Mazmur 88 - Eipomek

Imun kanye weik bobuka, un talak arye, Allah ati, morobuk yupu

¹ Sik Korah yala nang arye deiamiknye arye, Mazmur mot yupu sekuk. Ara, Allah yupu mot nyana deiyoknye arenamika ati, amot ara, sekeibuk. Tonda, amot yupu ara, ‘Yuk Allah yupu mot, el si ‘Leanot mot’ nyanmakceba, el lelim nyalamle touk kibuka, amot babye atonun nyanamak’ tenen, sekuk. Tonda, Ezrahi yalanye, el si Herman birye, amot yupu sekdeibuk. Ara, ‘Israel yala nang nirya arye, aning ara kel bikinamake,’ tenebukce, sekuk. Herman birye sekuka nyabuk yupu ara, ani.

² Se, na ni Allah, an si ara, Yahweh, ancuk na Lyena Deiyoknye ulyame! Ara, lukunyan noutam nirya ara, an damuk yanirye, ‘Na ni Allah melipnilyame,’ nyabuka, morokinye talak nirya ara, ancuk, yana melibuka lyelonilyame.

³ Ati ara, narye an dam yanuka morokinye talak nirya ara, ‘Na morokinye yupu ara, ancuk kekenamnilam’ tenen, moropkine. Diba, ‘Narye morokinye talak nirya ara, an amul arye moubuka kekenamnilam’ tenen, moropkine na nio!

⁴ Ara, talye ati kum bukni, deiyok ara, na kanye talima noutam ara, ikin weik unulula ati, moropkine na nio! Tonda, wini talak ara, nara akunum dipmanto kipmana ati, akunum dipnyeura, sik min talak arye akunum deibikceura, weinyak nang unyak mutuku, el si ara Sheol mutuku, amutuku noutamuk akunum wekmanto unune.

⁵ Wini talak ara, yuk nang arye, nati teneninyake, ‘Kume, anye bira, akunum dipnaman nang ulamak atonun ulule,’ teneninyake. Ati diba, ninye dibikcopura, yuk nang arye anang bobuka, tuku lukikceura, aminyan talak anang ton ap kum melipmanto unyak atonun, wini talak ara, na babye atonun unune.

⁶ Ara, ninye dibikcopura, yuk nang arye, ‘Kume, sikda ninye akunum diamik mutuku noutamuk bindobika ati, dauplye. Nunce sikti, tuba kum meliptibye’ tenen, bikisinyak atonun akunum unamne. Ara, ninye dibikcopura, yuk nang arye, ‘Kume, sikda ninye akunum diamik mutuku bindobika ati, dauplye, nunce sikti, tuba kum meliptibye’ tenen, bikisinyak atonun akunum unamne. Anang akunum dibikceba, tuku lukikceura, daulamikca ani, oketing tamun noutam, sik akunum deiamik nang, tuba kum tenenyak touk, na babye atonun wininune. Na babye tuba pia kum teninyaninyake. Tonda, na kanye ara, ance ton nang ara batakmince, pia kum melilyam touk, na babye atonun, batakniminyeba, tuba kum melinilyame na nio!

⁷ Ara, ikin weik unulula ati, winipmanto ara, ance na dobuka, ninye akunum dipmakce nang tuku lukikceura, sik unyakak, tuku pum tamuk akunum dongobuka, ulamak nang atonun unune. Winipmanto ara, weik karu tuku pum bisik, pia unyakak, akunum dongobuka ulamak atonun, tuba unune.

⁸ Ara, na malye winilamse ning wenena ati, yu weik upkukba, na nong deice, ikin ning pia weik arye deipnulume. Ara, an yu deice arye, ikin weik arye areniminyeba, nara kum winipmanto unune. Winipmanto ara, laut mekwen noutam, mek weik arye deibuka, welepnin yangalamle atonun, ikin ning ara, na dam tuba yanganulule.

⁹ Tonda, an Allah arye, na wenena ati, an pil dosiminya deice arye, na kayapu nang ap, na dam unyak nang ap arye, ‘Kume, anye bira, nun ap neika pia kum unamabe’ tenen, batakaninyake. Winiminya deice, sikce nati, eipnikirye, ‘Se, anye bira, el ikin weik ulya ara, mambul weik’ tenen, ilil pia weik uplyeba, sikce, ‘Kume, nun ap, el ap neika kum uptibye,’ tenekirye, na bataknikirye, leipdakuka yukak binuka unyake. Ikin deice weik ununa ati, winipmanto ara, wenen aik pum tam dongobikiba, bai tam kum binmanto ulamak touk unune.

