Mazmur 89 - Eipomek

Allah arye tukwak ninye ati, pia weik arye bico tenesulula ati, mot nyabik yupu

¹ Amot ara, ninye ton el si Etan, Ezrahi yalanye birye nyabuk mot ara, ani.

² Na ni Allah Yahweh, ance nunti bico tenesiminya ati, narye wini talak arye, doryanamle talak nirya, an siuk pia ati erenamkine. Ara, mot nyana deice aniryuk nyanamkine. Nyanamkina ara, talye ati kume. Ance nunti batakna pia kum diparyuk, pia weik arye bico tenesimince, pia moubuka teleb kilisiminya ati, nyanamne. Tonda, ayupu bobuka, nunce deibibyeba, dadeipdanin banamak ninye, sik dam laka nyabuka peterenamne.

³ Ance nunti bico tenesimince, melisilyam ning ara, ton pia kum kum danamle. Pia ati aupnamle. Winipmanto ara, im deice ulul ning nirya, pia aubuk touk, Allah ance nunti, bico tenesiminya ara, pia ati aupnamle. Bana kum, pia darabuka aubuk touk, an mikip ara, atonunuk ulule. Ara, Allah ance, ‘Na tenena ninye, pia kalikuka melinamne,’ nyabuka, nyalin yupu im deice arye, akunum nyapdeiamsuluma atia.

⁴ Ance nyapdeiamsulum yupu ara, nun apu koproba Daud binyak, ance wipdeiamlumnye, elti, nyapdeiamlume. Ance nyapdeiamlume. “Narye wipdeipsinye, na amu tam pil dolulnye Daud biti, pia kalikuka melinamne,” nyabuka, nyalin yupu nyapdeiamlume.

⁵ Tonda, “Daud ance deipminba, dadeipdanin banamak nang arye, an taliplum ning nirya, sikce pia talinamake,” nyabuka, nyalin yupu ton nyapdeiamlume. Tonda, “Daud an ap, ance deipnalam nang ap nirya ara, ninye deiyok nang bun ning deice, bukikirye, amutuku ninye nirya, pia talinamake. Ara, doryanamle talak nirya ara, yuk yala nang arye, Israel yala ninye ara, kum talinamake. Akunuma nyana ati, Selah,” nyapne.

⁶ Nun ni Allah Yahweh, ance weik mambul pil weik donyaka ati ara, im deice tam kwepdeaimlum ning ap, im deice unyak nang, malaikat ap arye, an siuk pia erekinyake. Im deice umince, ninye kum winipmanto ning nirya ulyamnye ati, im deice unyak nang nirya arye, kanye deipkikirye, antibuk si erekinyake. ‘Allah Yahweh arye, ‘Wininamsine,’ nyasilye yupu nirya ara, tonok ning babye batakna kumce, aning nirya, pil dosulule. Nun tibuk moubuka kalikisilirye, teleb ulisulule,’ tenebikirye, an siuk pia erekinyake.

⁷ Diba, nun ni Allah Yahweh, an uminye mutuku im deice ara, Allah an uminya atonunye ton, kum ulule. Tonda, im deice unyak malaikat nirya babye, an touk ton kum unyake. Allah Yahweh, an uminya atonunye ton, pia kum ulule.

⁸ Allah an pil donyak malaikat, pia mikip weik nang, im deice unyakce, Allah antibuk ilil ululba, diba tenekinyakce, an siuk erebuka, si erekinyake. Sik im deice unyak malaikat nirya ara, weik mambul nang unyak bukni, nun ni Allah Yahweh anda, pia weik mambulnye ulyame. Sik im deice unyak malaikat nirya ara, an dam anyuk antanap dongobuka unyakce, an siuk erekinyake.

⁹ Diba, nun ni Allah Yahweh, anda aning-aning nirya, deice tam talibuka weik kwemdinanye ulyame. Allah Yahweh anda, aning-aning nirya taliplumce, im deice yin talin malaikat nirya, sik pia weik deiyoknye ulyame. Allah an uminya atonunye, ton kum ulule. Yatanye, an mikip uminya atonunye ton ulul do? Pia kume. Ance, ‘Wininamne,’ nyabuka, nyalisilyam yupu nirya ara, tonok ning babye batakna kumce, pia dipkoprob winisilyame.

¹⁰ Tonda, na ni Allah, ancuk tenepmunyopura, laut mekwen deibukce, mikip welelul bukni, ancuk kalikuka dilyame. Anya arye, ance tenepminye touk, mek langdibuka, pia weik arye langdipmalyane, ila tuba tamubuka, mitik kiplirye kololamle.

¹¹ Weik laut mekwen deibuka noutamak, weik mek pum bal ikan, el si ara Rahab, daulamuk ning babye, Allah ancuk obuka, sice bukloplume. Tonda, Allah an weik taruk mikip deice arye, an mal olan dam ninye nirya, akunum malye kibuka, yuk-yuk yakdonoklyame.

