Mazmur 87 - Eipomek

Allah arye wipdeibuk mutuku Yerusalem ati, mot nyabuk yupu

¹ Korah el deibukba, deipdanin balamik ninye arye nyalamik mot ara, ani. Allah elce, ‘Amutuku deice, na si deipnamne’ tenen, wipdeibuk mutuku, malye ning tonok babye pia kum ulul mutuku ubuk. Amutuku deice ara, Allah Yahweh arye dobuka deibuk mutuku, weik kota kintinip deibuk.

² Israel ninye unyak mutuku noutamak nirya ara, asik weik adolamik bukni, amutuku nirya ara, mitik mambule. Bukni, Allah Yahweh arye, Yerusalem mutuku ati ara, ‘Amutuku weik mambul mutuku ubuk,’ tenelule.

³ Se, Yerusalem mutuku noutamak ululum ninye ara, kekeplulume. Allah el si eren aik, sik weik asik kota noutamak ulula ati ara, ninye nirya arye, sik kota ati, weik mambul yupu nyanyakce, si erenyake. Akunuma tenena ati, Selah nyapne.

⁴ Pia pera mutuku unyak ninye ara, Mesir mutuku ninye ap, Babel mutuku ninye ap ara, Yerusalem mutuku ati akunum kekebuka kel kiamika ati ara, aninye si sekelina noutamakuk, sekuka deipnamne. Tonda, Pilistea mutuku unyak nang ap, Tirus mutuku unyak nang ap, Etiopia mutuku unyak nang ap, amutuku-amutuku unyak ninye nirya ap ara, Yerusalem mutuku ati, kekebuka kel bikiamika ati, sik babye, ‘Yerusalem mutuku unyak ninye noutamakuk, tabakuka unamabe’ tenen, patalule.

⁵ Aning ati ara, Yerusalem mutuku ati, ninye nirya arye, “Nun babye amutuku unyak ninye uptibye,” nyanamake. Tonda, yatanye do nirya, Yerusalem mutuku noutamak arye, deibicenye bira, yuk ninye nirya arye, elti, si erenamake. Allah Yahweh aning-aning nirya deice tam talibuka, Weik Erenanye birye, Yerusalem mutuku unyak ninye nirya ati, pia teleb winilinamle.

⁶ Winiplirye, Allah el si Yahweh arye, ninye im sirya, mutuku sirya nirya dobuka, sik si sekeipnamle talak ara, aninye dipdelirye, Yerusalem mutuku noutamak arye deibik ninye ati, ‘Aning ara, weik mambul mutuku, Sion mutuku noutamak arye, deipsika,’ nyaplirye, sik si sekeipnamle.

⁷ Winiplyopura, sik aninye nirya arye, ‘Yerusalem mutuku ara, nun deiyok mutuku’ tenen, malye kanye bonyakce, Allah el siuk erebuka, mot nyanamake.