deiyok nang arye, atilila yupu kum kekekirye, ‘Kume, anye bira, tuba diksukumuk ulule,’ teneninyake. Tonda, anda weik ninye deiyoknye ulyama ati, an bun ning, el si takhta deice bukmince, ance nyasilyam yupu, aulye touk kibuka, dipkoprob uk yupu lipsisikuka bokolisilyame.

⁶ Yata mutuku nang do nirya, yuk-yuk mutuku nang ati, ance sik malye ning talibuka wininyaka ati ara, anggunti, ‘Aning ara, pia kum wininamlume,’ nyabuka wenelyame. Tonda, sik pia malye weik unyak nang ara, ance akunum obuka sirya daklume. Anang ati, obuka sice buklopminyopura, yuk nang nirya arye, sik si ton pia kum teninamake. Pia malye unyak nang ara, yuk nang arye, sik si ara, luba kinauk unamake.

⁷ Aning ati, obuka sice buklopminyopura, yuk nang nirya ara, sik si ton pia kum teninamake. Pia malye wininyak nang ara, yuk nang arye sik si ara, luba kinauk unamake. Sik malye winilamik nang arye domik asik nirya ara, akunum ulubuka, sice bukloplume. Ati, anang ap, sikce domik asik nirya ap ara, sice bukloplumba, yuk nang nirya arye sikti, tuba tamubuka, pia kum teninyake. Luba kinauk unyake.

⁸ Bukni, nun ni Allah Yahweh, ance aning-aning nirya talibuka, weik ninye deiyoknye ubuka, pia unalame. Ati na Allah arye, tahkta deice buknirye, aning-aning nirya talepnirye, ‘Aning ara wininamlume, aning ara, pia kum wininamlume,’ nyasin touk ubuka, pia diksukum yupu uk, lipsisikuka bokolinamsine.

⁹ Allah arye, na tahkta deice buknirye, aning-aning nirya talepnirye, ‘Aning ara, wininamlume, aning ara, pia kum wininamlume,’ akunum nyapdeipsise touk ubuka, tukwak mutuku unyak nang, mutuku sirya, im sirya nirya ara, pia diksukumuk yupu lipsisikuka bokolinamsine. Atonun, tukwak nang, mutuku sirya, im sirya nirya ara, nunce winilamap touk ubuka, yupu lipsisikuka bokeipsilirye, wenepnamsile. Ati, ton tam nang ati, ‘E, sikda na kayapu’ tenen, kum bataknamle. Tukwak nang nirya ara, bita lakak arye lipsisikuka yupu bokolisulule.

¹⁰ Yata, bona uto-toa talina kum unyak nang do nirya, yuk nang arye yanibikcopura, amu tam unyak bukni, Allah Yahweh arye anang ati, pia melibuka kalikinamle. Ati ara, kanye imun weik ning, sik dam yanamle talak ara, Allah arye sik ikin upliba, amu tam unyak nang ati, weik tonun melibuka kalikinamle!

¹¹ Se, nun ni Allah Yahweh, an si ati akunum bikamik nang arye, an siuk tenebikirye, anti diba tenebuka, telebuk unamake. Aning deiyok ara, ani. Ara, yata nang do nirya, sikce anti, ‘Elcuk melipsutue’ tenen, anti ekinyak nang ara, ance pia kum bataklume. Tuba tenepsimince, pia melisilyame.

¹² Ninye nirya kekepnululume! Nun ni koproba Allah Yahweh ati, “Anda pia telebuk ulyame,” nyabuka, el si erelulumce, el si erebuka kina ati, kanye kil-kil mot ara, Sion mutuku deice arye, amot nyanamlume. Allah mikip deice arye pil dolul ning ara, tukwak nang mutuku sirya, im sirya nirya, unyak nang, sik kekenak nirya, lak nyalbinamlume.

¹³ El ti nyanamluma deiyok ara, ani. Dan mutuku noutam do nirya, ton nang arye, yuk nang ati, obikiba donamake. Winibikiba, Allah eiplirye, kwang daknamle! Yu nang arye, yuk nang ati, yanibikirye, ikin ning, sik nong deice deibikiba, engelamikcopura, Allah kekeplirye, luba pia kum kilule.