¹² Im deice ap, im deice ulul ning nirya ap, tukwak ap, tukwak mutuku noutamak ulul ning nirya ap ara, ancuk kwepdeipluma ati ara, an bidamnye aryuk, aning ayala-ayala nirya, talibuka ulyame. Ara, an ninguk ulule. Tonda, tukwak mutuku ap, tukwak mutuku noutamak ulul ning nirya ap, tonda tukwak noutamak unyak ninye nirya ap ara, ancuk kwepdeipluma ati, tuba talilyame.

¹³ Tonda, Allah ancuk eitam ap, outam ap nirya, kwepdeiplume. Winipluma ati ara, Tabor mutuku unyak ninye ap, Hermon mutuku unyak ninye ap, nirya arye, antibuk kanye deibuka winilikinyake. Amutuku unyak ninye arye, mot nyabuka, an si atibuk erekinyake.

¹⁴ Allah an taruk mikip weik deice arye, ninye kum winipmanto ning nirya winilyamnye. Tonda, an taruk tatang deice arye, mikip weik pil dolyame. Tonda, an sirik tam taruk, pia mikip weik anya arye, erebuka dolyame.

¹⁵ Allah ance, aning-aning nirya ara, mikip weik arye erebuka dolyamce, dilyame. Ance aning nirya erebuka dopluma amu tam aik, ayukumna yo atonun ara, pia diksukum una ap, pia dipkoprob yupu nyana ap, ulule. Tonda, ance nunti, batakna kum diparyuk, weik arye bico tenesilyam ning ap, ance, ‘Wininamsine,’ nyapsulum touk, winisiminye ap nirya ara, aninguk ulule.

¹⁶ Yata ninye do, nirya ara, kanye teniltona kum diparyuk, pin-pin kanye bobuka, Allah an siuk erenamkiak ninye ara, ance pia telebuk kilinamlyame. Allah Yahweh ance, an weik dirin ning ara, sik aninye nong deice deliminyeba, adirin deice arye, an dam anyuk yanganamake.

¹⁷ Aninye nirya ara, an si ati, tuba tenebikcopura, wini talak arye doryanamle talak nirya, pin-pin kanye bobuka, telebuk unamake. Tonda, an pia diksukum telebuk winiminya ati, pia kanye deibuka unyake.

¹⁸ Ati, ance nun lyepsulumce, an pia weik dirina dobuka, nun deice delisilyame. Tonda, ance nunti, kanye deipsuluma deice aryuk, nun mikip arepsimince, teleb kibuka delisilyame.

¹⁹ Aning ati ara, nun ninye deiyoknye Raja ara, nun ni Allah Yahweh, ance wibuka deiplumce, arepsulume. Atonun, nun Israel ninye wibuka akwamsuluma deiyoknye bira, nun ni Allah, an tonok Weik Erena Deiyoknye ulyame. Allah an dam ara, malye winin ning tonok babye, pia kum ukulule. Anda, pia Telebnye dem aniryuk, nun Israel ninye ati, kalikuka melisilyame.

Allah arye Raja Daud ati, ‘Na tenena ninye, Israel yala ninye talinamle’ tenen, wibuka deiamuka ati, nyabuk yupu

²⁰ Minop talak an yupu lak lena deiyoknye tonok ati, lengdar mana deice arye, yanuka nyapdeiamlume. Ara, “Talye daunmace ninye kan-kan arye, tonoknye ton, narye wipdeipnirye, narye nyapniba, anda na yupu lak lenanye birye, el kisok deice minyak mek dikeipminba, Israel ninye sik deiyoknye Raja unamle,” nyapdeiamlume. “Anye Daud bira, ninye noutamak daulamlya ani, narye erepdeipniba, ninye deiyoknye kiplirye, Israel ninye talibuka unamle,” tenen, nyapdeiamlume.

²¹ Tonda, ayupu ton nyalamlume. “Narye, na pil donanye Daud, akunum wipdeipsa ati, ance el kisok deice minyak mek dikeipnulyame,” nyapdeiplume.

²² “Ati tuba-tuba na mikip weik taruk arye melipniba, el babye mikip asa arye unamle. Atonun, narye Daud talipniba, na amu tamuk, mikip arye pil donamle.

²³ Na Allah arye Daud biti, melipnyopura, el mal olan nang arye, kum yanuka obuka sirya daknamake. Tonda, malye winina nang arye, elti, kum yanuka malye kipnamake. Narye Daud biti, melipnyopura, yuk mutuku ninye deiyok nang arye, elti, ‘Nun si erena ati, yo bok uang weik arepsilyame,’ nyabica babye, kum arenamle.”

