Mazmur 85 - Eipomek

‘Allah arye, Israel yala nang ati, ila tamubuka, teleb kipdeipsutu’ tenen, morolamik yupu

¹ Korah yalanye birye, Mazmur yupu sekukce, Allah yupu mot nyana deiyoknye ati arebuk. Anye birye nyabuk yupu ara, ani.

² Se, Allah Yahweh, ance areamsulum mutuku ap, amutuku noutam unyak nang ati, bico tenepsulumce, lobuka lyepsulume. Ara, pera mutuku nang arye, nun apu yapu nirya ati, obuka tomobuka obikce, sik mutuku tamubuka bobinamikce, wenen aik dongamikak, ikin weik ulamik buk, ance sikti, lobuka lyeproplume.

³ Aninguk kum bukni, tonda, ance wipdeiamsulum nang arye, malye winilamupu ning ara, namin kipsiminyopura, amalye ning nirya kum kipdeibuka bikisilyame. Nun Israel nang arye, malye ning weik winilamupu ning nirya ara, namin kipsulumce, amalye winin ning ara, kum kipdeipsulume.

⁴ Ance nun malye winilamupu ning ati, yu pia weik upkuk bukni, aning batakmunce, nunti, ‘Na lik’ tenen, yu weik upkuk ning ara, ‘Dauplye’ teneplumce, bataklume.

⁵ Aning ati ara, nun ni Allah, anda nun Lyena Deiyoknye usilyama ati, ‘Ance nunti, ila tamubuka teleb kipdeipsutum’ tenen, moropkine na nio. Tonda, nunce malye weik ulamupu ning ati, na ni an pia yu upkuk ning ara, ‘Dauplye’ tenepmince, namin kipsulumce, kum kipdeipsulum’ tenen, moropkine na nio.

⁶ Se, nun ni Allah, atalak arye dipdongobuka doyanamle talak nirya ara, tuba yu kanye uk bonamsilam do?’ Aning atonun, nunce deibibyeba, dadeipdanin banamak nang arye, aminyan dotalak dadeilinamak mapu nirya babye ati, ance sikti, yu tenebuka malye kanye bobuka unamlam do?

⁷ Se, nun ni Allaho, ‘Ance nun Israel yala nang ati, ton ap bico tenepsutumce, ila tamubuka teleb kipdeipsutum’ tenen, moropkine na nio. Ara, talye ati kum bukni, deiyok ara, tamubuka teleb kipdeipsutum toura, ance wipdeiamsulum Israel yala nang arye, ‘An ti, kanye pia deibuka unamap’ tenen ati, moropkine na nio.

⁸ Nun ni Allah Yahweh, ance nunti, ‘Na weik arye bico tenepsinirye, pia teleb kilinamsilame,’ nyabuka, nyalin yupu deice nyapdeiamsulum ning ara, tuba-tuba winipsutumba, dinamabe’ tenen, moropkine na nio. Tonda, ‘Nun ikin weik usilye noutam arye, ancuk melibuka lyepropnamsilam’ tenen, moropkine.

⁹ Nun ni Allah Yahweh, ance, ‘Naʼ tenen, wipdeiamsulum nang ati, “Olana kumce, talye kanye bobuka unamlume,” nyabuka, nyalin yupu deice arye nyapnamsil ati ara, ‘Allah arye nyapnamsil yupu ara, na ton kekeptinye’ tenen, weik arye patanulule. Ara, Allah ati, diba tenebikirye, elce nyasulul yupu moubuka talibikirye, diksukumuk wininyak nang ati, ayupu nyapnamsile. Bukni, yata nang do nirya, sikce min talak malye-malye winin ning talibuka winilamlum ning ara, ila tamubuka, aninguk talipmunce, ton ap kum wininamlume.

¹⁰ Allah arye, “Aning ara, wininamlume. Aning ara, pia kum wininamlume,” nyapdeipsuk yupu moubuka talibikirye, aninguk wininyak nang ati ara, Allah arye anggun dam yana, melibuka lyelosulule. Ara talye ati kum bukni, ‘Allah el pia teleb ulul ning ap, mikip weik winilul ning ap, nun mutuku noutam arye laka kipdeipsilyeba, ninye nirya eibikirye, el Allah ati biknamak’ tenen, moropkine na nio.

¹¹ Allah arye nunti, bico weik tenesilirye, “Aning ara, winibukapnirye, pia teleb kilinamsine,” nyabuka, nyalin yupu deice arye nyapdeipsuk ning nirya ara, pia kum bataknamle. Aning nirya ara, pia arenamsile. Tonda, elce, ‘Wininamne,’ nyalul yupu nirya ara, dipkoprob aning atouk winilule. Aning nirya ara, min kum uptue. Aning atonun, tonda elce nun tukwak mutuku nang ati, “Aning ara, wininamlume. Aning ara, pia kum wininamlume,” nyapdeiamsuk yupu nyamuk touk, aning tuba ulule. Tonda, aning-aning nirya ati, teleb kipdeipsilirye, olana kumce, pia telebuk unamabe. Teleb yupu nyasulul ning ap, telebuk kilisilyam ning ap, kikliman unamle.

¹² Ninye tukwak mutuku nang nirya ara, Allah arye, pia teleb kilisulul ning bikikceura, sikce Allah ati, diba tenebikirye, pia kum batakanamake. El siuk erenamake. Aning atonun, Allah ara, pia diksukumuk kibuka ulinye birye, im deice arye, nun tukwak mutuku nang ati, disululce, pia melinauk usulule.

¹³ Diba, nun teniltona kumce, akunum bikinyabe. Allah arye, pia telebuk kilinamsile. Wininamsila ati ara, elce nun unyap mutuku nirya ati ara, teleb kipdeipsilyeba, nun wa wibuka kounyap ning nirya ap, kam ning weinyap ning nirya ap, pia weik arye tabakuka, telebuk kinamsilarya!

¹⁴ Tukwak mutuku unyap nang nirya arye, Allah winilye ning eibikirye, ‘Se, dipkoprob, el winilye ning nirya ara, diksukum kibuka pia telebuk ulule,’ tenebikirye, moubuka biknamake. Allah arye winilye ning nirya ara, pia diksukum teleb ninguk ulula ati, elce pil donamlak nirya ap, banamalak nirya ara, pia diksukum kibuka, telebuk tuba-tuba unamlarya!