¹⁴ Se, diba na ni Allah Yahweh, ‘Na malye winilamse ning ati, pia malye winiluleʼ tenen, adiparyuk wenepnutum bukni, ‘Bico tenepnutumce, teleb kipdeipnutum’ tenen moropkine. Yu nang arye, nati, ‘Anye bira pia nun lik,’ tenepnikirye, ikin ning na nong deice delininyak ning ara, ance moubuka dinunilyame na nio! Sikce ikin weik kipdeipnikiba, nara akunum dipmatinyeba, kuna bisik bublan dam binmatini bukni, ancuk, na nong dobuka erepdeipnulumba, kam tuba unune.

¹⁵ Wininilyam ning ara, talye ati kuma. Deiyok ara, ‘Anye bira, na Allah arye pia teleb kibuka winin ning tuba lak nyanamle’ tenen, lyelonilyame. Allah ance pia teleb winilyam ning ati, lak nyanamnak ara, Yerusalem mutuku noutam antanap dongobuka domik keil poka noutam, bublan botcamikak, ninye nirya bulunyak sukum arye lak nyanamne. Nyapnyopura, sik nirya kekebikirye, ‘Se, dipkoprob Allah arye lyesulule,’ nyabuka, an si ati erenamkiake.

¹⁶ Sik mutuku sirya, im sirya nirya, yala yuk-yuk unyak nang nirya ara, ‘Ninye opnamap’ tenen, kintinibik ning ara, aning sik nong deiceuk tamubuka yanamle. Winipmanto ara, ninye arye ‘Kam ning opnuyap’ tenen, tuku palyamikca pum tam bukni, mangkau kanye bobuka, banmalya ani, sik mining lukamice tuku pum tamuk sakuka olanyake. Atonun, ninye arye ton, ‘Bai basam do? Yua basam do? Youpnamleʼ tenen, tapu dungnubuka welamak touk, ayu nang babye, sikce yuk nang ati, malye ning dobuka deilinyak nang ara, tamubuka yalirye, sik nong deiceuk upnamle!

¹⁷ Allah Yahweh arye, ‘Ninye tukwak nang, mutuku sirya, im sirya nirya unyak nang arye, kel biknamak’ tenen, el ulul ning ara, akunum lak nyabukba, nunce elinyabe. Tonok ning ara, elce, ninye tukwak nang nirya ati, el yupu nyasilye touk, moubuka yupu lipsisikuka bokeipnamsile. Winipnamsila ati, sik talima noutam arye, malye wininyak nang ara, malye winina deiceuk unyakce, kintinilinyak ning ara, sik bidamnye tamubuka yanamle! Ara, sik taruk deice arye, malye wininyak ning ara, akunum kintinibika ati, sik bidamnye tamubuka yanamle!

¹⁸ Sik kanye pum noutam arye, malye wininyak nang ara, akunum dibikcopura, adiparyuk, uku bisik, el si ara Sheol mutuku binuka unamake. Tonda, yala yuk-yuk nang do nirya, yuk-yuk mutuku unyakce, Allah ati, diba tenena kumce, elti, pia kum tenenyak nang babye, akunum dibikcopura, Sheol mutuku uk binuka unamake.

¹⁹ Aning-aning nirya kum talibikirye, talye bona uto-toa talina kum unyak nang ara, Allah arye, pia luba kum kinamle. Aminyan talak ara, sik pia ikin kanye bobuka, unyak nang ton lyepnamle. Atonun, sik pia bona uto-toa talina kum nang arye, ‘Se, nun babye teleb uptibye’ tenen, pia patanauk ulul nang ara, pia min kum, kum danamle. Kume, Allah arye anang babye, lyepnamle!

²⁰ Ati ara, nun ni Allah Yahweh anti moropkiabe. Ara, ‘Talye tukwak mutuku, im sirya, mutuku sirya nirya unyak nang arye, ‘Winipnamabe,’ tenenyak ning arye, ‘Yuk ning nirya ara, bisiplyak’ tenen, an Yahweh arye, anang wenepmince, sikti, yupu sekenalame. Tonda, yala yuk-yuk nang nirya ara, mutuku sirya, im sirya nirya, yuk-yuk daunyak nang ara, an dam yakcopura, an Allah aryuk sikti, yupu lipsisikuka bokeipmince, wenepnalame.

²¹ Tonda, ‘Sik bidamnye arye, kanye erepdakcak’ tenen, dipkoprob Allah Yahweh ance, sik talima noutam ara, ilil weik un ning arepminba, ilil weik unamle. Ara, ance arepminba, sik yala yuk-yuk nang nirya arye, ‘E, diba, nunda mikip weik nang kum unyabe. Talye tukwak nang dem unyabe,’ tenebikirye, bikdanamake.