²⁴ Ati, el mal olan nang nirya ara, narye obuka kum kipdeipnamne. Tonda, elti, ‘Opnuyabe,’ tenenyak nang nirya, obuka sirya daknyopura, yata nang arye, elti, mal penamak do? Kume nyapne.

²⁵ Winipnirye pia ati, narye el atibuk bico tenebuka melinamne. Winipniba, elce nati, tuba si erenilyopura, narye elti, mikip weika arye arepneba, yuk mutuku ninye deiyok kibuka unyak nang nirya ara, elcuk erebuka talinamle.

²⁶ Na Allah arye elti, mikip weika arye arepneba, Daud birye talinamle mutuku ara, keting kumulban tam deibuk. Pia weik laut mekwen arye dipdongobuka, keting yangan tam Efrat mek ap, Tigris mek ap, otam nirya ara, talinamle. Anyapman mutuku nirya ara, elti, arepneba, elcuk talinamle.

²⁷ Atalak ara, Daud birye nati, nyanamle. “Anda na ni koproba Allah ulyame. Anda na ni Allah umince, nati melibuka lyenilyame. Ton winipmanto ara, na ni Allah, anda weik keil bulamle atonun kibuka uminyeba, nara an amu tam unamne,” nyanamle.

²⁸ “Na Allah arye, anye Daud ati, na mi koproba dunye atonun kipdeipnamne. Winipdeipniba, Daud elce mutuku-mutuku nirya, ninye deiyok kibuka unyake nang nirya ara, amu kibuka, elda pia deice tam arye, talibuka unamle. Na Allah arye Raja Daud ati, ninye deiyoknye kibuka erepdeipniba, yuk mutuku nang nirya, sik deice tam erenanye unamle.

²⁹ Tonda narye, ‘El tibuk pia bico tenebuka melinamne,’ nyapdeamsi touk, tuba-tuba melipniba, mikip arye unamle. Tonda, na Allah arye, Daud biti, ‘Wininamkine,’ nyalilamse yupu nirya ara, dipkoprob pia wininamle ati, aning ara, kum kum danamle.”

³⁰ Elce amutuku-amutuku nirya talinamle talak arye, dipdongobuka doryanamle talak nirya ara, Daud birye deipliba, dadeipdanin, banamak nang aniryuk, el bulye sukum punubuka bunamake. Ara, na im deice unirye tukwak mutuku nirya talinamne talak nirya, Daud el yala nang arye, amutuku nirya talinamake.

³¹ ‘Wininamake,’ tenepse bukni, elce deipliba, dadeipdanin banamak ninye nirya arye, na nyapse yupu yanibuka batakikcopura, dipkoprob sik anang ati wenepnamne. Narye, ‘Wininamlulume, aning ara, kum wininamlulume,’ nyapdeiamse yupu, batakikirye, yanibikcopura, narye anang ati wenepnamne.

³² Sikce, ‘Allah nyapdeiamsuk ning ara, ani’ tenen, moubuka kum tenebikirye, talye-talye tenebuka winibicopura, aninye wenepnamne.

³³ Ara, narye sikti, wenebuka opnamana deiyok ara, sik aninye arye, na yupu yanibuka bataknikirye, malye wininamak dekna ati, ikin weik ning arepneba, dopropnamake. Ara, sik aninye ara, kama arye kulabuka opnamne.

³⁴ Anggun malye winin ning ati, wenepnamsin bukni, Daud birye deipliba, dadeipdanin banamak ninye ara, narye pia bico tenenamne. Winipnirye Daud biti, ‘Winipnamkine,’ nyapdeiamse ning ara, kum bataknamne. Tuba tenebuka melinamne.

³⁵ Narye elti, ‘Winipnamkine,’ nyabuka, nyalilamse ning ara, ton min kum kum kipdeipnamne. Tonda, anyapdeiamse ning ara, tonok ning babye na babye ton, tamubuka kum dopropnamne.

³⁶ Tonap, arup arye dukdongobuka nyapsin ning ara, dipkoprob pia ati aupnamle. Allah nara, Pia Telebnye ununa deice arye, ayupu nyapsine. Narye Daud biti, ‘Wininamkin,’ nyabuka, nyalin yupu deice nyalilamse ning ara, talye kum nyaplomse. Anyalamse ning ara, tuba tenenamne.

³⁷ Ara, elce deipliba, dadeipdanin banamak ninye nirya arye, sik ni koproba Daud birye talilamuk ninguk, talepdanin banamake. Tonda, sikce na dam unamak ning ara, keting deiplirye, amutuku noutamak nirya, dirina ulamle touk, Daud el yala nang arye, amutuku noutamak nirya talibuka, ninye deiyok nang unamake.

