Mazmur 86 - Eipomek

‘Yu nang arye opnikcak tenenʼ ati, ‘Allah arye lobuka lyepropnutue’ tenebukce, morobuk yupu.

¹ Daud birye, aMazmur mot yupu nyan ning ati sekuk. Daud birye nyabuk yupu ara, ani. Se, na ni Allah Yahweh, narye anti moropkin yupu ara, ‘Moubuka kekeptum’ tenen, moropkine. Deiyok ara, wini talak ara, narye bona yuk-yuk ning nirya ton, kum talinun talak buk, ikin weik unun ati, ‘Ance melipnutumce, na ikin kanye doubuka ununa noutamak arye, lyepropnutum’ tenen, moropkine.

² Na nio ance, “Aning ara, wininamlume. Aning ara, pia kum wininamlume,” nyapdeiamsulum yupu ara, pia ati talibuka wininuna ati, na kam unun talak ara, ‘Ikin ning, na dam yanilyakʼ tenen, ‘Ancuk melibuka kalikinamnilyameʼ tenena ati nyapkine na nio. Tonda, an amu tam unirye, an piluk talibuka donune. Ati, ‘Na mal olan nang arye, opnikcakʼ tenen, narye anti, na kanye talima nirya, an deice deipkinirye, diba tenekunune.

³ Na si erenun Allah ara, an tonoka! Ati, ‘Anda weik tonun bico tenepnimince, melipnamnilam’ tenen, moropkine na nio! Anda, aning-aning nirya talimince, deice tam erebuka, mikip weik deiyoknye ulyama ati, diba tenekunune. Anda, mikip weiknye ulyama ati, asum-asum nirya ara, narye, ‘Naio melibuka lyepdopnilyame!’ nyabuka, antibuk morokunune.

⁴ Anda, aning-aning nirya talimince, deice tam erebuka, mikip weiknye deiyoknye ulyama ati, diba tenekinirye, na kanye talima nirya ara, an deiceuk delikunune. Ati ara, ance melipniminyeba, pin-pin kanye deibuka, telebuk unamne. Nara, an amu tam unun ati, ance, ‘Winipnamlame,’ nyapniminye yupu dem, talibuka unune.

⁵ Narye an Allah Yahweh ati, ‘Melibuka lyepdopnilyame!’ nyabuka, morokununa deiyok ara, ani. Ara, anda aning-aning nirya talimince, deice tam erebuka, mikip weik deiyoknye ulyam bukni, ance kanye deipsimince, nun malye wininyap ning ati, namin kipsimince, kum danalilyame. Anda pia telebnye ulyama atia. Tonda, yata ninye do nirya, sikce antibuk, ‘Naio, ancuk melibuka lyepsilyame!’ nyabuka, morokinyak nang ati, lyepmince, pia teleb kililyame. Tonda, anda, ‘Weik tonun bico tenesimince, pia telebuk kilinamsine,’ nyapdeiamsulum yupu ara, weik tonun nyasilyama ati nyapkine.

⁶ Na ni Allah Yahweh, narye morokunun ning ara, ‘Moubuka kekepnimince, melipnamnilam’ tenen, moropkine na nio! Ara, narye, “Melipnilyame,” nyabuka, engena deice arye moronamkin nirya ara, ‘Kekepmince, na moropmakin touk melipnamnilam’ tenen, moropkine na nio.

⁷ Se, na ni Allah Yahweh, narye moropkine yupu ara, ‘Ance moubuka kekeptum’ tenen, moropkine. Weik ikin ning, na dam yalyeura, atalak aryuk, narye anti, “Naio, melipnilyame,” nyabuka, moronamkine! Anti moropnamkina deiyok ara, talye ati kume. Deiyok ara, ancuk asum-asum nirya ara, dipkoprob tuba melinilyama ati, antibuk morokunune na nio.

⁸ Yuk yala ninye nirya arye, yuk talye ning ati, Nun ni bira ani,’ nyabuka, isa si erenyak bukni, sik si erenyak ning ara, talye ninguk ulule. Bukni, an tonok ara, dipkoprob Allah ulyame. Ara, anda aning-aning nirya talimince, deice tam erebuka, Pia Mikip Weik Deiyoknye ulyama ati, anda Allah pia mikipnye ulyame! Tonda, an mikip arye weik mambul pil dolyam ning ara, yuk nang arye, ton pia kum winiptinge.

⁹ Aminyan sirya talak ara, tukwak mutuku im sirya, mutuku sirya, unyak ninye, ance kwepdeiamlum ninye yala nirya ara, an si eren ati, an damuk yanganamake. Se, Allah anda aning-aning nirya talimince, deice tam erebuka, Pia Mikip Weik Deiyoknye ulyama ati, tukwak ninye nirya, an urasin din sukum akunum yaceura, sik nirya arye, kutam tuku deice deibuka kanupdongobuka, an si atibuk erenamake. Tonda, an ap, an mikip ap, an pia teleb si ulyamnye ap ati, “Anirya ara, pia telebe,” nyabuka, an siuk erenamake.