¹⁰ Aning nirya ati ara, na talima noutam arye, uk dinilyeba, engenauk ununa ati, na asing ara, pia uk dinulule. Ati, na ni Allah Yahweh, asum-asum nirya noutam ara, “Naio melibuka lyepnilyame,” nyabuka, antibuk morokunune. Ara, ‘Allah aryuk melibuka lyepnutu’ tenen, tuba-tuba na taruk erepnirye, antibuk morokunune, na nio.

¹¹ Na nio moubuka tenepnilyame. Akunum diamikak, tuku lukik nang ati, melilyam do? Kume, anang ati, tuba kum melilyama ati, ‘Na dipnun’ tenen, moropkine na nio! Aning atonun, akunum diamik nang, sik kanya ara, ila tamubuka bukikirye, an dam yanuka, an si ati erekinyak do? Kume, aning babye kum winipmanto na nio. Ati, ‘Na dipnyak’ tenen, melibuka lyepnilyame na nio!

¹² Tonda, ance an tenen nang ati, bico tenesimince, “Tuba teleb kilinamsilame,” nyabuka, nyalin yupu deice arye nyapdeiamsulum ning ara, sik akunum diamikba, akunum tuku lukamik nang, tuku pum tam arye ton, ayupu nirya ati, tuba laka nyanyak do? Kume, aning babye kum winipmanto. Aning atonun, akunum diamik nang unyakak, aning-aning nirya kum kipnamle mutuku, el si ara Abadon mutuku, noutam arye, sik diamik nang arye, “Allah arye nyamuk touk, dipkoprob ulule. Elce pia kum batakasulule,” nyabuka, an si erekinyak do? Kume, kum wininyake.

¹³ Tonda, akunum diamik nang unyakak, pia unyak noutam arye, “Allah arye, el pil dolul ning ara, pia telebe,” nyabuka, an si ton erekinyak do? Kume, aning babye, pia kum wininyake na nio. Tonda, ance pia diksukum kibuka, telebuk pil dolyam ning nirya ara, akunum diamikba, aning-aning nirya ara, lubakikirye, pia kum tenipmanto ulamak nang arye, laka nyanamak do? Kume, aning babye, kum winipmanto.

¹⁴ Sik akunum diamik nang ara, an winilyam ning, pia kum laka nyapting bukni, na ni Allah Yahweh, narye antibuk, “Se, na melibuka lyepnilyame,” nyabuka, engena deice arye, morokunune. Ara, beren tam talak nirya ara, na adiparyuk mapmanya ani, bukuka, anti, “Naio, ancuk melibuka lyepnilyame!” nyabuka, moropnyeura, narye morokinye yupu ara, an dam yangalule.

¹⁵ Bukni, na ni koproba Yahweh, yata ning deiyok ati, ance nati tuba batakanimince, yuk pera mutuku atonun donoknulum do? Tonda, yata ning deiyok ati, an urasin ara, lelipdopmince, na tam tuba kum dinilyamce, pia kum melinilyam do?

¹⁶ Na kanye ara, na mitik mapu ulamse talak arye dipdongobuka, danoutam ulamse talak nirya ara, imun kanye bobuka ulamse ati, atalak ara, na adiparyuk, akunum dipmanto tuba ulamse. Ara, na kam ulamse talak babye, wini talak babye, ance weik ikin ning, na deice delilamnulumba, ilil weik unulula ati, ‘Se, yata wiriptibye do?’ tenen, imun kanye bopsirye, teniltonauk unune.

¹⁷ Tonda, winipmanto ara, weik ipna ibikceba, uku arye aning-aning nirya diplirye, sirya daklamle touk, an yu weik ulula ati, na wenena ati areminye ning ara, na deiceuk yanganulule. Ara, na malye winilamse ning ati, dekna weik mambul ning dobuka, na deice wenebuka arenilyam ning arye, na obuka sice bultakanilirye, sirya dakanule.

¹⁸ Ara, asum-asum nirya noutam ara, na wenena ati arenilyam ikin ning ara, na dana-dana tam nirya, antanap dongobuka yanganulule. Winipmanto ara, weik mek opnin banmalirye, dana-dana tam ulul ning nirya dilamle touk unulule. Ara, tonok tam arye kum yanganulule. Aning kum bukni, na dana-dana tam nirya arye, aikin ning na dam yanganilirye, dinikilongonulule.

¹⁹ Se na nio! Ancuk ikin ning weik arye arenilyama deice arye, nati pia bico tenelamnik nang ap, na kayapu nang koproba ap, na dam unyak nang ap, min arye akunum kekamsirye, na ap neika yupu taleamupu nang ap nirya ara, akunum batakika ati, nara pia kunuknak pum tam atonun unune na nio. Nara, pia ikin weik unulula ati, an Allah tonok morokunune na nio!