³⁸ El yala nang arye, amutuku talilbanamak talak nirya ara, yata im deice ulirye, el dirina pia ati, aulamle touk, ubuka ninye deiyok nang kibikirye, talipra banamake. Akunuma nyana ati, Selah nyapne. Allah arye nyabuk.

³⁹ Nyabukopura, amot nyabuknye, el si Etan birye, tamubuka nyabuk. Nun ni Allah arye, ayupu nirya nyapdeiamsulum bukni, wini talak ara, ance nun ninye deiyoknye Daud biti, akunum derepmalame. Winipmalama deice arye, ance wipdeiplumnye Daud ati, ‘Na like,’ tenebuka batakmalame.

⁴⁰ Ance an amu tam pil donanye biti, “Winipnamkine,” nyabuka, nyalin yupu nyalamlum ning ara, akunum bataklume, tenepne. Winiplumce, el ninye deiyoknye kina ati, kisok deice deiamuk ning ara, dobukaplumce, ance bental pum bisik dongoplume.

⁴¹ Tonda, el ulul mutuku, cang weik keil poka domik ning ap, kat ning deice arye deibuka, teleb aik domik ning nirya ap ara, ance ulubuka, kum kipdeiplume.

⁴² Winipluma deice arye, abisik banyak ninye nirya arye, el ‘Naʼ tenen, ning nirya, alubuka dolonyake. Wininyakce, sik kwit capu, yuk nang ati binuka nyabikiba, sik nirya arye elti, nalibuka akutunyake.

⁴³ Ance el mal olan nang ati, mikip arepminba, ‘Obuka sirya daknamabe,’ tenenyake. Winipluma ati, el mal olan nang nirya, teleb kanye bobuka unmake.

⁴⁴ El ninye ona ati, bolamuk parang ya ara, Allah ance, si kau kipdeiplume. Tonda, elce, ‘Na mal olan nang olbinune’ tenen, kintinilye talak ara, Allah ance kum melilyame.

⁴⁵ Tonda, el mikip arye taleamuk ning nirya ara, ance kum kipdeipmalame. Tonda, el ninye deiyok kibuka bululak ara, ance dobuka, talye tukwak donokmalame.

⁴⁶ El kamnye atonun tuba ulamtu bukni, Allah ance, el kam tuba una ouku ara, tamubuka mitik tonun kiplumba, wisinye atonun akunum ulule. Tonda, alye dakalan ninguk, el deice deiplumba, alye asa uk unmale. Akunuma nyana ati, Selah nyapne.

⁴⁷ Na ni Allah Yahweh, yata barye talak nirya arye, na dam arye leibuka yukak kipropnalam do? Ance nati, yata talak karin ton nirya, duknupnamnilam do? Tonda, yata talak karin ton nirya, an yu ara, uku buk dilamle touk kibuka, na deice deipniminba, dinamnil do?

⁴⁸ Na ni Allah, na moropkin ning ara, na kam una ati ouku ara, lo weik kum upnile. Tonda, Allah ance kwepdeipsulumba, unyap kili sal nirya ara, mikip kum ninye uk unyabe. Nun kam unyap talak nirya ara, ‘Aning ara mambule, winibuka wininamabe,’ tenena kumce, talye kanye bobuka unyabe.

⁴⁹ Ati, yatanye ton dipna kumce, kam tuba upra banamle do? Tonda, yatanye ton, ‘Nara, kum dipnamnanye’ tenen, lyepdandoptu do? Aning ara, kum winipmanto ati, akunuma nyana ati, Selah nyapne.

⁵⁰ Diba na ni Allah Yahweh, an min yuma talak arye, nun ninye ati, ‘Na tenena ninye unyake,’ tenelamsulumce, weik arye bico tenelamsulum ning ara, akunum lubakipsulum do? Tonda, nun apu koproba Daud ati, “Wininamkine,” nyabuka, nyalin yupu nyamlum ning ara, kum dukdongopnamsilam do? Aning ara, akunum batakmasilam do?

⁵¹ Diba na ni Allah Yahweh, ance pia tenepnamlyame. Na, an amu tam pil donanye bira, yata deiyok ati bataknulumba, alye weik dakalanun do? Anyapne ning ara, talye ati kume. Yuk mutuku ninye, ayala-ayala nirya arye, natibuk, yep-yep abuka, ikin ning, na nong deice delininyaka ati, nyapne.

⁵² Tonda, na ni Allah Yahweh anti, ‘Nun like,’ tenekinyak ninye arye, ninye deiyok kina ati, wipdeiplumnye Daud ati, sikce malye yupu nyabuka yep-yep anyake. Ara, dan sukum do nirya, el banmalebuk, eibikirye, yep-yep abuka, nalinauk unyake.

⁵³ Bukni, ikin unilya babye, na ni Allah Yahweh, an si atibuk, pia erebuka kinamkine. Telebe akunuma ati, amin nyapne.