¹⁰ An siuk erenamkiaka deiyok ara, ani. Ara, ance pia teleb pil, weik tonun ninye dopman kum pil dominye talak nirya ara, ninye nirya arye, ‘Se, aweik mikip pil ara, ouku weikto uptu do?’ tenen, ilil weik upliba, sik kanye deibikirye, pin-pin asa unyake. Dipkoprop, Allah an tonok ulyame, yuknye ton kum ulule.

¹¹ Se, na nio Yahweh, ance nunti, ‘Aning ara, wininamlume. Aning ara, pia kum wininamlume,’ nyapdeiamsulum yupu ap, ‘Teleb winina ati, ban bisik ara ani,’ nyapdeiamsulum ning ap ara, ‘Ance peterepniminba, bita kel biktinye’ tenen, patapnil ati, moropkine na nio. Ara, talye kekena ati kum bukni, deiyok ara ance, “Dipkoprop diksukum winin ning ara, ani,” nyasilyam yupu, ‘Narye aninguk talibuka, dip ninguk winiptinye’ tenen, patapnila ati, moropkine na nio. Ance na kanye noutamak pil dopnutuma deice arye, na teniltona kumce, na kanye talima nirya tonok keipniminba, an deiceuk deipkinirye, antibuk ilil tenebuka, an amu tam unamne.

¹² Se na ni Allah, antibuk, “Elda pia telebuk ulule,” nyabuka, an siuk erenamkine. Anda aning-aning nirya talimince, deice tam erebuka, mikip weik deiyoknye ulyama ati, na kanye talima nirya deice arye, an siuk erenamkine na nio. Diba, an ap, an mikip ap, an si ap ati, “Anda pia telebe,” nyabuka, an siuk, pia erenamkine.

¹³ An siuk erenamkina deiyok ara, ani. Ara, ance nati, ‘Pia weik tonun bico tenekinirye, pia teleb kibuka winilinamkine’ nyapdeiamnulum ning ara, nukman kumto ulule. Tonda, minop talak akunum dipmanto ulamse talak ara, dipmatinirye, akunum diamik nang unyakak, amutuku si ara, Sheol mutuku, akunum binuka unmatinye bukni, wini talak ara, ancuk kwetepnulumba, kum dipsa ati, kam tuba unune.

¹⁴ Se, na ni Allah, pia mandipna kanye bonyak nang arye, yu ubukba, ‘Anye opnuyap’ tenen, na dam akunum olyanganinyake. Ara, ninye weik arye, sik pia ilil tenena kum aryuk, ‘Anye olbinuyabe,’ nyabuka, sik yu nang nirya arye, bulubuka na dam akunum olyanganinyake. Tonda, anang ara, ‘E, anye oplobipyeura, Allah arye nun wenena ati, yata wiripnamsil do?’ pia kum tenenyake. Talya lukparabuka, olyanganinyake.

¹⁵ Bukni na ni Allah, na kele, anda aning-aning nirya talimince, tenesimince, deice tam erebuka, mikip weiknye ulyame. Bukni, nun malye winin ning ati, adiparyuk oplopsutum buk, namin kinauk usilyamce, telebuk kilisilyame. Tonda, nun malye wininyap ning ati, minopce yu kum tenesilyame. Tonda, ance, ‘Weik tonun pia bico tenesimince, pia teleb kilinamsine,’ nyabuka, nyalin yupu deice ara, weik tonun nyasilyam ning nirya ara, batakna kumce, pia teleb kibuka kilisilyame. Tonda, ance, aning nirya ati ara, narye, ‘Winipnamsine, winipnamsine,’ nyabuka, nyasilyam atonun kibuka, pia tuba melisilyame.

¹⁶ Se na nio, ance nati, tuba dinimince, na ikin unulul ning nirya ati, bico tenepnimince, yanuka melinamnilame. Ati, na dam yaminyeura, lyepnamnilyame na nio! Nara, na nin ulamuk atonun, na kam unamne talak nirya ara, an amu tamuk unirye, an piluk pia donamkine.

¹⁷ Na nio, ‘Anda pia weik tonun bico tenepnimince, melipnamnilam ning ara, ‘Moubuka tenepnirye, biknamne’ tenen, patapnila ati, moropkine. Ati, ‘Ance bikilin ning ton arepniminya deice arye biktinyeʼ tenen, moropkine na nio. Adeice arye biknamne. Bikilin ning arepniminyeba, nati, ‘Nun like,’ teneninyak nang nirya arye, aning ebicopura, alye dakdanamake. Ara, sikce, ‘Se, dipkoprob Allah Yahweh arye, anye akunum melilule,’ tenebikirye, bikikcopura, alye dakdanamake. Na ni Yahweh, imun kanye bobuka unun talak nirya ara, ancuk na talima, kwa dinilyama ati, sik yu nang arye, aning eibuka bikikcopura, alye dakdanamake.